Ðeji dó Nǔbǐwúkpétɔ́ wɛ̌kɛ́ ɔ tɔn wú

1. Nǔ baɖabaɖa tɛ́ lɛ́ ka gbo Jɔbu?

ÐIBLA nyí nǔ e nya nǔɖitɔ́ hwexónu tɔn Jɔbu ɖó lɛ́ é bǐ wɛ é ba kpo. Vǐ tɔn lɛ́ bǐ kú, é jɛ azɔn syɛ́nsyɛ́n, bɔ dɔkun tɔn lɛ́ gblé. Gɔ́ ná ɔ, nyǐkɔ ɖagbe e é ɖó é gblé. Nǔ e “xɔ́ntɔn” tɔn lɛ́ ɖɔ lɛ́ é gěgé kú awakanmɛ n’i. Awakanmɛ tlɛ kú asivɛ́ tɔn lɔ káká bɔ é byɔ́ ɛ ɖɔ é ní “dó nu Mawu bo kú.” (Jɔb. 2:9; 15:4, 5; 19:1-3) Nǔ baɖabaɖa énɛ́ lɛ́ e jɛ é sixú ko zɔ́n bɔ jiɖe e Jɔbu ɖó dó Mawu nǔgbó ɔ wú é xo akpa, bɔ é sixú xo nǔ kpɔ́n ɖɔ Jexóva ka nɔ nya xɛ ɖo mɛ ɖěɖěe yí wǎn n’i bo ɖo sinsɛn ɛ wɛ lɛ́ é jí dóó a jí.

2-3. Étɛ́ mǐ ka sixú jɛ kinkanbyɔ́ mǐɖée jí? Étɛ́ lɛ́ mǐ ka ná kplɔ́n ɖo wěma Jɔbu tɔn mɛ?

² Hweɖélɛ́nu ɔ, mǐ lɔ sixú ɖí xwi xá ninɔmɛ ɖé lɛ́ bɔ yě ná tɛ́n jiɖe e mǐ ɖó dó Jexóva wú é kpɔ́n dó nǔjɔnǔ mɛ. Mǐ ɖo gbɛ nɔ wɛ ɖo “hwenu e syɛ́n bo vɛ́ wǔ bɔ è ná ɖí xwi xá lɛ́ é” mɛ. (2 Tim. 3:1) Ényí mǐ ɖo tagba ɖě jɛ ɖě gǔdo lɛ́ mɔ wɛ ɔ, agbɔ̌n sixú wá kpé mǐ, bɔ mǐ mɔ ɖɔ mǐ kún sɔ́ ná kpé wú bo dɛ ɖo yě nu ó. Tagba mɔ̌hun lɛ́ zɔ́n bɔ mɛɖé lɛ́ ko kanbyɔ́ yěɖée ɖɔ nǔ émítɔn ka nɔ ɖu ayi mɛ nú Jexóva nǔgbó a jí.

³ Ényí nǔ ko cí mɔ̌ nú hwi lɔ kpɔ́n hǔn, ma nú awakanmɛ kú we ó. Jɔbu kplɔ́n ɖɔ Jexóva nɔ hwlɛ́n mɛ e ɖo gbejí n’i lɛ́ é. Mǐ lɔ sixú ɖeji bǐ mlɛ́mlɛ́ dó Tɔ́ mǐtɔn jǐxwé tɔn ɔ wú. Bo ná dó d’alɔ mǐ nú mǐ ná kpé énɛ́ wú ɔ, mǐ ná gbéjé wěma Jɔbu tɔn kpɔ́n, bo ná kpɔ́n lěe é vɔ́ gǎnjɛwú ná mǐ dó nǔ tají we élɔ́ lɛ́ wú gbɔn é: Nukɔntɔn, Jexóva ɖokpónɔ géé wɛ nyí Acɛkpatɔ́ Nǔbǐwúkpétɔ́ wɛ̌kɛ́ ɔ tɔn. Wegɔ́, Mawu mǐtɔn Ajalɔ̌nlɔn ɔ ɖó hlɔ̌nhlɔ́n bo ná bló bɔ linlin e é ko ɖó é ná jɛnu, bo lɛ́ nya xɛ ɖo mɛsɛntɔ́ tɔn lɛ́ jí bɔ nǔɖé ná wa nǔ dó yě wú ɖo gbigbɔ kpó agbaza kpó lixo káká sɔ́yi ǎ.

