A Na Aki Tokanikai Akana Buakana Te Atua!
“Ane a na buakaniko; ma a na aki tokanikai i aom: ba I a memena i roum ni kamaiuko, bon ana taeka Iehova.”—IEREMIA 1:19.
1. Tera te mwiokoaki are e reke iroun Ieremia, ao ai maan ra ana tai ni mwakuri iai?
IEHOVA e mwiokoa te tei ae Ieremia n te nakoa ni burabeti nakoia botannaomata. (Ieremia 1:5) E riki aei inanon ana tai Uean Iuta are raoiroi, are Iotia. E waaki nako ana mwakuri ni burabeti Ieremia inanon te tai ae a bati kangaanga iai, are boni mai imwain ana tokanikai Baburon i aon Ierutarem ao ni karokoa te tai are a uotaki nako iai bwa taenikai ana aomata te Atua.—Ieremia 1:1-3.
2. E a kanga Iehova ni kakorakora riki Ieremia, ao tera ae nanonaki ngkana e na buakanaki te burabeti aei?
2 Taeka ni motikitaeka ake e riai n taekin Ieremia a na bae ni karika ribaakina. Mangaia are te Atua e kakorakoraa ibukin bwaai aika a mena imwaina. (Ieremia 1:8-10) N aron anne, e a kakorakoraki riki nanon te burabeti aei n taeka aikai: “Ane a na buakaniko; ma a na aki tokanikai i aom: ba I a memena i roum ni kamaiuko, bon ana taeka Iehova.” (Ieremia 1:19) Buakanakin Ieremia e a nanonaki naba buakanakin te Atua. Ni boong aikai, bon iai naba te koraki ake a toro iroun Iehova aika ai aroia burabeti, ao e kuri n tii teboo naba aia mwakuri ma ana mwakuri Ieremia ngkoa. N aron anne, a ninikoria n tataekina ana taeka ni burabeti te Atua. E a bane n rootaki te botannaomata ngkai n te rongorongo aei, n te aro ae raoiroi ke ae e aki raoiroi, n aron butimwaeana irouia. N ai aron are e riki ngkoa n ana tai Ieremia, bon iai naba ngkai aika a buakana te Atua n te aro are a kairiribai nakoia ana toro te Atua ma aia mwakuri are E mwiokoia iai.
A Tabe ni Buakanaki Ana Toro Iehova
3. Bukin tera ngkai a buakanaki ana toro Iehova?
3 A tabe ni buakanaki ngkai ana aomata Iehova mai moan te ka 20 n tienture. N aaba aika mwaiti, aomata aika a buakaka nanoia a a tia ni kataia n tuuka—ke ni katoka—tataekinan euangkerion ana Tautaeka n Uea te Atua. A kaungaki n aei iroun ara Kairiribai are te kabanea ni buakaka, are te Riaboro, are “e nakonako ... n ai aron te raian ae bekorara, n ukoukora ae e na oongnga.” (1 Betero 5:8) Imwin tokin “aia bong botannaomata aika a motikaki” n 1914, te Atua e a katea Natina bwa te Uea ae boou i aoia kaain te aonnaba, ngke e tuatua ni kangai: “Ko na tauu taeka i buakoia am kairiribai.” (Ruka 21:24, NW; Taian Areru 110:2) E kabongana mwaakana Kristo ni kanakoa Tatan mai karawa, ao e karuoa nako rarikin te aonnaba. Kioina ngkai e ataia te Riaboro bwa e a kimototo ana tai, e a kaota unna i aoia Kristian aika kabiraki ma raoraoia. (Te Kaotioti 12:9, 17) Tera mwiin okiokiia ni buaka, taani buakana te Atua aikai?
4. Baikara kataaki ake a riki irouia ana aomata Iehova inanon tain te Moan Buaka are Kabuta te Aonnaba, ma tera are riki n 1919 ao 1922?
