Pasian’ Itna Sungah Na Kip Un

1, 2. Pasian’ itna sungah i kip nading bang bawl thei i hiam?

A KUAMAH peuh in i tha dimin, cidam sitset ding i ut ciat hi. Tua ahih manin a lim a al ante ne-in pumpi kiseekna tuamtuam bawlin i pumpi i kem hi. Kitawl mahmah taleh, bawl thaman om hi cih thei ihih manin lungkia-in i tawpsan kei hi. Ahih hang adang khat tawh zong i cidam sitset ding kisam lai hi.

² Jehovah i thei khin himah taleh, amah tawh kizopna i kipsak semsem ding kisam hi. “Pasian’ itna sungah na kip un,” ci-in Jude in Khristian-te hanthawn a, tua itna kipsak ding dan zong a hilhcian hi. Ama’n: “A siangtho na upna uhah na kip semsem un,” ci-in a gen hi. (Jude 20, 21) Tua hileh i upna koi bangin kipsak thei ding ihi hiam?

NA UPNA UH KIPSAK SEMSEM UN

3-5. (a) Satan in Jehovah’ ngeinate bangci i ngaihsut ding deih a hiam? (b) Jehovah’ thukhamte le thubulte bangci ngaihsut na hiam?

³ Jehovah’ lampite a hoihpen hi cih ei mahmah in i up ding thupi hi. Pasian’ tehnate zuih ding haksa lua, a man le a man lo pen ei mahmah in khensat lehang nuamzaw ding hi, ci-a i ngaihsut ding Satan in deih hi. Eden huan peka kipan hih thu mi te’n a up theih nading Satan in na hanciam hi. (Piancilna 3:1-6) Tu ni dong mahin ama’n na hanciam lai hi.

⁴ Satan a man mah maw? Ahih kei leh Jehovah’ ngeinate zuih ding a haksa lua hizaw maw? A haksalua hi het lo hi. Gentehna, a nopci mahmah pak huanah a vak kawikawi-in kingaihsun lecin; mun khatah dai a sang mahmahin a ki-um na mu hi. ‘Ka pai nading lampi-ah hih dai ki-um in bang hang ong khak sese a hia?’ ci-in na ngaihsun khathei hi. Ahih hang tua na cih lai takin dai ki-umna a langkhat pan humpinelkai hawk na za hi. Tu’n hileh tua dai a ki-um pen bangci ngaihsun na hiam? Humpinelkai in hong nek loh nadinga hong dal ahih manin na lungdam mahmah hi. Jehovah’ thubulte pen tua dai tawh kibang a, Dawimangpa pen humpinelkai tawh kibang hi. Lai Siangtho in: “Note pilvangin khua phawk un. Na gal uh ahi Dawimangpa, humpinelkai bangin a nek theih ding zongin vak kawikawi hi,” ci-in i kidop ding hong hilh hi.—1 Peter 5:8.

⁵ Jehovah in a hoihpen nuntakna i neih ding hong deihsak hi. Satan’ khemna i thuak ding deih lo hi. Tua ahih manin Pasian in eite hong kem ding le hong lungnuamsak dingin thukhamte le thubulte hong pia ahi hi. (Efesa 6:11) James in hih bangin gelh hi: “Mite a suaktasak thei thukham cingtaak hoihtakin a et khit ciangin a thu ngai-in . . . , hoihtakin ngaihsun tawntungin a zuite pen . . . Pasian in thupha a pia ding hi.”—James 1:25.

6. Pasian’ lampite zuih ding a hoihpen ahihlam bangci theithei ding i hiam?

⁶ Jehovah’ lamlahna i zuih teh, i nuntak zia hong khangto semsem a, Pasian tawh i kilawmtakna zong hong kip semsem hi. Gentehna-in, ama kiang tatsat lo-a thu ngen dinga Pasian hong sapna i san ciang phattuamna i ngah hi. (Matthai 6:5-8; 1 Thesalonika 5:17) Amah bia khawm dingin kikhawm un, khatlekhat kihanthawn un, cih ama hong lamlahna i zuih ciang, taangko nasepna-ah le thuhilh nasepna-ah hunbita i kihel ciangin i lungnuam hi. (Matthai 28:19, 20; Galati 6:2; Hebru 10:24, 25) Hihte in i upna a khauhsak dan i ngaihsut teh, Jehovah’ lampite zuih ding a hoihpen ahihlam i thei semsem hi.

