Blǒ bónú “nǔwúkpíkpé mɛkplɔ́nkplɔ́n tɔn” towe ní kpɔ́n te

1. Nǔwúkpíkpé tɛ́ mǐ ka ɖó ná dó gǎn bá ɖó? Étɛ́wú? (2 Timɔtée 4:2) (Kpɔ́n ɖiɖe ɔ lɔmɔ̌.)

JEZU ɖɔ xó élɔ́ nú ahwanvú tɔn lɛ́: “Mi bló bónú mɛ lɛ́ ní húzú ahwanvú . . . , mi kplɔ́n nǔ yě bónú yě ní se tónú nú nǔ e un zɔ́n mi lɛ́ é bǐ.” (Mat. 28:19, 20) Gbeɖiɖe énɛ́ ɖo xlɛ́xlɛ́ wɛ ɖɔ klisánwun lɛ́ bǐ ɖó ná nyí nǔkplɔ́nmɛtɔ́. Nǔgbó wɛ ɖɔ Jexóva wɛ nɔ dɔn mɛ ɖěɖěe ɖó “ninɔmɛ ayi mɛ tɔn e sɔgbe” lɛ́ é, bɔ wɛnsagun lɛ́ nɔ xlɛ́ ali mǐ yi mɛ mɔ̌hun lɛ́ gɔ́n. (Mɛ. 13:48; Jaan 6:44; Nǔɖe. 14:6) É ɖo mɔ̌ có, mǐ ɖó ná wa éé nyí mǐtɔn é. Lin tamɛ dó kpɔ́ndéwú mɛsɛ́dó Pɔ́lu kpó Baanabási kpó tɔn jí. Biblu ɖɔ ɖɔ hwenu e yě jlá wɛn ɔ ɖo kplɔ́ngbasá ɖo Ikoniyɔ́mu é ɔ, yě “ɖɔ xó ɖo ali ɖé nu bɔ mɛ wɔ̌búwɔ́bú ɖé húzú nǔɖitɔ́, Jwifu kpó glɛ̌kinu kpó bǐ.” (Mɛ. 14:1) É ɖo wɛn ɖɔ, Pɔ́lu kpó Baanabási kpó tɛ́n kpɔ́n bo ɖó “nǔwúkpíkpé mɛkplɔ́nkplɔ́n tɔn.” (Xa 2 Timɔtée 4:2.) É ná nyɔ́ ɖɔ klisánwun lɛ́ bǐ ní wa nǔ ɖokpó ɔ.

2. Étɛ́wú klisánwun ɖé lɛ́ ka sixú lin ɖɔ émí kún sixú bló bónú nǔwúkpíkpé mɛkplɔ́nkplɔ́n tɔn émítɔn ná kpɔ́n te ó?

² Mɛɖé lɛ́ sixú nɔ lin ɖɔ émí kún sixú bló bónú nǔwúkpíkpé mɛkplɔ́nkplɔ́n tɔn émítɔn kpɔ́n te ó, ɖó émí kún yi wěmaxɔmɛ káká ɖé ó, alǒ émí ɖó dogbó ɖé lɛ́ ɖo jɔwámɔ linu wútu. Nǔ cí mɔ̌ nú mɛ e xó Biblu ɖɔ é ɖé lɛ́ lɔ. (Tín. 4:10; Jel. 1:6) Awakanmɛ sixú kú mɛ ɖěvo lɛ́ dó nǔwúkpíkpé mɛkplɔ́nkplɔ́n tɔn yětɔn wú, ɖó yě nɔ mɔ ɖɔ émí ná bo dó gǎn káká ɔ, é kún nɔ ná nǔ mɛ ɖěvo lɛ́ tɔn ɖɔhun ó. É ɖo wɛn ɖɔ, é kún nyí mɛ e mǐ jlá wɛn ɔ lɛ́ é bǐ wɛ ná yí ganjí ó. Gɔ́ ná ɔ, gǎndídó mǐtɔn kɛ́ɖɛ́ wú wɛ lěe mɛ lɛ́ ná wa nǔ gbɔn é ná sín ǎ. Lěe mǐ ko ɖɔ gbɔn é ɔ, Jexóva kpó wɛnsagun lɛ́ kpó wɛ nɔ tɛ́n kpɔ́n bɔ è nɔ mɔ ayijlɔ́jlɔ́nɔ lɛ́. É ɖo mɔ̌ có, mǐ nɔ ba ná wa nǔ e wú mǐ kpé é bǐ bɔ wɛn mǐtɔn ná dɔn mɛ. Bo ná dó d’alɔ mǐ ɔ, xóta élɔ́ ná ɖɔ xó dó lěe nǔwúkpíkpé mɛkplɔ́nkplɔ́n tɔn mǐtɔn sixú kpɔ́n te ɖo sinsɛnzɔ́ ɔ mɛ gbɔn é atɔn jí.

