Wěma Jɔbu tɔn sixú d’alɔ we hwenu e a ɖo wǔvɛ́ mɔ wɛ é

1-2. Ðɔ hwɛjijɔ e wú é jɛxá ɖɔ è ní xa wěma Jɔbu tɔn é ɖé lɛ́.

A KA ɖu vǐví wěma Jɔbu tɔn xixa tɔn agaɖanu din a? È wlán wěma xóxó énɛ́ din é ɔ, xwe ko yi 3500 mɔ̌ có, è nɔ xa ɛ dó wěma nukúnɖéjí gbɛ ɔ tɔn lɛ́ mɛ hwɛhwɛ. Mɛ lɛ́ nɔ sɔ́ alɔ nú mɛ e wlán wěma énɛ́ é, ɖó é zán xókwín e bɔ wǔ bɔ è ná mɔ nukúnnú jɛ mɛ lɛ́ é, amɔ̌, yě lɛ́ nyɔ́ se bo ɖ’agbɔ̌n tawun. Mɔyízi wɛ wlán wěma nukúnɖéjí énɛ́, amɔ̌, Jexóva Mawu wɛ nyí Dǒwátɔ́ tɔn.—2 Tim. 3:16.

² Akpáxwé tají ɖé wɛ wěma Jɔbu tɔn nyí ɖo Biblu mɛ. Aniwú? Hwɛjijɔ e wú wɛ é ɖokpó wɛ nyí ɖɔ é ɖe xó ɖaxó e ɖo atɛ jí bo kan gbɛtɔ́ lɛ́ bǐ kpó wɛnsagun lɛ́ bǐ kpó é xlɛ́ nyi wɛn, énɛ́ wɛ nyí cí klɔ́klɔ́ sín nyǐkɔ Jexóva tɔn wú. É lɛ́ kplɔ́n nǔ mǐ dó jijɔ ɖaaɖagbe Jexóva tɔn lɛ́ wú, ɖi wǎnyíyí tɔn, nǔnywɛ́ tɔn, nǔjlɔ́jlɔ́wiwa tɔn kpó hlɔ̌nhlɔ́n tɔn kpó. Ði kpɔ́ndéwú ɔ, wěma Jɔbu tɔn ylɔ́ Jexóva ɖɔ “Nǔbǐwúkpétɔ́ ɔ” hú kplékplé wěma Biblu tɔn ɖěvo e kpo lɛ́ é bǐ tɔn. Wěma Jɔbu tɔn lɛ́ ná xósin nú nǔkanbyɔ́ gbɛ mɛ tɔn gěgé, káká jɛ éé kpo ɖo linkpɔ́n nyí nú mɛ gěgé wɛ é ɖé jí: Étɛ́wú Mawu ka tin bɔ wǔvɛ́ mimɔ tíin?

3. Ðɔ le e wěma Jɔbu tɔn kplɔ́nkplɔ́n sixú hɛn wá nú mǐ é ɖé lɛ́.

³ Lěe só ɖé jí xíxá nɔ d’alɔ mǐ bɔ mǐ nɔ sixú mɔ nǔ e lɛ́ lɛ̌ dó mǐ lɛ́ é ganjí gbɔn é ɔ, mɔ̌ wɛ wěma Jɔbu tɔn nɔ d’alɔ mǐ bɔ mǐ nɔ ɖó linlin e yi aga é, énɛ́ wɛ nyí linlin Jexóva tɔn dó gbɛ mɛ tagba lɛ́ wú gbɔn. Mi nú mǐ ní kpɔ́n lěe wěma Jɔbu tɔn sixú d’alɔ mǐ hwenu e mǐ ɖo wǔvɛ́ mɔ wɛ é gbɔn é. Mǐ ná kplɔ́n lěe tan Jɔbu tɔn sixú ko hɛn le wá nú Izlayɛ́li ví lɛ́ gbɔn é kpó lěe é sixú hɛn le wá nú mǐ lɔ ɖo égbé gbɔn é kpó. Mǐ ná lɛ́ kplɔ́n lěe mǐ sixú zán tan Biblu tɔn énɛ́ dó d’alɔ mɛ ɖěvo lɛ́ gbɔn é.