7, 8. Mailam hunah i tuak khak theih ze-etnate ading i lungkham loh nading bang in hong huh ding a hiam?

⁷ Mailam hunah, a haksa mahmah upna ze-etna i thuak ding lungkham khathei hi hang. Tua bang na hihleh: “Phattuamna na ngah nadingin nang a hong hilh, na zuih ding a kilawm lampi-ah a hong paipih Topa na Pasian ka hi hi. Ka thupiakna a ngai hi hoh leteh! Nangma nopsakna gunpi bang ding a, na thumanna, tuihualte tawh kibang ding hi,” cih Jehovah thugen phawk in.—Isaiah 48:17, 18.

⁸ Jehovah’ thu mang lehang, i nopsakna pen a kang ngei lo gunpi bang hiding a, i thumanna zong tatsat lo-a tuipi piau-a tuihualte tawh kibang ding hi. I nuntakna-ah bangbang i tuak zongin, cihtakna i lenkip thei hi. Lai Siangtho in: “Topa tungah na vangik nga in, amah in hong huh ding hi. Amah in mi thumante kilingsak ngei lo ding hi,” ci-in hong kamciam hi.—Late 55:22.

“PICINNA LAMAH MANAWT NI”

9, 10. Picinna i cih in bang a hiam?

⁹ Jehovah tawh na kizopna na kipsak semsem leh, “picinna lamah manawt” na hithei ding hi. (Hebru 6:1, ZSV) Picinna i cih in bang a hiam?

¹⁰ I kum a tamna hang bek tawh a picing Khristian-te kihi tuan lo hi. A picing khat i suah nadingin Jehovah pen Lawm hoihpen a i neih ding le na khempeuh ama muh banga i muh theih nading i hanciam kul hi. (Johan 4:23) Paul in hih bangin gelh hi: “Amau pumpi deihna bangin a nungtate, amau pumpi deihna in a lungsim uh a uk hi; Kha Siangtho deihna bangin a nungtate, Kha Siangtho in amau lungsim a uk hi.” (Rom 8:5) A picing mi khat in ama’ nuntakna-ah gualnopna, neihlelamte mitsuan lo hi. Tua sangin, Jehovah’ na sepna mitsuan zaw a, a nuntakna-ah hoih takin thu a khensat hi. (Paunak 27:11; James 1:2, 3 sim in.) A khial sem dingin amah le amah kithuzawh sak lo hi. A picing khat in thuman thei ahih manin tua banga gamta dingin a khensat hi.

11, 12. (a) ‘Theih theihna’ tawh kisai Paul in bang gen a hiam? (b) A picing Khristian khat hihna le kimawl a siam mi khat hihna koici kibang a hiam?

¹¹ Picing khat suah nading hanciam kul hi. Sawltak Paul in: “Antak pen, a sia le a pha a khen thei a, [“a theihtheihna,” New World Translation] zangin zongsang a, amau le amau a kisek sa, a picing sate ading ahi hi,” ci-in gen hi. (Hebru 5:14, ZIV) “Kisek” cih kammal in a kimawl mite kiseekna hong phawksak hi.

¹² Kimawl a siam mahmah mikhat i muh ciang, amah in siamna a neih nading kiseekna le hun tampi kisam ding cih i thei hi. Amah pen kimawl a siamsa ngiata hong piang hi lo hi. Naungek khat a suah tungin, a khut a khete a zat dan ding thei lo hi. A nung ciang, nate hong len thei a, lampai dan ding a hong thei hi. Kiseekna tawh kimawl a siam mi hong suak thei bek hi. Tua mah bangin, a picing Khristian-te ihih theih nadingin kiseekna le hun kisam hi.

