Mme Edidiọn̄ Utom Usiakusụn̄
“Ufọn Jehovah ofori owo, enye inyụn̄ idianke afanikọn̄ ke esịt.”—MME N̄KE 10:22.
1, 2. (a) Didie ke asiakusụn̄ kiet eketịn̄ ekikere esie kaban̄a utom ukwọrọikọ uyọhọ ini? (b) Ntak emi mme asiakusụn̄ ẹdude ke idaha ndinyene idatesịt eke edinam mme mbet ata ọyọhọ ọyọhọ?
“NTE idatesịt efen ekeme ndidu oro okponde akan eke edikụt owo emi afo ekpepde n̄kpọ akabarede edi ifịk ifịk anditoro Jehovah? Edi n̄kpọ nduaidem ye se isọn̄ọde mbuọtidem ndikụt nte Ikọ Abasi enyenede odudu ke ndinụk mme owo ẹnam mme ukpụhọde ke uwem mmọ man otodo ẹnem Jehovah esịt.” Ntre ke asiakusụn̄ kiet otode Canada emi odude ke utom uyọhọ ini ke se ibede isua 32 ekewet. Kaban̄a utom usiakusụn̄ esie, enye ọdọhọ ete: “N̄kemeke ndikere ndinam n̄kpọ ndomokiet efen. Ke akpanikọ n̄kemeke ndikere mban̄a n̄kpọ efen oro ekemede ndinọ mi ukem idatesịt oro.”
2 Ndi afo emenyịme nte ke akwa idatesịt odu ke nditiene mbuana ke ndin̄wam owo ke usụn̄ nsinsi uwem? Edi akpanikọ, idịghe mme asiakusụn̄ ikpọn̄ ẹnyene utọ idatesịt oro. Kpukpru mme asan̄autom Jehovah ẹdu ke idak ewụhọ ‘ndinam kpukpru mme idụt ẹdi mbet,’ ndien mmọ ẹdomo ndinam ntre. (Matthew 28:19) Nte ededi, sia mme asiakusụn̄ ẹkemede ndibiat ediwak hour ke utom ukwọrọikọ, mmọ ẹwak ndidu ke idaha ndinyene idatesịt eke edinam mme mbet ata ọyọhọ ọyọhọ. Edi usiakusụn̄ enyene mme utịp efen n̄ko. Nyene nneme ye mme asiakusụn̄, ndien mmọ ẹyesian fi ẹte ke usiakusụn̄ edi utịbe utịbe usụn̄ ndinyene ‘ufọn Jehovah oro oforide owo.’—Mme N̄ke 10:22.
3. Nso ikeme ndinụk nnyịn nte nnyịn ikade iso inam n̄kpọ Jehovah?
3 Ke ndondo emi, ẹma ẹdọhọ mme asiakusụn̄ ẹtode nsio nsio ikpehe ke ererimbot ẹtịn̄ mme edidiọn̄ ẹmi mmọ ẹnyenede ke utom ukwọrọikọ uyọhọ ini. Ẹyak nnyịn ikere iban̄a se mmọ ẹketịn̄de. Nte ededi, kûkop mmemidem edieke utom fo mîkponke ke ntak unana nsọn̄idem, usọn̄, m̀mê mme idaha en̄wen. Ti ete, akpan n̄kpọ edi ndinam n̄kpọ Jehovah ke ofụri ukpọn̄, ke ifet ekededi. Kpa ye oro, ndikop se ndusụk mme asiakusụn̄ ẹtịn̄de ekeme ndinam udọn̄ fo ọkọri ke ndidụk utom emi ọnọde utịp mi edieke ekemede.
Ndikop Ntotụn̄ọ Uyụhọ ye Idatesịt
4, 5. (a) Ntak emi edibuana eti mbụk ye mbon en̄wen edide ifiọkutom emi ọnọde utịp ntre? (b) Didie ke mme asiakusụn̄ ẹse edibuana ke utom ukwọrọikọ uyọhọ ini?
4 “Ekese inemesịt odu ke ndinọnọ akan nte odude ke ndibọbọ,” ntre ke Jesus ọkọdọhọ. (Utom 20:35, NW) Ih, edinọ ye unana ibụk enyene mme utịp esie. (Mme N̄ke 11:25) Emi edi akpanikọ akpan akpan ke ini edide edisịm edibuana eti mbụk ye mmọ en̄wen. Ke akpanikọ, ewe n̄kponn̄kan enọ ke nnyịn ikeme ndinọ ekemmọ owo n̄kan ndin̄wam enye enyene ifiọk Abasi, emi adade esịm nsinsi uwem?—John 17:3.
