Mme Mbụme Ẹtode Mme Andikot
Ke N̄wed Mbon Rome 9:3, apostle Paul ekewet ete: “N̄kpoyom nte ẹkpedianade mi ke Christ nte n̄kpọ-nsobo, man ọfọn ye nditọete mi, orụk mi ke obụkidem.” Nte ikọ esie ọkọwọrọ nte ke enye akpawa uwem esie ndinyan̄a ekemmọ mme Jew?
Jesus ama onịm ata eti uwụtn̄kpọ ima. Enye ama onyịme ndiyak ukpọn̄, m̀mê uwem esie nnọ ke ibuot anamidiọk ubonowo. Ke ini an̄wan̄wa utom ukwọrọikọ esie, enye ama ọnọ idemesie kaban̄a ekemmọ mbio obio esie—mme Jew—man ediwak nte ekekeme edi mme andibuana ke otu mmọ oro ẹdibọde ufọn ẹto uwa ufak esie. (Mark 6:30-34) Unana edinyịme ye ubiọn̄ọ oro mmọ ẹkebiọn̄ọde etop edinyan̄a emi ikanamke ima ima edikere mban̄a oro Jesus ekenyenede ọnọ mme Jew ebịt. (Matthew 23:37) Ndien enye ama ọkpọn̄ ‘uwụtn̄kpọ ọnọ nnyịn man nnyịn ikpetiene isan̄a ke nde ikpat esie.’—1 Peter 2:21.
Nte edi mmemmem n̄kpọ mme anana mfọnmma owo nditiene uwụtn̄kpọ ima Jesus? Ih, ndien nnyịn imekeme ndikụt uwụtn̄kpọ emi ke apostle Paul. Enye ama enen̄ede ekere aban̄a ekemmọ mme Jew tutu, ke ntak ima enyenede ọnọ mmọ, enye ama ọdọhọ ete ke imọ ikpoyom ‘ẹdianade imọ ke Christ nte n̄kpọ nsobo’ ke ntak mmọ.
Paul do akada uduot ikọ oro anamde n̄kpọ enyene udop, m̀mê ikọ n̄kponinua, nditịn̄ ikọ esie. Jesus ama ada ukem ikọ n̄kponinua emi ke Matthew 5:18, ke ini enye ọkọdọhọde ete: “Tutu enyọn̄ ye isọn̄ ẹbe ẹfep, baba ntọi kiet m̀mê ekpri n̄kpọ kiet idibehe ifep ke ibet, tutu kpukpru n̄kpọ ẹsu.” Jesus ama ọfiọk ete ke enyọn̄ ye isọn̄ idibehe ifep. Paul idikabakede idi n̄kpọ nsobo, kpukpru mme Jew idinyụn̄ inyịmeke Ido Ukpono Christ. Edi ikọ Paul ekedi nte ke ekpere ndidi imọ iyenam n̄kpọ ekededi oro idikemede ndin̄wam mme Jew ẹkụt usụn̄ edinyan̄a Abasi ebe ke Jesus Christ. Eyịghe idụhe apostle emi ekekemede ndisịn udọn̄ nnọ ekemmọ mme Christian ete: “Mbufo ẹkabade ẹkpebe mi, kpa nte ami n̄kpebede Christ”!—1 Corinth 11:1.
Mfịn, mme Christian ẹkpenyene ndinyene ukem edikere mban̄a emi Jesus ye Paul ẹkenyenede ẹnọ mmọ oro mînịmke ke akpanikọ. Nnyịn ikpedehede iyak unana udọn̄ m̀mê nnennen ubiọn̄ọ otode mme owo ke efakutom unọ ikọ ntiense nnyịn ebịt ima oro nnyịn inyenede inọ mme mbọhọidụn̄ nnyịn ye ifịk nnyịn kaban̄a edin̄wam mmọ ẹkpep usụn̄ edinyan̄a.—Matthew 22:39.