27 MEFIBÓXET
Negouse a vivir amargado
MEFIBÓXET era o neto dun rei poderoso e o fillo dun home de fe moi valente. Pero cando tiña só 5 anos a súa vida foi sacudida pola traxedia. O seu avó Saúl suicidouse despois de que o ferisen nunha batalla. E ó seu pai Ionatán tamén o mataron nesa mesma batalla. Cando a muller que coidaba a Mefibóxet escoitou estas impactantes noticias saíu correndo levada polo pánico. Coas présas, o neno caéuselle dos brazos e quedou coxo dos dous pés o resto da súa vida.
Parece que Mefibóxet nunca permitiu que estas traxedias o amargasen. Máis ben, estaba agradecido polas cousas boas que tiña. Un israelita chamado Maquir foi bo con el e acolleuno. Co tempo, David lembrou que lle prometera ó seu querido amigo Ionatán que coidaría da súa familia (1 Sam. 20:14-17). Así que mandou chamar a Mefibóxet.
Mefibóxet tiña medo. Tendo en conta que era familia do malvado rei Saúl, sería que David quería desfacerse del? Aínda así, obedeceu e foi onda o rei. David faloulle con cariño e díxolle que lle devolvería as terras do seu avó. Tamén lle dixo: “Comerás sempre á miña mesa”. Conmovido e moi agradecido pola amabilidade de David, Mefibóxet preguntoulle por que lle daba un honor tan grande a alguén tan insignificante coma el. Incluso se comparou a si mesmo cun can morto!
Mefibóxet perdeu os seus pais e quedou coxo cando era neno. Ademais, anos despois traizoárono e tratárono inxustamente.
Tempo máis tarde as cousas volvéronse torcer para Mefibóxet. Abxalom, un dos fillos de David, encabezou unha revolta e o rei tivo que fuxir de Xerusalén. O servo de Mefibóxet, Sibá, marchou para axudar a David, pero deixou o seu amo atrás. Como Mefibóxet non podía ir con eles sen alguén que lle axudase, atopou outra forma de demostrar a súa lealdade e a súa tristeza. Deixou de coidar a súa barba e o seu bigote, coma se estivese de loito. Co tempo, a revolta de Abxalom fracasou e David volveu a Xerusalén en paz. Aínda así, o rei estaba decepcionado con Mefibóxet. Por que?
Sibá mentíralle a David sobre o seu amo. Cando foi axudarlle, díxolle que Mefibóxet era un traidor e que quedara en Xerusalén porque esperaba chegar a ser rei. Imaxina como debeu sentirse David. O seu propio fillo e Ahitófel, o seu amigo íntimo e conselleiro, acababan de traizoalo. Así que é posible que non lle custase crer que outra persoa fixese o mesmo. Polo tanto, decidiu que as terras que Mefibóxet herdara do rei Saúl pasasen a ser de Sibá.
Cando Mefibóxet escoitou que Sibá o calumniara, foi ver o rei esperando poder contarlle a verdade. David pediulle explicacións de por que non fuxira de Xerusalén con el. Mefibóxet respondeulle: “O teu servo está coxo”, e explicoulle que Sibá o enganara. É probable que David se decatase de que Mefibóxet deixara de coidar a súa barba e o seu bigote coma se estivese de loito. Non demostraba isto que Mefibóxet estivera triste polo rei e non conspirando contra el? En calquera caso David estaba enfadado. Así que interrompeu bruscamente a Mefibóxet e díxolle que non quería seguir escoitando. Entón modificou a súa decisión, pero só en parte. Dixo que Mefibóxet e Sibá debían compartir as terras de Saúl.
Compartir a súa herdanza co servo traidor que o calumniara diante do rei? Mefibóxet puido sentirse indignado. Cando nos enfrontamos a inxustizas é fácil que nos amarguemos e nos volvamos resentidos (Deut. 19:18, 19). Fai falta valor para centrarnos en asuntos tan importantes como buscar a paz, en lugar de autocompadecernos e centrarnos nos erros dos demais. Que decidiría facer Mefibóxet?
A resposta que lle deu a David demostra o humilde que era: “Pode quedar el con todo, xa que o rei, meu señor, volveu san e salvo á súa casa”. A este home importáballe de verdade o rei que Xehová escollera. A pesar de que o calumniaron e lle quitaron terras, mantívose alegre e servindo fielmente a Xehová. Aínda que nunca loitou nunha guerra, demostrou máis valor que moitos que si o fixeron.
Le o relato da Biblia:
2 Samuel 4:4; 9:1-13; 16:1-4; 19:25-31 (19:24-30, TNM)
Pensa nisto:
De que formas demostrou valor Mefibóxet?
Afonda máis
1. Antes de que levasen a Mefibóxet ante David, viviu “na casa de Maquir”. Que máis indica que Maquir foi un home leal e hospitalario? (2 Sam. 9:3, 4; it “Maquir” núm. 2-wcgr).
2. Por que se comparou Mefibóxet a “un can morto”? (2 Sam. 9:8; it “Can” par. 5-wcgr). A
PhotoStock-Israel/Photodisc via Getty Images
Imaxe A: No antigo Israel, os cans considerábanse impuros.
3. Por que non sería propio de Mefibóxet que buscase ser rei? (w02 15/2 páx. 14 par. 11, nota-wcgr). B
Imaxe B: Que pode que lle dixese Ionatán ó seu fillo sobre o home a quen Xehová escollera para ser rei?
4. De que formas bendiciu Xehová a Mefibóxet despois do que sucedeu neste relato? (it “Mefibóxet” núm. 2 par. 3-wcgr).
Medita no que aprendiches
Moitos cristiáns sofren por depresión e outros desafíos que os demais irmáns non comprenden totalmente. Que lección tranquilizadora poden aprender de Mefibóxet?
Despois de escoitar tan só un informe, David quitoulle as terras a Mefibóxet. Que podemos aprender sobre o perigo de actuar precipitadamente e a importancia de coñecer os feitos? C
Imaxe C
Como podes imitar o valor de Mefibóxet na túa vida?
Analiza o cadro completo
Que me ensina este relato sobre Xehová?
Como se relaciona este relato co propósito de Xehová?
Que me gustaría preguntarlle a Mefibóxet cando resucite?
Aprende máis
Mira como podemos imitar a Mefibóxet cando sentimos que fomos tratados inxustamente.
Se un neno pensa que non encaixa ben, como poden os pais usar o relato de Mefibóxet para axudarlle?
“Sentícheste rexeitado algunha vez?” (w11 1/6 páxs. 26-27)