5 Idịghe n̄kpọ n̄kpaidem, mbon oro ẹbuanade ke utom ukwọrọikọ uyọhọ ini ẹsiwak nditịn̄ mban̄a idatesịt ye ntotụn̄ọ uyụhọ oro mmọ ẹnyenede ẹto utom ukwọrọikọ mmọ. Asiakusụn̄ kiet edide isua 64 ke emana emi otode Britain ọdọhọ ete: “Mmọfiọk nte ke utom ndomokiet efen ikpekemeke ndida uyụhọ oro otode edibuana akpanikọ ye mbon efen nsọk mi.” Ebeakpa kiet otode Democratic Republic of Congo etịn̄ se utom usiakusụn̄ ọwọrọde ọnọ enye ete: “Utom usiakusụn̄ ekedi ata n̄kpọ ndọn̄esịt ọnọ mi ke mma n̄kataba edima ebe mi. Adan̄a nte n̄wọrọde n̄ka ukwọrọikọ man n̄n̄wam mbon efen, ntre ke n̄ketre ndinen̄ede n̄kop ubiak akwa nnama oro. Mma n̄kọn̄ mbuọtidem mi ke mme un̄wọn̄ọ Jehovah nnyụn̄ n̄kere akpan akpan mban̄a nte n̄kemede ndin̄wam mbon oro n̄kpepde n̄kpọ man ẹnam mme ukpụhọde ke uwem mmọ. Ke utịt usen kiet kiet, mmesikop inem idap, ndien esịt mi esiyọhọ ye idara.”
6. Nso akpan idatesịt ke ndusụk mme asiakusụn̄ ẹnyene?
6 Ndusụk mbon oro ẹnamde utom usiakusụn̄ ke ediwak isua ẹnyene san̄asan̄a idatesịt ndinam utom ke mme nsannsan ikpehe, ẹtọn̄ọde mme esop, ẹmi nte ini akade ẹkọride ẹkabade mme circuit. Ke uwụtn̄kpọ, ke Abashiri, Hokkaido (isuo ata edere edere Japan), odu eyenete an̄wan emi anamde utom usiakusụn̄ ke isua 33. Enye eti ete ke akpa mbono circuit esie—ke ofụri Hokkaido—owo 70 kpọt ẹkedụk. Ndien idahaemi-e? Circuit 12 ẹdu ke isuo oro, ye ofụri ibat mme asuanetop ebede 12,000. Kere nte esịt esie ọyọhọde ye idara ke ini enye odụkde n̄kpri ye ikpọ mbono ye akwa otu ekemmọ mme anditan̄a Obio Ubọn̄ ke isuo oro!
7, 8. Nso idatesịt ke ediwak mme asiakusụn̄ oro ẹnamde utom ke anyan ini ẹnyene?
7 Mme asiakusụn̄ efen oro ẹnamde utom ke anyanini ẹnyene idatesịt ndikụt nditọ ukpepn̄kpọ Bible ẹnade baptism ndien ekem ẹnyanade ẹbịne mme ifetutom ẹkponde ẹkan. Ke Japan eyenete an̄wan oro anamde utom ke nsio nsio efakutom usiakusụn̄ usụkkiet toto ke 1957 eti nte ikenịmde magazine Awake! ye n̄kaiferi kiet anamde utom ke ban̄k. Ke ufan̄ ọfiọn̄ usụkkiet n̄kaiferi oro ama ana baptism. Nte ini akade enye ama ọdọ ndọ, ndien enye ye ebe esie ẹma ẹkabade ẹdi mme akpan asiakusụn̄. Ekedi n̄kpọ idatesịt didie ntem ọnọ asiakusụn̄ eyenete an̄wan oro ke ini, ke ọyọhọ efakutom esie ita, obufa esenyịn circuit akakade ndise esop esie asan̄ade ye n̄wan esie—akani eyen ukpepn̄kpọ Bible esie!
8 Eyịghe idụhe nte ke mbon oro ẹnamde utom usiakusụn̄ edi ubọkọkọ ẹda enye nte “ọsọn̄urua ifetutom oro anade ẹkama nte n̄kpọuto,” nte asiakusụn̄ kiet emi anamde utom ke isua 22 eketịn̄de!
