မတရားမှုတွေ​ကို အကောင်းဆုံး တုံ့ပြန်​နိုင်​ပုံ

ကျွန်တော်တို့ အသက်ရှင်နေတဲ့ လောက​မှာ မတရားမှုတွေ ပြည့်နေတယ်။ လူများစွာဟာ ဆင်းရဲ​ချမ်းသာ၊ ကျား/မ၊ လူမျိုး၊ အသားအရောင် ခွဲခြား​ဆက်ဆံခံ​ကြ​ရ​တယ်။ လောဘဇော​တိုက်တဲ့ စီးပွားရေး​သမားတွေ၊ အကျင့်ပျက်​ခြစားတဲ့ နိုင်ငံရေး​သမားတွေ​ကြောင့် ဒုက္ခ​ရောက်​ကြတယ်။ ဒီလို​မတရားမှုတွေ​ကို ကိုယ်တိုင်​ကြုံရလို့ ဒါမှ​မဟုတ် မြင်ရလို့ ကျွန်တော်​အားလုံး စိတ်​မချမ်းမသာ ဖြစ်ကြရတယ်။

^၂ မတရားမှုတွေ ကြုံရတဲ့​အခါ၊ မြင်ရတဲ့​အခါ လူတွေ ဒေါသ​ထွက်ကြ​တာ မဆန်းပါဘူး။ အေးအေးချမ်းချမ်း နေ​ချင်​တာ၊ မျှမျှတတ ဆက်ဆံခံ​ချင်​တာ လူတိုင်း​ရဲ့ ဆန္ဒ ဖြစ်လို့​ပါပဲ။ ဒါကြောင့် တချို့က ပြုပြင်​ပြောင်းလဲရေး လှုပ်ရှားမှုတွေမှာ ပါဝင်ကြတယ်။ လက်မှတ်ထိုး အသနားခံစာ တင်ကြတယ်။ ဆန္ဒ​ပြကြတယ်။ မတရားမှုတွေ ပပျောက်​စေမယ်​ဆိုတဲ့ နိုင်ငံရေး​သမားတွေ​ကို မဲပေး​ထောက်ခံကြတယ်။ ဒါပေမဲ့ “လောကနဲ့ မပတ်သက်” ဖို့၊ မတရားမှု​အားလုံး ချုပ်ငြိမ်း​စေ​မယ့် ဘုရားသခင့်​နိုင်ငံတော်ကို စောင့်ဆိုင်း​ဖို့ ကျမ်းစာ သွန်သင်ထားတယ်။ (ယော. ၁၇:၁၆) ကျမ်းစာ​သွန်သင်ချက်ကို သိထားပေမဲ့ မတရား​တာ မြင်ရင် ကျွန်တော်တို့ စိတ်မကောင်း​မဖြစ်ဘဲ၊ ဒေါသ​မထွက်​ဘဲ မနေနိုင်​ကြ​ဘူး။ ‘ငါ ဘာလုပ်သင့်သလဲ။ ငါ လုပ်နိုင်တာ ရှိသလား’ လို့ စဉ်းစားမိနိုင်တယ်။ မတရားမှုတွေ မြင်တဲ့​အခါ ယေဟောဝါ​ဘုရားနဲ့ ယေရှု ဘယ်လို ခံစားရသလဲ​ဆိုတာ အရင် သုံးသပ်ကြရအောင်။

