Ẹsọn̄ọ Ẹyịre ke Utom Usiakusụn̄
N̄KPỌ nte Mme Ntiense Jehovah 4,500,000 ke ẹtan̄a eti mbụk ke ofụri ererimbot. Se iwakde ibe mme asiakusụn̄, m̀mê mme atan̄a Obio Ubọn̄ uyọhọ-ini 600,000 ẹdu ke otu mmọ. Mbon oro ẹdude ke udịm mme asiakusụn̄ emi ẹsịne mbon oro ẹdude ke ntọn̄ọ ntọn̄ọ isua n̄kparawa tutu osịm mbon oro ẹma ẹkekpọn̄ utom ẹmi ẹdude ke mme iduọk isua 90. Mmọ ẹto kpukpru idaha ye ikpehe ke uwem.
Nte eyịghe mîdụhe, kpukpru mme ọkwọrọikọ uyọhọ-ini ẹmi ẹyom ndikụt unen ke utom usiakusụn̄. Ediwak ẹyom ndinam enye edi ubọkọkọ ofụri eyouwem mmọ. Ndusụk ikemeke ndinam ntre oto ndusụk ntak. Edi, mmọ en̄wen ke ẹkaiso ke utom usiakusụn̄ kpa ye mme nsọn̄ọn̄kpọ ke n̄kan̄ okụk, unana nsọn̄idem, unana nsịnudọn̄, ye mme mfịna eken. Ntre didie ke mme ọkwọrọikọ uyọhọ-ini ẹkeme ndiyọ mme utọ mfịna oro ndien ẹsụk ẹsọn̄ọ ẹyịre ke utom usiakusụn̄?
Ndisịm Mme N̄kpọ Ẹyomde ke N̄kan̄ Okụk
Ke ofụri ofụri, mme asiakusụn̄ ẹsinam utom idịbi udia man ẹse ẹban̄a ubiatokụk mmọ, nte apostle Paul akanamde. (1 Thessalonica 2:9) Ke ata ediwak ikpehe ererimbot, mmọ ẹsobo edidọk oro ekọmurua udia, ọfọn̄, itieidụn̄, ye okụk ukpeusụn̄ ẹdọkde. Ediwak ini esisọn̄ ndinyene utom ibio ini oro mmọ ẹyomde. Ke odude, mme utọ utom oro ẹsiwak ndinọ nsụhọde n̄kan okụkutom kpọt, ye unana okụk ufọkibọk.
Edieke nnyịn ‘ibemde iso iyom Obio Ubọn̄ Abasi ye edinen ido esie,’ nnyịn imekeme ndinyene mbuọtidem nte ke Jehovah eyenọ se nnyịn iyomde ke n̄kan̄ eke obụk. Ke ntre, ke ini ẹdude ke idak mfịghe ke n̄kan̄ okụk, iyomke mme asiakusụn̄ ‘ẹtịmede esịt ẹban̄a n̄kpọn̄.’ (Matthew 6:25-34) Ke adan̄aemi mmọ ẹsịnde ukeme ofụri esịt ndikan mme utọ mfịna oro, ọkpọsọn̄ mbuọtidem ke Jehovah eyenam mmọ ẹbọhọ editịmede esịt oro mîdotke.
Ke ini owo osobode nsọn̄ọn̄kpọ ke n̄kan̄ okụk, eyedi ẹkeme ndisụhọde ubiatokụk. Ye ndusụk ukpụhọde ke ndutịm ubiatokụk, ẹkeme ndisịm mme n̄kpọ oro ẹyomde, nte ededi idịghe orụk ikpîkpu n̄kpọ obụkidem oro ẹkpemade ndinyene. Man ẹsụhọde mme ubiatokụk, ndusụk mme asiakusụn̄ ẹsibuana ubet ufọk kiet ye ekemmọ mme Christian. Ke ndin̄wam nditọ mmọ ẹnam utom usiakusụn̄, ndusụk ini mme ete ye eka ẹsinam itieidụn̄ odu ke mfọn mîdịghe ke usụhọde ekọmurua. Mmọ eken ẹsin̄wam mme asiakusụn̄ ke okụk udia ye okụk ukpeusụn̄. Edi mme asiakusụn̄ ikpoyomke ndidi mbiomo nnọ mmọ en̄wen, koro mmọ ẹnyene mbiomo N̄wed Abasi ndise mban̄a idemmọ.—2 Thessalonica 3:10-12.
