Mutiakina Ana Taeka Ni Burabeti Te Atua

“Bon iai i roura aia taeka burabeti ae e ataki riki koauana; are kam karaoa ae raoiroi iai ngkana kam mutiakinna.”​—2 BETERO 1:19.

1, 2. Tera te katoto ae ko kona n taekinna, ae kaota te mesia ni kewe temanna?

I NANON tienture aika mwaiti, mesia ni kewe a kataia ni burabetini taekan bwaai aika a na riki nakon taai aika imwaiia. N te kanimaua n tienture C.E., te mwaane are e aranna bwa Mote, e anaa nanoia I-Iutaia ake a mena n te abamwakoro ae Kirete bwa a na kakoaua bwa boni ngaia te mesia ae e na kamaiuiia man tautoronakiia. N te bong are aongkoa a na kainaaomataki iai, a iria nakon te tabuki are i etan te marawa ae te Mediterranean Sea. E taku bwa a na kiba nako marawa ao ane e na karaureaki marawa ibukiia. A mwaiti mai buakoia aomata aika a kiba nako marawa, ake a bwabwa iai, ao e a biri nako te mesia ni kewe arei.

² Iai te “mesia” temanna ae kaoti i Yemen n te ka 12 n tienture. Te toka, ke te tia tautaeka iai, e butiia bwa e na kaota te kanikina teuana ae e na kakoaua arona ni mesia. Te “mesia” aei e tuatua bwa e na kabakuaki roroana iroun te toka arei. E taetae ni burabetinna bwa utina man te mate n te tai ae waekoa, e na riki bwa te kanikinaa. E nano iai te toka​—ao ai boni ngaia anne tokin te “mesia” arei.

3. Antai te Mesia ni koaua, ao tera ae kakoauaki n ana mwakuri ni minita?

³ Bon akea uaaia mesia ni kewe ao aia taetae ni burabeti, ma e aki kona ni karika te maneang, mutiakinan ana taeka ni burabeti te Atua. Anuani maiun te Mesia raoi ae Iesu Kristo, e a riki bwa kakoroan bukin taetae ni burabeti aika mwaiti man te Baibara. N te katoto teuana, e korea ae kangai te tia korea te Euangkerio ae Mataio, ngke e mwanewea ana taeka ni burabeti Itaia: “Aban Teburun, ao aban Nabetari, are i rarikin te nama, are i meangin Ioretan, are Kariraia, are abaia Tientaire, a nora te oota ae ababaki aomata ake a tekateka ike e ro; ao e kaoti te oota nakoia ake a tekateka i aban te mate ao i nuna. Ao man te tai arei ao E moa n reirei Iesu, ao E taku, Kam na rairi nanomi; ba e a kan roko uean te Atua.” (Mataio 4:15-17; Itaia 9:1, 2) Iesu bon te “oota ae ababaki,” ao ana mwakuri ni minita e kakoaua bwa boni ngaia te Burabeti are e kaman taekinaki iroun Mote. A na kamaunaki akana a rawa n ongo iroun Iesu.​—Te Tua-Kaua 18:18, 19; Mwakuri 3:22, 23.

4. E a kanga Iesu ni kakoroa bukin Itaia 53:12?

⁴ Iesu e kakoroa bukin te taetae ni burabeti are n Itaia 53:12: “E nurakina tamneina nakon te mate, ao E warekaki i buakoia taani bure, ngkae E bon uouoti naba aia bure aomata aika bati, ao E bubuti ni kan raoi i bukiia taani bure.” E ataia Iesu bwa e a kaan te tai are e nang anga iai maiuna n aomata bwa te kaboomwi, mangaia are e a kakorakora riki aia onimaki taan rimwina. (Mareko 10:45) Iesu e karaoa anne n te aro ae kamimi, rinanon onikakina.