မတရားမှုကို ယေဟောဝါနဲ့ ယေရှု မုန်းတယ်

^၃ မတရားမှုတွေ ကြုံရတဲ့အခါ၊ မြင်ရတဲ့အခါ ကျွန်တော်တို့ ဘာကြောင့် ဒေါသ​ထွက်ကြ​သလဲ။ “ဖြောင့်မတ်ခြင်းနဲ့ တရားမျှတခြင်း” ကို မြတ်နိုးတဲ့ ယေဟောဝါရဲ့ ပုံသဏ္ဌာန်​အတိုင်း ဖန်ဆင်းခံထားရလို့​ပါပဲ။ (ဆာ. ၃၃:၅။ က. ၁:၂၆) ယေဟောဝါက ဘယ်တော့မှ မတရား​မလုပ်ဘူး။ ဘယ်သူ့ကိုမှလည်း မတရား​မလုပ်​စေ​ချင်​ဘူး။ (တရား. ၃၂:၃၊ ၄။ မိ. ၆:၈။ ဇာ. ၇:၉) ဥပမာ၊ ပရောဖက် ဟေရှာယ​ခေတ်မှာ အစ္စရေးတွေဟာ ကိုယ့်​လူမျိုး​အချင်းချင်း မတရား​ဆက်ဆံတာကို ခံကြရတယ်။ သူတို့ “ဒုက္ခရောက်​လို့ ငိုကြွေး​တဲ့​အသံကို” ယေဟောဝါ ကြားတယ်။ (ဟေရှာယ ၅:၇ ကို ဖတ်ပါ။) ဒါနဲ့ မိမိ​ပညတ်တွေကို ထပ်ခါ​ထပ်ခါ လျစ်လျူရှုပြီး မတရား​လုပ်သူတွေကို အပြစ်​ပေးလိုက်တယ်။—ဟေရှာ. ၅:၅၊ ၁၃။

^၄ ယေဟောဝါ​လိုပဲ ယေရှုလည်း တရား​မျှတမှုကို မြတ်နိုးတယ်။ မတရားမှုကို မုန်းတယ်။ ယေရှု မြေကြီးပေါ် အမှုဆောင်စဉ် တစ်ရက်​မှာ လက်တစ်ဖက်​သေနေသူကို တွေ့တယ်။ ဒါနဲ့ သနား​သွားပြီး ကု​ပေးချင်တယ်။ ဒါပေမဲ့ ဥပုသ်နေ့မှာ အဲဒီ​လူကို ယေရှု ကုပေး​မပေး ဖာရိရှဲတွေ မျက်စိ​ဒေါက်ထောက် ကြည့်နေကြတယ်။ အဲဒီ​လူ လက်​အကောင်း​ပကတိ ဖြစ်သွားမှာ​ကို ဝမ်းသာ​မပေးနိုင်​ကြ​ဘူး။ “သူတို့မှာ အကြင်နာတရား မရှိတဲ့​အတွက် ယေရှု စိတ်ထိခိုက်​သွားတယ်။”—မာ. ၃:၁-၆။

^၅ မတရားမှုတွေ မြင်တဲ့အခါ ယေဟောဝါနဲ့ ယေရှု ဒေါသ​ထွက်​လို့ ကျွန်တော်တို့ ဒေါသထွက်တာ မှား​တော့​လည်း မမှားပါဘူး။ (ဧ. ၄:၂၆) ဒါပေမဲ့ ဒေါသ​ထွက်​ရတဲ့ အကြောင်းရင်း ခိုင်လုံ​ရင်တောင် ဒေါသ​ထွက်​လို့ ပြဿနာ ပြေလည်​မသွား​ဘူး​ဆိုတာ သတိရရမယ်။ ဒေါသ ပိုက်​ထား​ရင် ဒါမှ​မဟုတ် မထိန်းချုပ်​နိုင်ရင် ကျန်းမာရေး ထိခိုက်လာမယ်။ စိတ်​ဖိစီး​လာမယ်။ (ဆာ. ၃၇:၁၊ ၈။ ယာ. ၁:၂၀) ဒါဆိုရင် မတရားမှုတွေ ကြုံတဲ့အခါ၊ မြင်တဲ့အခါ ဘာလုပ်သင့်သလဲ။ ယေရှု​ဆီကနေ သင်ယူ​နိုင်​တာ​တွေ ရှိတယ်။

