Inee, Ing’erue Omonyene Ase Nyasae Na Kobatiswa?

1. Ninki aye orarengererie nyuma y’okwegera egetabu eke buya?

AYE kwegeire amange igoro y’ekeene ki’Ebibilia ase engaki kwabeire kogosoma egetabu eke buna, eira ya Nyasae y’obogima bwa kare na kare, ng’ai abakure bare, na ogosemeria gw’okobokigwa. (Omorandia 9:5; Luka 23:43; Yohana 5:28, 29; Okomaanoka 21:3, 4) Kero kende gwachakire goikerana ase emesangererekano ya Birori ba Yehova na kwegena ng’a nabwo bagosasima ase ekeene. (Yohana 13:35) Kero kende gwachakire koagacha obosani bwa ang’e na Yehova, naende gose kwanachire ng’a notagete komokorera ere. Ase igo nabo oreborie ng’a, ‘Erio mokorere Nyasae bono ninki nganeirie nkore?’

2. Nase ki omonto bw’Ethiopia atagete kobatiswa?

² Ekio nakio omonto omenyete ekero ki’engaki ya Yeso korwa Ethiopia arengereretie. Ekero chingaki gete chiaetire nyuma y’okobokigwa kwa Yeso, omworokigwa oye, Filipo akamoranderia omonto oyio. Filipo akamoenekeria ng’a Yeso nere orenge Masihi. Omonto oria korwa Ethiopia nigo akunetwe mono na ayarenge kwegera ekagera agateba agwo agwo: “Rora amache aya! Inki kegontanga timbatiswa?”​—Ogokora 8:26-36.

3. (a) Ngochika ki Yeso aete aborokigwa baye? (b) Inaki omonto agwenerete kobatiswa?

³ Ebibilia nigo ekoorokeria ng’a onye gotagete komokorera Yehova, goika obatiswe. Yeso nigo abatebetie abarokigwa baye iga: “Genda mokore ebisaku bionsi koba aborokigwa, mokobabatisa.” (Matayo 28:19) Naende Yeso akabeka ekeorokererio ase okobatiswa ere omonyene. Nigo atobegetwe omobere bwensi ase amache ime, na tari ogoitororerwa amache ase omotwe. (Matayo 3:16) Rero ekero Omokristo akobatiswa goika atobekwe omobere bwensi amache ime.

4. Ninki ebatiso yao ekoorokia abanto bande?

⁴ Ekero okobatiswa nigo ekoorokia abanto bande ng’a notagete koba omosani o Nyasae na komokorera. (Zaburi 40:7, 8) Ase igo nabo oreborie, ‘Ninki nganeirie gokora erio mbatiswe?’

CHISEMI AMO N’OKWEGENA

5. (a) Goika okore ki ritang’ani otarabatiswa? (b) Nase ki emesangererekano y’Egekristo ere y’engencho?

⁵ Otarabatiswa goika omanye Yehova amo na Yeso. Aye gwachakire gokora igo ase okwegera Ebibilia. (Soma Yohana 17:3.) Korende erio rioka tirisaini. Ebibilia nigo egoteba ng’a goika “moichorwe ne chisemi” chi’ogwancha kwa Yehova. (Abakolosai 1:9) Emesangererekano ya Birori ba Yehova nigo eragokoonye koba n’obosani na Yehova. Eyio n’esababu eyemo y’engencho ekogera oikerane ase emesangererekano eyio botambe.​—Abaibirania 10:24, 25.

6. Aye otarabatiswa noganeirie komanya Ebibilia ang’ana ng’aki?

⁶ Yehova taganetie ng’a aye omanye kera egento ase Ebibilia erio obatiswe. Taaganetie ng’a, omonto oria korwa Ethiopia amanye kera egento erio kobatiswa. (Ogokora 8:30, 31) Naende ntogenderere kwegera igoro ya Yehova goika kare na kare. (Omorandia 3:11) Korende erio obatiswe, noganeirie komanya na goitaba amorokererio ye ritang’ani y’Ebibilia.​—Abaibirania 5:12.