SATÁAN WÁ XWETƆ́N ÐO TƐ́NTIN YĚTƆN

4. Mɛ̌ ka wá xwetɔ́n ɖo kplé e è bló ɖo jǐxwé bɔ wěma Jɔbu tɔn ɖɔ xó tɔn é domɛ?

⁴ É wá su gbe ɖokpó, “bɔ wɛnsagun Mawu tɔn lɛ́” kplé ɖo Jexóva nukɔn. Tan ɔ ɖɔ gɔ́ ná ɖɔ: “Satáan . . . lɔ wá xwetɔ́n ɖo yě tɛ́ntin.” (Jɔb. 1:6) Azɔn nukɔntɔn e nyǐkɔ “Satáan” ɔ tɔ́n ɖo Biblu mɛ é nɛ́. È ylɔ́ ɛ ɖɔ mɔ̌, ɖó é nɔ klán gbe xá Jexóva. Hwenɛ́nu ɔ, Satáan sɔ́ nyí vǐ Mawu tɔn gbejínɔtɔ́ ǎ. É ko húzú kɛntɔ́ Jexóva, wɛnsagun gbejínɔtɔ́ lɛ́ kpó gbɛtɔ́ gbejínɔtɔ́ lɛ́ bǐ kpó tɔn. Hwenu e Jexóva ɖɔ xó e ɖo Bǐbɛ́mɛ 3:15 mɛ é ɔ, é xlɛ́ ɖɔ Satáan kún sɔ́ ɖo xwédo émítɔn mɛ ó. Mɔ̌ mɛ ɔ, Satáan ɖo “nyɔ̌nu ɔ,” énɛ́ wɛ nyí xwédo Jexóva tɔn e mɛ nǔɖíɖó gbigbɔ tɔn lɛ́ ɖe, bɔ “kúnkan” ɔ ná gosín mɛ é mɛ ǎ.

5. Étɛ́ nǔ e è ɖɔ ɖo kplé ɔ domɛ ɖo jǐxwé é ka kplɔ́n mǐ?

⁵ Jexóva bló bɔ è wlán nǔ e jɛ ɖo kplé énɛ́ tɛnmɛ ɖo jǐxwé é dó Biblu mɛ. Xó Satáan tɔn lɛ́ xlɛ́ ɖɔ jidómɛtɔ́ e báɖá tawun é wɛ n’i. (Jɔb. 1:9; sɔ́ jlɛ́ dó Nǔɖexlɛ́mɛ 12:10 wú.) Blǒ e Jexóva bló bɔ è wlán nǔ énɛ́ e jɛ é dó Biblu mɛ é vɔ́ jiɖe ná mǐ ɖɔ é nɔ zán acɛ ɖaxó e é ɖó é ɖo ali ɖé nu bɔ nǔ bǐ nɔ vɔ ɖ’é wú. Tan ɔ lɛ́ xlɛ́ ɖɔ Nǔbǐwúkpétɔ́ ɔ nɔ ɖó dogbó nú nǔ e mɛ ɖěvo lɛ́ sixú wa é.

JEXÓVA NƆ ÐÓ DOGBÓ LƐ́ AYǏ

6. Nɛ̌ Jexóva ka xlɛ́ ɖɔ émí ɖó acɛ dó nǔ lɛ́ jí ɖo kplé e è bló ɖo jǐxwé é domɛ gbɔn? (Jɔbu 1:7, 8)

⁶ Xa Jɔbu 1:7, 8. Jexóva xlɛ́ ɖɔ émí ɖó acɛ dó nǔ lɛ́ jí ɖo kplé énɛ́ domɛ. É kanbyɔ́ Satáan ɖɔ: “A ma mɔ mɛsɛntɔ́ ce Jɔbu a?” Jexóva tuun ɖɔ Satáan ɖo biba ná wa nǔ dó Jɔbu wú wɛ. Mi nú mǐ ní kpɔ́n lěe Jexóva ná zán hlɔ̌nhlɔ́n tɔn ma ɖó dogbó ɔ dó Jɔbu tamɛ gbɔn é.