ယေရှု လုပ်ဆောင်ခဲ့​ရာ

^၆ ယေရှု မြေကြီးပေါ် ရှိစဉ် မတရားမှု အများကြီး တွေ့တယ်။ ဘာသာရေး​ခေါင်းဆောင်တွေ​က စည်းမျဉ်းတွေ ထပ်​ထုတ်ပြီး သာမန်​လူတန်းစားတွေ​ကို ဝန်ပိ​စေ​ကြတယ်။ (မ. ၂၃:၂-၄) ရောမ​အာဏာပိုင်တွေ​ကလည်း ပြည်သူ​ပြည်သားတွေကို မညှာ​မတာ ဆက်ဆံ​ကြတယ်။ ဒါကြောင့် ဂျူး​တော်တော်များများ ရောမ​လက်အောက်​ကနေ လွတ်မြောက်​ချင်ကြ​တယ်။ ဇဲလတ်ထ်​လို့ ခေါ်တဲ့ ဂျူး​အစွန်းရောက်သမား​တွေ​ဆိုရင် လွတ်လပ်ရေး​အတွက် တိုက်ပွဲဝင်ကြတယ်။ ဒါပေမဲ့ နိုင်ငံရေး​လှုပ်ရှားမှု​တွေ​ကို ယေရှု ဦး​မဆောင်​ဘူး၊ မထောက်ခံ​ဘူး။ မိမိကို လူတွေ အတင်းအကျပ် ဘုရင်​လုပ်​ခိုင်း​တော့မယ်​ဆိုတာ သိတော့ ရှောင်​တောင် ရှောင်ထွက်သွားတယ်။—ယော. ၆:၁၅။

^၇ နိုင်ငံရေး လုပ်ပြီး မတရားမှုတွေ ဖယ်ရှား​ပေးဖို့ ယေရှု ဘာကြောင့် မကြိုးစားသလဲ။ လူတွေမှာ အချင်းချင်း အုပ်ချုပ်ပိုင်ခွင့်​ကော အုပ်ချုပ်နိုင်စွမ်း​ပါ မရှိမှန်း သိလို့ပဲ။ (ဆာ. ၁၄၆:၃။ ယေ. ၁၀:၂၃) ဒါ့အပြင် မတရားမှု ဖြစ်ပေါ်စေတဲ့ အကြောင်းရင်းတွေကို လူတွေ ဖယ်ရှား​မပေးနိုင်ဘူး။ မတရားမှုတွေ ဘာကြောင့် ဖြစ်ပေါ်​ရသလဲ။ ပထမ၊ လောကကို စာတန်​မာရ်နတ် အုပ်ချုပ်နေ​ပြီး မတရားမှုတွေ ဖြစ်ပေါ်​အောင် နောက်ကွယ်ကနေ သွေးထိုး​လှုံ့ဆော်​နေတယ်။ (ယော. ၈:၄၄။ ဧ. ၂:၂) ဒုတိယ၊ လူတွေ မစုံလင်ကြ​ဘူး။ ဒါကြောင့် စိတ်ရင်းကောင်း​ပါတယ်​ဆို​သူ​တွေ​တောင် တစ်ခါတလေ မတရား​လုပ်မိကြတယ်။—ဒေ. ၇:၂၀။

^၈ မတရားမှုတွေ​ရဲ့ ဇာစ်မြစ်​ကို အဆုံးတိုင်စေမှာ​ဟာ လူ့​အဖွဲ့အစည်း​တွေ မဟုတ်ဘဲ “ဒီ​လောကနဲ့ မသက်ဆိုင်” တဲ့ ဘုရားသခင့်​နိုင်ငံတော် ဖြစ်တယ်​ဆိုတာ ယေရှု သိတယ်။ (ယောဟန် ၁၈:၃၆ ကို ဖတ်ပါ။) ဒါကြောင့် မိမိရဲ့ အချိန်၊ ခွန်အားကို “ဘုရားသခင့်​နိုင်ငံတော် သတင်းကောင်း” ဟောပြောခြင်း​လုပ်ငန်းမှာ မြှုပ်နှံထား​တယ်။ (လု. ၈:၁) အကျင့်ပျက်​ခြစားမှု​တွေ၊ မတရားမှုတွေ အဆုံးတိုင်မယ့်​အကြောင်း “ဖြောင့်မတ်ခြင်းကို ဆာငတ်​သူ​တွေ” သိအောင် ပြောပြတယ်။—မ. ၅:၆၊ အောက်ခြေမှတ်ချက်။ လု. ၁၈:၇၊ ၈။