Uyarade Ukpeme Jehovah
9. Nte Akwa Andinọ, nso ke Jehovah ọn̄wọn̄ọ ndinọ mme asan̄autom esie, ndien nso ke emi ọwọrọ ọnọ nnyịn?
9 Jehovah, Akwa Andinọ, ọn̄wọn̄ọ ndibọk mme asan̄autom esie, ndise mban̄a mmọ ke n̄kan̄ eke spirit ye eke obụk. Edidem David eke eset ama etịn̄ nte odotde ete: “N̄kedi eyenọwọn̄, ndien ndi ebiowo n̄ko; n̄kanam n̄kwe nte ẹkpọn̄de eti owo, nte ubon esie ẹnyụn̄ ẹsan̄ade inọk.” (Psalm 37:25) Edi akpanikọ, ubiọn̄ emi otode Abasi mi ibiomokede nnyịn mbiomo edinọ mme ubon nnyịn n̄kpọ eke obụk, m̀mê enye ndinọ nnyịn isọn̄ ndidori enyịn ke mfọnido nditọete Christian nnyịn. (1 Thessalonica 4:11, 12; 1 Timothy 5:8) Edi, ke ini nnyịn inamde n̄waidem ke unyịmesịt ke uwem nnyịn man otodo inam n̄kpọ Jehovah ọyọhọ ọyọhọ, enye idikpọn̄ke nnyịn tutu amama.—Matthew 6:33.
10, 11. Otode ke ifiọk n̄kpọntịbe, nso ke ediwak mme asiakusụn̄ ẹfiọk ẹban̄a ukeme oro Jehovah enyenede ndinọ se ẹyomde?
10 Mme asiakusụn̄ ke ofụri ererimbot ẹfiọk ẹto ifiọk n̄kpọntịbe nte ke Jehovah esinọ mbon oro ẹyakde idemmọ ẹsịn ke idak ukpeme esie se ẹyomde. Kere ban̄a asiakusụn̄ ebe ye n̄wan ẹmi ẹkewọrọde ẹka ekpri obio emi ata akamba udọn̄ okodude kaban̄a mme ọkwọrọ ikọ Obio Ubọn̄. Ke ọfiọn̄ ifan̄ ẹma ẹkebe, utom idịbi udia ama anana, ndien okụk emi mmọ ẹkenịmde ama okụre. Ekem mmọ ẹma ẹbọ n̄wed isọn insurance moto edide $81. “Usụn̄ ndomokiet ikodụhe nnyịn ndikpe enye,” ntre ke eyenete oro anam an̄wan̄a. “Nnyịn ima ibọn̄ akam ata ọkpọsọn̄ ọkpọsọn̄ okoneyo oro.” Ke ndan̄nsiere, mmọ ẹma ẹbọ kad ẹto ubon kiet emi n̄ko ẹkesụk ẹn̄wanade idem man ẹnyene okụk. Ubon oro ẹma ẹbọ okụk tax oro ẹkefiakde ẹkpọn̄ ẹnọ mmọ, nte kad oro akanamde an̄wan̄a, ndien sia okokponde akan se mmọ ẹkedoride enyịn ndibọ, ama ọdọn̄ mmọ ndibahade ndusụk nnọ asiakusụn̄ ebe ye n̄wan emi. Ẹma ẹsịn babru ubọ okụk ndida mbọ $81! “Ndifreke usen oro tutu amama—edieke ẹkpekesiakde mi esịt ẹkpekesio ebok ndom!” ntre ke eyenete asiakusụn̄ oro etịn̄. “Nnyịn ima iwụt esịtekọm etieti iban̄a ntatubọk ubon emi.” Jehovah n̄ko owụt esịtekọm aban̄a utọ mfọnido oro, emi edide mbiet edu ntatubọk emi enye esịnde udọn̄ ọnọ mme asan̄autom esie ndinyene.—Mme N̄ke 19:17; Mme Hebrew 13:16.