7. Inaki okwegera kwao kw’Ebibilia kwagokoonyire?

⁷ Ebibilia nigo egoteba ng’a omonto: “Atari nokwegena takonyara komogwenera Nyasae.” (Abaibirania 11:6) Ase igo noganeirie koba n’okwegena otarabatiswa. Ebibilia nigo egototebia ng’a abanto gete ase omochie o Korinto ya kare bakaigwa aya aborokigwa ba Yeso baare korokereria erio, “bakeegena, bakabatiswa.” (Ogokora 18:8) Naboigo, okwegera kwao kw’Ebibilia kwagokoonyire koba n’okwegena ase chiira chia Nyasae, nase chinguru echio chiratotoorie korwa ase ebibe n’amakweri chi’ekengwanso kia Yeso.​—Yoshua 23:14; Ogokora 4:12; 2 Timotheo 3:16, 17.

TEBIA ABANTO BANDE IGORO Y’EKEENE KI’EBIBILIA

8. Ninki keragosegete kobatebia abanto bande igoro yaria kwegeire?

⁸ Buna aye okogenderera kwegera mono korwa ase Ebibilia na korora buna ekogokoonya ase obogima bwao, okwegena kwao nigo kogoting’a. Noganie kobatebia abanto bande igoro yaria okwegera. (Yeremia 20:9; 2 Abakorinto 4:13) Korende ning’o ogwenerete gotebia?

9, 10. (a) Mbarabi orachake gosanga nabwo aria kwegeire? (b) Ninki ogwenerete gokora onye gotagete korandia amo na ekeombe ki’omosangererekano?

⁹ Nabo oratake gotebia enka yao, abasani, abaamate, gose abamogokora emeremo nabwo igoro yaria okwegera. Korende botambe batebie ase enchera y’obwororo na y’obwanchani. Omoerio, noikeere gochaka korandia amo n’ekeombe ki’omosangererekano. Ekero kwaigure ng’a kwabeire ang’e, nabo ogokwana na Kirori oria mokwegera nere Ebibilia na komotebia ng’a noganie gosanga emeremo y’okorandia amo n’ekeombe ki’omosangererekano. Onye ere okorengereria ng’a nore ang’e na nigo omenyete obogima bwao koreng’ana n’ebirengo bi’Ebibilia, rirorio inwe babere nabo mokoumerana na abagaaka babere ase ekeombe ki’omosangererekano.

¹⁰ Ninki kerabe ekero mwaumeranire? Abagaaka abwo mbakwane naye korora gose kwamanyire na kwegena amorokererio y’eritang’ani y’Ebibilia, gose nkoigwera ore eki Ebibilia egoteba ase obogima bwao, naende, gose nogwenerete koba Kirori o Yehova. Inyora ng’a abagaaka nigo bagwechandera abanto bonsi ase ekeombe ki’omosangererekano, aye kore oyomo obo, ase igo tibwoboa gokwana nabwo. (Ogokora 20:28; 1 Petero 5:2, 3) Nyuma y’okoumera abagaaka, mbakomanyie gose kwagweneire korandia n’ekeombe ki’omosangererekano.

11. Nase ki ere egento ki’engencho gokora amonchorerio otarachaka korandia n’ekeombe ki’omosangererekano?

¹¹ Nabo abagaaka barakoerese ng’a noganeirie gokora amonchoreri ande otarachaka korandia amo n’ekeombe ki’omosangererekano. Nase ki ere egento ki’engencho gokora amonchorerio ayio? Ase engencho ekero togokwana n’abanto bande igoro ya Nyasae, nigo togokwanera Yehova ase igo goika tomenye ase enchera ekomoretera amasikani.​—1 Abakorinto 6:9, 10; Abagalatia 5:19-21.

ONCHOKA NA KOIRANA

12. Nase ki abanto bonsi baganeirie goonchoka?

¹² Otarabatiswa goika okore egento kende. Omotomwa Petero nigo atebete iga: “Onchoka, moirane, eride ebibe biaino bitinyigwe.” (Ogokora 3:19) Goonchoka engencho yaye ninki? Engencho yaye, nogweitia mono ase amamocho twakorire. Ase omobwekano, onye kwamenyete obogima bw’obokayayu, rirorio noganeirie goonchoka. Nonya gwatemire buna okonyara ase obogima bwao bwensi gokora ekere ekeronge, notakeire goonchoka, ase engencho twensi nigo togokora ebibe na nigo toganetie koboria Nyasae atwabere.​—Abarumi 3:23; 5:12.