NǓ MƐ LƐ́ TƆN NÍ NƆ ÐU AYI MƐ NÚ WE

3. Étɛ́wú Jezu ka nɔ kpé wú bo nɔ ɖɔ xó bɔ é nɔ byɔ́ tóɖóetɔ́ lɛ́ sín ayi mɛ?

³ Biblu ɖɔ ɖɔ Jezu nɔ “mɔ nǔ jɛ nǔ e ɖo gbɛtɔ́ xomɛ é wú.” (Jaan 2:25) Énɛ́ ɖo xlɛ́xlɛ́ wɛ ɖɔ Jezu nɔ tuun linlin mɛ lɛ́ tɔn kpó nǔ e nɔ sísɛ́ yě bɔ nɔ wa nǔ lɛ́ é kpó. Jezu nɔ ɖɔ xó b’ɛ nɔ byɔ́ tóɖóetɔ́ lɛ́ sín ayi mɛ, ɖó é tuun hudó yětɔn lɛ́. É mɔ ɖɔ mɛ lɛ́ kún nɔ ɖu nǔ ganjí ɖo gbigbɔ lixo ó, bɔ sɛ́n gbɛtɔ́ tɔn kpó hwɛndomɛnú kpó maxamaxa lɛ́ lɛ́vɔ́ nyí agban bo ɖo kɔ jí nú yě. (Mat. 9:36; 23:4) Jezu kɛ nu dó nǔ énɛ́ lɛ́ wú ɖo mawuxóɖiɖɔ só jí tɔn ɔ mɛ. Nǔ e ɖo ayi mɛ ɖu nú mɛ lɛ́ wɛ é jí wɛ Jezu nɔ ɖɔ xó dó, énɛ́ wú ɔ, yě nɔ ɖótó è.

4. Nɛ̌ mǐ ka sixú ɖe xlɛ́ ɖɔ mɛ lɛ́ sín nǔ nɔ ɖu ayi mɛ nú mǐ gbɔn? (Kpɔ́n ɖiɖe lɛ́ lɔmɔ̌.)

⁴ Mǐ sixú xlɛ́ ɖɔ nǔ mɛ lɛ́ tɔn nɔ ɖu ayi mɛ nú mǐ gbɔn tíntɛ́nkpɔ́n bo mɔ nǔ jɛ nǔ e ɖo ayi mɛ ɖu nú yě wɛ lɛ́ é mɛ gblamɛ. Mɛ lɛ́ bǐ wú wɛ gbɛ Satáan tɔn ko wa nǔ dó ɖo ali ɖé nu. Énɛ́ hinhɛn ayi mɛ sixú zɔ́n bɔ é ná bɔ wǔ nú mǐ hú gǎn bɔ mǐ ná ba ná d’alɔ yě. Ði kpɔ́ndéwú ɔ, nǔɖé ka jɛ agaɖanu din bo sixú ko ɖo linkpɔ́n ɖó nú mɛ lɛ́ wɛ ɖo xá mǐtɔn mɛ wɛ a? Ado ka nɔ hu mɛjitɔ́ lɛ́ dó ayijayǐmɛninɔ vǐ yětɔn lɛ́ tɔn ɖo wěmaxɔmɛ wú wɛ a? Azɔ̌ tíin ɖo xá ɔ mɛ ǎ wɛ a? Dǒ nukún lěe gbɛ sixú ko cí nú mɛ ɖěɖěe ma tuun nǔ ɖaaɖagbe ɖěɖěe sín akpá Biblu dó lɛ́ é ǎ é mɛ kpɔ́n.—2 Tim. 3:1; Eza. 65:13, 14.