Onikakin Iesu E Kakorakora Riki te Onimaki

5. N oin am taeka, ko na kanga ni kabwarabwara taekan onikakin Iesu?

⁵ Onikakin Iesu bon te mwakuri ni burabeti. E kangai Iesu: “Ba ane E na nako mai natin te Aomata ma neboakin Tamana ma ana anera . . . E koaua ae I a tuangngkami ba a na aki mate tabemang i buakoia aika tei ikai, ngkana a tuai n nora Natin te Aomata ngkana E nako mai ma ueana.” (Mataio 16:27, 28) Iai abotoro tabeman ake a bon nora Iesu n roko ma ana Tautaeka n Uea? E kangai Mataio 17:1-7: “Ao i mwin onobong ao Iesu E wetea Betero, ma Iakobo, ma Ioane are tarina, ao E kairiia nakon te maunga teuana ae rietata ni kaokoroia: ao E onikaki i mataia.” Ai kamimi ra te bwai are riki arei! “E oota matana n ai aron taai, ao e mainaina kunnikaina n ai aron te riringa. Ao akea ba e kaoti i mataia uakekei Mote ma Eria n taetae ma Ngaia.” Ao “e rabunia te nang ae raneanea,” ao a ongo naba bwanan te Atua ae kangai: “Natiu ae tangiraki Teuaei, ae I kakatonga i Rouna; kam na ongo i Rouna. Ao ngke a ongo ana reirei, ao a bwaka ni kabo mataia ma aontano, ao e bati te maku i rouia. Ao E nako ia Iesu, ao E ringiia, ao E taku, Tei rake, ao tai maku.”

6. (a) Bukin tera Iesu ngke e arana onikakina bwa te miitara? (b) Bannan tera onikakin Iesu?

⁶ Te waaki ae kamimi aei e riki tao ni mangeen te Maunga are Oman, ike a matu iai Iesu ma abotoro ake teniman. Kioina ngkai e riki onikakin Iesu arei n te bong, e bon rangi ni kakamataku riki ao e teretere. Iesu e aranna te bwai arei bwa te miitara ibukina teuana, bwa a kamani mate Mote ma Eria, mangaia are bon tiaki raoi ngaiia ni koaua ake a mena iai. Bon tii Kristo are e mena iai. (Mataio 17:8, 9, NW) Te kamataku ae kamaiu aei e anganiia Betero, Iakobo ma Ioane, bannan mimitongin Iesu ngkana e nang mena ma aomata ma mwaakana n te Tautaeka n Uea. Mote ma Eria, bon kaikonakakiia taan uaia n ababa ma Iesu ake a kabiraki, ao te miitara aei e boutokoa raoi ana kaotioti ibukin te Tautaeka n Uea ao te tai are e na uea iai.

7. Ti kanga n ataia bwa e ururinga raoi taekan onikakin Iesu Betero?

⁷ Onikakin Iesu e kakorakora riki aia onimaki abotoro ake teniman ake a na karaoa te mwakuri ni kairiri ae kakawaki inanon te ekaretia ni Kristian. Ootan matan Kristo, kunnikaina aika raneanea, ao bwanan te Atua are kaotia bwa Iesu bon Natina ae tatangiraki are a riai n ongora irouna —a buoka kakoroan bukin are e a kaantaningaki iai. Ma a aki riai ni kaongoia aomata taekan te miitara anne abotoro ni karokoa tian kautakin Iesu. Ngke tao 32 te ririki imwin anne, e boni korakora naba ururingan te miitara aei iroun Betero. E taekina te miitara arei ma nanona, ngke e korea ae kangai: “Ba ti aki tou mwini karaki-ni-kewe aika kuneaki n te rabakau, ngke ti tuangngkami mwakan ara Uea are Iesu Kristo ma rokona, ma ti bon nora mimitongina. Ba E anganaki te karineaki ma te neboaki mairoun te Atua are te Tama, ngke e uotaki nako ina n te mimitong are moan te tamaroa te bwana ae kangai, Natiu ae tangiraki Teuaei, ae I kakatonga i Rouna: ao ti ongo te bwana aei ae uotaki mai karawa, ngke ti mena ma Ngaia n te maunga are tabu.”​—2 Betero 1:16-18.

8. (a) Ana kaotioti te Atua ni kaineti ma Natina e katuua riki taekan tera? (b) Tera ae nanonaki n te nang ae kaoti ngke e onikaki Iesu?