MAWU TIN BƆ JƆBU MƆ WǓVƐ́

4. Vogbingbɔn ɖaxó tɛ́ ka ɖo Jɔbu kpó Izlayɛ́li ví e ɖo Ejípu lɛ́ é kpó tɛ́ntin?

⁴ Hwenu e Izlayɛ́li ví lɛ́ ɖo wǔvɛ́ mɔ wɛ ɖo kannumɔgbénu ɖo Ejípu é ɔ, nya ɖé nɔ nyí Jɔbu bo nɔ nɔ Wúsi; xá ɖé wɛ bo sixú ko ɖo zǎnzǎnhwe jí Akpádídó yíkúngban ɔ tɔn, bo ɖo fí ɖé ɖo totaligbé Alabíi tɔn. Jɔbu gbɔn vo nú Izlayɛ́li ví ɖěɖěe jɛ vodún sɛn jí ɖo Ejípu lɛ́ é tawun; éyɛ́ sɛn Jexóva kpó gbejíninɔ kpó. (Joz. 24:14; Ezek. 20:8) Jexóva ɖɔ dó Jɔbu wú ɖɔ: “Étɔn ɖɔhun ɖě ɖo ayǐkúngban ɔ jí ǎ.”a (Jɔb. 1:8) Jɔbu jɛ dɔkun tawun, bɔ mɛ lɛ́ nɔ ɖó sísí n’i ɖésú, yě nɔ ɖó sísí n’i hú mɛ ɖěvo ɖěbǔ ɖo akpá gbɛ ɔ tɔn énɛ́ xwé. (Jɔb. 1:3) Kpɔ́n lěe mɔ e Satáan mɔ bɔ nya nukúnɖéjí énɛ́ e mɛ lɛ́ nɔ ɖó sísí ná é ɖo Mawu sɛn wɛ kpó gbejíninɔ kpó é ná ko dó xomɛsin n’i sɔ é!

5. Étɛ́wú Jexóva ka tin bɔ Jɔbu mɔ wǔvɛ́? (Jɔbu 1:20-22; 2:9, 10)

⁵ Satáan ɖɔ ɖɔ ényí wǔvɛ́ lɛ́ vun blá Jɔbu ɔ, é ná jó Jexóva sinsɛn dó. (Jɔb. 1:7-11; 2:2-5) Jexóva yí wǎn nú Jɔbu tawun, amɔ̌, xó baɖabaɖa e Satáan ɖɔ é fɔ́n xó tají gěgé nyi atɛ jí, énɛ́ wú ɔ, Jexóva jó Satáan dó bónú é ná tɛ́n nǔ e é ɖɔ é kpɔ́n. (Jɔb. 1:12-19; 2:6-8) Satáan vɔ kanlin Jɔbu tɔn lɛ́, vívá kún nú Jɔbu sín vǐ wǒ lɛ́, bo dó azɔn baɖabaɖa ɖé Jɔbu sín ta káká yi afɔ. Amɔ̌, gǎn énɛ́ lɛ́ e Satáan dó bá dó bló bónú Jɔbu ná gɔn gbejí nɔ é cifo. (Xa Jɔbu 1:20-22; 2:9, 10.) Nukɔnmɛ ɔ, Jexóva bló bɔ lanmɛ Jɔbu tɔn lɛ́ jɛ jógúnjógún, dɔkun tɔn lɛ́ lɛ́ wá xwé, bɔ mɛ lɛ́ lɛ́ jɛ sísí ɖó n’i jí; gɔ́ ná ɔ, é lɛ́ bló bɔ Jɔbu lɛ́ ji vǐ wǒ ɖěvo lɛ́. É lɛ́ bló bɔ Jɔbu lɛ́ nɔ gbɛ xɔ xwe 140, bo nɔ gbɛ káká bo mɔ jijimɛ ɛnɛgɔ́ vǐ tɔn lɛ́ tɔn. (Jɔb. 42:10-13, 16) Nɛ̌ tan énɛ́ ka sixú ko hɛn le wá nú mɛ lɛ́ ɖo hwexónu gbɔn? Nɛ̌ é ka sixú hɛn le wá nú mǐ lɔ ɖo égbé gbɔn?

6. Nɛ̌ nǔ e wú Mawu tin bɔ wǔvɛ́ mimɔ tíin é tuuntuun ka sixú ko hɛn le wá nú Izlayɛ́li ví lɛ́ gbɔn? (Kpɔ́n ɖiɖe ɔ lɔmɔ̌.)

⁶ Lěe Izlayɛ́li ví lɛ́ sixú ko ɖu le tɔn gbɔn é. Gbɛ bɔ wǔ nú Izlayɛ́li ví lɛ́ ɖo Ejípu ǎ. Ði kpɔ́ndéwú ɔ, kannumɔ wɛ Jozuwée kpó Kalɛ́bu kpó nyí hwenu e yě ɖo wǐnnyáwínnyá mɛ é. Énɛ́ gúdo ɔ, é sín nǔwanyido yěɖésúnɔ tɔn lɛ́ wú ǎ có, yě flú gbɔn gbětótló mɛ xɔ xwe 40. Ényí Izlayɛ́li ví lɛ́ tuun adǎn e gbo Jɔbu lɛ́ é kpó lěe nǔ lɛ́ wá fó gbɔn ɖo gbɛzán tɔn mɛ é kpó sín tan ɔ, é ɖo wɛn ɖɔ é ná d’alɔ yě kpó jijimɛ Izlayɛ́li ví lɛ́ tɔn e ná bɔ d’é wú lɛ́ é kpó, bɔ yě ná mɔ nukúnnú jɛ mɛ e nyí ɖɔ wǔvɛ́ e mɔ wɛ yě ɖe é tɔn tawun é wú. Yě sixú lɛ́ mɔ nukúnnú jɛ nǔ e wú Mawu tin bɔ wǔvɛ́ mimɔ tíin é kpó lěe gbejíninɔ gbɛtɔ́ lɛ́ tɔn nɔ su nukún tɔn mɛ sɔ é kpó wú d’é jí.

