Top left: Marek M. Berezowski/Anadolu Agency via Getty Images; bottom left: Halfpoint Images/Moment via Getty Images; center: Zhai Yujia/China News Service/VCG via Getty Images; top right: Ismail Sen/Anadolu Agency via Getty Images; bottom right: E+/taseffski/via Getty Images
TEIMATOA N TANTANI!
2023: Ririkin te Tabeaianga ae Korakora—Tera ae E Taekinna te Baibara?
A mwaiti baika riki n 2023 ni katobibia te aonnaba ake a katerea koauan ae ti a maeka n te tai ae e taekinna te Baibara bwa “kabaneani boong.” (2 Timoteo 3:1) Baika riki aika ti a nori ngkai, boni baika e a kamani kabwarabwarai taekaia te Baibara bwa a na kaoti n taai aikai.
Te Baibara ao baika riki ni katobibia te aonnaba
“Karongoaani buaka ao rongorongoni buaka.”—Mataio 24:6.
“E a rikirake karaoani mwakuri n itabarara aika iowawa n taabo aika bati n te aonnaba.”a
Nora te kaongora ae “Antai ae E na Kamaiuia Kaain te Aba Ake Tiaki Tautia?” ao “E Riaon 2 te Tirion te Kabanemwane Ibukini Boutokaaia Taanga ni Buaka ni Katobibia te Aonnaba.”
“Mwaeiein te aba n te tabo teuana ma teuana.”—Mareko 13:8.
“Ni moan te ririki 2023 ni karokoa ngkai, a a tia n riki mwaeiei aika 13 aika raka i aon 7 te magnitude korakoran aia urubwai, ao aei te mwaiti ae te kabanea n rietata, kioina ngkai a riki mwaeiei aikai i nanon te ririki ae tii teuana.”b
Nora te kaongora ae “Mwaeiei Ake A Urubekea Aon Turkey ma Syria.”
“Baika kakamaaku.”—Ruka 21:11.
“E a toki tataekinan abuen te ea ae kabutaa te aonnaba; e a tataekinaki ngkai korakoran te kabuebue ae rota te aonnaba.”—António Guterres, te tia koroboki ni kabuta n te botaki ae te UN.c
Nora te kaongora ae “Biriraken te Kabuebue n 2023 Are E a Rota te Aonnaba ae Bwanin.”
“Roongo.”—Mataio 24:7.
“2023: Manga te ririki naba teuana ike e a korakora iai te tabeaianga irouia ake a korakai ni kakaaea aroni maiuia ma aia utu.”d
Nora te kaongora ae “Te Kangaanga n Taren te Amwarake n te Aonnaba Man te Buaka ao Bibitakini Kanoan te Bong.”
“Taai aika okoro aika karuanikai.”—2 Timoteo 3:1.
“Ni katobibia te aonnaba ao e na bae n iai temanna mai buakoia waniman aomata ae iai aorakin ana iango.”e
Nora te kaongora ae “Kararaoman Kerikaakin Marurungin Aia Iango Ataei Aika Tebwi Tabun Aia Ririki.”
Tera ae ti kona ni kantaningaia n 2024?
Akea temanna ae kona n taekinna raoi bwa tera kanoan te ririki ae 2024. Ma e oti mani baika riki n te aonnaba bwa e a kaan ana tai Ana Tautaeka n Uea te Atua ke te tautaeka mai karawa, n onei mwin aia tautaeka aomata ao ni kamauna nibwan te rawawata ma te tabeaianga.—Taniera 2:44; Te Kaotioti 21:4.
N te tai moa aei, ti kona n onimakina te Atua ibukini buokara ngkana ti namakina te tabeaianga. E taku te Baibara:
“N te tai are I maaku iai ao I onimakiniko.”—Taian Areru 56:3.
Ti na kangaa ni kaota onimakinan te Atua? Ti kaoko bwa ko na reiakina riki ana berita te Baibara ni kaineti ma te tai ae imwaira ike e nang akea iai te rawawata. Kataa te reirei n te Baibara ae aki kabooaki n nora iai arom ni kona ni kakabwaiaaki ma am utu n ana berita nako te Baibara.
a Foreign Affairs, “A World at War: What Is Behind the Global Explosion of Violent Conflict?” mairoun Emma Beals ao Peter Salisbury, Okitobwa 30, 2023.
b Earthquake News, “Year 2023: Number of Major Earthquakes on Course for Record,” Mei, 2023.
c United Nations, “Secretary-General’s Opening Remarks at Press Conference on Climate,” Turai 27, 2023.
d World Food Programme, “A Global Food Crisis.”
e World Health Organization, “World Mental Health Day 2023,” Okitobwa 10, 2023.