5. Nɛ̌ Jezu ka gbɔn vo nú Falizyɛn lɛ́ gbɔn? (Matíe 11:28-30)

⁵ Mɛ lɛ́ sín nǔ nɔ ɖu ayi mɛ nú Jezu; yěɖésúnɔ tlɛ nɔ mɔ mɔ̌ ɖo nǔwiwa tɔn lɛ́ mɛ. É gbɔn vo nú Falizyɛn ɖěɖěe nɔ ɖe mɛ lɛ́ kpo, bo nɔ mɔ ɖɔ yě kún hwɛ́n nǔɖé ó lɛ́ é. (Mat. 23:13; Jaan 7:49) Éyɛ́ nɔ nyɔ́ xomɛ dó mɛ lɛ́ wú, bo nɔ lɛ́ sí yě. “Mɛfífá wɛ [n’i] bo nyí mɛɖéesɔ́hwetɔ́ ɖo ayi mɛ,” bɔ énɛ́ zɔ́n bɔ é nyí nǔkplɔ́nmɛtɔ́ ɖagbe. (Xa Matíe 11:28-30.) Mǐ lɔ ɖó ná nɔ wa nǔ ɖokpó ɔ xá tóɖómǐtɔ́ lɛ́.

6. Nɛ̌ mǐ ka sixú nyɔ́ xomɛ dó mɛ ɖěɖěe gbɛ́ wɛn mǐtɔn alǒ klán gbe xá mǐ lɛ́ é wú, bo lɛ́ ɖó sísí nú yě gbɔn?

⁶ Mɛɖé lɛ́ nɔ gbɛ́ wɛn mǐtɔn, alǒ tlɛ nɔ klán gbe xá mǐ. Nɛ̌ mǐ ka ɖó ná nɔ wa nǔ gbɔn? Jezu kplɔ́n mǐ ɖɔ mǐ ní wa nǔ zɛ didɛ ɖo gbeklánxámɛ nu kpowun wú. É ɖɔ: Mi “wa ɖagbe nú mɛ e gbɛ́ wǎn nú mi lɛ́ é,” mi nɔ “byɔ́ nyɔ̌ná nú mɛ e ɖo nu dó mi wɛ lɛ́ é,” bo tlɛ nɔ lɛ́ “xo ɖɛ dó mɛ e ɖo mi zun wɛ lɛ́ é tamɛ.” (Luk. 6:27, 28) Nú mǐ flín ɖɔ é sixú nyí hwɛjijɔ ɖé wú wɛ yě gbɛ́ wɛn mǐtɔn ɔ, mɔ̌ wiwa ná bɔ wǔ nú mǐ hú gǎn. Nǔgbó wɛ ɖɔ mɛɖé lɛ́ nɔ jló bo nɔ klán gbe xá mǐ dó nǔjɔnǔ mɛ. É ɖo mɔ̌ có, é sixú nyí tagba xwédo tɔn, alǒ tagba mɛɖésúnɔ tɔn ɖé wɛ ɖo linkpɔ́n ɖó nú mɛ ɖěvo lɛ́ wɛ. Bóyá gan ɖagbe ɔ mɛ wɛ mǐ wá dó ǎ kpowun wú wɛ. Ðěbǔ wɛ é ná bo nyí ɔ, mǐ ɖó ná xwedó wěɖexámɛ élɔ́: “Mi nú xó mitɔn lɛ́ ní nɔ nyɔ́ se hwebǐnu, bónú jɛ ní nɔ kpé, énɛ́ ɔ, mi ná tuun lěe mi ɖó ná nɔ ná xósin mɛ ɖokpó ɖokpó gbɔn é.” (Koló. 4:6) Nú mǐ nɔ se wǔvɛ́ xá mɛ lɛ́, bo nɔ tɛ́n kpɔ́n bo nɔ mɔ nǔ jɛ hudó yětɔn lɛ́ wú ɔ, mǐ ná nɔ yá wǔ sin xomɛ ǎ; énɛ́ sixú zɔ́n bɔ mǐ ná nyí nǔkplɔ́nmɛtɔ́ ɖagbe.