Ẹkeme ndisụhọde okụk ukpeusụn̄ ke ndibuana ubiatokụk ye mme asiakusụn̄ eken. Edieke asiakusụn̄ iba ẹnyenede moto, mmọ ẹkeme ndinam utom ukwọrọikọ ọtọkiet ke ukem ebiet, ẹkamade moto kiet ẹnyụn̄ ẹtrede ubiatokụk edikama moto iba. Mme asiakusụn̄ oro mînyeneke moto ẹkeme ndinam utom ọtọkiet ye mbon oro ẹnyenede ẹnyụn̄ ẹbuana ke ndise mban̄a okụk ukpeusụn̄. Ẹkeme ndikaiso nsụhọde okụk ukaisan̄ ebe ke ndikụre mme n̄kpet n̄kpet efakutom ke ndisasan̄a. Ke ediwak idụt mme asiakusụn̄ ẹsisan̄a ke n̄kpọisan̄ mbio obio oro ememde urua.
Ke otu mbon oro ẹkekande mme mfịna okụk ẹnyụn̄ ẹsọn̄ọde ẹyịre ke utom uyọhọ-ini ekedi Newton Cantwell ye n̄wan esie. Mmọ ẹma ẹnyam in̄wan̄ mmọ ẹnyụn̄ ẹtọn̄ọ utom usiakusụn̄ ye nditọ itiokiet ke otu nditọ mmọ itiaba ke 1932, ke ini Akwa Iduọ eke Ndutịm Uforo. Brọda Cantwell ekewet ete, “Ikebịghike ke emi ikabiatde ofụri okụk oro nnyịn ikenyenede ito in̄wan̄ oro ikanyamde—akpan akpan ke okụk ufọkibọk. Nnyịn imeti nte ke ini nnyịn ikọkpọn̄de ika ọyọhọ itieutom nnyịn iba, nnyịn ikenyene okụk ekemde ndida n̄kpe okụkufọk urua iba kpọt, ye dollar ition ọyọhọde osụhọ. Nte ededi, nnyịn ima ifiọk ite ke Jehovah eyenọ n̄kpọ nnyịn ima ikam isịn ifịk ke utom nnyịn. . . . Nnyịn ima ikpep nte ẹfamde n̄kpọ ke nsio nsio usụn̄. Ke uwụtn̄kpọ, ke ikpọn̄de ika obufa efakutom, ami nnyenyene nneme ye ndusụk mme enyene itie unyam aranuwat nnyụn̄ nnam an̄wan̄a nte ke nnyịn isiwat moto ita kpukpru usen ke ebuana ye utom Christian nnyịn. Emi ama esiwak ndisụn̄ọ ke nnyịn ndidep aranuwat ke usụhọde ekọmurua. Ikebịghike nditọiren nnyịn ẹma ẹdiọn̄ọ ndidiọn̄ moto nnyịn, anamde nnyịn ibọhọ ekese okụk oro ikpesikpede ke udiọn̄ moto.” Ke ntre ubon Cantwell ẹma ẹkan n̄kpọ-ata eke n̄kan̄ okụk uforo uforo ẹnyụn̄ ẹsọn̄ọ ẹyịre ke utom uyọhọ-ini. Brọda Cantwell okosụk odu ke udịm mme asiakusụn̄ ke ini enye akakpade ke osịmde isua 103.
