Pasian’ Itna Kip Tawntung Hi

1, 2. Bang hang Jehovah Pasian it na hiam?

PASIAN na it hiam? Pasian kiang ki-ap a na kipumpiakna in amah na it man ahi hi. Pasian pen na Lawm hoihpenin na ngaihsun thei hi. A taktakin ci leng, Jehovah in amah na it ma pekin nang hong it khin hi. “Pasian in eite hong it masa ahih manin eite in itna i nei thei hi,” ci-in Lai Siangtho sungah i sim hi.—1 Johan 4:19.

² Jehovah in ei’ tunga itna a hong lahte khempeuh ngaihsun lecin; Pasian in a hoih mahmah i tenna leitung le nuntakna nuam i ngah theih nadinga i kisap na khempeuh hong pia hi. (Matthai 5:43-48; Maangmuhna 4:11) Pasian in amah tawh lawmta kizopna hoih hong neisak nuam a, ama’ thu i sin theih nadingin i kisap bangbang hong vaihawmsak hi. Lai Siangtho i sim ciang Jehovah kam a ngai ihi hi. Thu i nget ciang ama’n hong ngaihsak hi. (Late 65:2) A vanglian kha siangtho tawh lam hong lakin, tha hong pia hi. (Luka 11:13) Mawhna le sihna pan i suahtak nadingin a manpha a Tapa nangawn hih leitungah a hong sawl hi.—Johan 3:16; Rom 5:8 sim in.

3. Pasian tawh lawmta kizopna hoih koici nei thei ding ihi hiam?

³ Na lungnop hun le na khasiat hun ciangin a hong thuakpih na itpen na lawm khat ii thu ngaihsun in. Tua banga lawmta ki-itna a kipsuak theih nadingin hanciamna kisam hi. I neih khempeuh lakpan i Lawm hoihpen ahi, Jehovah tawh i kizopna zong tua bangmah ahi hi. Pasian tawh i kizopna pen kip tawntung thei hi. Tua ahih manin, Lai Siangtho in: “Pasian’ itna sungah na kip un,” hong ci hi. (Jude 21) Tua pen koi bangin sem thei ding i hiam? Lai Siangtho in: “Pasian i it ciangin ama thupiakte a zui ihi hi. Eite adingin ama thupiakte zuih ding a haksa lua hi lo hi,” ci hi.—1 Johan 5:3.

“PASIAN I IT CIANGIN”

4, 5. (a) ‘Pasian it’ cih ciang bang a cihnopna hiam? (b) Jehovah na itna koi bangin hong kipan a hiam?

⁴ Bang in ‘Pasian hong itsak’ a hiam? Jehovah na itna a kipat hun na phawk lai hiam?

⁵ Jehovah in leitung thakah a tawntungin hong nungtasak nuam hi cih na theih masak pen hun ngaihsunkik in. Tua munah nuntak theih nadingin Pasian hong bawlsak nate khempeuh na thei hi. A Tapa hih leitungah hong sawlin a manpha mahmah letsong hong pia hi cih na theikhia hi. (Matthai 20:28; Johan 8:29; Rom 5:12, 18) Jehovah in bangzah takin nang hong it hiam cih na theih ciang, nangh zong Pasian na it hi.—1 Johan 4:9, 10 sim in.

6. Mi khat ngai i cih ciang bang kihel a hiam? Pasian na itna in bang sem dingin hong hanthawn a hiam?

⁶ Ahih hang, Pasian na itna pen a kipatna hi pan hi. Gentehna-in, mi khat na it na ngaih ciangin, “Hong ngai ing,” cih gen bek hi loin gamtatna zong kihel hi. I ngaih khat pen a lungnop na’ng bawlsak dingin itna in hong hanthawn hi. Tua mah bangin, Jehovah i itna in ama deihna bangin hong nungtasak hi. Tua itna hong khan semsem ciang Pasian kiangah nang le nang ki-apin tui na kiphum hi. Tua banga na sepna in Jehovah’ na sem den dingin a kiciam na hi hi. (Rom 14:7, 8 sim in.) Tua na kiciamna koi bangin kipsak ding na hiam?

“AMA THUPIAKTE A ZUI IHI HI”

7. Jehovah it ihih leh bang sem ding i hiam? Pasian’ thupiak pawlkhat bangteng a hiam?

⁷ Jehovah i it manin “ama thupiakte a zui ihi hi.” Koi bangin zui ihi hiam? Ama thu i mang hi. Jehovah in koi bangin hong nungtasak nuam hiam cih thu Lai Siangtho pan i theikhia hi. Gentehna-in, zukhamna, guktakna, zuauthu genna, a kiteng nai lopi-a lupkhopna le Pasian hi loin na khat peuhpeuh, ahih kei leh mi khat peuhpeuh biakna pen khial hi cih hong theisak hi.—1 Korin 5:11; 6:18; 10:14; Efesa 4:28; Kolose 3:9.

8, 9. Lai Siangtho thupiak kician taka a om lo dinmunte-ah Jehovah in bang hong semsak nuam hiam cih koi bangin thei ding i hiam? Gentehna pia in.