NƆ ÐEJI DÓ XÓ MAWU TƆN WÚ

7. Nɛ̌ Jezu ka xlɛ́ ɖɔ émí nɔ gán jɛ Xó Mawu tɔn wú hwenu e é nɔ ɖo nǔ kplɔ́n mɛ wɛ é gbɔn? (Jaan 7:14-16)

⁷ Jezu nɔ gán jɛ nǔtuuntuun éɖésúnɔ tɔn wú ǎ. É nɔ sɔ́ nǔ e kplɔ́n mɛ wɛ é ɖe lɛ́ é jínjɔ́n Xó Mawu tɔn jí, bo nɔ kplɔ́n mɛ ɖo ali ɖé nu b’ɛ nɔ bɔ wǔ nú tóɖóetɔ́ lɛ́, bónú yě ná mɔ nǔ jɛ nǔ e kplɔ́n yě wɛ é ɖe é mɛ, bo lɛ́ flín. Biblu ɖɔ nú mǐ ɖɔ Jezu nɔ kplɔ́n nǔ mɛ, “mɛ e ɖó acɛ é ɖɔhun, é nyí sɛ́nkplɔ́nmɛtɔ́ lɛ́ ɖɔhun ǎ.” Bɔ lěe é nɔ kplɔ́n nǔ mɛ gbɔn é nɔ “kpácá” mɛ lɛ́. (Mak. 1:22) Sɛ́nkplɔ́nmɛtɔ́ e nɔ gbɛ ɖo Jezu hwenu lɛ́ é nɔ ɖe xó sín mɛ̌si e mɛ lɛ́ nɔ ɖó sísí ná tawun lɛ́ é sín xó mɛ dó nɔ gǔdo nú nǔkplɔ́nmɛ yětɔn lɛ́. Jezu ka nɔ ɖe xó sín Nǔwlánwlán mímɛ́ lɛ́ mɛ. Ðó Vǐ Mawu tɔn wɛ Jezu nyí, bo ko nɔ gbɛ ɖo jǐxwé wútu ɔ, é hɛn ɔ, é ná ko sɔ́ nǔnywɛ́ tɔn aditi ɔ dó hu ji nú tóɖóetɔ́ lɛ́, bo tlɛ ná bló bɔ nǔ lɛ́ ná hú agbɔ̌n yě. Amɔ̌, é bló mɔ̌ ǎ, é nyɔ́ wa ɔ, é sɔ́ nǔkplɔ́nmɛ tɔn jínjɔ́n jlǒ Mawu tɔn kpó Xó tɔn kpó jí. (Xa Jaan 7:14-16.) Kpɔ́ndéwú ɖagbe wɛ nyí énɛ́ b’ɛ sɔ́ ɖ’ayǐ nú ahwanvú tɔn lɛ́.

8. Nɛ̌ mɛsɛ́dó Piyɛ́ɛ ka xwedó kpɔ́ndéwú Jezu tɔn gbɔn?

⁸ Ahwanvú Jezu tɔn lɛ́ lɔ nɔ gán jɛ Xó Mawu tɔn wú hwenu e yě nɔ ɖo nǔ kplɔ́n mɛ wɛ é. Kpɔ́ndéwú tɔn ɖokpó wɛ nyí xó e mɛsɛ́dó Piyɛ́ɛ ɖɔ ɖo Pantekótu 33 H.M. tɔn é. Piyɛ́ɛ kplɔ́n wěma káká ɖé ǎ có, nǔɖɔɖayǐ ɖěɖěe Jezu bló bɔ yě jɛnu, bɔ é tínmɛ lɛ́ é byɔ́ ayi mɛ nú tóɖóetɔ́ lɛ́. (Mɛ. 2:14-37) Wǎgbɔ tɔn ɔ, “mɛ e yí xó tɔn kpó xomɛhunhun kpó lɛ́ é bló batɛ́mu, bɔ gbɛtɔ́ 3000 húzú ahwanvú gbe nɛ́ gbe.”—Mɛ. 2:41.