7. Sɔgbe xá Jɔbu 1:10, 11 ɔ, étɛ́ Satáan ka ɖɔ dó mɛ ɖěɖěe nɔ sɛn Jexóva lɛ́ é wú?

⁷ Xa Jɔbu 1:10, 11. Jexóva wɛ nyí Nǔbǐwúkpétɔ́ wɛ̌kɛ́ ɔ tɔn, bo nɔ zán acɛ tɔn kpó hlɔ̌nhlɔ́n tɔn kpó ɖo ali e sɔgbe é nu. (Jel. 32:17; Dan. 4:35) É ɖo mɔ̌ có, Satáan ɖɔ ɖɔ Jexóva kún nɔ zán acɛ tɔn ganjí ó. Ðiɖɔ wɛ Satáan ɖe ɖɔ nǔ ɖagbe e Mawu nɔ ná gbɛtɔ́ lɛ́, lěe é bló gbɔn nú Jɔbu é ɖɔhun é wú wɛ yě nɔ sɛn ɛ. Satáan lɛ́ ɖo ɖiɖɔ wɛ ɖɔ cejɛ́nnábí kɛ́ɖɛ́ wú wɛ gbɛtɔ́ lɛ́ nɔ sɛn Jexóva. Nɛ̌ Jexóva ka wa nǔ gbɔn?

8-9. Dogbó e ɖo wɛn é tɛ́ Jexóva ka ɖó nú Satáan? Aniwú? (Jɔbu 1:12) (Kpɔ́n ɖiɖe ɔ lɔmɔ̌.)

⁸ Xa Jɔbu 1:12. Jexóva hun ali nú Awǒvi nú é ná tɛ́n nǔ e ɖɔ wɛ é ɖe é kpɔ́n. Amɔ̌, é ɖó dogbó n’i. Mawu ɖɔ nyi wɛn ɖɔ: ‘Ma nú alɔ towe jɛ Jɔbu wú ó.’ Wɛnsagun e ɖo kplé ɔ domɛ lɛ́ é bǐ nukúnmɛ wɛ Jexóva dó sɛ́n énɛ́ nú Satáan ɖe. É sixú zɛ dogbó énɛ́ wú ǎ. Bɔ nǔ ɖokpó ɔ wɛ nɔ lɛ́ jɛ ɖo égbé. Jexóva zán acɛ tɔn kpó hlɔ̌nhlɔ́n tɔn kpó dó nya xɛ ɖo Jɔbu kpó nyǐkɔ éɖésúnɔ tɔn kpó jí.

⁹ Satáan xo ahwan nukɔntɔn e é tɔ́n Jɔbu é kpo bǐ mlɛ́mlɛ́. Jɔbu kpo ɖo gbejí nú Tɔ́ tɔn jǐxwé tɔn ɔ. (Jɔbu 1:22) Amɔ̌, adɔn kpo ɖo te.

10. Étɛ́wú Jexóva ka tin bɔ Satáan lɛ́ tɛ́n Jɔbu kpɔ́n? (Jɔbu 2:2-6)

¹⁰ Xa Jɔbu 2:2-6. Satáan lɛ́ flɔ́ zo dó glɔ̌ nú gǎn e dó wɛ é ɖe bónú Jɔbu ná jó Jexóva dó é. É ɖɔ ɖɔ Jɔbu ná dó nu Mawu bá dó hwlɛ́n gbɛ éɖésúnɔ tɔn jɛ́n wɛ. Bá dó ɖe ɖɛ xó ɔ ɔ, Jexóva tin bɔ Awǒvi dó azɔn baɖabaɖa ɖé nya gbejínɔtɔ́ énɛ́. Amɔ̌, Jexóva lɛ́ ɖó dogbó n’i, bo ɖɔ: “Ma nú alɔ towe jɛ gbɛ tɔn wú ó.” Satáan ɖó ná wa nǔ sɔgbe xá dogbó énɛ́. Mǐ mɔ ɖɔ Ajalɔ̌nlɔn ɔ ɖó acɛ dó nǔ lɛ́ jí ɖo mɛtɛ́nkpɔ́n Jɔbu tɔn hwenu azɔn ɖěvo, ɖó Satáan sixú wa nǔ zɛ dogbó e Jexóva ɖó n’i lɛ́ é wú ǎ.