13. Jehovah ngaihsut banga i ngaihsut theih nading bang in hong huh ding a hiam?

¹³ Jehovah’ ngaihsut banga i ngaihsut theih dan, na khempeuh Jehovah muh banga i muh theih dan hih laibu sungah i kikum khin hi. Jehovah’ tehnate manpha sa-in, i it khinta hi. Thu khensatnate i bawl ciangin, ei le ei hih bangin kidong ni: ‘Hih thu tawh kisai Lai Siangtho thukham le thubul bang om hiam? Bangci zuih ding ka hiam? Bang sem dingin Jehovah in hong deih a hiam?’—Paunak 3:5, 6; James 1:5 sim in.

14. I upna a kip semsem nading bang kisam a hiam?

¹⁴ Jehovah tung i upna a kip semsem nading i hanciamna pen tawpsan het kei ni. An limci i nekna in i pumpi cidamin, i tha a hatsak semsem mah bangin, Jehovah’ thu i sinna in i upna a khauhsak semsem hi. Lai Siangtho i sin cil lai-in, Jehovah le ama lampite tawh kisai thuman bulpite i thei hi. Ahih hang hun a hong sawt tohtoh ciang, thuthukte i theihtel ding hong kisamta hi. Paul in: “Antak pen, . . . a picing sate ading ahi hi,” a cih ciang, tua thu a gen nuam ahi hi. I theih thute i nuntakpih ciang pilna i ngah hi. Lai Siangtho in: “Pilna na ngahna ding a thupi masa pen hi,” a ci hi.—Paunak 4:5-7; 1 Peter 2:2.

15. Jehovah le unaute’ tungah itna man i neih ding bangzah takin thupi a hiam?

¹⁵ Mi khat in cidamin thahat mahmah ahih hang, tua banga a cidam suak nading hoih taka a kikep tawntung ding kisam hi cih a thei hi. Tua mah bangin, a picing mi khat in zong Jehovah tawh a kizopna a kip tawntung nading hanciamna kisam hi cih a thei hi. Paul in: “Thu um taktak mah ihi hiam, ci-in nomau mahmah na ki-entel ciat un,” ci-in hong hilh hi. (2 Korin 13:5) Tua ahih manin, upna khauh bek tawh kicing lo hi. Jehovah le unaute i itna pen i khantohsak semsem ding kisam hi. Paul in: “Na khempeuh thei-in, mualte kinsak zawh nading upna ka neih hangin itna ka neih kei leh ka kimanna bangmah om lo hi,” na ci hi.—1 Korin 13:1-3.

NA LAMETNA MITSUAN IN

16. Satan in bang lungsim i neih ding deih a hiam?

¹⁶ Cikmah hunin Jehovah maipha kingah thei lo ding hi, ci-a i kingaihsut ding Satan in deih hi. Amah in i lungkiat ding deih a, buainate vengsak theih dan om lo hi, ci-in i ngaihsut ding deih hi. Khristian-pihte tung khatlekhat kimuanna i neih ding deih lo a, lungnopna i neih ding zong deih lo hi. (Efesa 2:2) A sia lam ngaihsutna lungsim in eite hong siatsak theih banah, Pasian tawh i kizopna zong siasak thei hi cih Satan in thei hi. Ahih hang Jehovah in a sia lam ngaihsutna lungsim i do zawh nadingin lametna hong pia hi.

17. Lametna pen bangzah takin thupi a hiam?

¹⁷ Thesalonika masa 5:8-ah, lametna pen galdona-ah galkap khat ii lutang a dal lukhu tawh na genteh a, tua lukhu pen “i lamet hotkhiatna” na ci hi. Jehovah’ hong kamciamte i lametna in i lungsim hong kem a, a sia lam ngaihsutna lungsim i do zawh nadingin hong huh hi.

18, 19. Lametna in Jesuh koi bangin tha ngahsak a hiam?