7-8. Nɛ̌ wěma Jɔbu tɔn ka sixú d’alɔ mɛ ɖěɖěe ɖo mǐ mɛ bo ɖo wǔvɛ́ mɔ wɛ lɛ́ é gbɔn? Nǎ kpɔ́ndéwú ɖé.

⁷ Lěe mǐ sixú ɖu le tɔn gbɔn é. É blá wǔ ɖɔ mɛ gěgé ɖe égbé bo sɔ́ ɖi nǔ nú Mawu ǎ, ɖó yě kpé wú bo mɔ nukúnnú jɛ nǔ e wú nǔ nyanya nɔ jɛ dó mɛ ɖagbe jí é wú ǎ. Kpɔ́n kpɔ́ndéwú Hazelb e gosín Rwanda é tɔn. Hwenu e é ɖo wǐnnyáwínnyá mɛ é ɔ, é ɖi nǔ nú Mawu. Amɔ̌, énɛ́ gúdo ɔ, nǔ lɛ́ wá húzú. Mɛjitɔ́ tɔn lɛ́ gbɛ́ yěɖée, bɔ wǎgbɔ tɔn ɔ, súnnu ɖěvo e nɔ tɔn da é nɔ bló bɔ gbɛ nɔ vɛ́ wǔ n’i. Nukɔnmɛ ɔ, nya ɖé ɖó xó xá ɛ gǎnnugǎnnu. Hazel yi amǐsaxwé tɔn bónú è ná dó gbɔ n’i, é ka mɔ gbɔdónúmɛ ɖo dɔ̌n ǎ. Nukɔnmɛ ɔ, Hazel wlán wěma ɖé sɛ́dó Mawu. Nǔ e é ɖɔ dó wěma ɔ mɛ é ɖíe: “Mawu, un xo ɖɛ sɛ́dó we, un tɛ́n kpɔ́n bá wa nǔ ɖagbe, amɔ̌, a sɔ́ nyanya dó sú ɖagbexɔ́ mì. Din ɔ, un ná lɛ́ kɔ sín gǔdo towe, bo ná nɔ wa nǔ ɖěbǔ e ná zɔ́n bɔ un ná ɖ’awǎjijɛ é.” Gbɛtɔ́ Hazel ɖɔhun ɖěɖěe wá ɖi ɖɔ Mawu wɛ zɔ́n bɔ émí ɖo wǔvɛ́ se wɛ lɛ́ é sín nǔ byɔ́ lanmɛ nú mǐ tawun!

⁸ É ɖo mɔ̌ có, tan e ɖo wěma Jɔbu tɔn mɛ é kplɔ́n mǐ ɖɔ é kún nyí Mawu wɛ zɔ́n bɔ wǔvɛ́ mimɔ tíin ó, lé Satáan wɛ! Mǐ lɛ́ kplɔ́n ɖɔ mǐ kún ɖó ná ɖɔ ɖɔ mɛ ɖěɖěe ɖo wǔvɛ́ se wɛ lɛ́ é ɔ, nǔ e yě dó é ya wɛ yě ɖe ó. Mawuxówéma ɔ ɖɔ nú mǐ ɖɔ “hwenu kpó nǔmaɖónukún lɛ́ kpó” sixú wa nǔ dó mɛ ɖěbǔ wú, ɖo hweɖébǔnu. (Nǔt. 9:11; Jɔb. 4:1, 8) Gɔ́ ná ɔ, mǐ kplɔ́n ɖɔ ényí mǐ nɔ dɛ ɖo mɛtɛ́nkpɔ́n lɛ́ nu kpó gbejíninɔ kpó ɔ, mǐ nɔ hun ali nú Jexóva bɔ é nɔ ná xósin nú nǔɖɔbamɛ Satáan tɔn lɛ́. Énɛ́ nɔ zɔ́n bɔ è nɔ jɛ hun dó nyǐkɔ tɔn jí. (Nǔx. 27:11) Nǔ énɛ́ lɛ́ e mǐ kplɔ́n ɖo Biblu mɛ lɛ́ é nɔ su nukún mǐtɔn mɛ, ɖó mǐ tuun hwɛjijɔ tají e wú mǐ kpó mɛ e mǐ yí wǎn ná lɛ́ é kpó nɔ se wǔvɛ́ é din. Nukɔnmɛ ɔ, Kúnnuɖetɔ́ Jexóva tɔn lɛ́ kplɔ́n nǔ xá Hazel, bɔ é wá tuun ɖɔ é kún nyí Mawu wɛ zɔ́n bɔ émí nɔ mɔ wǔvɛ́ ó. É ɖɔ: “Un lɛ́ wá xo ɖɛ sɛ́dó Mawu sín ayi gɔngɔn ce mɛ. Un ɖɔ nú Jexóva ɖɔ hwenu e un ɖɔ n’i ɖɔ un ná lɛ́ kɔ sín gǔdo tɔn é ɔ, un kún ɖo mɔ̌ ná wa wɛ ɖě ó. È ná ɖɔ lɔ ɔ, un tuun i ganjí ɖ’ayǐ ǎ. Un wá mɔ nukúnnú jɛ wú din ɖɔ Jexóva yí wǎn nú mì. Wǎgbɔ tɔn ɔ, un wá ɖó awǎjijɛ tawun.” Tuun e mǐ tuun nǔ e wú Mawu tin bɔ wǔvɛ́ mimɔ tíin é su nukún mǐtɔn mɛ tawun! Din ɔ, mi nú mǐ ní kpɔ́n lěe tan Jɔbu tɔn sixú d’alɔ mǐɖésúnɔ mɛtún ɔ ɖo tagba lɛ́ hwenu gbɔn é.