ယေရှုကို အတုယူပါ

^၉ ယေရှု​ခေတ်က​ထက် “နောက်ဆုံးကာလ” မှာ မတရားမှုတွေ ပိုများလာတယ်။ မတရားမှု ဖြစ်ပေါ်စေတဲ့ အကြောင်းရင်းတွေ​ဟာ စာတန်နဲ့ လူ့​မစုံလင်မှု ဖြစ်​နေတုန်း​ပါပဲ။ (၂ တိ. ၃:၁-၅၊ ၁၃။ ဗျာ. ၁၂:၁၂) အဲဒီ​အကြောင်းရင်းတွေကို ဘုရားသခင့်​နိုင်ငံတော်​က​ပဲ ဖယ်ရှား​ပေးနိုင်မယ်​ဆိုတာ ယေရှုလိုပဲ ကျွန်တော်တို့ သိကြတယ်။ ဘုရားသခင့်​နိုင်ငံတော်ကို​ပဲ အပြည့်အဝ ထောက်ခံတဲ့​အတွက် မတရားမှု ပပျောက်​ရေး ချီတက်​ဆန္ဒပြပွဲတွေ၊ လှုပ်ရှားမှုတွေမှာ မပါဝင်​ကြ​ဘူး။ မတရားမှုတွေ ဖယ်ရှား​ပေးဖို့ အစိုးရတွေကို အားမကိုး​ကြ​ဘူး။ ညီအစ်မ စတေစီ​အကြောင်း စဉ်းစားကြည့်ပါ။a အမှန်တရား မသိခင်က ပြုပြင်​ပြောင်းလဲရေး လှုပ်ရှားမှုတွေမှာ အမြဲ​ပါတယ်။ ဒါပေမဲ့ ကိုယ်​လုပ်နေတာ​တွေ မှန်ရဲ့လား​လို့ သံသယ​ဝင်​လာတယ်။ “ဆန္ဒ​သာ ပြ​နေပေမဲ့ ကိုယ်​ရပ်တည်တာ ဘက်​မှန်ရဲ့လား​ဆိုတဲ့ အတွေး ဝင်လာတယ်။ အခုတော့ ဘုရားသခင့်​နိုင်ငံတော်ကို​ပဲ ထောက်ခံ​လို့ ဘက်​မှန်တာ လုံးဝ​သေချာ​သွားပြီ။ ဘယ်သူမှ မတရားမှုရဲ့ သားကောင် မဖြစ်ရ​တော့​အောင် ကျွန်မ မလုပ်နိုင်ဘူး။ ဒါပေမဲ့ ယေဟောဝါ လုပ်ပေးနိုင်တယ်” လို့ စတေစီ ပြောတယ်။—ဆာ. ၇၂:၁၊ ၄။

^၁၀ ပြုပြင်​ပြောင်းလဲရေး လှုပ်ရှား​သူ​တွေ​ဟာ ကိုယ်​ထင်တာ လုပ်​သူ​တွေ၊ ဒေါသ​မောဟ​များ​သူ​တွေ ဖြစ်လေ့​ရှိကြတယ်။ ဒါ ယေရှုရဲ့ စံနမူနာ၊ သွန်သင်ချက်​နဲ့ မကိုက်ညီ​ဘူး။ (ဧ. ၄:၃၁) “ငြိမ်းချမ်း​စွာ ဆန္ဒ​ပြတယ်​လို့ ဆို​သူ​တွေ​ဟာ စက္ကန့်​ပိုင်း​အတွင်းမှာပဲ အကြမ်းဖက်​သူ​တွေ၊ ဖျက်လို​ဖျက်ဆီး​လုပ်​သူ​တွေ ဖြစ်သွားနိုင်တယ်” လို့ ညီအစ်ကို ဂျက်ဖရီ ပြောတယ်။ ယေရှုကတော့ ကိုယ်​နဲ့ သဘောထား​ချင်း မတူသူတွေ၊ ကိုယ့်ကို နှိပ်စက်​သူတွေကို​တောင် မေတ္တာထား​ဖို့ သွန်သင်ပေးတယ်။ (မဿဲ ၅:၄၃-၄၈ ကို ဖတ်ပါ။) ဒါကြောင့် ယေရှုရဲ့ လမ်းစဉ်​နဲ့ မကိုက်ညီ​တာ ဘာကိုမှ မလုပ်ဖို့ ကျွန်တော်တို့ အတတ်နိုင်ဆုံး ကြိုးစားကြတယ်။