9. Ényí mǐ ɖo nǔ kplɔ́n mɛ wɛ ɔ, aniwú mǐ ka ɖó ná gán jɛ Xó Mawu tɔn wú?

⁹ Xó Mawu tɔn kɛ́ɖɛ́ jɛ́n ɖó agbɔ̌n bo ná húzú mɛ lɛ́. (Ebl. 4:12) Hǔn, mǐ ɖó ná nɔ zán hwenu e mǐ ɖo nǔ kplɔ́n mɛ wɛ é. Mǐ ba ná “jlá mawuxó ɔ,” é nyí linlin mǐɖésúnɔ tɔn lɛ́ ǎ. (2 Tim. 4:2) Nǔnywɛ́xó 2:6 ɖɔ: “Jexóva ɖésúnɔ wɛ nɔ ná nǔnywɛ́ mɛ; nu tɔn mɛ wɛ nǔtuuntuun kpó nukúnnúmɔjɛnǔmɛ kpó nɔ gosín.” Énɛ́ wú ɔ, ényí mǐ nɔ zán Biblu dó kplɔ́n nǔ mɛ ɔ, ali hun nú Jexóva wɛ mǐ ɖe nú é ná ɖɔ xó nɛ́. (Mal. 2:7) Mǐ ba ɖɔ mɛ lɛ́ ní tuun ɖɔ nǔ e ɖo Biblu mɛ lɛ́ é zɛ nǔnywɛ́ gbɛtɔ́ tɔn wú flaflá tɔn. Mɛ e dá mǐ é gɔ́n wɛ nǔ e ɖ’é mɛ lɛ́ é gosín, bo nɔ d’alɔ mǐ bɔ nǔ mǐtɔn nɔ nyɔ́ nukún tɔn mɛ bɔ mǐ nɔ lɛ́ ɖó awǎjijɛ.—2 Tim. 3:16, 17.

10. Nɛ̌ mǐ ka sixú dɔn ayi Biblu kplɔ́ntɔ́ ɖé tɔn yi Xó Mawu tɔn jí gbɔn?

¹⁰ Ée a ná ɖo nǔ sɔ́ nú Biblu kplɔ́nkplɔ́n ɖé wɛ é ɔ, ba ali ɖěɖěe nu a ná dɔn nǔkplɔ́ntɔ́ towe sín ayi yi nǔkplɔ́nmɛ Biblu tɔn lɛ́ jí ɖe lɛ́ é. Nǔgbó wɛ ɖɔ ɖiɖe lɛ́ kpó video lɛ́ kpó sixú dó jɛ̌ kɔ nú nǔkplɔ́nkplɔ́n ɔ, amɔ̌, nǔkplɔ́ntɔ́ ɔ ɖó ná tuun ɖɔ Biblu wɛ nyí wěma tají hú gǎn ɔ. Énɛ́ wú ɔ, cyán wěmafɔ tají lɛ́ bo d’alɔ nǔkplɔ́ntɔ́ towe bónú é ní lin tamɛ dó yě jí. Ényí mi ɖo xó ɖɔ dó ɖiɖe lɛ́ kpó video lɛ́ kpó jí wɛ hǔn, tɛ́n kpɔ́n bónú nǔkplɔ́ntɔ́ ɔ ní mɔ nǔ jɛ nǔgbódodó Biblu tɔn tají e kplɔ́n mɛ wɛ yě ɖe lɛ́ é mɛ. É byɔ́ ɖɔ a ní ɖɔ xó gěgé, alǒ xa wěmafɔ gěgé ǎ. É nyɔ́ wa hǔn, nǎ hwenu nǔkplɔ́ntɔ́ ɔ bónú é ní lin tamɛ dó wěmafɔ e è xa lɛ́ é ɖokpó ɖokpó jí, bo tlɛ sixú lɛ́ vɔ́ xa ényí é byɔ́ ɖó mɔ̌ ɔ nɛ́. Mɔ̌ mɛ ɔ, a ná xlɛ́ ɖɔ Biblu kplɔ́n wɛ mi ɖe nǔgbó, b’ɛ kún nyí wěma ɖé kplɔ́n wɛ mi ɖe, alǒ ɖiɖe ɖé, kabǐ video ɖé kpɔ́n wɛ mi ɖe kpowun ó.—1 Kɔ. 2:13.