Ndinyene Utom Ibio Ini
Ediwak mme asiakusụn̄ ẹse ẹban̄a idemmọ ke n̄kan̄ okụk ebe ke mme utom ibio ini. Man an̄wam idemesie ke utom ukwọrọikọ ke Corinth, Paul akanam utom nte anam ufọkọfọn̄ ye ekemmọ mme andinịm ke akpanikọ Aquila ye Priscilla. (Utom 18:1-11) Mfịn, nditọete eke spirit ẹsikop inemesịt ndinọ mme asiakusụn̄ utom idịbi udia eke ibio ini. Mme asiakusụn̄ eken ẹsinyene utọ utom oro ẹto mme n̄ka uda owo ke utom oro ẹsinọde utom ibio ini. Edinyene mbuọtidem ke Abasi edi akpan n̄kpọ, ntre ke onyụn̄ edi ye akam ofụri esịt kaban̄a ndausụn̄ esie ke ndinam mme ubiere oro ẹban̄ade utom.—Mme N̄ke 15:29.
Asiakusụn̄ kiet ọkọdọhọ ete, “Ke mma n̄kokop ekese odudu nto edikere mban̄a ke akam, mma nnam esenyịn utom mi ọfiọk ete ke utom ukwọrọikọ mi edi ọkpọkpọ akpan mbiomo ye nte ke ami ndiyomke idaha utom ofụri ini. Ke Wednesday urua efen, ẹma ẹbụp mi m̀mê nyema ndinam utom oro ke ido eke ibio ini. Mma nnyịme ye idatesịt.” Ẹkûda odudu oro akam enyenede ke usụhọde, ẹnyụn̄ ẹnam n̄kpọ ẹban̄a akam mbufo.
Mme asiakusụn̄ ẹkeme ndikụt nte edide se idotde nditịn̄ nnọ mbon oro ẹyomde ndida mmọ ke utom nte ke uduak mmimọ ke ndiyom utom ibio ini edi man an̄wam mmimọ ke utom ukwọrọikọ. Mmọ ẹkeme ndisiak mme usen oro mmọ ẹdinamde utom ye ibat hour oro mmọ ẹdidade ẹnam utom ke urua. Nditọeka iban iba eke obụk ẹma ẹbahade utom ofụri ini mmọ ke itieutom usobo lọya, anamde owo mmọ kiet kiet esinam utom usen iba ye ubak ke urua. Emi ama an̄wam mmọ ndikaiso nte mme asiakusụn̄ tutu mmọ ẹkedụk Watchtower Bible School of Gilead ẹnyụn̄ ẹbọ itieutom isụn̄utom.
Ẹkeme ndikụt mme nsio nsio orụk utom oro N̄wed Abasi onyịmede ebe ke ndinyene nneme ye ekemmọ mme andinịm ke akpanikọ ye mbon en̄wen m̀mê ke ndise etop uyom mbonutom ke n̄wed mbụk n̄kpọntịbe. Nsụhọdeidem edi n̄kpọ un̄wam, koro emi ekeme ndinam mme asiakusụn̄ ẹkûsat utọ utom oro mmọ ẹkpenamde ẹbe ubọk. (Men James 4:10 domo.) Man ẹkaiso ke utom usiakusụn̄ ekeme ndiyom mmọ ẹnam utom idịbi udia oro ndusụk owo ẹsede ke usụhọde. Ke owo ama ọkọbọ utọ utom oro edi oyom utọ efen, ẹkeme ndinam ukpụhọde ke utom nte ini akade.