4 Ana toro Iehova aika kabiraki a kaitara ma kataakin aia onimaki n itera aika mwaiti inanon te Moan Buaka are Kabuta te Aonnaba. A kakanikoaki ao a oteaki keewe ibukiia, a kaeaki irouia taan iowawa, ao a batiboaki. N aron are e taetae ni burabetinaki iroun Iesu, a riki n “ribaki irouia botanaomata ni kabaneia.” (Mataio 24:9) Ibuakon te mangaongo n tain te buaka, te koraki ake a kairiribai nakon ana Tautaeka n Uea te Atua, a kabongana te mwaan are e kabonganaki ibukin eekakinakoan Iesu Kristo rimoa. A kewe ni bukinia ana aomata Iehova bwa aongkoa a karitei nakon te tautaeka, ao a kataia iai n eeka nako ana botaki te Atua i aon te aonnaba. Ni Mei 1918, a kaotinakoaki beeba ake a kariaia tauakin J. F. Rutherford are e beretitenti n te Watch Tower Society, ma raoraona ni kaan ake itiman. E motikaki kabureakiia mwaane akana waniman akanne inanon te tai ae maan, ao a kainaki ni karabutin te tautaeka i Atlanta, Georgia, U.S.A. A manga kainaaomataki ruaiua te namwakaina imwin anne. Ni Mei 1919, te boowi ni manga tang e motikia bwa e a tia n aki karaoaki raoi te kaetitaeka nakoia taani bukinaki aikai ngke a kateaki n te kaboowi, ao e a taonaki naba te moti arei. Aongkoa e na manga rinanoaki riki te keiti anne ma e a manga buuta ana tang te tautaeka, ao Brother Rutherford ma raoraona a kaitiakaki man kabuakakaia. A manga waakina aia mwakuri, ao e a kakorakoraki riki waakinakin tataekinan rongorongon te Tautaeka n Uea ni bwabwaro ake a booaki i Cedar Point Ohio, n 1919 ao 1922.
5. A kanga aroia Ana Tia Kakoaua Iehova ake a mena i Tiaman are e tautaekanaki irouia taian Nazi rimoa?
5 A rikirake tautaeka tabeua ake e tauaki te mwaaka iai iroun te aomata ae tii temanna, imarenan 1930 nakon 1940 , ao a botaki Tiaman, Itare, ao Tiaban n te rabwata are e aranaki bwa te Axis. Teutana imwin 1930, ao e a tabekaki te bainikirinaki ae moan te iowawa nakoia ana aomata te Atua, ao e a moamoa riki i Tiaman are e tautaekanaki irouia taian Nazi. E katabuaki aia mwakuri. A niniaki auti ao a tauaki ni katikaki kaaia. Ngaa ma ngaa ake a kainaki inanon auti ni kaikain ibukina bwa a rawa ni kakeaa aia onimaki. Buakanakin te Atua ma ana aomata e a waakinaki i aan te kaantaninga are a na boni kamaunaaki Ana Tia Kakoaua Iehova n te aono arei are e tautaekanaki n te matoatoa. Ngke a tangitang nakon te kaboowi i Tiaman ibukin inaaomataia taani Kakoaua aikai, te Botaki ni Mwakuri ae Tabe ma te Kaetitaeka i Tiaman n te tai anne, e katauraoa ana taeka ae abwabwaki n tuka aron reken te tokanikai irouia taani Kakoaua aikai. E kangai: “Taiani boowi a aki riai ni konaaki ni kaetieti ibukin waakinan te mwakuri i aan te tua; ma a riai ni kakaea ma ni kunei aia aanga ake a kona iai ni kakoroa bukin tabeia, n aki tukaki ni kaetieti aikai.” E nanonaki iai bwa e aki kona n reke iai te kaetitaeka raoi. A taku taian Nazi bwa e iowawa aia mwakuri Ana Tia Kakoaua Iehova ke e boto i aon te kairiribai, ao e ‘tabarea ana waaki te tautaeka ae te National Socialistic.’