11 Ediwak mme asiakusụn̄ ẹkeme ndibụk mme ukem ifiọkutom ẹmi. Bụp mmọ, ndien mmọ ẹyesian fi ete ke akananam owo ‘ikpọn̄ke mmimọ’ ofụri ofụri. Ke afiakde ese se ibede isua 55 ke utom ukwọrọikọ uyọhọ ini, asiakusụn̄ kiet edide isua 72 ke emana ọdọhọ ete, “Akananam Jehovah ikpụho mi.”—Mme Hebrew 13:5, 6.
“Mfọnn̄kan Usụn̄ Nditịm Nsịk N̄kpere Jehovah”
12. Ntak emi utom editan̄a eti mbụk edide utọ n̄wọrọnda ifetutom oro?
12 Jehovah ndikam ndọhọ nnyịn itan̄a eti mbụk Obio Ubọn̄ esie ọnọ nnyịn ifet. Enye ese nnyịn—kpa ye oro idide mme anana mfọnmma owo—nte “ekemmọ mbonutom” ke utom unyan̄a uwem emi. (1 Corinth 3:9, NW; 1 Timothy 4:16) Nte nnyịn ikwọrọde inọ mbon efen iban̄a Obio Ubọn̄ Abasi, nte nnyịn itan̄ade utịt idiọkido, nte nnyịn inamde utịbe utịbe ima esie ke ndinọ ufak an̄wan̄a mme owo, nte nnyịn ikụbọrede odu uwem Ikọ esie ikpep mbon oro ẹnyenede esịt akpanikọ mme ọsọn̄urua n̄kpọ ẹsịnde ke esịt, nnyịn ke ndammana usụn̄ imasan̄a ikpere Andibot nnyịn, Jehovah.—Psalm 145:11; John 3:16; Mme Hebrew 4:12.
13. Nso ke ndusụk owo ẹtịn̄ ẹban̄a utịp oro utom usiakusụn̄ enyenede ke itie ebuana mmọ ye Jehovah?
13 Mme asiakusụn̄ ẹkeme ndisịn ekese ini kpukpru ọfiọn̄ ndibọ ukpep mban̄a nnyụn̄ n̄kpep mban̄a Jehovah. Mmọ ẹkere ke emi otụk itie ebuana mmọ ye Abasi didie? “Utom usiakusụn̄ edi mfọnn̄kan usụn̄ ndisịk n̄kpere Jehovah n̄kan,” ntre ke ebiowo kiet ke France emi edide asiakusụn̄ ke se ibede isua duop ọbọrọ. Asiakusụn̄ efen ke idụt oro, emi ama akabiat isua 18 ke utom uyọhọ ini, ọdọhọ ete: “Utom usiakusụn̄ anam nnyịn ikeme ‘nditabi nnyụn̄ nse nte Jehovah ọfọnde,’ ke usen ke usen ikọride itie ebuana oro etịmde-tịm ọsọn̄ akan ye Andibot nnyịn.” (Psalm 34:8) Eyenete an̄wan kiet ke Britain emi edide asiakusụn̄ ke isua 30 enyene ukem ekikere oro. “Ndiberi edem ke spirit Jehovah kaban̄a ndausụn̄ ke utom ukwọrọikọ mi anam mi ntịm nsịk n̄kpere enye,” ntre ke enye ọdọhọ. “Mmenen̄ede n̄kere ke ediwak ini spirit Jehovah esida mi usụn̄ ndiwaha ndusụk ufọk ke nnennen ini.”—Men Utom 16:6-10 domo.
14. Didie ke mme asiakusụn̄ ẹbọ ufọn ẹto edikama Bible ye mme n̄wed ẹkọn̄ọde ke Bible ke usen ke usen n̄kpep mbon en̄wen?
14 Ediwak mme asiakusụn̄ ẹkụt ẹte ke edikama Bible ye mme n̄wed ẹkọn̄ọde ke Bible nnam akpanikọ N̄wed Abasi an̄wan̄a ke usen ke usen an̄wam mmọ ndikọri ke ifiọk Ikọ Abasi. Eyenete eren kiet edide isua 85 ke emana ke Spain emi edide asiakusụn̄ ke isua 31 anam an̄wan̄a ete: “Utom usiakusụn̄ an̄wam mi ndinyene ntotụn̄ọ ifiọk Bible, kpa ifiọk oro ndade n̄n̄wam ediwak owo ndifiọk Jehovah ye mme uduak esie.” Eyenete an̄wan kiet otode Britain emi anamde utom usiakusụn̄ ke isua 23 ọdọhọ ete: “Utom ukwọrọikọ uyọhọ ini an̄wam mi n̄kọri ọkpọsọn̄ udọn̄ nnọ udia eke spirit.” Ndinam an̄wan̄a mbon en̄wen ‘ntak idotenyịn emi afo enyenede’ ekeme ndisọn̄ọ mbuọtidem fo kaban̄a mme n̄kpọ oro afo enịmde ke akpanikọ emi enen̄erede ama. (1 Peter 3:15) Asiakusụn̄ kiet otode Australia ọdọhọ ete: “Utom usiakusụn̄ ofori mbuọtidem mi nte ntịn̄de ikọ nnọ mbon efen.”