13. “Moirane” ninki eminetie?

¹³ Inee, ogweitia gweka ngoisaine ase amamocho gwakorire? Yaya. Petero nigo atebete ng’a naende moganeirie “moirane.” Engencho yaye neria ng’a noganeirie kwanga ogokora konde gwensi kwe ritang’ani na gochaka gokora ayare ay’oboronge. Ase omobwekano, rengereria aye kore orogendo gochia aase gete ageni otanya kogenda. Nyuma y’egeka, onyore ng’a gwasirire enchera. Ninki aye orakore? Goika oire ng’ora, otenene, na koirana, na gochaka kobwatia enchera endonge. Naboigo, buna okwegera Ebibilia, nabo oranyore ng’a chinaro gose ebinto mbire ase obogima bwao oganeirie gochenchia. Obe ang’e “koirana”​—engencho yaye, gokora amonchoreria aganeirie​—na gochaka gokora ayare ay’oboronge.

ERUE AYE OMONYENE

14. Inaki okwerua aye omonyene ase Nyasae?

¹⁴ Egetambokero kende ki’engencho oganeirie koimokia otarabatiswa, nokwerua aye omonyene ase Yehova. Ekero okwerua aye omonyene ase Yehova, nigo ogosaba na koria eira komosasima ere bweka na gokora ogwancha kwaye koba egento ki’engencho mono ase obogima bwao.​—Okoiranerera 6:15.

15, 16. Ninki kegosegeta omonto kwerua ere omonyene ase Nyasae?

¹⁵ Koria eira, erio komokorera Yehova bweka nigo enga buna okoria eira komenya obogima bwao bwensi amo n’omonto bwanchete. Rengereria igoro y’omosacha na omokungu bare n’obosani. Buna omosacha akomomanya omokungu oria buya, nigo akomwancha na gotaka komonyuoma. Nonya emeremo y’okonyuoma teri cheche, omosacha nigo akoba ang’e gokora emeremo eyio ase engencho amwanchete.

¹⁶ Buna aye okwegera igoro ya Yehova, nigo okomwancha na kobeka omokia oo bwensi erio komokorera. Nigo ogosegetwa gosaba na koria eira komokorera. Ebibilia nigo egoteba ng’a onde bwensi otagete komobwatia Yeso goika “ekaane ere omonyene.” (Mariko 8:34) Inee, ninki ayio aminetie? Nigo aminetie ng’a okomoigwera Yehova n’egento egetang’ani ase obogima bwao. Eki Yehova atagete nigo kere eki’engencho kobua okogania amo ne chiganga chiao.​—Soma 1 Petero 4:2.

TIBWOBOA OKOGWA

17. Nase ki abanto bande batari kwerua abanyene ase Yehova?

¹⁷ Abanto bande tibari kwerua abanyene ase Yehova, ase engencho bakwoboa ng’a tibagoikerania eira yabo y’okomokorera. Tibatagetie komoita Yehova omoyo, gose nabo bararengererie ng’a, onye tibakwerua asare, Yehova takobaboria aya bagokora.

18. Ninki keragokoonye obue obwoba bonde bwensi bw’okomoita Yehova omoyo?

¹⁸ Obwanchani bwao ase Yehova mbogere obue obwoba bonde bwensi bw’okomoita omoyo. Ase engencho omwanchete, nigo orakore kende gionsi okonyara erio goikerania eira yao asare. (Omorandia 5:4; Abakolosai 1:10) Aye tokorengereria ng’a nakong’u gokora ogwancha kwa Yehova. Omotomwa Yohana nigo arigete iga: “Okomwancha Nyasae nario okobwata amachiko aye, na amachiko aye tari amarito.”​—1 Yohana 5:3.

