SIN DING THU 02

Lai Siangtho In Lametna Hong Pia

ပုံနှိပ်စာပေ

Leitung bupa mite in gentheih haksatnate hangin dahna, lunghihmawhna, le natnate thuak uh hi. Nangh tua bangin na thuak ngei hiam? Cinatna hang le na it na ngaih khat a sihna hangin a lunggim zong na hithei hi. Tua ahih manin, ‘Hih sanga a hoihzaw nuntakna a om thei tam maw?’ ci-in ngaihsun khathei ding hi teh. Tu-a dotna ii dawnna pen Lai Siangtho sungah om hi.

1. Lai Siangtho in lametna koi bangin hong pia a hiam?

Leitungah gentheih haksatnate a tamna a hang Lai Siangtho in hong hilhcian hi. Tua banah a sawt lo-in haksatnate maimang ding hi cih a lungdamhuai thu zong na genlai hi. Lai Siangtho sunga mailam thu tawh kisai kamciamna in lametna hong neisak hi. (Jeremiah 29:11, 12 sim in.) Tua Lai Siangtho kamciamnate in tu huna buainate nawk zawh nading, a hoih lama i muh theih nading le lungnopna kip i ngah theih nadingin hong huh hi.

2. Lai Siangtho in koi bang mailam hun ding na gen a hiam?

Mailam hunah “sihna, dahna, le na sa-a kahna cihte om nawn lo ding hi,” ci-in Lai Siangtho in gen hi. (Maangmuhna 21:4 sim in.) Mite’ lametna a beisak thei zawngkhalna, thuman lohna, cinatna, le sihna cihte maimang ding hi. Mihingte leitung Paradais-ah a tawntungin nuamsa ding uh hi, ci-in Lai Siangtho in hong kamciam hi.

3. Lai Siangtho hong piak lametnate tunga na muanna bangci kipsak thei ding na hiam?

Mi tampite in thuhoih a pian ding lamen uh a, ahih hang amau lamet bangin hong piang takpi ding hiam cih pen thei cian tuan lo uh hi. Lai Siangtho kamciamte ciang, tua bang hi lo hi. ‘Lai Siangtho sittel’ leng, tua kamciamte tunga i upna hong kipsak thei ding hi. (Sawltak 17:11, ZSV) Lai Siangtho sin lecin, mailam hun tawh kisai Lai Siangtho kamciamte muanhuai maw, muanhuai lo cih pen na khensat thei ding hi.

ZON BEH INLA, MUH BEH IN

Mailam hun tawh kisai Lai Siangtho kamciamna pawlkhat sittel in. Lai Siangtho hong piak lametna in tu huna mite a huh dan en in.

Limte: Tu huna mite’ tuahkhak dinmunte le mailam ading Lai Siangtho hong kamciamte a kibat lohna tehkaak in. Dinmunte hih lim sunga bangin hong kikhel ding hi.

4. Lai Siangtho in gentheih haksatna om lo-a a tawntungin kinungta thei hi cih lametna hong pia

A nuai-a Lai Siangtho kamciamnate en in. Bang kamciam deihpen na hiam? Bang hang hiam?

Kamciamte’ nuai-a a kigelh Lai Siangtho munte sim in. Tua khit teh a nuai-a dotnate kikum un:

Hih Lai Siangtho munte in lametna hong neisak hiam? Na innkuanpihte le na lawmte zong lametna a pia thei ding hiam?

Hih bang leitungah a teng bangin na mitkha tawh mu in

KUA MAH IN . . .	MI KHEMPEUH IN . . .
natna, teekna, le sihna thuak nawn lo ding.—Isaiah 25:8.	a sisa a it a ngaihte hih leitungah hong thawhkik uh mu ding.—Johan 5:28, 29.
cinatna le zawngkhalna nei nawn lo ding.—Isaiah 33:24; 35:5, 6.	cidam sitsetin, khangno thahatna neikik ding.—Job 33:25.
thuman lohna thuak nawn lo ding.—Isaiah 32:16, 17.	annek tuidawn ding tampi le innlelo hoih nei ding a, a lungkimhuai nasep zong nei ding.—Late 72:16; Isaiah 65:21, 22.
galkidona hanga gentheih haksatna thuak nawn lo ding.—Late 46:9.	daihna le nopsakna a kicing ngah ding.—Late 37:11.
a beisa huna thupiangte hanga lungsim natna le lunggimna thuak nawn lo ding.—Isaiah 65:17.	a kicing dinmunah tawntung nuntakna ngah ding.—Late 37:29.