LĚE TAN JƆBU TƆN NƆ D’ALƆ MǏ BƆ MǏ NƆ DƐ GBƆN É

9. Tínmɛ ninɔmɛ e mɛ Jɔbu ɖe hwenu e é ɖo ayǐjínjɔ́n ɖo afín mɛ é. (Jaki 5:11)

⁹ Dǒ nukún mɛ kpɔ́n, Jɔbu ɖo ayǐjínjɔ́n éɖokpó ɖo afín mɛ, bɔ akpa gbɔn wǔ tɔn bǐ, bɔ é ɖo wǔvɛ́ se wɛ tawun. Azɔn e jɛ wɛ é ɖe é zɔ́n bɔ agbaza tɔn bǐ xwíí wi, bo flé zǎ. Nǔ wá gbɛ́ dó Jɔbu bǐ, bɔ nǔɖé sɔ́ kpo n’i hú é ní zé agbǎnxwɛ dó ɖo wǔtu klú ná wɛ, bo lɛ́ ɖo gbɛ wúvɛ́ mɔ wɛ ǎ. Amɔ̌, é nyí kan kɛ́ɖɛ́ klé wɛ Jɔbu ɖe bá nɔ gbɛ ǎ, loɔ, é lɛ́ kpo ɖo gbejí nɔ nú Jexóva wɛ, lobo lɛ́ ɖo ji ɖe dó wǔ tɔn wɛ. (Xa Jaki 5:11.) Étɛ́ ka d’alɔ Jɔbu b’ɛ dɛ?

10. Xɔ́ntɔn alɔkpa tɛ́ Jɔbu ka zun xá Jexóva? Tínmɛ.

¹⁰ Jɔbu ɖɔ lěe nǔ cí n’i é nú Jexóva. (Jɔb. 10:1, 2; 16:20) Ði kpɔ́ndéwú ɔ, wěmata 3​gɔ́ ɔ ɖɔ nú mǐ ɖɔ Jɔbu sa gbɛvo tawun, ɖó awě e xo è lɛ́ é wú, bo dó hwɛ Jexóva d’acɛ jí ɖɔ é wú wɛ yě sín. Énɛ́ ɔ gúdo ɔ, xɔ́ntɔn Jɔbu tɔn atɔn lɛ́ ɖɔ azɔn mɔ̌kpán ɖɔ hwɛ e Jɔbu hu lɛ́ é wú wɛ Mawu ɖo tó dɔn n’i wɛ. Amɔ̌, Jɔbu kpo ɖo ɖiɖɔ wɛ ɖɔ émí ɖo gbejí nú Jexóva. Xó e Jɔbu ɖɔ lɛ́ é xlɛ́ ɖɔ nú hwenu ɖé ɔ, é lin ɖɔ émí nyí nǔjlɔ́jlɔ́watɔ́ hú Mawu. (Jɔb. 10:1-3; 32:1, 2; 35:1, 2, nwt) Amɔ̌, nú è ná ɖɔ xójɔxó ɔ, é yí gbe ɖɔ gǎn ɖěɖěe émí dó bá jɛ hun dó gbejíninɔ émítɔn jí hweɖélɛ́nu é cí “nǔwláɖɔ” ɖɔhun. (Jɔb. 6:3, 26) Énɛ́ gúdo ɔ, ɖo wěmata 31​gɔ́ ɔ mɛ ɔ, Jɔbu ba ɖɔ Mawu ní ná xósin émí, bo ɖɔ ɖɔ émí kún jɛxá tódɔnnúmɛ ó. (Jɔb. 31:35) Amɔ̌, Jɔbu sín hwɛ jɔ bónú é ná ɖɔ ɖɔ dandan mɛ ɔ, Mawu ɖó ná ɖɔ nǔ e wú émí ɖo wǔvɛ́ mɔ wɛ é nú émí ǎ.