JEXÓVA ÐÓ NǓ JƆBU SÍN WǓVƐ́ LƐ́ NU

11. Ée Jexóva ɖó nǔ tagba Jɔbu tɔn lɛ́ nu gúdo é ɔ, nɛ̌ é ka d’ajɔ ɛ gbɔn? (Jɔbu 42:10-13)

¹¹ Xa Jɔbu 42:10-13. É wá za wě ɖɔ Jɔbu kún ɖo gbe ná jó wɛ ó, bɔ Jexóva d’afɔ xó ɔ mɛ bo ɖó nǔ ahwan e tɔ́n ɛ wɛ Satáan ɖe é nu. Ðo ninɔmɛ élɔ́ ɖésú mɛ ɔ, gbeklánxámɛtɔ́ ɔ ɖó hlɔ̌nhlɔ́n e ná sú ali dó gbeta Jexóva tɔn é ǎ. Satáan sɔ́ ɖó acɛ ɖě bo ná kpo ɖo ahwan tɔ́n mɛsɛntɔ́ vívɛ́ Jexóva tɔn Jɔbu wɛ tlɔlɔ ǎ.

12. Nǎ kpɔ́ndéwú lěe nǔ lɛ́ wá yi gbɔn nú mɛ ɖěɖěe ɖeji dó hlɔ̌nhlɔ́n mɛhwlɛ́ngán tɔn Jexóva tɔn wú lɛ́ é tɔn ɖokpó.

¹² Jexóva ko zán hlɔ̌nhlɔ́n tɔn dó hwlɛ́n mɛsɛntɔ́ tɔn gěgé ɖo azǎn gǔdo gúdo tɔn lɛ́ mɛ. Ði kpɔ́ndéwú ɔ, ɖo 1945 ɔ, Kúnnuɖetɔ́ 230 xo gló kú baɖabaɖa ɖé ɖo yadónúmɛkpá Nazi tɔn ɖé mɛ. Yě ɖɔ xó élɔ́ dó gbeta e kɔn yě wá b’ɛ kunkplá nǔ baɖabaɖa e xá yě é wú: “Mǐ gbɔn hwenu yadónúmɛ tɔn syɛ́nsyɛ́n gaga ɖé mɛ wá yi, bɔ mɛ ɖěɖěe gán ɖ’é mɛ lɛ́ é ɔ, é cí nǔ ɖɔ è dɔn yě sín myɔkpó ɖé mɛ, bɔ è kún ka se azɔwán vɔ́vɔ́ ɖo yě wú ó ɖɔhun. . . . É nyɔ́ wa ɔ, Jexóva nyí tɔn bɔ hlɔ̌nhlɔ́n ɖo yě wú tawun.” Yě ɖɔ gɔ́ ná ɖɔ: “Ée mǐ jɛ te sín kinnikínní lɛ́ do mɛ din é ɔ, nǔ ɖokpó e ba wɛ mǐ ɖe é . . . wɛ nyí ɖɔ è ní ná gbe mǐ nú mǐ ná sɛn Jexóva . . . káká sɔ́yi. Ajɔ ɖaxó hú gǎn e è sixú dó mǐ é nɛ́.”—Sɔ́ jlɛ́ dó Daniyɛ́li 3:27; 6:22 wú.

13. Ényí a ɖo mɛtɛ́nkpɔ́n lɛ́ ɖí xwi xá wɛ ɔ, jiɖe tɛ́ a ka sixú ɖó? (Kpɔ́n ɖiɖe lɛ́ lɔmɔ̌.)