11-12. (a) Nɛ̌ mǐ ka sixú ɖó suúlu dó Biblu kplɔ́ntɔ́ mǐtɔn lɛ́ wú gbɔn? (Mɛsɛ́dó 17:1-4) (Kpɔ́n ɖiɖe ɔ lɔmɔ̌.) (b) Étɛ́ mɛɖé lɛ́ ka sixú nɔ ma tuun dó Biblu wú? Nɛ̌ mǐ ka sixú d’alɔ yě gbɔn?

¹¹ Ényí é vɛ́ wǔ nú nǔkplɔ́ntɔ́ towe bónú é ná yí gbe nú nǔkplɔ́nmɛ Biblu tɔn ɖé hǔn, flín ɖɔ émí ɖó ná “nɔ jlá mawuxó ɔ . . . kpó suúlu ɖaxó kpó.” Nukɔnyiyi nɔ byɔ́ hwenu ɖo mɛ ɖě sí hú gǎn mɛ ɖěvo. Mɛɖé lɛ́ sixú ɖó hudó hwenu tɔn hú gǎn bá dó mɔ nǔ jɛ nǔgbó e bɔ wǔ ɖo nukún mǐdɛɛ lɛ́ tɔn mɛ é mɛ. Azɔn gěgé wɛ Pɔ́lu ɖe kúnnu nú Jwifu e ɖo Tɛsaloníki lɛ́ é, bo jlɛ́ xó dó xó wú xá yě dó Nǔwlánwlán mímɛ́ lɛ́ wú cóbɔ yě mɛ ɖé lɛ́ wá wlí nǔkplɔ́nmɛ ɔ.—Xa Mɛsɛ́dó 17:1-4.

¹² Ali ɖěvo e nu mǐ sixú ɖe xlɛ́ ɖɔ mǐ nɔ ɖó suúlu ɖe é wɛ nyí ɖɔ, mǐ ná nɔ kan nǔ byɔ́ nǔkplɔ́ntɔ́ mǐtɔn lɛ́ bo ka ná tɛ́n kpɔ́n bo nyi alɔ nú xó gěgé ɖiɖɔ. Tɛ́n kpɔ́n bo nɔ ɖótó yě ganjí, bo nɔ mɔ nǔ jɛ lěe yě nɔ lin nǔ gbɔn é mɛ. Énɛ́ gúdo hǔn, mi xa wěmafɔ tají lɛ́ bo ɖɔ xó d’é jí, bónú a ní d’alɔ yě nú yě ní mɔ nǔ jɛ linlin e Mawu ɖó dó xó ɔ wú é mɛ. Gɔ́ ná ɔ, mɛɖé lɛ́ tíin bo mɔ Biblu kpɔ́n ǎ, yě ka tuun nǔtí dó nǔ e ɖ’é mɛ lɛ́ é wú ǎ. Ényí è xlɛ́ yě Biblu e è zín é ɖé ɔ, é ná d’alɔ a? A sixú zán akpáxwé “Xónusɔ́ɖóte nú Xó Mawu tɔn,” éé ɖo bǐbɛ́mɛ Biblu gbɛ yɔ̌yɔ́ ɔ tɔn tɔn é dó xlɛ́ yě xóta tají tají e wú Biblu ɖɔ xó dó lɛ́ é. A hɛn ɔ, a ná zán wěmafɔ e è slɛ́ dó nǔkanbyɔ́ 15​gɔ́ ɔ glɔ́ lɛ́ é ɖokpó alǒ we dó tínmɛ lěe Biblu sixú d’alɔ mǐ bɔ mǐ ná ɖó awǎjijɛ gbɔn é. Ðo kléwún mɛ ɔ, ényí a nɔ xlɛ́ agbɔ̌n e Xó Mawu tɔn ɖó é Biblu kplɔ́ntɔ́ towe lɛ́ ɔ, yě ná ɖu nǔ e kplɔ́n wɛ yě ɖe é sín le hú gǎn.