11. Ée Jɔbu ɖɔ xó dó jɛ hun dó gbejíninɔ tɔn jí é ɔ, nɛ̌ Jexóva ka wa nǔ gbɔn?

¹¹ Ényí mǐ lin tamɛ d’é jí ɔ, mǐ sixú mɔ ɖɔ gbɛvo e Jɔbu sa é xlɛ́ lěe é zé éɖée jó nú Jexóva bǐ mlɛ́mlɛ́ bo kú d’é jí ɖɔ gbɛ ná bo gbɔn ɖěbǔ ɔ, Mawu ná tuun gbejíninɔ émítɔn nú émí gbɔn é. Ée Jexóva nɔ jɔhɔn syɛ́nsyɛ́n ɖé mɛ bo wá ná xósin nú Jɔbu é ɔ, É ná gǒflɛ́mɛ ɖěɖěe kunkplá hwɛjijɔ e wú Jɔbu ɖo wǔvɛ́ mɔ wɛ lɛ́ é ǎ. Mɔ̌ jɛ́n é ma lɛ́ dó hwɛ Jɔbu ɖó gbɛvo e é sa é alǒ ɖɔ e é ɖɔ ɖɔ émí ɖo xomɛvɔ́ é wú ǎ é nɛ́. É nyɔ́ wa ɔ, Jexóva kplɔ́n nǔ Jɔbu lěe tɔ́ ɖé nɔ wa nú vǐ tɔn gbɔn é ɖɔhun. Alɔ ɖagbe e è ka ɖó ná ɖu xó ɔ ná é nɛ́. Wǎgbɔ tɔn ɔ, Jɔbu sɔ́ éɖée hwe bo wá mɔ nukúnnú jɛ lě do é ma tuun nǔ káká ɖé ǎ sɔ é wú, bɔ nǔ e é wlá ɖɔ lɛ́ é wá vɛ́ n’i. (Jɔb. 31:6; 40:4, 5; 42:1-6) Nɛ̌ tan énɛ́ ka sixú ko d’alɔ mɛ lɛ́ ɖo hwexónu gbɔn? Nɛ̌ é ka sixú d’alɔ mǐ lɔ ɖo égbé gbɔn?

12. Nɛ̌ tan Jɔbu tɔn ka sixú ko hɛn le wá nú Izlayɛ́li ví lɛ́ gbɔn?

¹² Lěe Izlayɛ́li ví lɛ́ sixú ko ɖu le tɔn gbɔn é. Nǔ e jɛ dó Jɔbu jí é sixú ko kplɔ́n nǔ Izlayɛ́li ví lɛ́. Lin tamɛ dó kpɔ́ndéwú Mɔyízi tɔn jí. É bɔ wǔ ɖěbǔ nú Mɔyízi bónú é ná nɔ nukɔn nú akɔta Izlayɛ́li tɔn ǎ. Azɔn mɔ̌kpán wɛ yě tlí tó nú Jexóva b’ɛ kú wǔ nú Mɔyízi tawun. Mɔyízi gbɔn vo nú Izlayɛ́li ví gǔfɔ́ntɔ́ lɛ́, yě nɔ húnhún nǔ ɖɔ dó Jexóva wú hwɛhwɛ, amɔ̌, ényí Mɔyízi ɖó tagba ɖé ɔ, é nɔ yi mɔ Jexóva. (Tín. 16:6-8; Kɛ́n. 11:10-14; 14:1-4, 11; 17:6, 14, 20) Mɔyízi ɖó ná lɛ́ dɛ hwenu e Jexóva gbɛ́ nǔ nú éɖésúnɔ mɛtún ɔ é. Ði kpɔ́ndéwú ɔ, hwenu e Izlayɛ́li ví lɛ́ ɖó gɔnu ɖó Kadɛ́ci, bóyá hwenu e yě ɖo flúflú gbɔn gbětótló ɔ mɛ wɛ é sín xwe 40​gɔ́ ɔ mɛ ɔ, Mɔyízi “kɛ nu nyi do” bo sɔ́ kpé wú bo sɔ́ nyǐkɔ Jexóva tɔn su ǎ. (Ðɛh. 106:32, 33) Wǎgbɔ tɔn ɔ, Jexóva gbɛ́ ɖɔ Mɔyízi kún ná yi Akpádídó yíkúngban ɔ jí ɔ. (Sɛ́n. 32:50-52) Énɛ́ ɖó ná ko vɛ́ nú Mɔyízi; amɔ̌, é sɔ́ éɖée hwe bo yí gbe ná. Tan Jɔbu tɔn sixú ko d’alɔ jijimɛ Izlayɛ́li ví lɛ́ tɔn e wá bɔ d’é wú lɛ́ é bɔ yě dɛ ɖo mɛtɛ́nkpɔ́n e yě mɔ lɛ́ é nu. Tamɛ linlin dó tan ɔ jí sixú ko d’alɔ gbejínɔtɔ́ lɛ́ bɔ yě kplɔ́n lěe yě ná nɔ ɖɔ lěe nǔ cí nú yě é nú Jexóva gbɔn é kpó lěe yě ná nyi alɔ nú hwɛjijɔ biba nú yěɖée ɖo nukɔn tɔn gbɔn é kpó. Yě sixú ko lɛ́ kplɔ́n lěe yě ná nɔ sɔ́ yěɖée hwe bo yí gbe nú nǔgbɛ́númɛ Jexóva tɔn gbɔn é.