¹³ Mǐ lɔ sixú gbɔn ninɔmɛ syɛ́nsyɛ́n lɛ́ mɛ ɖo gbɛzán mǐtɔn mɛ cí nǔ ɖɔ kinnikínní do mɛ wɛ è sɔ́ mǐ nyi ɖɔhun. (1 Pi. 5:8-10) Mǐ sixú ba gǎn kpo tawun hweɖélɛ́nu, bo kanbyɔ́ mǐɖée ɖɔ tagba mǐtɔn lɛ́ ka ná wá vɔ gbeɖé a jí. Ðo ninɔmɛ mɔ̌hun lɛ́ mɛ ɔ, nǔ e gbo Jɔbu é flínflín sixú d’alɔ. Mǐ sixú ɖeji bǐ mlɛ́mlɛ́ dó hlɔ̌nhlɔ́n e Jexóva ɖó bo ná ɖó nǔ wǔvɛ́ mǐtɔn lɛ́ nu, é sixú nyí ɖo din alǒ ɖo gbɛ yɔ̌yɔ́ ɔ mɛ é wú. É ná lɔn nú gbɛ élɔ́ ná nɔ te zɛ hwenu e é ko ɖó ná é wú ǎ!

JEXÓVA YÍ WǍN NÚ GBEJÍNƆTƆ́ LƐ́

14-15. Nɛ̌ nǔ ka nɔ cí nú Jexóva dó ajɔ dídó mɛsɛntɔ́ tɔn gbejínɔtɔ́ lɛ́ wú? (Jɔbu 14:15) (Kpɔ́n ɖiɖe ɔ lɔmɔ̌.)

¹⁴ Xa Jɔbu 14:15. Tɔ́ mǐtɔn jǐxwé tɔn ɔ nɔ tɛ́ dó mɛsɛntɔ́ tɔn gbejínɔtɔ́ lɛ́ wú tawun. Yě xɔ akwɛ́ n’i sɔmɔ̌, b’ɛ ba vɛ́návɛ́ná bá fɔ́n yě wá gbɛ. É ná jlá nǔ e kú ko hɛn gblé dó yě wú lɛ́ é ɖó.—Eza. 65:17.

¹⁵ Gbɛ e nu Satáan kp’acɛ dó é mɛ jɛ́n Jɔbu lɛ́ wá nɔ gbɛ ɖe hwenu e wǔvɛ́ tɔn lɛ́ vɔ é có, xó ɖejidéwú e ɖo Biblu mɛ lɛ́ é xlɛ́ ɖɔ Jexóva lɛ́ ná ɛ lanmɛ syɛ́n hunsin ɖagbe, bo tlɛ lɛ́ ná ɛ nǔ hú nǔ e ko gblé n’i lɛ́ é. Nyɔ̌ná ɖěɖěe Jexóva ná wá kɔn dó Jɔbu jí ɖo sɔgúdo lɛ́ é sín tɔ́n kpowun wɛ nyɔ̌ná énɛ́ lɛ́ nyí. Jexóva xlɛ́ ɖɔ émí ba ɖɔ mɛsɛntɔ́ gbejínɔtɔ́ émítɔn lɛ́ ní ɖó awǎjijɛ bǐ mlɛ́mlɛ́, bo lɛ́ ɖu gbɛ víví. Nǔgbó ɔ, Jexóva ná hun ali nú mɛ ɖěɖěe ná ɖe xlɛ́ ɖɔ émí ɖo gbejí n’i lɛ́ é bǐ, bɔ yě ná ɖu gbɛ maɖóblɔ̌ sín vǐví ɖo palaɖísi mɛ. (Nǔɖe. 21:3, 4) Ðó Acɛkpatɔ́ Nǔbǐwúkpétɔ́ wɛ̌kɛ́ ɔ tɔn wɛ é nyí wútu ɔ, é ba ná wa mɔ̌. Xó énɛ́ lɛ́ ná dó gbɔ nú mǐ tawun hwenu e mǐ ná ɖo didɛ wɛ ɖo tagba lɛ́ nu é.

16. Hwɛjijɔ ɖěvo tɛ́ mǐ ka ɖó bá ɖeji dó Acɛkpatɔ́ Nǔbǐwúkpétɔ́ e Jexóva nyí é wú?

¹⁶ Ée Jɔbu nɔ gbɛ nú xwe mɔ̌kpán gúdo é ɔ, é wá kú. Amɔ̌, Acɛkpatɔ́ hlɔ̌nhlɔ́nnɔ wɛ Jexóva nyí, bo tlɛ ɖó hlɔ̌nhlɔ́n dó kú jí. (Sɛ́n. 32:39) Énɛ́ wú ɔ, mɛ ɖěbǔ sixú sú ali dó è bónú é ná gɔn mɛ e é yí wǎn ná lɛ́ é fɔ́n sín kú ǎ. Bɔ nǔ ná nyí mɔ̌ hwenu e é ba dó é.—Hlɔ̌. 8:38, 39.