Unana Nsọn̄idem ye Unana Nsịnudọn̄
Ana ndusụk owo ẹtre utom usiakusụn̄ mmọ ke ntak n̄kpọsọn̄ mfịna unana nsọn̄idem. Nte ededi, edieke mme asiakusụn̄ mînamke n̄kpọ ke ibụmede ke afan̄ emi, mmọ ẹkeme ndikụt ẹte ke udọn̄ọ oro ekeme ndikụre mîdịghe ke idem ekeme ndisọn̄ mmọ ekem ndikaiso ke utom usiakusụn̄. Ediwak owo ẹkeme ndisiak usụn̄ kpa ye mme mfịna unana nsọn̄idem koro mmọ ẹbọde usọbọ, ẹsọn̄ọde ẹyịre ye udia oro odotde ye mmọ, ẹnyụn̄ ẹbọ nduọkodudu ye nsịn̄edeidem oro ẹyomde. Esenyịn kiet oro asan̄ade-san̄a ama okụt asiakusụn̄ eyenete an̄wan kiet emi ọkọdọn̄ọde ewan̄kọ tutu enye okoyom un̄wam man ekeme ndisan̄a ke ufọk ke ufọk ke utom ukwọrọikọ. (Utom 20:20) Kpa ye oro, enye ye ebe esie ẹma ẹnịm ukpepn̄kpọ Bible 33 ẹnyụn̄ ẹn̄wam owo 83 ndibọ akpanikọ Abasi. Idem esie ama ọsọn̄ nte ini akakade, ndien enye ama oduk Ufọkn̄wed Utom Usiakusụn̄ isua 11 ke ukperedem.
Unana nsịnudọn̄ ekeme ndinam ndusụk owo ẹkpọn̄ utom usiakusụn̄. (Mme N̄ke 24:10) Asiakusụn̄ kiet ama asian esenyịn kiet oro asan̄ade-san̄a ete: “Mmọn̄ ntre utom usiakusụn̄. . . . Mmenyene n̄kpọ ndidep.” Enye okoyom akrasi enyịn oro akpade dollar 20. Esenyịn oro ama obụp ete, “Ndi afo oyom nditre utom usiakusụn̄ ke ntak n̄kpọ dollar 20?” Ẹma ẹnọ ekikere ẹte asiakusụn̄ oro anam utom usen kiet ke in̄wan̄ kọfi n̄kann̄kụk, ọbọ dollar 20, edep akrasi enyịn, onyụn̄ akaiso ke utom usiakusụn̄. N̄kaiso nneme ama owụt ete ke akpan mfịna ekedi ke ntak ediwak okụk udiọn̄ moto. Ẹma ẹtoro ẹte asiakusụn̄ oro osụhọde ubiatokụk ebe ke ndiwat moto esie ke ufan̄ ibat ibat itiat ke usen utu ke ndiwat n̄kanade akamba ikpehe. Ẹma ẹnọ enye item n̄ko ẹte ọsọn̄ọ omụm idaha eke spirit esie akama. Asiakusụn̄ emi ama ada item oro esịn ke edinam ndien ọfiọn̄ itiokiet ke ukperedem enye ama ọbọ ikot ndidụk Ufọkn̄wed Gilead. Ke ama okokụre ukpep ẹma ẹnọ enye aka esenidụt onyụn̄ anam utom do ke edinam akpanikọ ke ediwak isua tutu ke n̄kpa esie. Ih, ikpọ edidiọn̄ ẹsiwak ndisụn̄ọ edieke nnyịn mîyakke idem inọ unana nsịnudọn̄ edi inyenede ke ekikere ite ke Jehovah odu ye nnyịn.
Ẹda Ifetutom Mbufo Ke Akpan N̄kpọ
Kpa ye mme idomo, utọ nte unana ye mme ini utie ọbiọn̄, Paul ama ada utom esie ke akpan n̄kpọ. (2 Corinth 4:7; 6:3-6) Ke ẹsobode nsọn̄ọn̄kpọ ye ukọbọ mfịn, ediwak mme asan̄autom Jehovah ke Africa, Asia, Edem Usiahautịn Europe, ye ke mme ebiet en̄wen ẹmesọn̄ọ ẹmụm ifet utom usiakusụn̄ mmọ ẹkama. Ke ntre, ke ini ẹsobode mme idomo, ẹnam ofụri ukeme ndisọn̄ọ nyịre ke ifetutom emi, man ẹda itoro ẹsọk Jehovah.