15. Nso ke ediwak owo ẹnyịme ndinam man ẹdụk utom usiakusụn̄ ẹnyụn̄ ẹka iso ẹnam enye, ndien ntak-a?
15 Nte an̄wan̄ade, mme asan̄autom asiakusụn̄ ẹmi ẹsọn̄ọ ẹnịm ke akpanikọ nte ke mmimọ imemek orụk utom oro adade mme anana-ibat edidiọn̄ ẹtode Jehovah ẹsọk mmọ. Eyịghe idụhe ediwak owo ẹnyịmede ndinam mme ukpụhọde ke uwem mmọ, idem ẹyakde utom idịbi udia ye inyene eke obụk ẹtak, man ẹdụk utom usiakusụn̄ ẹnyụn̄ ẹka iso ẹnam enye!—Mme N̄ke 28:20.
Nte Ọdọn̄ Esịt Fo Ndinam Ekese?
16, 17. (a) Edieke afo enyenede eyịghe m̀mê afo emekeme ndinam utom usiakusụn̄, nso ke afo akpanam? (b) Etie ndusụk owo didie ke idem ke ini mîkemeke ndidụk usiakusụn̄?
16 Ke ama ekekere se mme asiakusụn̄ ẹtịn̄de ẹban̄a mme edidiọn̄ ẹtode utom usiakusụn̄, ekeme ndidi afo ke ekere m̀mê afo emekeme ndinam utom usiakusụn̄. Edieke edide ntre, ntak mûnyeneke nneme ye asiakusụn̄ emi okụtde unen ke utom ukwọrọikọ uyọhọ ini? Afo emekeme ndikụt n̄ko nte edide n̄kpọ un̄wam ndinyene nneme ye kiet ke otu mbiowo ke esop, owo emi ọfiọkde fi—idaha nsọn̄idem fo, mme mmeme fo, ye mme mbiomo ubon fo. (Mme N̄ke 15:22) In̄wan̄în̄wan̄ ikọ emi mbon efen ẹtịn̄de ekeme ndin̄wam fi nditịn̄ enyịn ndụn̄ọde m̀mê afo emekeme ndinam utom usiakusụn̄. (Men Luke 14:28 domo.) Edieke afo ekemede ndisiak usụn̄, afo udutreke ndinyene ikpọ edidiọn̄.—Malachi 3:10.
17 Nte ededi, nso kaban̄a ediwak mme anam-akpanikọ asuanetop Obio Ubọn̄ ẹmi mîdụhe ke idaha ndinam usiakusụn̄, okposụkedi ọdọn̄de mmọ ndikpanam ekese ke utom ukwọrọikọ? Kere, ke uwụtn̄kpọ, nte etiede eyenete an̄wan Christian kiet ke idem emi odomode ndibọk nditọ inan̄ ke idemesie. Enye ọdọhọ ete: “N̄kopke inem koro n̄kesidide asiakusụn̄ ofụri ini, edi idahaemi, ke ntak idaha mi, n̄kemeke ndiwọrọ an̄wautom ediwak ini aba nte n̄kesinamde.” Eyenete an̄wan emi enen̄ede ama nditọ esie onyụn̄ oyom ndinọ mmọ se ẹyomde. Ke ukem ini oro, ọdọn̄ enye ndinam ekese ke utom ukwọrọikọ. Enye anam an̄wan̄a ete: “Mmama utom ukwọrọikọ.” Mme enyene-ifịk Christian eken ẹmi ima oro mmọ ẹnyenede ẹnọ Abasi onụkde ẹyom ndinam n̄kpọ Jehovah ‘ke ofụri esịt mmọ’ ẹnyene ukem ekikere oro.—Psalm 86:12.