6. Tera are e karaoaki ibukin katokan ara mwakuri inanon tain te Kauoua ni Buaka are Kabuta Aonnaba, ao imwina?
6 Inanon te Kauoua ni Buaka are Kabuta te Aonnaba, e katabuaki ma n totokoaki aia mwakuri ana aomata te Atua ake i Aotiteria, Kanata, ao aaba tabeua riki aika reitaki ma te Kamwanuareta n Engiran—i Aberika, Atia, ao abamwakoro ake n te Caribbean ao te Betebeke. N te United States , kairiribai aika bwakuaku ao aomata aika a aki ataa raoi te rongorongo iai, a kariki kangaanga “rinanon te moti ae e buakaka.” (Taian Areru 94:20, NW) Ma kangaanga aika reitaki ma karinean te buraeki ao katabuakakin tataekinan te rongorongo man te auti teuana nakon te auti teuana, a uotaki nakon taiani kaboowi, ao a reke mooti aika raraoi iai n te United States, aika a boutokoa inaaomataia aomata ni waakina aia taromauri. N ana ibuobuoki Iehova, a aki tokanikai iai kairiribai. Ngke e a toki te buaka i Eurobe, e a manga kainaaomataki naba aia mwakuri. A kainaaomataki taani Kakoaua aika ngaa ma ngaa mwaitiia ake a kainaki n auti ni kaikain, ma tiaki anne tokin aia kangaanga. N tokin te Kauoua ni Buaka are Kabuta te Aonnaba, e a manga moanaki te itabarara imarenaia botannaomata, ae aranaki bwa te Cold War. Aaba ake i Eurobe Mainiku a manga karawawataia naba ana aomata Iehova. Tautaeka a waakina tukakin ao katokin ara mwakuri n tataekina te rongorongo, katokakin kabutan booki aika kabwarabwara te Baibara, ao kamaunan ara botaki. A mwaiti ake a karabutinaki ke a kainaki inanon taabo ike a kauunganaki iai.
Waakinakoan Tataekinan te Rongorongo!
7. Tera ae riki nakoia Ana Tia Kakoaua Iehova ake a mena i Poland, Rutia, ao aaba tabeua riki, inanon ririki ake a tibwa nako?
7 Ngke e a waakinako te tai, e a karababaki riki tataekinan rongorongon te Tautaeka n Uea. E ngae ngke e a tautaekanaki irouia Komuniti te aba ae Poland, ma e kariaiakaki iai karaoan bwabwaro aika maanna teuana te bong, n te ririki ae 1982. A booaki naba iai bwabwaro aika international, n 1985. A manga booaki iai bwabwaro aika international aika rangi ni bubura n 1989, ao ngaa ma ngaa aomata aika a roko mai Rutia ao Ukraine. N te ririki anne, Hungary ao Poland a angania Ana Tia Kakoaua Iehova kinaakia i aan te tua. E a bwaka Oon Berlin n 1989. Tabeua te namwakaina imwin anne, ao ti anganaki naba kinaakira i aan te tua i Tiaman Mainiku, ao teutana te tai imwin anne ao e a booaki te bwabwaro ae te international i Berlin. N 1990 e baireaki kawarakiia taari ake a mena i Rutia. A kawaraki tabeman kaain te tautaeka ake a mena i Moscow, ao n 1991, Ana Tia Kakoaua Iehova a anganaki kinaakiia i aan te tua. E a korakora rikiraken te mwakuri i Rutia ao aaba ake a mena i aan te Soviet Union rimoa mai imwin te tai anne.
8. Tera are e riki irouia ana aomata Iehova inanon ririki ake 45 mai imwin tokin te Kauoua ni Buaka are Kabuta te Aonnaba?
8 E ngae ngke e kerikaki te bainikirinaki n taabo tabeua, ma e a rikirake riki ni korakora n taabo ake tabeua. Inanon ririki aika 45 imwin te kauoua ni buaka are kabuta te aonnaba, a mwaiti aaba ake a rawa n angania Ana Tia Kakoaua Iehova kinaakiia i aan aia tua. Irarikin anne, ti a katabuaki, ke e katabuaki ara mwakuri, n aban Aberika ake 23, aban Atia aika 9, aaba ake 8 i Eurobe, 3 i Amerika Maiaki, ao abamwakoro aika 4.
9. Tera ae rinanoaki irouia ana toro Iehova i Malawi?
9 E tiritiri te bainikirinaki ae taonia Ana Tia Kakoaua Iehova ake i Malawi, ni moa man 1967. Ibukina bwa Kristian ni koaua ngaiia aika a tei i nuka ni kaineti ma waaki n tautaeka, raoraora n onimaki ake a maeka iai a rawa ni kabooa aia beeba ae kaotia bwa a kaaina te botaki n tautaeka teuana. (Ioane 17:16) Imwin ana boowi te Malawi Congress Party are e booaki n 1972, e a manga waakinaki riki te tiritiri iai. A kakioaki nako mani mweengaia taari, ao e aki kariaiakaki kamwakuraia irouia taani kamwakuri. Ngaa ma ngaa mwaitiia ake a biri nako man te aba anne, bwa a aonga n rawei maiuiia. Ma a tokanikai iai taani buakana te Atua ao ana aomata akekei? A bon aki! Imwin te bitaki n te aba anne ao e a reke te mwaiti ae te kabanea ni bubura ibukia taan ua rongorongo ibukin te Tautaeka n Uea i Malawi, ae 43,767 n 1999, ao a raka riki nakon 120,000, mwaitiia aomata ake a kaei bwabwaro n district ake a karaoaki iai. E a bon tei naba te aobiti ae boou ibukin mwaangan te Totaieti ni kautun kaawan te aba anne.
