28 ASÁ
Serviu a Xehová “toda a súa vida”
O REI Asá debeu quedar sen alento cando viu por primeira vez o enorme exército etíope acampado en Xudá e preparado para a batalla. Xehová pedíralle ó seu pobo que fose á guerra en moitas ocasións, pero non hai rexistro de que tivesen que enfrontarse nunca a un inimigo tan numeroso. Este exército tiña un millón de soldados, case o dobre do exército de Asá. Onde atoparía o rei o valor para enfrontarse a un desafío tan grande?
En certo modo xa levaba un tempo preparándose. Cando empezou a gobernar en Xudá dez anos antes, Asá pronto demostrou que se parecía moito ó seu tataravó, o rei David. Ó igual ca el quería agradarlle ó seu Deus, Xehová. Foi humilde e escoitou a Oded e a seu fillo Azarías, que eran profetas de Xehová. E sendo aínda moi novo tivo o valor para corrixir algunhas das cousas malas que estivo facendo o pobo dende que o rei Salomón se volvera apóstata. Por exemplo, destruíu os ídolos que adoraba a xente e acabou coa prostitución que se practicaba no templo.
Asá incluso corrixiu os pecados da súa propia familia. A súa avoa Macah, que tiña “o título de raíña-nai” en Xudá, construíu un ídolo obsceno, seguramente para promover ritos sexuais. Pero Asá non deixou que os seus lazos familiares influísen nel. Así que quitoulle o título á súa avoa e queimou o seu ídolo. Todas estas reformas agradáronlle moito a Xehová, e como resultado bendiciu o país con dez anos de paz. Pero entón, o enorme exército etíope atacou Xudá! Que faría Xehová para axudar a Asá?
O rei Asá enfrontouse ó exército inimigo máis grande que se menciona na Biblia.
Cando Asá mirou cara ás terras baixas de Xudá e viu o enorme exército etíope, a súa primeira reacción foi orarlle a Xehová. Imaxina como se deberon sentir os seus soldados cando o rei orou: “Señor, cando queres axudar non distingues entre poderosos e febles. Axúdanos, Señor, noso Deus, que en Ti nos apoiamos e no teu nome nos diriximos contra esa multitude. Ti e-lo noso Deus. Non te deixes vencer por un home”. Esa sentida oración debeu agradarlle moito a Xehová. Viu que Asá era como Ionatán, o fillo do rei Saúl. Os dous entenderon que a vitoria non depende do número de soldados senón da axuda de Xehová (1 Sam. 14:6). Calquera que teña ó Soberano do Universo do seu lado sempre terá o exército máis poderoso!
Asá dirixiu os seus homes á batalla. E que pasou? A Biblia di sobre os etíopes: “O Señor e as súas hostes destrozáronos”. Ningún deles sobreviviu.
Despois disto, Asá continuou fomentando a adoración pura. Moitos dos que vivían no reino norteño de dez tribos de Israel mudáronse ó sur, a Xudá, para poder volver adorar a Deus no seu templo en Xerusalén. Asá incluso fixo que tódolos habitantes de Xudá prometesen que lle serían leais a Xehová.
Aínda así, tamén sabemos que Asá cometeu algúns erros graves. Cando o rei de Israel ameazou con atacar Xudá, Asá non acudiu a Xehová por axuda, senón que subornou o rei de Siria para que atacase Israel. E cando Xehová corrixiu a Asá mandándolle un vidente —ou profeta— chamado Hananí, o rei enfadouse e meteuno no cárcere. Ademais, cando era vello púxose moi enfermo, pero en lugar de buscar a axuda de Xehová, acudiu a curandeiros. Parece que Asá perdeu parte da fe que tiña ó principio.
Pero Xehová é moi paciente. A súa Palabra resume os 41 anos que reinou Asá do seguinte xeito: “O corazón de Asá estivo enteiro co Señor, toda a súa vida”. O relato inspirado deste grande home lémbranos que Xehová quere os que o aman. Pero tamén nos recorda que non debemos esquecer nunca o que fixo por nós. Ver a man de Xehová ó longo da nosa vida fará que a nosa fe e o noso valor sexan cada vez máis fortes.
Le o relato da Biblia:
1 Reis 15:8-24
2 Crónicas 13:23–16:14 (14:1–16:14, TNM)
Pensa nisto:
De que formas demostrou valor Asá?
Afonda máis
1. A avoa de Asá mandou facer “unha imaxe de Axtarté”. Como demostra a arqueoloxía que os xudeus que eran apóstatas adoraban esta deusa? (1 Reis 15:12, 13; w08 1/6 páx. 10 pars. 1-5-wcgr). A
Imaxe A: Asá quitoulle á súa avoa a posición elevada que tiña e destruíu a imaxe de Axtarté.
Imaxe A: Asá quitoulle á súa avoa a posición elevada que tiña e destruíu a imaxe de Axtarté.
2. Quen era ó parecer o fillo de Hananí, o vidente, e como imitou el o exemplo de valor do seu pai? (it “Hananí” núm. 2-wcgr).
3. Aínda que cometeu erros, por que di a Biblia que “o corazón de Asá estivo enteiro co Señor”? (1 Reis 15:14; w17.03 páx. 19 pars. 5, 6-wcgr).
4. A cremación non era habitual entre os israelitas. Entón, por que di a Biblia que “acenderon na súa honra unha gran larada”, ou fogueira, no seu funeral? (2 Crón. 16:14; w05 1/12 páx. 20 par. 5-wcgr).
Medita no que aprendiches
As animadoras palabras do profeta Azarías motivaron a Asá a restaurar a adoración pura. Como poden animar a outros as túas palabras positivas? B
Imaxe B
Asá confiou en Xehová para enfrontarse a un exército moi grande, pero despois confiou nos homes para enfrontarse a un exército máis pequeno. Que nos ensina isto sobre confiar en Xehová en todo o que facemos? (Prov. 3:5, 6).
Como podes imitar o valor de Asá na túa vida?
Analiza o cadro completo
Que me ensina este relato sobre Xehová?
Como se relaciona este relato co propósito de Xehová?
Que me gustaría preguntarlle a Asá cando resucite?
Aprende máis
Se vives nun país no que podes adorar a Xehová libremente, que podes aprender sobre o modo no que Asá aproveitou un tempo de paz?
“Aproveitemos ben as épocas de paz” (w20.09 páxs. 14-19)
Analiza como pode animarnos o exemplo de Asá cando temos que enfrontarnos a inimigos moi poderosos.
“As vosas obras terán a súa recompensa” (w12 15/8 páxs. 8-10)