E Koaua ae te Mwane Boni Wakaani Baika Bubuaka ni Kabane?

Ana kaeka te Baibara

E aki. E aki taekinna te Baibara bwa e buakaka te mwane, ao e aki naba arana te mwane bwa aan rikini baika bubuaka ni kabane. Te taeka ae bwabwainaki ae “te mwane boni wakaani baika bubuaka ni kabane” e anaaki man te Baibara, ma e aki moti raoi ao e bureburea naba te aba. Ni koauana e taku te Baibara bwa “wakaani baika bubuaka ni kabane bon tangiran te mwane.”—1Timoteo 6:10.

Tera ana taeka te Baibara ibukin te mwane?

E kakoauaa te Baibara ae e kona n ibuobuoki te mwane ao n riki bwa te bwai ni “kamanomano” ngkana e kabonganaaki ma te wanawana. (Te Minita 7:12) E kamoamoaia naba naake a tituaraoi nakoia tabemwaang, ae nanona naba te bwaintangira n te mwane.—Taeka N Rabakau 11:25.

Ma e anga naba te kauring te Baibara ni kaineti ma moanibwaian te mwane ni maiura. E taku: “Kam na maiuakina te aro ae akea te bakimwane iai, ngkai a rau nanomi n ami bwai akana iroumi.” (Ebera 13:5) Te reirei iai bwa ti riai ni kabongana raoi te mwane ao ti na aki uaiakina te kaubwai. Ma a riai n rau nanora ma baika ti boni kainnanoi n aroni kanara, kunnikaira, ao mwengara.—1Timoteo 6:8.

**E aera te Baibara ngkai e anga te kauring ni kaineti ma tangiran te mwane?**

A na bon aki karekea te maiu n aki toki aomata aika nanonrang. (I-Ebeto 5:5) Bukina teuana, te nanonrang bon taromaurian naba bouannanti, ke te taromauri ae kewe. (I-Korote 3:5) Teuana riki bukina, a aki toki aomata aika nanonrang ni kakeai booto n reirei aika raraoi tii ibukini karekeani baika a tangiri. E taku Taeka N Rabakau 28:20: ‘A na reke n te bure akana ienikuria te kani kaubwai.’ A kona naba ni kaririaki nakoni karaoan ae kairua, n aroni kaotan rongorongon temanna ibukin te mwane, te aonikai ni kuribwai, te babakanikawai, iraean temanna ibukin te bae ko tangiria, ke bon te tiritiri.

E ngae ngkana e aki kairiri tangiran te mwane nakon te aroaro ae buakaka, ma e kona n iai mwina aika aki raraoi. E taku te Baibara bwa “akana uaiakina te kani kaubwai, a bwaka nako nanon te kaririaki ao te kai ni kabwaru ao bwaruani baika nanobaba ma ni kaikoaki.”—1Timoteo 6:9.

Ti na kangaa ni buokaki man ana taeka n reirei te Baibara ibukin te mwane?

Ngkana ti aki kakeai baika ti atai bwa a eti ao baika kakukureia te Atua tii ibukin tangiran te mwane, ti na boni karekea karineara i bon iroura ao akoara ma boutokaara iroun te Atua. E beritana aei te Atua nakoia aika a kataia ni kakukureia: “N na bon aki kaakiko ao N na bon aki kitaniko.” (Ebera 13:5, 6) E karaui naba nanora ni kangai: “A na reke kakabwaia aika bati iroun te aomata ae kakaonimaki.”—Taeka N Rabakau 28:20.

Kibun te Baibara Ibukin te Mwane

Te Minita 7:12: “Te mwane . . . te bwai ni kamanomano.”

Ae nanonaki iai: E kona n ibuobuoki te mwane ngkana e kabonganaaki ma te wanawana, bwa e karekea te mweraoi.

Ruka 12:15: “E ngae ngkana a bati ana bwai te aomata, ma tiaki maiuna mwaitin ana bwai nako.”

Ae nanonaki iai: Tiaki te bwai ae te kabanea ni kakawaki te mwane n te maiu aei, ao e aki kona ni karekea naba te maiu nakoira.

1 Timoteo 6:10: “Teuana mai buakoni wakaani baika bubuaka ni kabane bon tangiran te mwane, ao ngkana a uaiakina karekean te aeka n tangira aei tabemwaang ao a kairakinako iai man te onimaki ao a ewariia ni maraki aika bati.”

Ae nanonaki iai: E aki buakaka te mwane. Ma aomata aika tangira te mwane, ao ni moanibwaia ni maiuia, a a karekei kangaanga nakoia, n aron uruakin aia utu, ao rotakini marurungia man aia mwakuri ni kareketianti ae e a riao.

Ebera 13:5: “Kam na maiuakina te aro ae akea te bakimwane iai, ngkai a rau nanomi n ami bwai akana iroumi.”

Ae nanonaki iai: N oneani mwin uaiakinan te kaubwai, ti wanawana ngkana a rau nanora ni baika ti boni kainnanoi.

Mataio 19:24: “E bebete riki iroun te kamero bwa e na rin i nanoni bwangabwangan te neiran, nakon rinin te aomata ae kaubwai n ana Tautaeka n Uea te Atua.”

Ae nanonaki iai: E a tibwa tia Iesu ni kaoa te mwaane ae kaubwai bwa e na riki bwa te tia rimwina. E rawa teuaei bwa e rangi n tangiri ana bwai. Ngaia are e a anga te kauring aei Iesu. Te aomata ae moanibwaia te kaubwai ao tiaki te Atua, e a kabuaa te maiu n aki toki.