A Kakaea Aia Anga n Ibukibuki
10. N ai aron Taniera, tera are a a tia ni karaoia ana aomata te Atua aika maiu n taai aikai?
10 Akana a a tia ni kitana ke ni kabwaoa te koaua, mataniwi n Aaro, ao aomata tabeman riki, a aki kona ni kariaia ara rongorongo ae boto i aon ana Taeka te Atua. A kairoroaki irouia Aaro ni Krititentom taan riribai, bwa a na kakaei aanga ake aongkoa a kariaiakaki i aan te tua, ake a na kabongana ibukin kaotan riain buakanakira. Baikara mwakuri ake a kabonganaki n taai tabetai? Tera are a karaoia kairiribai ngkoa ngke a buakana te burabeti are Taniera? Ti wareka ae kangai n Taniera 6:4, 5: “Ao beretitenti ma teterabi a ukoukora rekeni bukinan Taniera nakon te aro n tautaeka; ma a aki kona ni kunea te bwai teuana ke ana buakaka teuana; ba kioina ngke e kakaonimaki, ao e aki noraki naba te bure teuana ma te buakaka teuana i nanona. Ao a taku aomata akanne, Ti aki kona ni karekea bukini bukinan Taniera aei, ngkana ti aki karekea bukinana n ana tua Atuana.” Ni boong aikai, a tabe ni kakaea naba aia anga ake a kona n ibukibuki iai taan riribai aikai. A bwabwarantiko n taekin “katei n Aro aika karuanikai,” ao a kataia ni bukinia naba Ana Tia Kakoaua Iehova iai. Rinanon te kabuakaka aei, taeka aika a karika te nanououa irouia aomata, ao taiani kewe, a buakana ara taromauri ao arora ni kakairi ni kaetieti mairoun te Atua.
11. Baikara bukibuki ni kewe ake a tabekaki irouia taan ribaia Ana Tia Kakoaua Iehova tabeman?
11 N aaba tabeua, botaki n Aro ao n tautaeka tabeua a rawa ni kariaia bwa ti a tabe ngkai ni waakina “te aro n taromauri ae itiaki ao e aki bareka imatan Atuara.” (Iakobo 1:27 NW) E ngae ngkai ara waaki ni Kristian e waakinaki ngkai n aaba aika 234 mwaitiia, ma taan riribai a taekinna bwa ngaira bon tiaki te “Aro ae ataaki.” Teutana te tai imwain moanakin te bwabwaro n international n 1998, te nuutibeeba teuana i Athens, e mwanewea aia taeka mataniwi n te Aro ae te Greek Orthodox, aika a taku bwa “[Ana Tia Kakoaua Iehova] bon tiaki te ‘Aro ae ataaki,’ ” e ngae ngke te boowi ae te European Court of Human Rights e a tia n anga ana moti tabeua te bong imwaina are e boni bobuaka ma aia taeka te koraki akanne. Tabeua te bong imwin anne, te nuutibeeba teuana n te kaawa anne e mwanewea naba ana taeka te tia taetae ibukin te Aro anne are e taku bwa: “[Ana Tia Kakoaua Iehova] bon tiaki ‘te ekaretia ni Kristian,’ ibukina bwa akea irekerekeia ma te onimaki ni Kristian ae kaotaki iroun te aomata ae Iesu Kristo.” E kamimi anne, bwa n taraakina, akea riki te botaki n Aro teuana are e rangi ni katuua aron katotongan aroaron Iesu, bwa tii kaain Ana Tia Kakoaua Iehova!