SƆ́ AYI ÐÓ JEXÓVA JÍ

13. Ényí mǐ ɖo nǔ kplɔ́n mɛ wɛ ɔ, mɛ̌ jí mǐ ka ɖó ná dɔn ayi mɛ lɛ́ tɔn yi? Jlɛ̌ dó nǔɖé wú.

¹³ Nǔ e gbé nya wɛ mǐ ɖe é wɛ nyí ɖɔ mǐ ná d’alɔ tóɖómǐtɔ́ lɛ́ bɔ yě ná tuun Jexóva, bo lɛ́ sɛkpɔ́ ɛ. (Ja. 4:8) Ðo ali énɛ́ nu ɔ, mǐ sixú sɔ́ azɔ̌ mǐtɔn jlɛ́ dó mɛ e nɔ tá zogbɛ́n dó weɖútɔ́ lɛ́ jí ɖo nǔkpɔ́ntɛn ɖé é tɔn wú. Ényí mɛ lɛ́ ɖo we ɖú wɛ ɔ, é nɔ lílɛ́ zogbɛ́n ɔ dó éɖésúnɔ jí ǎ, weɖútɔ́ lɛ́ jí wɛ é nɔ tá dó, bɔ yě nɔ nɔ wěziza nu. Nǔ ɖokpó ɔ wɛ mǐ lɔ ɖó ná wa hwenu e mǐ ɖo nǔ kplɔ́n mɛ wɛ é. Mǐ ná dɔn ayi mɛ lɛ́ tɔn yi Jexóva jí, é ná nyí dó mǐɖésúnɔ jí ǎ.

14. Nɛ̌ mǐ ka sixú d’alɔ nǔkplɔ́ntɔ́ mǐtɔn bɔ é ná sɔ́ ayi ɖó Jexóva jí gbɔn?

¹⁴ A ɖo Biblu kplɔ́n xá mɛɖé wɛ hǔn, d’alɔ ɛ nú é ní ba ná nyɔ́ ɖo Jexóva sí. (Nǔx. 27:11) Nǔ ɖěɖěe nǔkplɔ́ntɔ́ ɔ ná wa bá dó húzú kúnnuɖetɔ́ é kplɔ́n ɛ wɛ a ɖe kpowun ǎ. É ní bló hǔzúhúzú lɛ́ bá dó nyɔ́ ɖo Jexóva sí ba wɛ a ɖe. Ði kpɔ́ndéwú ɔ, nú é ɖo wǔ vɛ́ n’i wɛ bónú é ná ɖu ɖo walɔ nyanya ɖé jí ɔ, a sixú kan nǔ lěhun lɛ́ byɔ́ ɛ: “Étɛ́wú Jexóva ka gbɛ́ wǎn nú walɔ énɛ́? Étɛ́wú Jexóva ka byɔ́ we ɖɔ hwi ní jó nǔwalɔ énɛ́ e nɔ vǐví nú we é dó? Nɛ̌ nǔ énɛ́ e byɔ́ we wɛ Jexóva ɖe é ka xlɛ́ ɖɔ é yí wǎn nú we gbɔn?” Lě do a nɔ dó wǔsyɛ́n lanmɛ nú nǔkplɔ́ntɔ́ towe b’ɛ nɔ lin tamɛ dó Jexóva jí sɔ é ɔ, mɔ̌ do wɛ é ná mɔ ɖɔ Tɔ́ ɖagbe wɛ é nyí nú mǐ sɔ. Wǎgbɔ tɔn ɔ, énɛ́ ná d’alɔ nǔkplɔ́ntɔ́ ɔ bɔ é ná ba ná nyɔ́ ɖo Jexóva sí.