⁸ Moan te kakawaki ana kaotioti te Atua aei: “Natiu ae tangiraki Teuaei, ae I kakatonga i Rouna; kam na ongo i Rouna.” Taeka aikai a katuua riki aron Iesu ae te Uea ae katokaaki n ana kaintokanuea iroun te Atua, are te karikibwai ni kabane ae e riai n n ongeaba irouna. Te nang are e rabunia, e kaotia bwa e na aki nonoraki n te mata, kakoroan bukin te miitara aei. E na ataaki ni matan te nano irouia aomata ake a ataa “te kanikina” ae kaota menan Iesu ma aomata ae aki nonoraki, ma te mwaaka n te Tautaeka n Uea. (Mataio 24:3, NW) Ni koauana, ana kaetieti Iesu ae a na aki kaongoia aomata taekan te miitara anne ni karokoa tian kautakina man te mate, e kaotia bwa e na karietataki ma n neboaki imwin manga utina.

9. Bukin tera ngkai onikakin Iesu e na kakorakora riki ara onimaki?

⁹ E a manga kangai Betero ngke e a tia n taekina onikakin Iesu: “Bon iai i roura aia taeka burabeti ae e ataki riki koauana; are kam karaoa ae raoiroi iai ngkana kam mutiakinna, ba kaanga te bwae ae oota n te tabo ae ro ni karokoa e bo mainiku, ao e oti te itoi ni ngaina i nanomi. Ao kam ata aei moa, ba akea te taetae ni burabeti teuana i nanon te Baibara ae konaki ni kaetaki iroun te aomata n oin nanona. Ba e bon aki kanakomaiakaki te taetae ni burabeti n te tai teuana n nanon te aomata: ma a taetae aomata mairoun te Atua ngke a kairaki iroun te Tamnei are Raoiroi.” (2 Betero 1:19-21) Onikakin Iesu e katereterea riki bwa e kona n onimakinaki ana taetae ni burabeti te Atua. Ti riai ni mutiakina te taeka anne, ma ti na aki mutiakin “karaki-ni-kewe aika kuneaki n te rabakau” aika a aki boutokoaki ke n tangiraki iroun te Atua. Onimakinan te taetae ni burabeti e riai ni kakorakoraki riki n rongorongon onikakin Iesu, ibukina bwa te miitara anne are e kaota mimitongin Iesu ma mwaakana n te Tautaeka n Uea, e a tia ni kakoroaki bukina ngkai. Eng, bon iai koaua aika a aki kona ni kakeweaki aika a kaotia bwa Kristo e mena ma aomata ngkai bwa te Uea ae mwaaka i karawa.

Aron Otin te Itoi ni Ngaina

10. Antai, ke tera, te “itoi ni ngaina” are e taekinaki iroun Betero, ao bukin tera ngkai ko taekina anne?

¹⁰ E korea ae kangai Betero: “Kam karaoa ae raoiroi iai ngkana kam mutiakinna [te taetae ni burabeti], ba kaanga te bwae ae oota n te tabo ae ro ni karokoa e bo mainiku, ao e oti te itoi ni ngaina.” Antai, ke tera, te “itoi ni ngaina”? Bon tii teuana kabonganan taeka aika “itoi ni ngaina” n te Baibara, ao e kuri n tii tebo nanona ma “itoin te ingabong.” Te Kaotioti 22:16 e atonga Iesu Kristo bwa “te itoi ni ngaina ae raneanea.” N taai tabetai inanon ririki nako, aeka n itoi aikai bon kabanea n itoi n oti i mainiku. A oti teutana te tai imwain otin taai, ao a kaota rokon karangainan te bong anne. Betero e kabonganai taeka aika “itoi ni ngaina” n taekina aron Iesu ngke E a tia n anganaki te mwaaka n te Tautaeka n Uea. N te tai anne, e oti Iesu i aon te iuniweeti ni kabuta, ao i aon naba ara aonnaba! Kioina ngkai te Mesia ae te Itoi ni Ngaina ngaia, e kaota rokon karangainan te bong, ke te tai ae boou ibukin te botannaomata ae ongeaba.