12. Tera arora ae riai ngkai ti waakina ara buaka n taamnei?
12 Ti kataia ni kamanoa ma ni boutokoa te euangkerio rinanon kabonganan tuan te aba. (I-Biribi 1:7) Irarikin anne, ti na aki kakeaa ke ni kamaraua korakoran nanora ni kani kakairi n ana kaetieti te Atua ibukin te raoiroi. (Tito 2:10, 12) N ai aron Ieremia, ti ‘kabaea nukara n tuangia aomata bwaai ni kabane ake e tuangira Iehova,’ ao ti aki kariaia kakamaakakira irouia akana a buakana te Atua. (Ieremia 1:17, 18) Ana Taeka Iehova ae Tabu e a tia ni katereterea arora aika eti aika ti riai ni kaotiotii. Ti aki kona n onimakina “te anganibai ae te iriko” ae mamaara, ke ni kakaea kamanoara n “nun Aikubita,” are nanona, te aonnaba aei. (2 Rongorongo 32:8; Itaia 30:3; 31:1-3) Ti riai n teimatoa ni mwiokoa Iehova ma nanora ni kabane ngkai ti tabe ni buaka n te buaka n taamnei, ma ni kariaia kairan kawaira irouna, ma ti na aki onimakina oin ara ataibwai. (Taeka N Rabakau 3:5-7) Ngkana ti aki boutokoaki iroun Iehova ao e aki kamanoira, ao e na “matebuaka” ara mwakuri.—Taian Areru 127:1.
A Bainikirinaki, ma A Aki Kakeaa Aia Onimaki
13. Bukin tera ngkai e kona n taekinaki bwa e aki tokanikai buakanakin Iesu iroun Tatan?
13 Te katoto ae te kabanea n raoiroi n aron te aomata ae kakaonimaki iroun Iehova ae e aki kakeaa ana onimaki, bon Iesu, are e bukinaki n te bukibuki ni kewe are aongkoa e karitei nakon te tautaeka ao e urua te aro ae riai. Ngke e a tia n rinanon ana keiti Iesu, e kukurei Birato ni kainaaomataa. Ma aomata aika uanao ake a kairaki irouia mataniwi n Aro, a takaruaia bwa e riai n tauraki Iesu, e ngae ngke akea ana bure. A aki kubara Iesu ma a tangira kainaaomatakin Baraba—are te aomata are e kabureaki ibukin te karitei nakon te tautaeka ao te tiriaomata! Birato e a manga kataia riki n anaa nanoia taan riribai ake a kawimatoaia akekei, ma n tokina, e a ira nanoia kaain te koraki ae uanao aei. (Ruka 23:2, 5, 14, 18-25) E ngae ngke e mate i aon te kai ni kammaraki Iesu, ma e aki tokanikai ana mwakuri ae iowawa Tatan nakon Natin te Atua ae akea ana bure, bwa Iehova e a manga kauta Iesu man te mate, ao e karietataa nakon Angataina. Ao n te bong ni Bentekota n 33 C.E., rinanon Iesu are e a tia ni karietataaki, e a kabwaroaki te taamnei ae raoiroi, ao e kateaki te ekaretia ni Kristian iai—ae “te bwai ae karikaki ae boou.”—2 I-Korinto 5:17, NW; Mwakuri 2:1-4.
14. Tera ae riki ngke aia Aro I-Iutaia a buakania taan rimwin Iesu?
14 Teutana te tai imwin anne ao botaki n Aro a kakamaakuia abotoro. Ma taan rimwin Kristo akekei a aki katoka tataekinan rongorongon bwaai ake a a tia n nori ma n ongo. A tataro ni kangai taan rimwin Iesu: “[Iehova], Ko na tarai aia taeka ni kamaku ngkai: ao Ko na angania am toro te taekina am taeka n aki maku teutana.” (Mwakuri 4:29) E kaeka aia bubutii Iehova n te aro are e kaoniia n te ta mnei ae raoiroi, ao e kakorakoraia bwa a na teimatoa n taetae n akea te maaku. E aki maan ao a manga tuangaki riki abotoro bwa a na katoka tataekinan te rongorongo, ma e kangai Betero ma abotoro tabeman: “E riai riki iran nanon te Atua nakon iran nanoia aomata.” (Mwakuri 5:29) Taeka ni kamaaku, tauakiia, ao batiboakiia, a aki kona n tukiia man karababan riki aia mwakuri ibukin te Tautaeka n Uea.