18. (a) Nso ke Jehovah oyom oto nnyịn? (b) Ntak emi nnyịn mîkpayakke idem emem nnyịn edieke mme idaha ẹnamde se nnyịn ikemede ndinam osụhọde?
18 Ti ete ke se Jehovah oyomde oto nnyịn edi utom ofụri ukpọn̄. Se emi abuanade ekeme ndikpụhọde to ke ukpọn̄ kiet sịm ukpọn̄ efen. Ndusụk owo ẹkeme ndinam ukpụhọde ke mme mbubehe mmọ man ẹnam utom nte mme asiakusụn̄ ofụri ini. Ediwak mbon eken ẹsịn enyịn̄ nte mme asiakusụn̄ unọ un̄wam edide ke ini ke ini m̀mê ke anyan ini, ẹsịnde hour 60 kpukpru ọfiọn̄ ke utom ukwọrọikọ. Nte ededi, n̄wakn̄kan ibat ke otu ikọt Jehovah ẹsịn idem ke utom edikwọrọ ye edikpep n̄kpọ ke ofụri ukpọn̄ nte mme asuanetop esop. Ntre edieke afo ke akpanikọ enyenede mfịna unana nsọn̄idem, usọn̄, mme mbiomo ubon, m̀mê mme idaha eken, kûkop mmemidem. Adan̄a nte afo anamde ofụri ukeme fo, utom fo enyene ufọn ke enyịn Abasi, kpa nte eke mbon oro ẹdude ke utom ukwọrọikọ uyọhọ ini!
Kpukpru Owo Ẹkeme Ndiwụt Edu Usiakusụn̄
19. Nso idi edu usiakusụn̄?
19 Idem edieke afo mûkemeke ndisịn enyịn̄ nte asiakusụn̄, afo emekeme ndiwụt edu usiakusụn̄. Nso idi edu usiakusụn̄? Nsiondi Utom Obio Ubọn̄ Nnyịn eke March 1989 ọkọdọhọ ete: “Ẹkeme ndidọhọ ke enye ọwọrọ ndinyene in̄wan̄în̄wan̄ edu kaban̄a ewụhọ edikwọrọ ikọ ye edinam mme mbet, ndisịn idem ọyọhọ ọyọhọ ke ndiwụt ima ye edikere mban̄a nnọ mme owo, ndidi owo n̄waidem, ndikop idatesịt ke nditiene Eteufọk oro ket-ket, ye ndikop inemesịt ke mme n̄kpọ eke spirit, idịghe ke mme n̄kpọ obụkidem.” Didie ke afo ekeme ndiwụt edu usiakusụn̄?
20. Didie ke mme ete ye eka ẹkeme ndiwụt edu usiakusụn̄?
20 Edieke afo edide ete m̀mê eka emi enyenede n̄kpri nditọ, afo ke ofụri esịt emekeme nditoro ubọkọkọ nte mme asiakusụn̄ nnọ mmọ. In̄wan̄în̄wan̄ edu fo kaban̄a utom ukwọrọikọ ekeme ndinam mmọ ẹfiọk nte oyomde ẹnam utom Jehovah edi ata akpan n̄kpọ ke uwem mmọ. Afo emekeme ndinọ mme asiakusụn̄ ye mme esenyịn oro ẹsan̄ade-san̄a ye iban mmọ ikot ẹdi ufọk fo man otodo nditọ fo ẹbọ ufọn ẹto uwụtn̄kpọ mbon oro ẹkụtde idatesịt ke utom uyọhọ ini. (Men Mme Hebrew 13:7 domo.) Idem ke mme ufọk oro ẹbaharede ke ntak ido ukpono, mme ete ye eka oro ẹnịmde ke akpanikọ, ebede ke ikọ ye uwụtn̄kpọ, ẹkeme ndin̄wam nditọ mmọ ẹnam utom ukwọrọikọ uyọhọ ini edi utịtmbuba ke uwem.—2 Timothy 1:5; 3:15.
21. (a) Didie ke kpukpru nnyịn ikeme ndinọ mbon oro ẹnamde utom usiakusụn̄ ibetedem? (b) Nso ke mbiowo ẹkeme ndinam man ẹsịn udọn̄ ẹnọ mme asiakusụn̄?