A dam lo pasalno khat hong damkikin a nu tawh kikawi.

A kum haam pasal khat khangno hong suakkik a, mehteh mehgah tawh a kidim khutsawn leeng khat hong sawn.

5. Lai Siangtho hong piak lametnate in hong kikhelsak thei

Mi tampite pen kiimlepama buainate hangin lungkia uh a, a heh uh bang suak liang hi. Mi pawlkhat in hun a hoihzaw-a a kikhel theih nadingin nakpi takin hanciam uh hi. Hun hoihzaw hong om ding hi cih Lai Siangtho kamciamna in tu huna mite a huh dan kan in. VIDEO hong in. Tua khit teh a nuai-a dotnate kikum un.

VIDEO: Thuman Lohna Beisak Nuam Ing (4:07)

Limte: Video sunga lim i muhte ‘Thuman Lohna Bei Sak Nuam Ing.’ 1. Rafika a nungakno lai-in a minampihte tawh pat a lak laitak. 2. Rafika in Jehovah Tecite’ kikhoppi-ah a kikhop masakpen lai-in minam kibang lo mite a kikholh khawmna a muh teh a lungtang khoihin thalawp.

Hih video sungah, bang thuman lohna in Rafika’ lungsim nawngkaisak a hiam?
Thuman lohnate a omlai hang, Lai Siangtho in Rafika pen koi bangin huh a hiam?

Lai Siangtho sunga mailam hun lametna in lungkiatna i do zawh nading le buainate i nawksuak zawh nadingin hong huh thei hi. Paunak 17:22 le Rom 12:12 sim in. Tua khit teh a nuai-a dotnate kikum un:

Lai Siangtho sunga lametna hong pia kammalte in tu hunin zong na nuntakna hong kikhelsak zo dingin na um hiam? Bang hang hiam?

MI PAWLKHATTE’ GEN: “Mailam hun tawh kisai Lai Siangtho kamciamte hoihlua liang ahih teh ahi thei takpi tam?”

A dawnna na zon ding bang hang thupisa na hiam?

TOMLAKNA

Lai Siangtho in a nopci mahmah mailam hun ding hong kamciam hi. Tua in lametna hong neisak a, haksatnate nawksuak zo dingin zong hong huh hi.

Kikupkikna

Mihingte’n bang hangin lametna neih ding kisam a hiam?
Lai Siangtho in mailam thu ding bang gen a hiam?
Mailam lametna in tu hunin nang koi bangin hong huh a hiam?

Kikup zawh ni:

Ngimna

Hih sin ding thu sunga Lai Siangtho munte sim a, Lai Siangtho kamciamte thei cian dingin hanciam ding.

Adang:

Ngimna dang

THEIH BEH NADING

Lametna a thahat dan sim in.

“Lametna—Koi-ah Muthei Ding Na Hiam?” (Khanghlo In! Laibu)

Mailam lametna in kum sawt natna a thuak mite a huh dan sim in.

“Kum Sawt Natna Phul Zawh Nadingin Lai Siangtho In A Huh Thei Ding Hiam?” (Website-a thu)

Hih music video na et ciang, Lai Siangtho hong kamciam Paradais-ah nang le na innkuanpihte nuam taka a nungta bangin na mitkha tawh mu in.

Na Mitkha Tawh Mu In (3:37)

Lai Siangtho sunga mailam lametna thu a hong theih ciang, mi khat a nuntakna a kikhel dan sim in.

“Leitung Kikhelsak Ning Cih Ngaihsutna Nei Nawn Keng” (Vilnatausang, July 1, 2013)