Tan énɛ́ xlɛ́ nǔ e sixú jɛ dó mɛsɛntɔ́ Jexóva tɔn ɖěbǔ jí é. É sixú hu hwɛ syɛ́nsyɛ́n bo ná wá mɔ ɖo nukɔnmɛ ɖɔ nǔ lɛ́ bǐ jɛ ɖo ajijimɛ. Alǒ é sixú ɖɔ: “Un ɖó nukún tɔn cóbónú é jɛ ǎ.” Amɔ̌, ényí é lin tamɛ dó nǔ e jɛ é jí gúdo ɔ, é ná ɖibla wá mɔ ɖɔ émí ko ɖe afɔ e nǔnywɛ́ ma kpé ǎ é ɖé lɛ́ nyi do bɔ yě zɔ́n bɔ émí hu hwɛ. Gbɛ̌ nyanya dídó, ayiɖeɖayǐ e ma sɔgbe ǎ lɛ́ é, alǒ fí e ma nyɔ́ nú klisánwun ná yi ǎ lɛ́ é, é sixú nyí tlɔlɔ alǒ ɖo Ɛntɛnɛ́ti jí sixú ko ɖo afɔ énɛ́ lɛ́ e é ɖe nyi do lɛ́ é mɛ. Bóyá, é sixú ko lɛ́ ɖó ɖɛxixo, Biblu xixa, kplé lɛ́ yiyi alǒ alɔ ɖíɖó ɖo sinsɛnzɔ́ ɔ mɛ te. Lěe é nyí gbɔn nú nyaví e xó è ɖɔ ɖo Nǔnywɛ́xó mɛ é ɖɔhun ɔ, kpó nǔ e ko jɛ lɛ́ é bǐ kpó ɔ, hwɛ e é hu é sixú nɔ ma nyí nǔfyánmɛnú ɖé. Étɛ́ ka nyí nǔkplɔ́nmɛ ɔ? É nyí hwɛhuhu kɛ́ɖɛ́ wɛ mǐ ɖó ná hɔn ná ǎ, loɔ, mǐ ɖó ná lɛ́ hɔn nú afɔɖiɖe e ná dɔn mǐ yi jó nú hwɛhuhu lɛ́ é. Nǔ e Salomɔ́ɔ tínmɛ hwenu e é kpi tan ɔ gúdo tlóló é pɛ́pɛ́pɛ́ nɛ́.—Mat. 5:29, 30. w24.07 16 akpá. 10-11

Étɛ́ ka ɖo dɔkun énɛ́ ɔ nyí wɛ? Gbɛhwlɛngánzɔ́ e nyí wɛn ɖagbe Axɔ́súɖuto ɔ tɔn jíjlá é wɛ. (2 Kɔ. 4:1) Étɛ́ kozɛ́n lɛ́ ka nɔ te ná? Yě nɔ te nú mɛsɛntɔ́ Mawu tɔn ɖěɖěe nɔ jlá wɛn ɖagbe ɔ mɛ ɖěvo lɛ́ é. Ðo Pɔ́lu sín hwenu ɔ, ajɔ̌tɔ́ lɛ́ nɔ zán kozɛ́n lɛ́ dó bɛ́ nǔ xɔ akwɛ́ ɖagbe lɛ́, ɖi nǔɖuɖu, vɛ̌ɛn kpó akwɛ́ kpó sín fí ɖé jɛ fí ɖěvo. Ðo ali ɖokpó ɔ nu ɔ, Jexóva byɔ́ mǐ ɖɔ mǐ ní jlá wɛn ɖagbe e nyí wɛn xɔ akwɛ́ ɖé é. Kpó alɔdó Jexóva tɔn kpó ɔ, mǐ sixú ɖó hlɔ̌nhlɔ́n e sín hudó mǐ ɖó bo ná jlá wɛn ɔ kpó gbejíninɔ kpó é. Hweɖélɛ́nu ɔ, mǐ sixú ɖi xɛsi nú gbɛtɔ́, alǒ ɖi xɛsi ɖɔ è ná gbɛ́ wɛn mǐtɔn. Nɛ̌ mǐ ka sixú ɖu ɖo wǔvɛ́ énɛ́ jí gbɔn? Mǐ ní ɖɔ xó dó ɖɛ e mɛsɛ́dó lɛ́ xo hwenu e è gbɛ́ nú yě ɖɔ yě ma jlá wɛn ɔ é wú. Yě ɖi xɛsi ǎ, é nyɔ́ wa ɔ, yě byɔ́ Jexóva ɖɔ é ní d’alɔ émí bónú émí ná kpo ɖo xó ɖɔ wɛ kpó adɔgbígbó kpó. Tlóló kpowun ɔ, Jexóva ná sin nú ɖɛ yětɔn. (Mɛ. 4:18, 29, 31) Ényí xɛsi ɖi nú gbɛtɔ́ wa nǔ dó wǔ we hweɖélɛ́nu hǔn, byɔ̌ Jexóva ɖɔ é ní d’alɔ we bónú a ná yí wǎn nú mɛ lɛ́, énɛ́ ɔ, a ná ɖu ɖo xɛsi ɖi nú gbɛtɔ́ jí. w24.04 16 akpá. 8-9

Wǎn e mǐ yí nú Jexóva e nɔ sísɛ́ mǐ bɔ mǐ nɔ klɔ́ cí sín nyǐkɔ tɔn wú. Tínmɛ énɛ́ tɔn wɛ nyí ɖɔ, mǐ nɔ ba ná ɖɔ nú mɛ ɖěvo lɛ́ ɖɔ xó baɖabaɖa ɖěɖěe Satáan ɖɔ dó Jexóva wú lɛ́ é kún nyí nǔgbó ó. (Bǐb. 3:1-5; Jɔb. 2:4; Jaan 8:44) Nú mǐ ɖo sinsɛnzɔ́ ɔ mɛ ɔ, mǐ nɔ ba tawun bo ná jɛ hun dó Mawu mǐtɔn jí, lobo ɖɔ nǔgbó ɔ dó wǔ tɔn nú mɛ ɖěɖěe ba ná ɖótó mǐ lɛ́ é bǐ. Mǐ nɔ ba ɖɔ mɛ lɛ́ bǐ ní tuun ɖɔ jijɔ tɔn e hú gǎn bǐ é wɛ nyí wǎnyíyí, bɔ lěe é nɔ kpa acɛ gbɔn é sɔgbe bo jlɔ́, bɔ Axɔ́súɖuto tɔn ná ɖó nǔ wǔvɛ́ lɛ́ bǐ nu zaanɖé din, lobo hɛn fífá kpó awǎjijɛ jɔ awǎjijɛ kpó wá nú gbɛtɔ́ lɛ́. (Ðɛh. 37:10, 11, 29; 1 Jaan 4:8) Ényí mǐ jɛ hun dó nyǐkɔ Jexóva tɔn jí ɖo sinsɛnzɔ́ ɔ mɛ ɔ, mǐ nɔ klɔ́ cí sín nyǐkɔ tɔn wú. Mǐ nɔ lɛ́ j’awǎ, ɖó mǐ nɔ zán gbɛ sɔgbe xá nyǐkɔ mǐtɔn. w24.05 18 akpá. 12