11. (a) Bukin tera ngkai 2 Betero 1:19 e aki nanonna bwa e na oti te “itoi ni ngaina” bon inanoia aomata? (b) Ko na kanga ni kabwarabwara nanon 2 Betero 1:19?

¹¹ A mwaiti rairai n te Baibara aika a boutokoa te iango ae aongkoa ana taeka Betero ake a koreaki n 2 Betero 1:19 a taekina buroon te aomata. Rawawatan buroon te aomata ae ikawai, bon tii 9 nakon 11 te aonti. E na kanga Iesu Kristo—ae e a tia n riki bwa te taamnei ae aki mamate ae mimitong i karawa—ni kona n oti ni burooia aomata? (1 Timoteo 6:16) Te koaua bwa iai irekereken nanora ma te bwai aei, bwa ti kabongana nanora ngkana ti mutiakina ana taeka ni burabeti te Atua. Ma tarataraa raoi 2 Betero 1:19, ao ko na noria bwa te Baibara ae te New World Translation e kabonganai koma n te kibu aei ibukin kaokoroan te kibu n taeka ae “ni karokoa e karangaina ma otin te itoi ni ngaina,” ma taeka aika mai imwain aikai, ao taeka aika “i nanomi.” Te kibu aei e kona ni warekaki ni kangai: ‘E kakoauaki riki nakoira te taeka ni burabeti, ao kam karaoa ae riai ngkai kam mutiakinna, bwa kaanga te taura ae ura n te tabo ae ro, are i nanomi, ni karokoa te karangaina ao otin te itoi ni ngaina.’

12. Tera aron nanoia angiia aomata, ma tera te koaua ibukia Kristian ni koaua?

¹² Ma tera aron nanoia aomata aika bubure? E bon ro nanoia n te aro n taamnei! Ma ngkana Kristian ni koaua ngaira, ngkanne kaanga ai aron ae iai te taura ae ura i nanora, ao ngkana akea te taura anne ao a na ro naba nanora. N aron are e kaotaki n ana taeka Betero, Kristian ni koaua a na kamarurungiia ma n ataa te karangaina ae boou, ngkana a mutiakina ana taetae ni burabeti te Atua ae kaoota te aba. A na bon ataia bwa e a tia n oti te Itoi ni Ngaina i aon te karikibwai ni kabane, ao tiaki i nanoia aomata aika tangiri bwain te rabwata.

13. (a) Bukin tera ngkai ti kona ni kakoaua bwa e a tia ngkai n oti te Itoi ni Ngaina? (b) Bukin tera ngkai Kristian a kona n nanomwaaka i aan kangaanga aika a taetae ni burabetinaki iroun Iesu ibukin ara tai aei?

¹³ E a tia n oti ngkai te Itoi ni Ngaina! Ti kona ni kakoaua anne ngkana ti mutiakina ana taetae ni burabeti ae kakannato Iesu, ibukin menana ma aomata. Ni boong aikai, ti namakina kakoroan bukin te taetae ni burabeti anne ngkai a kaoti bwaai n tiaki aroia mai imwaina n aron taiani buaka, roongo, mwaeiein te aba, ao tataekinan te euangkerio ni katobibia te aonnaba. (Mataio 24:3-14) E ngae ngkana ti rootaki ngaira aika Kristian ni kangaanga ake a burabetinaki iroun Iesu, ma ti kona n nanomwaaka iai ma te rau n nano ao te kimwareirei. Bukin tera? Ibukina bwa ti mutiakina ana taeka ni burabeti te Atua ao ti onimakina ana berita ibukin taai aika imwaira. Ti ataia bwa ti a uakaan ngkai ma taai aika moanibaan te raoiroi aika a na roko, ibukina bwa ti a maan ngkai ni mena inanon “tain te toki”! (Taniera 12:4) E kakaiaki aron te aonnaba ngkai, n aron are e burabetinaki n Itaia 60:2: “Ba noria, ane e na rabuna aonaba te ro, ao e na rabuniia kaain aonaba te rotongitong.” A na kanga aomata ni kakaea kawaiia ibuakon te rotongitong aei? Aomata a riai n nanorinano ni mutiakina ana taetae ni burabeti te Atua ngkai, imwain ae e na bwaka nako te tai. Aomata aika a raraoi nanoia a riai n rairaki nakon Iehova ae te Atua, ae Nibwan te maiu ao te oota. (Taian Areru 36:9; Mwakuri 17:28) Tii ngkana a karaoa anne aomata ao a kona ngkanne n reke irouia te oota ni koaua, ao kaantaningan reken te maiu ae moanibaan te raoiroi n te tai ae na roko are te Atua e a tia ni baireia ibukia aomata aika ongeaba.​—Te Kaotioti 21:1-5.

