E kaotaki n ana rongorongo Toromon te bwai ae kona n riki nakon te tia taromauria Iehova. E kona ni bwaka nakoni karaoan te bure ae kakaiaki ao imwina e namakinna ae a rina n riki bwaai ni kabane. Ke e bae ni kangai, “E a bon riki naba.” Ma ngkana e iangoa raoi te baere e riki, e na bae n ataia ae e a tia n toui mwaneka tabeua ma te aki wanawana aika kairia nakon te bure. Tao e rineiia raoraona aika aki tangira Iehova, ke tao a bon aki tau ibukia Kristian ana kaakibotu aika e rinei, ao taabo ke atureti n te intanete aika e kakawari. Tao e bae naba n tia ni katoka ana tatataro, warekan te Baibara, kaakaeani bobotaki, ke uataboan te mwakuri ni minita. N aron te rorobuaka n ataei are e maroroakinaki n Taeka N Rabakau, bon tiaki te bwai ae karina karaoan ae bure irouna. Tera reireiara? Ti riai ni kararoaa tiaki tii te bure ma mwaneka naba aika kairiri nakon te bure. E kabwarabwaraa raoi te reirei anne Toromon imwin taekinan te rongorongo anne.​—Mt 5:​29, 30. w24.07 16 ¶10-11

Tera te bwai ae kakawaki aei? Bon te mwakuri ni kakamaiu ae tataekinan te rongorongo ibukin te Tautaeka n Uea. (2Ko 4:1) Tera mwangko aika taano? A tei ibukia ana toro te Atua aika a tataekina te rongorongo ae raoiroi nakoia aomata. N ana bong Bauro ao a kamanenai kaatibu aika karaoaki man te bokaboka taan iokinibwai bwa nneni baika kakawaki, n aron te amwarake, te wain, ao te mwane. N aron naba anne, e onimakinira Iehova n te rongorongo ae kakawaki ae taekan te rongorongo ae raoiroi. Man ana ibuobuoki Iehova, ti a kona ni karekea te korakora are ti kainnanoia n tataekina te rongorongo ma te kakaonimaki. N tabetai ti kona ni maakuia aomata ke ni maaka ae ti na ribaaki. Ti na kangaa n tokanikai i aon te kangaanga anne? Iangoa aia tataro abotoro ngke a tuangaki bwa a na aki uarongorongo. N oneani mwin are a na maaku, a bubutiia Iehova bwa e na buokiia n teimatoa n taetae ma te ninikoria ae bati. E waekoa Iehova ni kaekaa aia tataro. (Mwa 4:​18, 29, 31) Ngkana ko rotaki ni maakakia aomata n tabetai, bubutiia Iehova buokam bwa e na buokiko ni katokanikaia tangiraia aomata nakoni maakakia. w24.04 16 ¶8-9

Ti kairaki n tangiran Iehova bwa ti na katabua arana. Ti kani kaitiaka arana mani kabuakakaana are e reke n ana kewe Tatan. (KB 3:​1-5; Iob 2:4; Io 8:44) N ara mwakuri ni minita, ti ingainga n tei ibukin Atuara n tataekina te koaua ibukina nakoia aomata nako ake a kan ongora. Ti tangiriia aomata bwa a na ataia ae aroarona ae rianako riki bon te tangira, ao e raoiroi ao n riai ana waaki ni kairiri, ao e na waekoa ana Tautaeka n Uea ni katoka te rawawata ni kabane ao ni karokoa te rau ao te kukurei nakoia aomata. (TA 37:​10, 11, 29; 1Io 4:8) Ngkana ti kaitiaka taekan Iehova n ara mwakuri ni minita, ti a katabua iai arana. E reke naba raun nanora n ataakin ae ti maiuakina arara. w24.05 18 ¶12