13. Nɛ̌ tan Jɔbu tɔn ka sixú d’alɔ mǐ bɔ mǐ ná dɛ gbɔn? (Eblée lɛ́ 10:36)

¹³ Lěe mǐ sixú ɖu le tɔn gbɔn é. Mǐ mɛ klisánwun lɛ́ lɔ ɖó hudó didɛ tɔn. (Xa Eblée lɛ́ 10:36.) Ði kpɔ́ndéwú ɔ, mɛɖé lɛ́ ɖo mǐ mɛ bo ɖo xwi ɖí xá azɔn syɛ́nsyɛ́n alǒ linkpɔ́n, tagba xwédo tɔn ɖé, kú mɛvívɛ́ ɖé tɔn, alǒ tagba syɛ́nsyɛ́n ɖěvo lɛ́ wɛ. Gɔ́ ná ɔ, hweɖélɛ́nu ɔ, nǔ e mɛ ɖěvo lɛ́ nɔ ɖɔ é alǒ nɔ wa lɛ́ é sixú zɔ́n bɔ ninɔmɛ ɔ nu didɛ ɖe sixú lɛ́ vɛ́ wǔ nú mǐ hú gǎn. (Nǔx. 12:18) É ɖo mɔ̌ có, wěma Jɔbu tɔn kplɔ́n mǐ ɖɔ mǐ sixú ɖɔ lěe nǔ cí nú mǐ ɖo ayi gɔngɔn mǐtɔn mɛ é nú Jexóva bo kú d’é jí ɖɔ é ná ɖótó mǐ. (1 Jaan 5:14) Ényí vo e sa wɛ mǐ ɖe lɛ́ é wá cí “nǔwláɖɔ” ɖɔhun hweɖélɛ́nu lěe é nyí gbɔn nú Jɔbu é ɖɔhun ɔ, Jexóva ná ɖó hwɛ nú mǐ ǎ. É nyɔ́ wa ɔ, Mawu ná ná mǐ hlɔ̌nhlɔ́n kpó nǔnywɛ́ kpó e sín hudó mǐ ɖó bá dɛ é. (2 Tan 16:9; Ja. 1:5) É sixú lɛ́ jlá linlin mǐtɔn ɖó ényí é byɔ́ ɖó mɔ̌ ɔ nɛ́ lěe é nyí gbɔn nú Jɔbu é ɖɔhun. Wěma Jɔbu tɔn lɛ́vɔ́ kplɔ́n mǐ lěe mǐ sixú dɛ hwenu e Xó Jexóva tɔn, tutoblónúnǔ tɔn alǒ xɔ́ntɔn e zin lɛ́ é ɖe wě xá mǐ alǒ gbɛ́ nǔ nú mǐ é gbɔn é. (Ebl. 12:5-7) Lěe gbe e Jɔbu yí nú nǔ e è gbɛ́ n’i é kpó mɛɖéesɔ́hwe kpó é hɛn le wá n’i gbɔn é ɔ, ényí mǐ lɔ yí gbe bónú è jlá linlin mǐtɔn ɖó ɔ, mǐ nɔ ɖu le tɔn. (2 Kɔ. 13:11) Wěma Jɔbu tɔn kplɔ́n nǔ xɔ akwɛ́ lɛ́ mǐ mɛ nya! Din ɔ, mi nú mǐ ní kpɔ́n lěe mǐ sixú zán tan Jɔbu tɔn dó d’alɔ mɛ ɖěvo lɛ́ gbɔn é.