^၁၁ မတရားမှုတွေ​ကို ဘုရားသခင့်​နိုင်ငံတော်​က ချုပ်​ငြိမ်းစေမယ်​ဆိုတာ သိပေမဲ့ မတရား​ဆက်ဆံခံရတဲ့​အခါ ယေရှုကို အတုယူဖို့ ခက်နိုင်တယ်။ အသားအရောင် ခွဲခြား​ဆက်ဆံခံ​ရ​တဲ့ ညီအစ်မ ဂျန်နီယာ​အကြောင်း စဉ်းစားကြည့်ပါ။ “ကျွန်မ ဒေါသ​လည်း ထွက်၊ စိတ်မကောင်း​လည်း ဖြစ်တယ်။ မတရား​လုပ်သူတွေကို ပြစ်ဒဏ်​ခံ​ရစေချင်တယ်။ ဒါနဲ့ လူမျိုးရေး၊ အသားအရောင် ခွဲခြားဆက်ဆံတာ​ကို ဆန့်ကျင်တဲ့ လှုပ်ရှားမှု​တစ်ခု​ကို ထောက်ခံဖို့ စဉ်းစားမိ​သွားတယ်။ ဒါမှ ကျွန်မ ဒေါသ​ပြေ​နိုင်မယ် ထင်​လို့​ပါ” လို့ ပြောတယ်။ ဒါပေမဲ့ ကိုယ့်​အတွေး​ကို ပြုပြင်​ပြောင်းလဲဖို့ လိုမှန်း ဂျန်နီယာ သဘောပေါက်လာတယ်။ “ယေဟောဝါကို မဟုတ်ဘဲ လူကို အားကိုး​မိ​ရာ​ကနေ ကျွန်မ အတွေး​ချော်​လာတာ။ ဒါကြောင့် ဆန္ဒ​ပြ​အဖွဲ့တွေနဲ့ အဆက်အသွယ်​အားလုံး ဖြတ်လိုက်တယ်” လို့ ပြောတယ်။ အကြောင်းရင်း ခိုင်လုံ​လို့ ဒေါသ​ထွက်​ရင်တောင် လောကနဲ့ မပတ်သက်​မိ​ဖို့ သတိထား​စရာ​ပါပဲ။—ယော. ၁၅:၁၉။

^၁၂ မတရားမှုတွေ​နဲ့ပတ်သက်ပြီး ကိုယ့်​ခံစားချက်ကို ထိန်းချုပ်ဖို့ ဘာက ကူညီပေးနိုင်သလဲ။ တစ်နည်းကတော့ ကိုယ်​ဖတ်တဲ့၊ ကြည့်တဲ့၊ နားထောင်တဲ့​အရာတွေကို စိစစ်​ခြင်း​ပါ။ အင်တာနက်​သတင်း​တချို့က လူတွေကို အထိတ်တလန့် ဖြစ်စေတယ်။ ပြုပြင်​ပြောင်းလဲရေး လှုပ်ရှားမှု​တွေ​ကို ထောက်ခံ​ချင်စိတ် ပေါ်လာ​စေ​တယ်။ ဒါ့အပြင် သတင်းသမား​တွေ​က ဘက်လိုက်​ပြီး သတင်း​တင်ဆက်​တတ်​ကြတယ်။ သတင်း​မှန်​ဆိုရင်တောင် ဖတ်လို့၊ ကြည့်​လို့ အကျိုးထူး​သွား​သလား။ သတင်းတွေ​နဲ့​ပဲ အချိန်ကုန်​နေ​ရင် မလိုအပ်ဘဲ သောက​များလာမယ်၊ ဒေါသ​ပို​ထွက်လာမယ်။ (ပညာ. ၂၄:၁၀) ပို​ဆိုး​တာက မတရားမှု​အားလုံးကို ချုပ်ငြိမ်း​စေ​မယ့် ဘုရားသခင့်​နိုင်ငံတော်ကို မျက်ခြည်​ပြတ်​လာမယ်။

