Kristian ao te Buaka—Tera ae E Taekinna te Baibara?

N aron ae e oti n te waaki n itabarara i aon Ukraine, a a mwaiti taani kairiri aika Kristian, ake a kaungaia aomata bwa a na boutokaa te buaka. Nora aroia mataniwin Aaro ni boutokai taanga ni buaka aika uoua, ake a tei ni kaaitara i marenaia:

• “E korakora te karinerine ma te kakaitau nakoia taani buaka ake a a tei ni kamanoa Ukraine mairoun te tia iowawa . . . A teimatoa nanora, ara tataro ma ara boutoka ibukimi.”—Metropolitan Epiphanius I mai Kyiv, e taekinna te nuutibeeba ae The Jerusalem Post, Maati 16, 2022.

• “Atun te Aro n Rutia ae te Orthodox, e karaoa ana taromauri ae okoro n te Taabati ibukia tautian Rutia, ike e a kaungaia iai bwa a na tei ni kamanoa abaia ‘ngkai bon anne aroaroia I-Rutia’, ngkai e waakina ana kambein Moscow i Ukraine ibukini karekean te rau.”—Reuters, Eberi 3, 2022.

A riai Kristian ni boutokaa te buaka? Tera ae e taekinna te Baibara?

Ana taeka te Baibara

E oti n te Baibara bwa a aki boutokaa te buaka, te koraki ake a kani kakairi raoi iroun Iesu Kristo.

• “Kaoka am kabaang nakoni nnena, bwa a na mauna nako n te kabaang aomata ni kabane ake a kabongana te kabaang.”—Mataio 26:52.

  E ongeaba nakon ana taeka Iesu, te aomata ae e boutokaa te buaka ke waaki n itabarara?

• “I anganingkami te tua ae boou, bwa kam na itangitangiri i marenami, n arou ae I tangiringkami, ao kam na itangitangiri naba. Ao ane a na ataingkami aomata ni kabane bwa bon taan rimwiu ngkami, n aei: ngkana kam itangitangiri.”—Ioane 13:34, 35.

  E oti man aroaron te aomata ae e boutokai buaka, te aeka n tangira ae e taekinna Iesu, are a na kinaaki iai ana reirei ke taan rimwina?

Ibukin rongorongona riki, wareka te kaongora ae “Is War Compatible With Christianity?”

Kristian ao te buaka ni boong aikai

A boni kona Kristian n aki kairekerekeia ma taiani buaka ni boong aikai? Eng. E a kaman taekinna te Baibara ae boong aikai, a atongaki bwa “kabaneani boong” ao a na iai aomata mai buakoia natannaomata nako, ake a nang aki “manga reireinia te buaka” ni kaineti ma are e tua Iesu.—Itaia 2:2, 4.

• Ibukini karekean riki rongorongona, wareki kaongora aika rereitaki, n Te Taua-n-Tantani ae atuna “Tera Ana Iango te Atua n te Buaka?”

E na waekoa Iehova,a ae “te Atua are reke mairouna te rau” ni kabongana ana tautaeka i karawa, ni kamaiuia aomata “man te karawawataaki ao man te iowawa.”—I-Biribi 4:9; Taian Areru 72:14.

• Ngkana ko kan ataa aroni karaoan anne, mataku n te taamnei ae Tera Ana Tautaeka n Uea te Atua?