19. Nase ki otagweneretie kwoboa kwerua aye omonyene ase Yehova?

¹⁹ Tebetereretie ng’a obe omoikeranu erio kwerua omonyene ase Yehova. Taganetie ng’a tokore amang’e kobua okonyara gwaito. (Zaburi 103:14) Ere nagokoonye gokora ayare y’oboronge. (Isaya 41:10) Semeria Yehova n’enkoro yao yonsi, “nere narongeyie oboeto bwao.”​—Emereng’anio 3:5, 6.

ASE OMONWA OOROKIA OGOTOOREKA

20. Nyuma y’okwerua omonyene ase Nyasae, ngetambokero ki gekobwatia?

²⁰ Inee, aye okorengereria kwabeire ang’e kwerua omonyene ase Yehova? Nyuma y’okwerua omonyene ase Yehova, kwabeire ang’e ase egetambokero gekobwatia. Noganeirie kobatiswa.

21, 22. Inaki ‘oroorokie nomonwa oo’ okwegena kwao?

²¹ Momanyie oyore omorobereria gati y’abagaaka ase ekeombe kiao ki’omosangererekano ng’a, kwerure omonyene ase Yehova na notagete kobatiswa. Erio ere naroberie abagaaka gete goetera amo naye amorokereri ye ritang’ani. Kobararore ng’a kwabeire ang’e, mbakomanyie ng’a nobatiswe ase omosangererekano omonene gose ase omosangererekano oria omonene bw’orogongo o Birori ba Yehova orabe bwango iga. Ase omosangererekano omonene, enkwana nerugwe ekoeresera eki ebatiso emininetie. Omokwani okorua enkwana naborie baria bare ang’e kobatiswa amaborio abere amororo. Ase okoiraneria amaborio ayio, noorokie “ase omonwa” okwegena kwao.​—Abarumi 10:10.

²² Nerio aye nobatiswe. Nigo oratobekwe omobere bwensi ime y’amache. Ebatiso nigo eraorokie kera omonto ng’a kwerure omonyene ase Yehova na bono nigo ore Kirori o Yehova.

EKI EBATISO YAO ETENENERETE

23. Kobatiswa ‘ase erieta ria Tata, neri’Omwana, neri’omoika omochenu’ ninki eminetie?

²³ Yeso nigo atebete ng’a aborokigwa baye mbabatiswe ‘ase erieta ria Tata, neri’Omwana, neri’omoika omochenu’ (Soma Matayo 28:19.) Ninki ayio aminetie? Ayio nigo aminetie ng’a nomanyete obonene bwa Yehova n’emeremo ya Yeso ase okogania kwa Nyasae, na buna Nyasae agotumia omoika oye omochenu goikerania ogwancha kwaye.​—Zaburi 83:18; Matayo 28:18; Abagalatia 5:22, 23; 2 Petero 1:21.

24, 25. (a) Ebatiso ninki etenenerete? (b) Ninki toregere ase egesieri ki’omoerio?

²⁴ Ebatiso nigo etenenerete egento ki’engencho mono. Ekero ogotobekwa ase amanche ime, nigo eminetie ng’a aye gwakure ase, gose gwatigire, obogima bwao bw’eritang’ani. Ekero ogosoka korwa ase amache ime, aye nochake obogima oboyia gokora ogwancha kwa Nyasae. Nigo ekoorokia ng’a nomokorere Yehova gochakera bono na kogenderera. Inyora ng’a tibwerueti ase mwanyabanto, ase ekeombe, gose ase emeremo. Nigo kwarure obogima bwao ase Yehova.

²⁵ Okwerua kwao nigo koragokoonye koagacha obosani bwa ang’e na Nyasae. (Zaburi 25:14) Okobatiswa gweka, tikominetie ng’a omonto otoorekire. Omotomwa Paulo nigo arigete iga: “Korera ogotooreka kwaino abanyene ase okwoboa na okoiguswa.” (Abafilipi 2:12) Okobatiswa nigo kore omochakano. Korende inaki orabe ang’e na Yehova? Egesieri ki’omoerio ki’egetabu eke nkeiranerie riborio erio.