KPO ÐO AZƆ̌ WA ÐO NǓWÚKPÍKPÉ MƐKPLƆ́NKPLƆ́N TƆN TOWE WÚ WƐ

15. Nɛ̌ a ka sixú kpo ɖo azɔ̌ wa ɖo nǔwúkpíkpé mɛkplɔ́nkplɔ́n tɔn towe wú wɛ gbɔn?

¹⁵ A sixú xo ɖɛ sɛ́ dó Jexóva ɖɔ é ní d’alɔ we, nú a ná gbéjé nǔwúkpíkpé mɛkplɔ́nkplɔ́n tɔn towe kpɔ́n bá kpɔ́n fí e a sixú blóɖó ɖe é. (1 Jaan 5:14) Bo ná dó wa nǔ sɔgbe xá ɖɛ towe ɔ, a hɛn ɔ, a ná hɛn azɔ̌ e Jexóva nɔ kplɔ́n mǐ ɖo kplé mǐtɔn lɛ́ jí é ayi mɛ, bo zán. A sixú nɔ lɛ́ kplá nǔkplɔ́nmɛtɔ́ alɔsekpɛ́nnánɔ lɛ́ yi Biblu kplɔ́nkplɔ́n towe lɛ́ domɛ. Énɛ́ gúdo hǔn, nɔ kanbyɔ́ yě ɖɔ fítɛ́ lɛ́ émí ka sixú bló hǔzúhúzú lɛ́ ɖe a jí. Lɛ̌ flín ɖɔ nǔ lɛ́ ko má dó hwɛ, amɔ̌, é ko má dó Biblu kplɔ́ntɔ́ towe ǎ. Sɔ́ hwiɖée ɖó tɛn tɔn mɛ. Énɛ́ gúdo hǔn, d’alɔ nǔkplɔ́ntɔ́ towe bónú é ní mɔ ɖɔ wɛn mǐtɔn ɔ, wɛn ɖagbe wɛ é nyí nǔgbó. Énɛ́ sixú zɔ́n bɔ é ná zun xɔ́ntɔn vívɛ́ xá Jexóva bo lɛ́ ɖó awǎjijɛ adodwé ɔ.—Ðɛh. 1:1-3.

16. Ényí mǐ kpo ɖo azɔ̌ wa ɖo nǔwúkpíkpé mɛkplɔ́nkplɔ́n tɔn mǐtɔn wú wɛ ɔ, nɛ̌ mǐ ka ná ɖu le tɔn gbɔn?

¹⁶ Nǔ kplɔ́nkplɔ́n mɛ ɖěvo lɛ́ dó Jexóva wú nyí ɖokpó ɖo nǔ e nɔ hɛn awǎjijɛ wá nú mǐ hú gǎn lɛ́ é mɛ. È ná ɖó hudó azɔ̌ énɛ́ tɔn hú gǎn ɖo gbɛ yɔ̌yɔ́ ɔ mɛ. Énɛ́ wú ɔ, mi nú tóɖómǐtɔ́ lɛ́ sín nǔ ní kpo ɖo ayi mɛ ɖu nú mǐ wɛ. Mǐ ní kpo ɖo Xó Mawu tɔn wú gán jɛ wɛ, bo kpo ɖo ayi sɔ́ ɖó Jexóva jí wɛ, ée mǐ ná ɖo wɛn ɖagbe ɔ jlá wɛ é. Mɔ̌ mɛ ɔ, mǐ sixú bló bɔ nǔwúkpíkpé mɛkplɔ́nkplɔ́n tɔn mǐtɔn ná kpɔ́n te.