21 Ke esop, kpukpru nnyịn imekeme ndinọ mbon oro ẹkemede ndinam usiakusụn̄ ibetedem ke ofụri esịt. Ke uwụtn̄kpọ, nte afo emekeme ndisịn san̄asan̄a ukeme ndinam utom ye asiakusụn̄ ke utom ukwọrọikọ, akpan akpan ke mme ini oro asiakusụn̄ akpasan̄ade ikpọn̄? Afo emekeme ndikụt n̄ko nte ke “nsịnudọn̄ edem mbiba” oyodu. (Rome 1:11, 12) Edieke afo edide ebiowo, afo amakam ekeme ndinam ekese ndisịn udọn̄ nnọ mme asiakusụn̄. Ke ini otu mbiowo ẹsopde idem, mmọ kpukpru ini ẹkpenyene ndidụn̄ọde se idide mme n̄kpọ oro mme asiakusụn̄ ẹyomde. Ke ini asiakusụn̄ okopde mmemidem m̀mê osobode ndusụk mfịna, kûsọsọp udọhọ enye etre utom usiakusụn̄. Ke adan̄aemi ekemede ndidi akpan n̄kpọ ndidọhọ ẹtre ke ndusụk idaha, kûfre nte ke utom usiakusụn̄ edi ọsọn̄urua ifetutom oro asan̄autom uyọhọ ini ekemede ndima ntotụn̄ọ ntotụn̄ọ. Ekpri nsịnudọn̄ ye nti item ifan̄ m̀mê un̄wam ekeme ndidi ofụri se ẹyomde. Ọfis n̄kọk itieutom N̄ka ke Spain ewet ete: “Ke ini mbiowo ẹsịnde udọn̄ ẹnọ utom usiakusụn̄, ẹnọde mme asiakusụn̄ ibetedem ke utom ukwọrọikọ, ẹnyụn̄ ẹnamde utom ubọkerọn̄ ẹnọ mmọ kpukpru ini, mme asiakusụn̄ ẹnyene ekese idatesịt, ẹkere ke imedi se ẹyomde, ẹnyụn̄ ẹyom ndika iso kpa ye mme ubiọn̄ọ oro ẹkemede ndidaha nda.”
22. Ke ọkpọsọn̄ ini emi ke mbụk owo, nso ke nnyịn ikpebiere ndinam?
22 Nnyịn idu uwem ke ini ndiọkeyo ke mbụk owo. Jehovah ọnọ nnyịn utom unyan̄a uwem ndinam. (Rome 10:13, 14) Edide nnyịn imekeme ndibuana ke utom emi ke uyọhọ ini nte mme asiakusụn̄ m̀mê ikemeke, ẹyak nnyịn iwụt edu usiakusụn̄. Ẹyak nnyịn inyene nte ini edide usọp usọp ke ekikere ye edu n̄waidem. Ẹyak nnyịn ibiere ndinọ Jehovah se enye oyomde oto nnyịn—utom ofụri ukpọn̄. Ndien ẹyak nnyịn iti ite ke ini nnyịn inọde ofụri se nnyịn ikemede, edide enye etie nte n̄kpri okudọk ebeakpa oro m̀mê ọsọn̄urua aran Mary, utom nnyịn edi ke ofụri ukpọn̄, ndien Jehovah ama utom ofụri ukpọn̄ nnyịn!
Nte Afo Emeti?
◻ Ntak emi utom ukwọrọikọ uyọhọ ini anamde ẹkop uyụhọ ye idatesịt?
◻ Otode ke ifiọk n̄kpọntịbe, nso ke ediwak mme asiakusụn̄ ẹfiọk ẹban̄a ukeme oro Jehovah enyenede ndinọ se mme asan̄autom esie ẹyomde?
◻ Mme asiakusụn̄ ẹkere ke didie ke utom ukwọrọikọ mmimọ otụk itie ebuana mmimọ ye Jehovah?
◻ Didie ke afo ekeme ndiwụt edu usiakusụn̄?
[Ndise ke page 23]
Mme asiakusụn̄ ẹnyene akwa idatesịt ẹto edinam mme mbet
[Ndise ke page 23]
Nditọ fo ẹkeme ndibọ ufọn nto edinyene ebuana ye mme anditan̄a Obio Ubọn̄ uyọhọ ini
[Ndise ke page 23]
Mbiowo ẹkeme ndinọ mme asiakusụn̄ nsịnudọn̄ ke utom ukwọrọikọ