Ata ediwak mme asiakusụn̄ ẹkekam ẹkeme ndidụk utom ukwọrọikọ uyọhọ-ini koro mmọ ẹkenamde usụn̄uwem mmọ edi mmemmem. Ukem nte Paul, mmọ ẹma ẹbiọn̄ọ mme n̄kpọ etabi inyene obụkidem ẹnyụn̄ ẹkpep ndikop uyụhọ ke ‘se ẹdiade ye se ẹdade ẹfụk iferi.’ Man ẹsọn̄ọ ẹyịre ke utom usiakusụn̄, oyom mmọ ẹyụhọ ye mme n̄kpọ oro ẹdide se ẹyomde. (1 Timothy 6:8) Idatesịt esisụn̄ọ oto edida mme ifetutom oro Abasi ọnọde nnyịn ke akpan n̄kpọ, inịmde mmọ ẹkon̄ ẹkan inyene obụkidem.
Ke ndinam an̄wan̄a: Anton Koerber ama enyene ifet ndimen mme ufọn n̄kpọ Obio Ubọn̄ n̄wụt ikpọ owo ukara ke Washington, D.C. Enye ama anam utom nte asiakusụn̄ ke ndusụk ini onyụn̄ edi esenyịn circuit ke mme iduọk isua 1950. Ndusụk n̄kani nsan̄a mbubehe esie inikiet ẹma ẹda ekikere oro akpanamde enye enyene udori miliọn dollar kiet ẹbịne enye. Nte ededi, man anam ntre, oro okpokoyom enye ayak ofụri ini esie esịn ke mme ndutịm mbubehe ke n̄kpọ nte isua kiet. Ke ama ọkọbọn̄ akam oyom ndausụn̄ ye edu eti ibuot, enye ọkọdọhọ ete: “Idịghe mmemmem n̄kpọ ami ndikpọn̄ mme utịbe utịbe ifet mi ndinam n̄kpọ Jehovah mi idem ke isua kiet kpọt, baba, idịghe mmemmem kaban̄a ofụri okụk ke ererimbot. Ndinam n̄kpọ nnọ nditọete mi mi ke Washington otịm ọsọn̄ urua ọnọ mi, ndien edi mi ke ami mfiọk ke mmenyene edidiọn̄ Jehovah. Ami n̄kpenyene miliọn dollar kiet nte eyịghe mîdụhe, edi ke utịt isua utọ uwem oro, ami n̄kpetie didie ke n̄kan̄ eke spirit, m̀mê idem ke n̄kan̄ eke obụk?” Enye ke ntre ama esịn enọ oro. Ndida mme ifetutom mmọ ke akpan n̄kpọ ke ukem usụn̄ oro aman̄wam ediwak owo ndisọn̄ọ nyịre ke utom usiakusụn̄.
Nso akwa edidiọn̄ ke mme asiakusụn̄ ẹnyene ntem! Edi edidiọn̄ ndibiat ediwak hour ke nditịn̄ n̄kpọ mban̄a ubọn̄ ubọn̄ itie Jehovah nte edidem. (Psalm 145:11-13) Ke ntak ẹsịnde utọ akpakịp ini oro ke utom ukwọrọikọ, mme asiakusụn̄ ẹmenyene edidiọn̄ eke edida ndọn̄esịt eke spirit nsọk mbon unana ye mbon oro ẹfịkde, mbon udọn̄ọ m̀mê mbon oro ẹtabade owo mmọ ke n̄kpa, ye mbon eken oro ẹdude ke ọkpọsọn̄ nnanenyịn ẹnyụn̄ ẹyomde ata idotenyịn. Ntre, edieke mme idaha ẹyakde nnyịn ibuana ke utom ukwọrọikọ uyọhọ-ini, nnyịn ke akpanikọ iyenyene ediwak edidiọn̄. Edi “[edidiọn̄, NW] Jehovah ofori owo.” (Mme N̄ke 10:22) Ndien edi ke un̄wam ye edidiọn̄ esie ke ediwak mme anditan̄a Obio Ubọn̄ ẹsọn̄ọ ẹyịre idara idara ke utom usiakusụn̄.