ZǍN WĚMA JƆBU TƆN DÓ D’ALƆ MƐ ÐĚVO LƐ́

14. Nɛ̌ mǐ ka sixú zɔ́n tamɛ lin mɛ lɛ́ ɖo sinsɛnzɔ́ ɔ mɛ dó nǔ e wú wǔvɛ́ mimɔ tíin é jí gbɔn?

¹⁴ A ka ko xo go mɛɖé ɖo sinsɛnzɔ́ ɔ mɛ bɔ é kan nǔ e wú wǔvɛ́ mimɔ tíin é byɔ́ we kpɔ́n a? Xósin tɛ́ a ka ná ɛ? A sixú ko ɖɔ xó dó nǔ e Biblu ɖɔ ɖɔ é jɛ ɖo jikpá Edɛ́ni tɔn mɛ é wú n’i. A sixú ko ɖɔ nǔ lěhun n’i dó bɛ́: Satáan éé nyí gbigbɔ nyanya ɖé é ɖó adingban nú asú kpó asi kpó nukɔntɔn ɔ, b’ɛ zɔ́n bɔ yě fɔ́n gǔ dó Mawu jí. (Bǐb. 3:1-6) Énɛ́ gúdo ɔ, a sixú ko ɖɔ n’i ɖɔ ée Adámu kpó Ɛvu kpó fɔ́n gǔ gúdo é ɔ, wǔvɛ́ mimɔ kpó kú kpó byɔ́ gbɛ ɔ mɛ. (Hlɔ̌. 5:12) Bo ná dó fó ɔ, a sixú ko tínmɛ n’i ɖɔ Mawu ná hwenu bá dó ɖe xlɛ́ ɖɔ adingban wɛ Satáan ɖó, bo lɛ́ bló bɔ wɛn ɖagbe e ɖɔ ɖɔ, ɖo sɔgúdo ɔ gbɛtɔ́ lɛ́ ná lɛ́ húzú mɛ maɖóblɔ̌ é ná gba kpé. (Nǔɖe. 21:3, 4) Ali ɖagbe e nu è sixú zɔ́n tamɛ lin mɛ dó nǔkanbyɔ́ ɔ jí ɖe é ɖokpó nɛ́, bɔ énɛ́ sixú hɛn le gěgé wá.

15. Nɛ̌ mǐ ka sixú zán wěma Jɔbu tɔn dó d’alɔ mɛ e nɔ kan nǔ e wú wǔvɛ́ mimɔ tíin é byɔ́ é ɖé gbɔn? (Kpɔ́n ɖiɖe lɛ́ lɔmɔ̌.)

¹⁵ Kpɔ́n wlɛnwín ɖěvo e ɖo wěma Jɔbu tɔn mɛ bɔ a sixú zán dó zɔ́n tamɛ lin mɛ é. Bo ná dó bɛ́ ɔ, a sixú kpa mɛ ɔ ɖó nǔ ɖagbe mɔ̌hun e é kan byɔ́ é wútu. Énɛ́ gúdo ɔ, a sixú ɖɔ ɖɔ Jɔbu e nyí nya gbejínɔtɔ́ bo mɔ wǔvɛ́ dó nǔjɔnǔ mɛ é lɔ kan nǔ ɖokpó ɔ byɔ́. É tlɛ lin ɖɔ ɖo ali ɖé nu ɔ, Mawu wɛ zɔ́n bɔ émí ɖo wǔvɛ́ mɔ̌ wɛ. (Jɔb. 7:17-21) É sixú kpácá mɛ e ɖɔ xó xá wɛ a ɖe é ɖɔ nǔ e ɖo adɔ̌vɛ́ ɖó n’i wɛ é kún nyí égbé xó ɖé ó. Énɛ́ gúdo ɔ, a sixú hɛn ayi bo tínmɛ n’i ɖɔ é kún nyí Mawu wɛ zɔ́n wǔvɛ́ Jɔbu tɔn ó, loɔ, Awǒvi wɛ. Awǒvi wa mɔ̌ bo ná dó ɖe xlɛ́ ɖɔ hwɛjijɔ cejɛ́nnábí tɔn lɛ́ kɛ́ɖɛ́ wú wɛ gbɛtɔ́ lɛ́ ɖo Mawu sɛn wɛ. A sixú lɛ́ ɖɔ gɔ́ ná ɖɔ é kún nyí Mawu wɛ zɔ́n wǔvɛ́ mimɔ Jɔbu tɔn lɛ́ ó có, é ka tin, mɔ̌ mɛ ɔ, énɛ́ xlɛ́ ɖɔ Mawu ɖeji dó gbɛtɔ́ gbejínɔtɔ́ lɛ́ wú ɖɔ yě ná xlɛ́ ɖɔ Satáan nyí adingbannɔ. Bo ná dó fó ɔ, a sixú tínmɛ ɖɔ ɖo nukɔnmɛ ɔ, Mawu d’ajɔ Jɔbu ɖó gbejí e é nɔ é wú. Énɛ́ wú ɔ, mǐ sixú dó gbɔ nú mɛ ɖěvo lɛ́ gbɔn jiɖe níná yě ɖɔ é kún nyí Jexóva gɔ́n wɛ wǔvɛ́ mimɔ nɔ gosín ó gblamɛ.

