Arora ae Ti na Kukurei ma n Rauaki Iai ni Maiura

Mwakuri Korakora

“Ke e mwakuri korakora ni karaoa te mwakuri ae raoiroi ni baina, bwa e aonga n reke naba ana bwai ae e na angan ane e kainnano.”​—I-EBETO 4:28.

E kaungaira ara tia Karikiriki bwa ti na bwaina te iango ae riai ibukin te mwakuri. Bukin tera? E kukurei te aomata ae mwakuri korakora ibukina bwa e kona iai ni katauraoi bwaai ibukina ao ibukia ana utu. E kona naba ni buoka te aomata ae kainnanoa buokana. E na kakawaki naba iroun teuare e mwakuri irouna. Ngaia are e na bon teimatoa ana mwakuri te aomata ae mwakuri raoi. E kabwarabwaraa raoi te Baibara te kaniwanga ibukin te mwakuri korakora bwa “te bwaintangira mairoun te Atua.”​—Te Minita 3:13.

Bwabwaina te Koaua

“Ti onimakinna bwa a bon itiaki mataniwin nanora, ngkai ti kani bwabwaina te koaua ni bwaai ni kabane.”​—EBERA 13:18.

Ngkana ti bwabwaina te koaua ao ti karineira iai i bon iroura. Ti na kukurei bwa a rau nanora ao ti na matu raoi riki n te tairiki. Irarikin anne, a na onimakinira naba tabemwaang ao ni karineira. Aomata aika aki bwabwaina te koaua, a aki kona n reke baika raraoi aikai irouia, a na katabetabeaki naba ni mataniwin nanoia, ao a na maiu ma maakakin ae n te tai teuana, a na bon reke raoi n aki bwabwainakin te koaua irouia.

Iangoa te Mwane n te Aro ae Riai

“Kam na maiuakina te aro ae akea te bakimwane iai, ngkai a rau nanomi n ami bwai akana iroumi.”​—EBERA 13:5.

Ti kainnanoa te mwane ibukini kanara ao baika ti kainnanoi riki tabeua, ma e rangi ni karuanikai “te bakimwane.” E kona ni kaira te aomata bwa e na kabanea angiin ana tai ao korakorana n ukoukora aroni karekean te mwane ae bati riki. Ukoukoran te mwane n te aro aei, e kona ni karekea te kangaanga n ana mare ao e kona naba n anaa ana tai are e na reitaki iai ma natina, ao riki, e kona ni karuanikai nakoni marurungina. (1 Timoteo 6:​9, 10) Ma ae moamoa riki, e kona ni kairaki te aomata ae bakimwane bwa e na aki bwabwaina te koaua. E taku te aomata ae wanawana: “A na reke kakabwaia aika bati iroun te aomata ae kakaonimaki, ma e na reke n te bure ane e ienikuria te kani kaubwai.”​—Taeka N Rabakau 28:20.

Rinea te Reirei ae te Kabanea n Tamaroa

“Kawakina te wanawana ao te konabwai n iaiango raoi.”​—TAEKA N RABAKAU 3:21.

Te reirei ae tamaroa e buokira bwa ti na riki bwa ikawai ao kaaro aika a ataa te bwai ae a na karaoia. Ma te reirei ibukin te rabakau n te aonnaba aei n tii ngaia, e aki kona n teimatoa iai te mweraoi ke te kukurei. Ngkana e kan nakoraoi arora n iterani maiura ni kabane, ti kainnanoa te reirei are mairoun te Atua. E taekina ae kangai te Baibara ibukin te aomata ae ongo iroun te Atua: “A na nakoraoi bwaai nako aika e karaoi.”​—Taian Areru 1:​1-3.