¹⁸ Lametna in Jesuh tha na ngahsak hi. Leitung a nuntakna a bei ding zanin, haksatna khat khit khat a thuak hi. A it a lawmpa in a lehhek hi. A lawm dang khat in Jesuh na nial hi. A lawm dangte in Jesuh nusia-in taisan uh hi. A gam mipihte in lehdo-in, bawlsia uh a, thahlup ding dongin ngen uh hi. Hih a nasia mahmah gimnate a thuak zawh nading bang in Jesuh na huh a hiam? “Mailamah a ngah ding lungdamna hangin maizumna kihta loin singlamteh tungah sihna hong thuak a, tu-in Pasian tokhom taklamah a tu hi.”—Hebru 12:2.

¹⁹ Cihtakna in a Pa min thangsak thei a, Satan zong zuau genpa ahihlam kilangsak thei hi cih Jesuh in a thei hi. Tua banga hih thei dinga a kilametna in nakpi takin a lungdamsak hi. A sawt loin vantungah a Pa tawh om khawmkik ding hi cih zong a thei hi. Tua lametna in thuakzawhna neisak hi. Jesuh mah bangin, i lametna i mitsuan den ding kisam hi. Tua in i tungah bangbang hong piang zongin thuakzawhna hong neisak ding hi.

20. A hoih lam lungsim i neih nading bang in hong huh thei a hiam?

²⁰ Jehovah in na upna le na thuakzawhnate mu gige hi. (Isaiah 30:18; Malakhi 3:10 sim in.) “Amah in na deihna hong pia ding hi,” ci-in hong kamciam hi. (Late 37:4) Tua ahih manin, na lametna mitsuan den in. Satan in na lametna beisak nuam a, Jehovah’ kamciamte tangtung ngei het lo ding hi, ci-a na ngaihsut ding deih hi. Ahih hang, a sia lam ngaihsutna lungsim a hong lut ding phal kei in. Na lametna bei semsem banga na kitheih leh, Jehovah kiangah huhna ngen in. Filippi 4:6, 7-a kigelh kammalte phawk in: “Thu khat peuhpeuhah lunghimawh lua kei unla, na kisap bangbang uh, lungdamna tawh Pasian kiangah na ngen un. Mihingte in a theihtel zawh loh Pasian’ hong piak lungsim nopna in, Khrih Jesuh tawh na kipawlna uh hangin note hong lungnuamsak ding hi.”

21, 22. (a) Leitung ading Pasian ngimna in bang a hiam? (b) Bang sem dingin khensat na hiam?

²¹ Mailam hun a nopci mahmah thute hun pia-in ngaihsun den in. A sawt loin, a nungta mi khempeuh in Jehovah bia tading uh hi. (Maangmuhna 7:9, 14) Leitung thak a nuntakzia ding ngaihsun dih ve. Na lamet sangin nakpi takin hoihzaw tham ding hi. Satan le dawi gilote banah, gitlohna le siatna khempeuh maimang khin tading hi. Kuamah cina om nawn lo ding a, kuamah si nawn lo ding hi. Zingsang na thawh simin na tha hong dimin, nuntakna hong nopci mahmah ding hi. Leitung pen paradais hong suah nadingin mi khempeuh in na sem khawm diamdiam ding uh hi. Mi khempeuh in a limci an nek ding nei-in, tenna muanhuai inn nei ciat ding uh hi. Mihingte ngongtat nawn lo ding uh a, khatlekhat ki-itin kihehpih tading uh hi. Tua hun ciangin, leitung mi khempeuh in “Pasian’ tate tawh a nuam suahtakna a ngahkhawm ding” uh hi.—Rom 8:21.

²² Jehovah in Lawm hoihpena amah i neih ding deih hi. Tua ahih manin, nisimin Jehovah’ thu na man theih nading le amah tawh na kinaih semsem nadingin hanciam in. I vekpi-in Pasian’ itna sungah kip tawntung ciat ni!—Jude 21.