ÐEJI DÓ JEXÓVA WÚ BǏ MLƐ́MLƐ́

17. Étɛ́ ka xlɛ́ ɖɔ gǎn e Satáan dó bá sú kún dó nú togun Jexóva tɔn é cifo?

¹⁷ Tan Jɔbu tɔn e ɖo Biblu mɛ é ná mǐ hwɛjijɔ ɖagbe e wú mǐ ná ɖeji dó Jexóva wú bǐ mlɛ́mlɛ́ lɛ́ é. É su nukún mǐtɔn mɛ tawun ɖɔ Satáan xo gǎn e é dó bá sú kún dó nú togun Jexóva tɔn é kpo. Mǐ tuun ɖɔ Jexóva wɛ nyí Ajalɔ̌nlɔn ɔ, ɖó gbɛtɔ́ lǐvi tɛ́nnɛ mɔ̌ ɖo sinsɛn ɛ wɛ kpó gbejíninɔ kpó égbé. Azɔn mɔ̌kpán wɛ mǐ mɔ bɔ alyánnú e è tun, bo sɔ́ dó mɛsɛntɔ́ Jexóva tɔn lɛ́ jí é wa nǔtí nú yě ǎ. (Eza. 54:17) Akɔta kpó sinsɛngbɛ́ta kpó e syɛ́n bo cí gan ɖɔhun lɛ́ é kpé wú bo nyínyɛ́ togun Jexóva tɔn e cí mɛ e ma sixú jɛ hun éɖée jí ǎ é ɖɔhun é ǎ. Gɔ́ ná ɔ, nǔ ɖěbǔ sixú sú ali dó mǐ bónú mǐ gɔn nǔgbó ɔ jlá dó Jexóva wú, bo gɔn Satáan e nyí adingbannɔ kpó mɛhutɔ́ kpó é ɖe gba ǎ. Kú tlɛ sixú ɖó mǐ te ǎ, ɖó Jexóva ná fɔ́n mɛ ɖěbǔ e nɔ gbejí n’i bo kú é.—Oz. 13:14.

18. Étɛ́wú mǐ ka sixú kpɔ́n sɔgúdo sɛ́ dó kpó jiɖiɖe kpó?

¹⁸ Nǔ e jɛ ɖo gbɛzán Jɔbu tɔn mɛ é sín tan e mǐ gbéjé kpɔ́n é ná hlɔ̌nhlɔ́n nǔɖiɖi mǐtɔn, bɔ mǐ sixú kpɔ́n sɔgúdo sɛ́ dó kpó jiɖiɖe kpó. Ðo wǔvɛ́ ɖaxó ɔ hwenu ɔ, Satáan kpó ahwan tɔn lɛ́ kpó ná lin ɖɔ é ná bɔ wǔ bɔ è ná ɖu ɖo togun Mawu tɔn jí, bo ná tɔ́n ahwan ɛ. Amɔ̌, lěe é nyí gbɔn ɖo Jɔbu sín hwenu é ɖɔhun ɔ, Jexóva ná ɖ’acɛ dó ninɔmɛ ɔ jí bǐ mlɛ́mlɛ́, bo ná lɔn nú Satáan ná wa nǔ e ná hɛn nǔ gblé dó togun tɔn wú káká sɔ́yi é ɖé ǎ. Hwenu e Jexóva ná ɖó nǔ wǔvɛ́ e Satáan nɔ dɔn wá nú mǐ mɛ gbɛtɔ́ lɛ́ é nu é ɖo sisɛkpɔ́ wɛ wunnáwúnná. È ná glɔ́n Satáan kpó awǒvi tɔn lɛ́ kpó ɖó domaɖó-azan mɛ nú xwe 1000. (Luk. 8:31; Nǔɖe. 20:1-3) Gǔdo mɛ ɔ, è ná sú kún dó nú Satáan kpó mɛ e ɖo ahwan tɔn mɛ lɛ́ é bǐ kpó. (Nǔɖe. 20:10) Lěe Jexóva ko ɖɔ gbɔn é ɔ, è ná só ta nú Satáan. È ná sú kún tɔn dó bǐ mlɛ́mlɛ́.—Bǐb. 3:15; Hlɔ̌. 16:20.