^၁၃ နေ့တိုင်း ကျမ်းစာ​ဖတ်တာ၊ တွေးတော​ဆင်ခြင်တာက​လည်း အကူအညီ ဖြစ်စေနိုင်တယ်။ ညီအစ်မ အလီယာ​အကြောင်း စဉ်းစားကြည့်ပါ။ လူတွေ မတရား​ဆက်ဆံခံရ​တာ ကြည့်ပြီး စိတ်​အနှောင့်​အယှက်​ဖြစ်လာတယ်။ မတရား​လုပ်​သူ​တွေ ဘာပြစ်ဒဏ်မှ မခံရလို့ ကြိတ်မနိုင်​ခဲမရ​ဖြစ်လာတယ်။ “‘ဒီ​ကိစ္စတွေကို ယေဟောဝါ ဖြေရှင်းပေးမယ်​ဆိုတာ ငါ တကယ် ယုံသလား’ လို့ ပြန်​စဉ်းစားရတယ်။ အဲဒီအချိန်မှာ​ပဲ ယောဘ ၃၄:၂၂-၂၉ ကို ဖတ်​မိတယ်။ ဘယ်သူမှ ယေဟောဝါ​ရှေ့​ကနေ ပုန်းရှောင်​လို့​မရဘူး​ဆိုတာ အဲဒီ​ကျမ်းပိုဒ်​က ပြန်အမှတ်ရစေတယ်။ ဘာက တရား​သလဲ၊ ဘယ်လို တရားစီရင်​ရမလဲ ယေဟောဝါ အသိဆုံး ဖြစ်လို့ အကောင်းဆုံး​နည်းနဲ့ တရားစီရင်​ပေးလိမ့်မယ်” လို့ အလီယာ ပြောတယ်။ ဒါဆိုရင် မတရားမှုတွေ​ကို ဘုရားသခင့်​နိုင်ငံတော် ဖယ်ရှား​ပေးမယ့်​အချိန် စောင့်နေ​တုန်း ကျွန်တော်တို့ ဘာလုပ်နိုင်သလဲ။

ကျွန်တော်တို့ လုပ်ဆောင်နိုင်ရာ

^၁၄ တခြားသူတွေရဲ့ လုပ်ရပ်တွေ​ကို ကျွန်တော်တို့ မထိန်းချုပ်​နိုင်ပေမဲ့ ကိုယ့်လုပ်ရပ်​တွေ​ကို ထိန်းချုပ်​နိုင်တယ်။ သိခဲ့​ရတဲ့​အတိုင်း မေတ္တာ​ပြခြင်း​အားဖြင့် ယေရှုကို အတုယူနိုင်တယ်။ ကိုယ့်ကို မတရား​လုပ်​သူတွေကို​တောင် လေးလေးစားစား ဆက်ဆံ​နိုင်တယ်။ (မ. ၇:၁၂။ ရော. ၁၂:၁၇) လူတိုင်းကို ကြင်ကြင်နာနာ၊ မျှမျှတတ ဆက်ဆံတဲ့​အခါ ယေဟောဝါ နှစ်သက်တယ်။—ကောလောသဲ ၃:၁၀၊ ၁၁ ကို ဖတ်ပါ။

^၁၅ ကျွန်တော်တို့ လုပ်နိုင်သမျှ​မှာ အကောင်းဆုံးကတော့ လူတွေကို ကျမ်းစာ​အမှန်တရား ပြောပြတာ​ပါပဲ။ ဘာကြောင့်လဲ။ “ယေဟောဝါကို သိကျွမ်း” လာတဲ့​အခါ ရုန့်ရင်း​ကြမ်းတမ်း​သူ​တွေ​တောင် အကြင်နာ​မေတ္တာရှိ​သူ​တွေ ဖြစ်လာနိုင်​လို့​ပါ။ (ဟေရှာ. ၁၁:၆၊ ၇၊ ၉) အစိုးရ တအား​ဖိနှိပ်​တယ်လို့ ခံစားရလို့ တော်လှန်ရေး​အဖွဲ့​ထဲ ဝင်​သွားတဲ့ ဂျေမယ်လ်​အကြောင်း စဉ်းစားကြည့်ပါ။ “လူတွေ ပြောင်းလဲ​လာအောင် အကြမ်း​နည်း သုံးလို့​မရဘူး။ ကျွန်တော့်ကို​ပဲ ကြည့်။ ကျမ်းစာ​အမှန်တရားကြောင့်​သာ ပြောင်းလဲ​လာတာ” လို့ ပြောတယ်။ ကျမ်းစာ​ကနေ သိလာတာ​တွေ​ကြောင့် ဂျေမယ်လ် တိုက်ခိုက်​ချင်စိတ်​တွေ ဖျောက်ပစ်​နိုင်ခဲ့တယ်။ ကျမ်းစာ​အမှန်တရားကြောင့် ပြောင်းလဲ​လာ​သူ များလေ မတရား​လုပ်မယ့်​သူ​တွေ လျော့​လေ ဖြစ်လာမှာ။

