Mme Edidiọn̄ Utom Usiakusụn̄
1, 2. Mme edidiọn̄ ewe ke ẹkeme ndinyene nto utom usiakusụn̄, ndien ntak-a?
1 Asiakusụn̄ kiet ọkọdọhọ ete: “Mmọfiọk nte ke utom ndomokiet efen ikpekemeke ndida uyụhọ oro otode edibuana akpanikọ ye mbon efen nsọk mi.” Asiakusụn̄ efen ọkọdọhọ ẹte: “Ke utịt usen kiet kiet, mmesikop inem idap, ndien esịt mi esiyọhọ ye idara.” Mme asiakusụn̄ emi ẹtịn̄ ukem se nditọete emi ẹdude ke kpukpru ebiet, oro ẹbọde ufọn eto utom usiakusụn̄ ẹkpetịn̄de.—N̄ke 10:22.
2 Ndin̄wam mbon en̄wen ndinyene ifiọk N̄wed Abasi oro anyan̄ade uwem ọnọ ata uyụhọ. (Utom 20:35; 1 Thess. 2:19, 20) Asiakusụn̄ oro anamde utom ke anyan ini ekewet ete: “Edi n̄kpọ nduaidem ye se isọn̄ọde mbuọtidem ndikụt nte Ikọ Abasi enyenede odudu ke ndinụk mme owo ẹnam mme ukpụhọde ke uwem mmọ.” Ih, ke ndinyịme ndin̄wam mbon en̄wen nnyụn̄ nnịm ukpepn̄kpọ Bible ye mmọ, mme asiakusụn̄ ẹyebọ utọ edidiọn̄ emi.
3, 4. Didie ke utom usiakusụn̄ ekpep owo ndibuọt idem ke Jehovah, ndien didie ke emi an̄wam owo ndikọri ke n̄kan̄ eke spirit?
3 Ndibuọt Idem ke Jehovah: Ndibuọt idem kpukpru usen ke spirit Abasi nte mmọ ẹnamde utom ukwọrọikọ mmọ an̄wam mme asiakusụn̄ ndikọri “mbun̄wụm spirit,” ndien emi esikpeme mmọ. (Gal. 5:16, 22, 23) Ke adianade do, sia mmọ ẹsidade Ikọ Abasi ẹnam n̄kpọ kpukpru ini, mme asiakusụn̄ ẹsiwak ndinyene usọ ke ndida N̄wed Abasi n̄n̄wana mban̄a akpanikọ nnyụn̄ nsọn̄ọ mbon en̄wen idem. (2 Tim. 2:15) Eyenete oro anamde utom usiakusụn̄ ke ediwak isua ama ọdọhọ ete: “Utom usiakusụn̄ an̄wam mi ndinyene ntotụn̄ọ ifiọk Bible, kpa ifiọk oro ndade n̄n̄wam ediwak owo ndifiọk Jehovah ye mme uduak esie.” Emi ọnọ uyụhọ didie ntem!
4 N̄ko, ana mme asiakusụn̄ ofụri ini ẹbuọt idem ke Jehovah ke ediwak usụn̄ efen. Ẹsisọn̄ọ mbuọtidem mmọ nte mmọ ẹkụtde nte enye ọdiọn̄de ukeme mmọ ke ndinọ mmọ n̄kpọ eke obụk. Asiakusụn̄ emi edide isua 72 emi anamde utom usiakusụn̄ ke isua 55 ọkọdọhọ ete: “Akananam Jehovah ikpụho mi.” N̄ko-n̄ko, ebede ke ndidu mmemmem uwem, mme asiakusụn̄ ẹkpeme idem mmọ ẹbiọn̄ọ ediwak editịmede esịt eke uwem. Nte emi edemede fi udọn̄?—Matt. 6:22; Heb. 13:5, 6.
5. Didie ke utom usiakusụn̄ ekeme ndin̄wam owo asan̄a ekpere Jehovah?
5 Ndisan̄a N̄kpere Abasi: Itie ebuana nnyịn ye Jehovah edi ata ọsọn̄urua inyene. (Ps. 63:3) Ke ini isịnde idem ọyọhọ ọyọhọ ke utom ukwọrọikọ ke ntak ima oro imade Jehovah, itie ebuana oro eyenen̄ede ọsọn̄. (Jas. 4:8) Eyenete oro akanamde utom usiakusụn̄ ke se ibede isua 18 ọkọdọhọ ete: “Utom usiakusụn̄ anam nnyịn ikeme ‘nditabi nnyụn̄ nse nte Jehovah ọfọnde,’ ke usen ke usen ikọride itie ebuana oro etịmde-tịm ọsọn̄ akan ye Andibot nnyịn.”—Ps. 34: 8.
6. Nso ke ana mme asiakusụn̄ ẹnyene, ndien ke ẹsiode mme asiakusụn̄ ẹfep, mmanie n̄ko ẹsibọ ufọn?
6 Ke adianade ye edinyene idaha oro ayakde ẹsiak usụn̄, ana mme asiakusụn̄ ẹnyene ọkpọsọn̄ mbuọtidem, ẹnyene ata ima Abasi ye ima mbọhọidụn̄ ẹnyụn̄ ẹnyịme ndinam n̄waidem. (Matt. 16:24; 17:20; 22:37-39) Nte ededi, nte iso imam mme asiakusụn̄ ke kpukpru ebiet ẹwụtde, mme edidiọn̄ ẹtode utom usiakusụn̄ ẹnen̄ede ẹwak. (Mal. 3:10) Mme edidiọn̄ emi isitreke n̄kukụre ke idem mme asiakusụn̄, edi mbon ubon mmọ ye esop ẹsinen̄ede ẹbọ ufọn n̄ko ẹto nti edu emi mme asiakusụn̄ ẹwụtde.—Phil. 4: 23.