16. Kpi nǔ e jɛ bo xlɛ́ lěe wěma Jɔbu tɔn sixú d’alɔ mɛ e ɖo wǔvɛ́ mɔ wɛ é ɖé gbɔn é sín tan.

¹⁶ Kpɔ́n lěe wěma Jɔbu tɔn d’alɔ Mario gbɔn é. Nɔví nyɔ̌nu ɖé ɖo kúnnu ɖé wɛ gbɔn alǒkan jí gbe ɖokpó ɖo 2021. Azɔn nukɔntɔn e é ylɔ́ Mario é ɔ, é má wěmafɔ Biblu tɔn ɖokpó xá ɛ bo tínmɛ n’i ɖɔ é kún nyí ɖɛ mǐtɔn lɛ́ kɛ́ɖɛ́ wɛ Mawu nɔ ɖótó ó, loɔ, é lɛ́ dó nǔ ɖaaɖagbe lɛ́ sín akpá nú mǐ dó sɔgúdo wú. Ée é kan nǔ e Mario lin é byɔ́ ɛ é ɔ, Mario tínmɛ n’i ɖɔ nǔ e émí ná wlán ɖ’ayǐ bá hu émíɖée é kɔn wɛ émí ɖe din bɔ é ylɔ́. É ɖɔ: “Un ɖi nǔ nú Mawu, amɔ̌, nǔ e kanbyɔ́ nyiɖée wɛ un ɖe zǎnzǎn din é wɛ nyí ɖɔ wɔn wɛ é ka wɔn mì a jí.” Azɔn wegɔ́ e é ylɔ́ ɛ gbɔn alǒkan jí é ɔ, yě ɖɔ xó dó gbɛdán e gbo Jɔbu é jí. Mario wá gbeta ɔ kɔn ɖɔ émí ɖó ná xa wěma Jɔbu tɔn ɔ blěbú. Énɛ́ wú ɔ, nɔví nyɔ̌nu mǐtɔn sɛ́ fí e é ná gbɔn (lien) bo ná mɔ Biblu gbɛ yɔ̌yɔ́ ɔ tɔn é dó è. Étɛ́ é ka ná? Mario yí gbe nú Biblu kplɔ́nkplɔ́n bɔ akpakpa sɔ́ ɛ dó nǔ gěgé kplɔ́nkplɔ́n dó Mawu wǎnyíyínɔ e nǔ tɔn nɔ ɖu ayi ná é wú wú.

17. Étɛ́wú sɔ́ e Jexóva sɔ́ wěma Jɔbu tɔn dó Xó tɔn e é sɔ́ d’ayi mɛ nú mɛ lɛ́ bɔ yě wlán é mɛ é ka su nukún towe mɛ? (Jɔbu 34:12)

¹⁷ É ɖo wɛn ɖɔ Xó Mawu tɔn ɖó hlɔ̌nhlɔ́n tawun bo ná d’alɔ mɛ lɛ́, káká jɛ mɛ ɖěɖěe ɖo wǔvɛ́ mɔ wɛ lɛ́ é jí. (Ebl. 4:12) Sɔ́ e Jexóva sɔ́ tan Jɔbu tɔn dó Xó tɔn e é sɔ́ d’ayi mɛ nú mɛ lɛ́ bɔ yě wlán é mɛ é, su nukún mǐtɔn mɛ tawun! (Jɔb. 19:23, 24) Wěma Jɔbu tɔn ná gǎnjɛwú mǐ ɖɔ “Mawu kún nɔ wa nǔ nyanya ó.” (Xa Jɔbu 34:12.) É lɛ́ kplɔ́n mǐ nǔ e wú Mawu tin bɔ wǔvɛ́ mimɔ tíin é kpó lěe mǐ sixú dɛ ɖ’é nu gbɔn é kpó. Gɔ́ ná ɔ, é lɛ́ d’alɔ mǐ bɔ mǐ ná dó gbɔ nú mɛ ɖěɖěe ɖo wǔvɛ́ mɔ wɛ lɛ́ é. Ðo xóta e bɔ d’é wú é mɛ ɔ, mǐ ná ɖɔ xó dó lěe wěma Jɔbu tɔn sixú d’alɔ mǐ bɔ mǐ ná ɖe wě xá mɛ ganjí gbɔn é jí.