“E a Roko te Oota i aon te Aba”

14. Tera ae ti riai ni karaoia ngkana ti tangiria n nora kakoroan bukin ana taetae ni burabeti te Baibara aika moanibaan te raoiroi?

¹⁴ Te Baibara e katereterea bwa e a tabe ngkai n tautaeka Iesu Kristo bwa te Uea. Ibukina bwa e a anganaki mwaakana n 1914, ao a na boni koro naba bukin taetae ni burabeti aika moanibaan te raoiroi n taai aika imwaira. Ngkana ti kan nora kakoroan bukiia, ti riai ni kaotiira bwa aomata aika nimamanei aika a onimakina Iesu Kristo, ao n raraoma mani mwakuri aika bure, ao buure ake ti karaoi ngke ti nanoro. Aomata aika a tangira te ro a na aki karekea te maiu are aki toki. E kangai Iesu: “Ao aio te bwai ae e kabuakakaki te aba iai, ba e a roko te oota i aon te aba, ao aomata a tangira riki te ro nakon te oota; ba kioina ngkai a bubuaka aia makuri. Ba ane kakaraoa ae buakaka ao e ribaa te oota, ao e aki nako n te oota, ba a kawa ni kaotaki ana makuri ba a bubuaka. Ma ane karaoa te koaua ao e nako n te oota, ba a na kaotaki ana makuri ba a karaoaki i nanon te Atua.”—Ioane 3:19-21.

15. Tera ae na riki ngkana ti kakeaa bongan te kamaiuaki ae katauraoaki iroun te Atua rinanon Natina?

¹⁵ E a roko te oota n taamnei n te aonnaba rinanon Iesu, ao moan te kakawaki bwa ti na ongora irouna. E korea ae kangai Bauro: “Te Atua, are taetae ngkoangkoa irouia burabeti nakoia bakatibu ni makoro aika bati ma aaro aika bati, E taetae naba nako ira ni boong aikai aika kaitira iroun Natina, are E motika bukina ba te tia bwaibwai ni bwaai ni kabane.” (Ebera 1:1, 2) Tera ae na riki ngkana ti kakeaa bongan te kamaiuaki ae katauraoaki iroun te Atua rinanon Natina? E manga reitia ni kangai Bauro: “Ba ngke e riki ni matoa te taeka are taekinaki irouia anera, ao ngke a reke booni buure ni kabane ma aki-ongeaba ni kabane, aika booia aika riai; ao ti na iranira ni kareke maiura ngkana ti aki mutiakina te maiu ae moan te kakanato aei? E a moa n taekinaki iroun te Uea, ao e kakoauaki nako ira irouia ake a ongo; ao E buoka naba kaotana ma ngaiia te Atua n taiani kanikina ma kamimi ma kakai nako ma tibakin te Tamnei are Raoiroi, n ai aron nanona.” (Ebera 2:2-4) Eng, moan te kakawaki Iesu ni kaineti ma kaotiotakin te taetae ni burabeti.​—Te Kaotioti 19:10.

