Ti Boni Kona Naba ni Kukurei ni Maiura Ngkai
IAI te tai ae e nang akea iai te aoraki, te kara, ao te mate, ao e boni kona n reke iroum te aeka ni maiu anne! E ngae n anne, ti boo naba ngkai ma rawawata ao kangaanga aika bati ni maiura aei. Tera ae e kona ni buokiko bwa ko na kukurei ni maium ngkai? Iai te kairiri n te Baibara ae kona ni karekea nakoim te kukurei ao te raunnano ni maium ngkai. Iangoi kangaanga tabeua ao aron te Baibara ni kona n ibuobuoki iai.
UKERAN TE RAUNNANO
Te taeka n reirei man te Baibara: “Kam na maiuakina te aro ae akea te bakimwane iai, ngkai a rau nanomi n ami bwai akana iroumi.”—Ebera 13:5.
A rangi ni bati bwaai ngkai ae a taku aomata bwa ti riai ni karekei. Ma e taku te Baibara bwa a kona n ‘rau nanora n ara bwai aika iroura.’ Ni kangaa?
Rarawa nakon “tangiran te mwane.” A kukurei aomata ni kakeaa bongani marurungia, aia utu, aia iraorao, ao ai karineaia, tii ibukin “tangiran te mwane.” (1 Timoteo 6:10) Ai boni kangaangara! N tokin te tai, e na bon “aki naba kona n rauaki” te aomata ae tangira te kaubwai.—Te Minita 5:10.
A kakawaki riki aomata nakoni bwaai. A bongana naba bwaikoraki tabeua, ma a aki kona n tangirira ke ni kaitauira, bwa bon tii aomata aika kona ni karaoa anne. Karekean “te rao ni koaua” e kona n anganira te raunnano ni maiura.—Taeka N Rabakau 17:17.
TI BONI KONA NABA NI KUKUREI NI MAIURA NGKAI N IRAN TE KAIRIRI MAN TE BAIBARA
KEKEIAKI NGKANA KO AORAKI
Te taeka n reirei man te Baibara: “Bon te bwainnaoraki ae raoiroi te nano ae kimwareirei.”—Taeka N Rabakau 17:22.
Te kimwareirei kaanga “te bwainnaoraki ae raoiroi” ae kona ni buokira ni kekeiaki ngkana ti aoraki. Ma ti na kangaa ni kimwareirei ngkana ti aoraki?
Bwaina te kakaitau. Ngkana ti a tii iaiangoi naba rawawatara, ‘a na bane boong’ n taraa ni buakaka. (Taeka N Rabakau 15:15) Ma e taku te Baibara: “Kaotiota ami kakaitau.” (I-Korote 3:15) Kaotiota te kakaitau ibukini baika raraoi ni maium, e ngae ngkana a uarereke. Bungin taai ae tamaroa, karen te ang ae bon tau, wingareia naaka tangiraki iroura, boni baika ti kimwareirei iai ni maiura.
Karaoi bwaai ibukia aomata. E ngae ngkana ko aoraki, ma “e kakukurei riki te anga nakon te anganaki.” (Mwakuri 20:35) Ngkana a kakaitau aomata n te bae ti karaoia, ti na kukurei ao n aki kaatuua iangoan ara kangaanga. Ti kona ni kanakoraoa riki maiura, ngkana ti buokiia aomata ni kanakoraoi maiuia.
KAMATOAAN TE MARE
Te taeka n reirei man te Baibara: “Koaua raoi bwa baikara bwaai aika kakawaki riki.”—I-Biribi 1:10.
E kona n uruaki aia reitaki taanga ake e karako aia tai i bon irouia. Ngaia are a wanawana taanga ngkana a moanibwaia aia mare, ni karikia bwa te bwai naba ae kakawaki riki ni maiuia.
Kaai ni karaoi bwaai. Baireia bwa kam na kaai ni karaoi bwaai. E taku te Baibara: “A raoiroi riki uoman nakon temanna.” (Te Minita 4:9) Kam kona ni kaai ni kuuka, ni kamarurung, ni kaakibotu, ke ni karaoi baika kam tatangiri.
Kaotiota ami tangira. E kaungaia taanga te Baibara bwa a na tangiriia ao ni karineia i marenaia. (I-Ebeto 5:28, 33) E kona ni matoa riki te mare man te wingare, kaotan te tangira, ke te bwaintangira ae uarereke. A bon riai taanga ni kaotiota tangiran te kani wene n taanga bon tii i marenaia.—Ebera 13:4.