Wanawanaia Mitiin ma Kaombiuta—A Karekei Kakabwaia ke A Karekekai?—Tera ae E Taekinna te Baibara?

N taai aika a tibwa nako ao a anga aia taeka ni kaineti ma wanawanaia mitiin ma kaombiuta taani kairiri n tautaekan aaba nako, n ikotaki ma taan rabakau ni bwain te aonnaba ao taan rabakau ni kukune aika boou. A kakoauaa ae iai manenani baikai ma a tabeaianga naba ibukini kabonganaakia n te aro ae aki riai.

• “Wanawanaia mitiin ma kaombiuta, bon te rabakau teuana mai buakoni karaobwai aika kokorakora ni boong aikai, ake a karaoaki ibukini kanakoraoan riki maiuia aomata . . . Ma a kona ni kamwengabuakaira, n anai inaomatara, ni kaoti rongorongora ake a riai n raba, ao ni kairira bwa ti na aki onimakina te waaki n tautaeka ae e kairaki irouia aomata.”—Kamala Harris, te kauoman ni beretitenti n te United States, Mei 4, 2023.

• “E ngae ngke a a nakoraoi riki marurungira mani wanawanaia mitiin ma kaombiuta ma a kona naba ni kammarakira ao ni kakerikaaka marurungin ara iango,” ana taeka te rabwata ae kaainaki irouia taokita ma taani kuakua n te aonnaba, are e kairaki iroun Dr. Frederik Federspiel, n te kaongora are e boreetiaki ni Mei 9, 2023, n te BMJ Global Health.a

• “A kona aomata ni kabonganai wanawanaia mitiin ma kaombiuta ni kabutiinakoi iai rongorongo aika kewe. E nang kona naba ni kerikaaka iai mwaitin te mwakuri ni kareketianti are e kainnanoia te aomata ibukini maiuna ma ana utu. A tabeaianga tabeman ake a mwakuri ma bwaai n rabakau aika boou, bwa a noria ae wanawanaia mitiin ma kaombiuta, e na kona ni karuanikaia maiuia aomata n taai aika imwaira.”—te nuutibeeba ae The New York Times, Mei 1, 2023.

Ni waakinakon te tai ao e nang otara riki ngkanne bwa a kakabwaiaaki aomata mani wanawanaia mitiin ma kaombiuta ke a karekeaki iai kaia. Tera ae e taekinna te Baibara?

Bukin namakinan te aki mweraoi n aia mwakuri aomata

E katerea bukina te Baibara ngkai a aki kona aomata ni beritani baika a raraoi mani bwaai n rabakau ake a karaoi.

1. 1. E ngae ngke a iangoia aomata bwa iai manenan te bwai are a karaoia, ma a bae n aki kantaningaia ae e na iai buakakana nakoia tabeman.

   • “Iai te kawai ae taraa n eti iroun te aomata, ma n tokina ao e boni kairiri nakon te mate.”—Taeka N Rabakau 14:12.

2. 2. E aki kona te aomata n totokoia tabeman man aroia ni kabongana te bwai are e karaoia—bwa tao a na kabongana raoi—ke a na kabongana buaka.

   • “N na katikui [au mwakuri] nakon te aomata ae e na ruamwiu. Ao antai ae e na ataia bwa e na wanawana te aomata anne ke e na nanobaba? Ma e ngae n anne, e nang taui aroni bwaai ni kabane aika I a tia ni kabanea iai korakorau ae bati ao wanawanau ni karekei, i aan taai.”—Te Minita 2:18, 19.

Namakinan te aki mweraoi n aron aikai, a a katerea nakoira bukina ngkai ti kainnanoa ana kairiri ara tia Karikiriki.

Katukan ara mwioko nakoina

E berita ara tia Karikiriki bwa e na bon aki kariaia temanna ke te bwai n rabakau are e karaoia te aomata, bwa e na kamauna ara aonnaba ke te botannaomata ae bwanin.

• “E teimatoa n aki toki te aonnaba.”—Te Minita 1:4.

• “A na abana te aonnaba akana raoiroi, ao a na maeka i aona n aki toki.”—Taian Areru 37:29.

Rinanon te Baibara ao e anganira ara tia Karikiriki kairara nakon te tai ae imwaira, ike ti nang karekea iai te rau ao te mweraoi. Ngkana ko kan reiakina riki ae e taekinna te Baibara, wareki kaongora aikai “Iai te Kairiri ae Kona n Onimakinaki Ibukini Karekean te Kabwaia n Taai Aika a na Roko?” ao “A Real Hope for a Better Tomorrow.”