16. Bukin tera ngkai ti kona n onimakina raoi ana taetae ni buraeti Iehova ae te Atua ni kabane?

¹⁶ N aron ae e a tia n ataaki, e kangai Betero: “Akea te taetae ni burabeti teuana i nanon te Baibara ae konaki ni kaetaki iroun te aomata n oin nanona.” A aki kona aomata n otoi taeka ni burabeti aika koaua n tii ngaia, ma ti bon kona n onimakina raoi ana taeka ni burabeti te Atua ni kabane. A riki mairoun Iehova ae te Atua. Rinanon te taamnei ae raoiroi, e kamwaakaia ana toro bwa a na ota ngkai n aron kakoroan bukin taetae ni burabeti ake n te Baibara. Ti bon rangi ni kaitaua Iehova ngkai ti a tia n nora kakoroan bukin taetae ni burabeti aika mwaiti, ni moa man te ririki 1914. Ao ti bon kakoaua raoi bwa taetae ni burabeti tabeua ni kaineti ma tokin te waaki ae buakaka ae ngkai a na boni koro naba bukiia. Moan te kakawaki bwa ti na teimatoa ni mutiakin taetae ni burabeti mairoun te Atua, ngkai ti a tabe ni kaotiota ara oota. (Mataio 5:16) Ai kukurei ra ngaira ngkai Iehova e ‘kaota ana oota ibukira ibuakon te ro’ ae rabuna te aonnaba ni boong aikai!​—Itaia 58:10.

17. Bukin tera ngkai ti kainnanoa te oota n taamnei mairoun te Atua?

¹⁷ Ti a noraba ngkai iai te ota. A kona naba iai n rikirake kaai n amwarake aika ti karekea karara ae kakaokoro nako mai iai. Ti aki kona ni maiu n akea te oota. Tera ngkanne aron te oota n taamnei? E kaiririira ao e kaotii bwaai ake a na riki nakon taai aika a na roko, aika a kaotaki n ana Taeka te Atua ae te Baibara. (Taian Areru 119:105) E tatangira Iehova ae te Atua ngkai e ‘kaotinakoa ana oota ma ana koaua.’ (Taian Areru 43:3) Ti riai ni kaota te kaitau ae bati ibukin bwaai aika ti anganaki n aron aikai. Ti bia karaoa ara kabanea n raoiroi ngkai ni karina te oota ae ‘te atatai ibukin te Atua ae moanibaan te raoiroi’ ae e kaoota nanora.​—2 I-Korinto 4:6, NW; I-Ebeto 1:18.

18. Tera are e a tauraoi ni karaoia ngkai ana Itoi ni Ngaina Iehova?

¹⁸ Ti a rangi ni kakabwaiaki ngkai ti ataia bwa e a oti te Itoi ni Ngaina ae Iesu Kristo n 1914 i aon te iuniweeti ni kabane, ao e a moanna ni kakoroa bukin nanon te miitara ae onikakin Iesu! E mena ma aomata ngkai ana Itoi ni Ngaina Iehova ao e tauraoi ni karaoa nanon te Atua ni kaineti ma kakoroan riki bukin nanon onikakin Iesu—ae “te buaka n te bong are kakanato are ana bongi te Atua, ae Moan te Mwaka.” (Te Kaotioti 16:14, 16) Ngkana e a tia n taekaki te waaki ae ngkai ae e a bane taina, Iehova e na kakoroa bukin ana berita ibukin “karawa ae e bou ma aonaba ae e bou,” ike ti kona ni karaoiroia iai n aki toki bwa te Uea ae Moan te Rietata i aon te iuniweeti, ao te Atua ae e taekin taeka ni burabeti aika koaua. (2 Betero 3:13) Ni karokoa rokon te bong ae kakannato anne, ti bia teimatoa n nakonako n te oota mairoun te Atua, n te aro ae ti mutiakina ana taetae ni burabeti te Atua.

Tera Am Kaeka?

• Ko na kanga ni kabwarabwara aron onikakin Iesu?

• E a kanga ni kakorakoraki riki te onimaki n onikakin Iesu?

• Antai, ke tera ana Itoi ni Ngaina Iehova, ao e oti n ningai?

• Bukin tera ngkai ti riai ni mutiakina ana taeka ni burabeti te Atua?

[Taamnei n iteraniba 13]

Ko kona ni kabwarabwara nanon onikakin Iesu?

[Taamnei n iteraniba 15]

E a tia n oti ngkai te Itoi ni Ngaina. Ko ataia bwa e a kanga n riki anne, ao n ningai?