^၁၆ ဘုရားသခင့်​နိုင်ငံတော်ကသာ မတရားမှုတွေ ချုပ်ငြိမ်း​စေ​မယ့်​အကြောင်း ယေရှုလိုပဲ ကျွန်တော်တို့ အားတက်​သရော ဟောပြော​သွန်သင်​ကြတယ်။ နိုင်ငံတော်​မျှော်လင့်ချက်က မတရားမှု ကြုံနေရသူတွေကို အားတက်လာ​စေ​တယ်။ (ယေ. ၂၉:၁၁) “အမှန်တရား သိထားလို့​သာ မတရားမှုတွေ ကြုံရတဲ့​အခါ၊ မြင်ရတဲ့​အခါ စိတ်​အေး​အေး ထား​နိုင်​လာတာ။ ယေဟောဝါက ကျမ်းစာ​အမှန်တရား​အားဖြင့် လူတွေကို နှစ်သိမ့်​ပေးတယ်” လို့ အစောပိုင်းမှာ ဖော်ပြတဲ့ ညီအစ်မ စတေစီ ပြောတယ်။ မတရားမှုတွေ အဆုံးတိုင်​သွားမယ်​ဆိုတဲ့ သတင်းတရား​အားဖြင့် တခြားသူတွေကို နှစ်သိမ့်​ပေး​နိုင်ဖို့ ကောင်းကောင်း ပြင်ဆင်ထားပါ။ ဒီဆောင်းပါးမှာ ပါတဲ့ ကျမ်းစာ​အဆို​တွေ​ကို အကျွမ်းတဝင်​ရှိအောင်၊ ပိုယုံကြည်စိတ်ချလာအောင် လုပ်ထားပါ။ ဒါဆိုရင် ကျောင်းမှာ၊ အလုပ်မှာ အခွင့်အရေး ပေါ်လာတဲ့အခါ ပါးပါးနပ်နပ် သက်သေခံနိုင်​မယ်။b

^၁၇ “ဒီ​လောကရဲ့ မင်း” စာတန် ရှိ​သရွေ့​တော့ မတရားမှုတွေ ရှိနေ​ဦး​မှာ​ပဲ။ ဒါပေမဲ့ စာတန် ဖျက်ဆီး​ခံရမယ့်​အချိန် မရောက်ခင် ကျွန်တော်တို့ အကူအညီ​ကော မျှော်လင့်ချက်​ပါ မဲ့​မနေပါဘူး။ (ယော. ၁၂:၃၁) မတရားမှုတွေ ဘာကြောင့် ဒီလောက်​များတယ်၊ မတရားမှုတွေ မြင်တဲ့​အခါ မိမိ ဘယ်လို ခံစားရတယ်​ဆိုတာ ကျမ်းစာက​တစ်ဆင့် ယေဟောဝါ ဖော်ပြထားတယ်။ (ဆာ. ၃၄:၁၇-၁၉) မတရားမှုတွေ​ကို ဘုရားသခင့်​နိုင်ငံတော်​က ဘယ်လို ချုပ်ငြိမ်း​သွား​စေ​မလဲ၊ လောလောဆယ် ကျွန်တော်တို့ ဘယ်လို တုံ့ပြန်သင့်သလဲ​ဆိုတာ ယေရှုက​တစ်ဆင့် သွန်သင်ပေးတယ်။ (၂ ပေ. ၃:၁၃) ဒါကြောင့် “တရားမျှတခြင်း​နဲ့ ဖြောင့်မတ်ခြင်း” ထာဝစဉ် တည်တံ့​ခိုင်မြဲ​မယ့်​အချိန်ကို စောင့်နေရင်း နိုင်ငံတော်​သတင်းကောင်း ထက်ထက်​သန်သန် ဆက်​ဟောပြောနေ​ကြရအောင်။—ဟေရှာ. ၉:၇။