E Riaon 2 te Tirion te Kabanemwane Ibukini Boutokaaia Taanga ni Buaka ni Katobibia te Aonnaba​—Tera ae E Taekinna te Baibara?

E rokoroko n te mwaiti ae 2.24 te tirion, n te taraa n Amerika (U.S.) te kabanemwane ibukini boutokaaia taanga ni buaka ni katobibia te aonnaba n 2022. Angiin te kabanemwane man te mwaiti anne, e riki ngke e rinnakoa Ukraine ana taanga ni buaka Rutia. E oti n te ribooti are e kaotinakoaki n Eberi 2023 man te Stockholm International Peace Research Institute (SIPRI), n 2022 bwa:

• Aia kabanemwane tautaeka n te aono n Eurobe ibukia aia taanga ni buaka, e “keerake nakon 13 te katebubua n te ririki anne ao anne te mwaiti n te ririki ae korakora birirakena, mai imwin te ririki 1991.”

• “E kabirirakea ana kabanemwane Rutia ni kaania 9.2 te katebubua ao anne are e a kakeerakea mani nnena ae te kaniman nakon te kateniman i buakoia tautaekan te aonnaba ake a bati aia kabanemwane ni bwaai ni buaka.

• E teimatoa Amerika ni nnena ae te moan n ana kabanemwane ibukia ana taanga ni buaka, bwa “e kabanea iai 39 te katebubua.”

E taku Dr. Nan Tian are ngaia naba temanna are e korea te ribooti man te SIPRI, “Kekeeraken te kabanemwane n ririki aika a tibwa nako ibukia taanga ni buaka, boni kanikinaean ae ti a maeka n te aonnaba ae e a rikirake iai akean te mweraoi.”

E a kaman taekinna te Baibara bwa e na riki te ikakaiwi i marenaia tautaekan te aonnaba aika kokorakora ni boong aikai, ao e kaota naba te kantaninga teuana are e na karekea te rau ni koaua.

E a kaman taekinaki rikiraken te untaba i marenaia taanga ni buaka

• E atonga te tai ae ti maeka i nanona ngkai te Baibara bwa “[tain] te toki.”​—Taniera 8:19.

• E a kaman taekinna te boki ae Taniera bwa n te tai anne, e na riki te kaiangatoa i marenaia tautaekan te aonnaba. A na uaia n “inotunotu” tautaeka aikai ke ni kabokorakora ibukin te kan toka i eta, ao anne are e a kairiia bwa a na kabanei aia bwai aika bati aika “kakawaki” ke aia mwane iai.​—Taniera 11:​40, 42, 43.

Ngkana ko kan reiakina riki te taetae ni burabeti ae kakaongora aei man te Baibara, mataku n te taamnei ae Kakoroani Bukin Taetae ni Burabeti—Taniera Mwakoro 11.

Aron reken te rau ni koaua

• E taekinna te Baibara bwa e na onei mwin aia tautaeka aomata te Atua. E nang “katea te tautaeka n uea teuana Atuani karawa ae e na bon aki kamaunaaki. Ao e na bon aki kanakoaki te tautaeka n uea aei nakoia aomata riki tabemwaang. E na urui tautaeka n uea aikai ni kabane ma ni kamaunai, ao tii te tautaeka aei ae e na teimatoa n aki toki.”​—Taniera 2:44.

• Iehovaa ae te Atua, e na waekoa ni karaoa te bwai ae a aki kona aomata ni karaoia ae karekean te rau ni koaua ae akea tokina. E na kangaa ni karaoa anne? E na kamaunai bwaai ni buaka ni kabane ma mwakuri n iowawa nako n Ana Tautaeka n Uea mai karawa.​—Taian Areru 46:​8, 9.

Ngkana ko kan reiakinna riki bwa tera ae e na kakororaoaki n Ana Tautaeka n Uea te Atua, wareka te kaongora ae “‘E na Bati te Raoi’ i Aan Ana Tautaeka n Uea te Atua.”