15. Antai Kamariera, ao tera ana reirei nakoia kaain te Aro ake a ribaia taan rimwin Iesu?
15 Tera aroia mataniwi n Aro iai? “A nanomaraki n un, ao a iangoa aron kamateaia [abotoro].” Ma iai te tia anga reirei i aon te Tua are e mena iai, are arana Kamariera, ae te Baritaio are e karineaki irouia aomata ni kabane. E katinanikuia abotoro man autin te Tanirim ni kamaaniia teutana, ao e reireinia taani kairiribai ibukin te Aro akekei ni kangai: “Mwaane aika Iteraera, kam na tarataraingkami n are kam nang karaoia nakoia aomata aikai. . . . I taku nako imi ngkai ba kam na taon nanomi nakoia aomata aikai, ao tai tukiia: ba ngkana tao aia bwai aomata te taeka aei ke te makuri aei, ao bon akea mwina: ma ngkana ana bwai te Atua, ao kam aki kona n urua; ba kam kawa n noraki iai ba kam buakana te Atua.”—Mwakuri 5:33-39.
Akea te Kai-ni-buaka Teuana ae na Tokanikai I Aora
16. N oin am taeka, ko na kanga ni kabwarabwara ana taeka ni karau nano Iehova nakoia ana aomata?
16 E raoiroi ana reirei Kamariera, ao ti kukurei ngkana aomata tabeman a tei ibukira. Ti ataia naba bwa te inaaomata n taromauri e a tia ngkai ni boutokoaki irouia taani moti, ni boowi ake a karaoi moti aika aki-tabe itera. Arora ni kakairi n ana Taeka te Atua e aki kakukureia nanoia mataniwi n Aro ni Krititentom ao mataniwi tabeman riki aika kaain Baburon ae Kakannato, ae te botaki n Aro ae kewe ae katobibia te aonnaba. (Te Kaotioti 18:1-3) E ngae ngkai ngaiia ao ake a kairaki irouia a tabe ni buakanira ngkai, ma bon iai te taeka ni karau nano aei ae buokira: “Bon akea te kai-ni-buaka teuana ae karaoaki n ekiko nako ae na tokanikai; ao ane ko na kabuakakai neewe ni kabane aika tei rake n ekiko nako ngkana e kaetaki taekam. Ai ngaia anne tibangaia ana toro Iehova, ao aia raoiroi ae reke mai Rou, bon ana taeka Iehova.”—Itaia 54:17.
17. Bukin tera ngkai ti ninikoria, e ngae ngkai a buakanira taan riribai?
17 A buakanira ara kairiribai n akea raoi bukina, ma ti aki biu iai. (Taian Areru 109:1-3) Ti aki kona ni kariaia aomata aika a riba ara rongorongo man te Baibara bwa a na kamaakuira n te aro ae ti na kakeaa ara onimaki. E ngae ngkai ti kaantaningaia bwa e na kakorakoraki riki buakanakira n taai aika a na roko, ma ti bon ataa mwiina ae na reke. N ai aron Ieremia, ti na namakina aron kakoroan bukin taeka ni burabeti aikai: “Ao ane a na buakaniko; ma a na aki tokanikai i aom: ba I a memena i roum ni kamaiuko, bon ana taeka Iehova.” (Ieremia 1:19) Eng, ti ataia bwa a aki kona n tokanikai akana a buakana te Atua!
[Kabwarabwara ae nano]
Tera Am Kaeka?
• Bukin tera ngkai a buakanaki ana toro Iehova?
• Tera aroaroia tabeua taan riribai ni buakania ana aomata Iehova?
• Bukin tera ngkai ti kona ni kakoaua bwa a na aki tokanikai akana a buakana te Atua?
[Taamnei n iteraniba 17]
E kakoauaki nakon Ieremia bwa e na memena irarikina Iehova
[Taamnei n iteraniba 18]
Aomata ake a maiu imwin kainakiia n auti ni kaikain
[Taamnei n iteraniba 18]
Te iowawa ae tiritiri ae waakinaki irouia aomata aika uanao, nakoia Ana Tia Kakoaua Iehova
[Taamnei n iteraniba 18]
J. F. Rutherford ma raoraona
[Taamnei n iteraniba 21]
A aki tokanikai iai taani buakana te Atua, aika a kaitara Iesu