19. Nyɔ̌ná tɛ́ lɛ́ ɖó nukún wɛ mɛ e nɔ ɖeji dó Jexóva wú bǐ mlɛ́mlɛ́ lɛ́ é ka ɖe? (Kpɔ́n ɖiɖe ɔ lɔmɔ̌.)

¹⁹ Mɛsɛntɔ́ nǔgbó Mawu tɔn lɛ́ ɖo nukún ɖó hwenu e yě ná nyí mɛ maɖóblɔ̌, bo lɛ́ nɔ awǎjijɛ mɛ ɖo gbɛ yɔ̌yɔ́ e ja malínmálín mɛ é mɛ é wɛ kpó akpakpa sɔ́ mɛ kpó. Mǐ tlɛ sixú dó nukún lěe gbɛ ná nyɔ́ sɔ ɖo hwenɛ́nu é mɛ kpɔ́n ǎ. Jexóva d’akpá élɔ́: “Éɖíe! Un ɖo nǔ lɛ́ bǐ bló wɛ yɔ̌yɔ́ tɔn.” (Nǔɖe. 21:5) Étɛ́ ka nyí tínmɛ énɛ́ tɔn? Sín jikpá Edɛ́ni tɔn mɛ ɔ, hwenɛ́nu wɛ ná nyí azɔn nukɔn ɔ, bɔ Satáan kpó awǒvi tɔn lɛ́ kpó ma sɔ́ ná kpé wú bo wa nǔ dó gbɛtɔ́ lɛ́ wú, alǒ zɔ́n bónú yě wa nǔ nyanya ǎ. Agbɔ̌n mǐtɔn ná jɛ do! Adohu adohu gbɛ élɔ́ tɔn lɛ́ sɔ́ ná zɔ́n nú adɔ̌ ná vɛ́ mǐ ɖě ǎ. È ná gbɔ azɔn nú mɛ e ná xo Aamagedɔ́ni zlɛ́, bo ná ɖo awa vovo gbɛ ɔ tɔn lɛ́ xwé lɛ́ é bǐ ɖo nǔjíwǔ linu. Énɛ́ gúdo ɔ, è ná jɛ mɛvívɛ́ mǐtɔn lɛ́ fɔ́n sín kú jí. Mǐ ná kpé wú bo ná ɖu gbɛ sín vǐví lěe Tɔ́ mǐtɔn jǐxwé tɔn ɔ ba gbɔn é.

20. Étɛ́ a ka kán ɖ’é jí bá wa?

²⁰ Ée mǐ ná ɖo tagba azǎn gǔdo gúdo tɔn élɔ́ lɛ́ tɔn ɖí xwi xá wɛ kpó akɔ́nkpinkpan kpó é ɔ, mi nú mǐ ní kán ɖ’é jí bá ɖeji bǐ mlɛ́mlɛ́ dó Jexóva wú, lobo lɛ́ nɔ gǔdo nú Nǔbǐwúkpétɔ́ e é nyí é bǐ mlɛ́mlɛ́. Mi nú mǐ ní ɖe wǎn e mǐ yí nú Tɔ́ mǐtɔn jǐxwé tɔn ɔ é xlɛ́, bo ɖe xlɛ́ ɖɔ Satáan nyí adingbannɔ. Ɛɛn, ényí mǐ kpo ɖo gbejí jɛ́n wɛ ɔ, mǐ sixú ɖó nukún sɔgúdo ɖaaɖagbe ɖé, ɖó Jexóva Nǔbǐwúkpétɔ́ ɔ nɔ ba vɛ́návɛ́ná bá d’ajɔ mɛ ɖěɖěe nɔ gbejí n’i lɛ́ é ɖo ali jí wǔ ɖé nu.