⁸ Ahih hang, Jehovah maipha ngah dingin a thupiakte i zuih bek hi loin adang kisam lai hi. Pasian in i nuntak zia khempeuh ading zuih ding thukham tampi hong pia lo hi. Tua ahih manin, bang sem ding cih tawh kisai Lai Siangtho sungah thukham kician taka a om lo dinmunte kituak khathei hi. Khensatna hoih koici bawl thei ding i hiam? (Efesa 5:17) Lai Siangtho sungah thubulte om a, tuate in thu khat peuhpeuh tawh kisai Jehovah’ muhdan hong theisak thuman bulpite ahi hi. Lai Siangtho i sim ciang, Jehovah pen mi khat bangin i thei hi. Tua banah, Pasian’ ngaihsut dante, a deihte le a muhdahte zong i theikhia hi.—Late 97:10 sim in; Paunak 6:16-19; Ciaptehna 1 en in.

⁹ Gentehna-in, TV le Internet-ah bang en ding cih tawh kisai koi bangin khensat ding i hiam? Bangte en ding cih a kician lianin Jehovah in hong gen lo hi. Ahih hang, khensatna hoih i bawl theih nading thubulte hong pia hi. Tu huna gualnopna a tamzaw-ah ngongtatna le nulepa mawhna vai vive tawh kidim ahi hi. Lai Siangtho sungah Jehovah in: “A ngongtat nuam mite a lungsim in mudah” in, “nulepa mawhna a gamta mite tungah thu khen ding hi,” ci hi. (Late 11:5; Hebru 13:4) Khensatna hoih i bawl theih nadingin hih thubulte in koi bangin hong huh thei a hiam? Jehovah in a muhdahte le gamtat sia-a a muhte i theih leh tuate i pelh ding kisam hi.

10, 11. Bang hangin Jehovah thu mang ihi hiam?

¹⁰ Jehovah thu bang hang mang ihi hiam? Gimpiak i thuaknop loh man le thu i khensat khialh hanga hong piang buainate i pelhnop man bek hi lo hi. (Galati 6:7) Jehovah i it manin ama thu i mang hi. Tate in a pa a lungdamsak nop mah bangin eite in zong vantunga i Pa lungdamsak nuam hi hang. Jehovah maipha ngah ihihlam i theihna sanga a hoihzaw bangmah om lo hi.—Late 5:12; Paunak 22:2; Ciaptehna 2 en in.

¹¹ Zuih ding a baih hun ciang bek, ahih kei leh deih teel ding adang a om loh hun ciang bekin Jehovah thu a mang ihi kei hi. Pasian’ thukhamte le ngeinate lakah bangteng zui ding a, bangteng zui lo ding cih i teel kei hi. (Thu Hilhkikna 12:32) Tua bang hi lo zaw-in: “Ka deih nangma thupiakna zuih ding nuam ka sa hi,” ci-a a gen Late a atpa mah bangin en’ zong lungsim khempeuh tawh Pasian’ thu i mang hi. (Late 119:47; Rom 6:17) Jehovah’ thupiak khempeuh banga a sepna tawh a itna a lakkhia Noah tawh i kibang nuam hi. Noah in “Pasian’ thupiak khempeuh a hih hi,” ci-in Lai Siangtho in gen hi. (Piancilna 6:22) Nang e leh, Jehovah in tua bangin hong gen leh na ut hiam?

12. Koi bangin Jehovah lungdamsak thei ding ihi hiam?

¹² Thu i man ciang, Jehovah in koi bangin ngaihsun a hiam? Amah “lungdam” hi. (Paunak 11:20; 27;11) Hih thu ngaihsun dih in. Thu i manna in khuavannuai, a Piangsakpa lungdamsak hi. Ahih hang, Pasian in ama thu mang dingin cikmah hunin hong sawl tentan lo hi. Ut banga teeltheihna hong pia hi. Eite in a sia a pha ut bangin kiteelthei cihna ahi hi. Pasian i it manin thukhensatna hoihte bawlin, a hoihpen nuntakna i ngah ding Jehovah in deih hi.—Thu Hilhkikna 30:15, 16, 19, 20; Ciaptehna 3 en in.

“AMA THUPIAKTE ZUIH DING A HAKSA LUA HI LO HI”

13, 14. Pasian’ thupiakte zuih ding a haksa lua hi lo hi, cih koi bangin thei ihi hiam? Gentehna pia in.

¹³ Jehovah’ thupiakte pen zuih ding haksa lua, ut bangbangin ki-om thei kei, ci-in a ngaihsun hi lecin e leh? “Ama thupiakte zuih ding a haksa lua hi lo hi,” ci-in Lai Siangtho in kician takin gen hi. (1 Johan 5:3) “Haksa lua” cih Greek kammal in “gik” cih khiatna nei hi. Lai Siangtho mun dangah hih kammal pen a kilawm lo thukhamte, ahih kei leh midangte uk le siatsak a sawmte gen nadingin kizang hi. (Matthai 23:4; Sawltak 20:29, 30) New English Translation-ah: “Ama thupiakte in eite adingin van gik hi lo hi,” ci-in ki-at hi. Jehovah thupiakte pen “gik” lo a, zuih ding a haksa hi lo hi. Pasian in a hong kalh khempeuhte pen a kilawm a kituak hi den hi.

¹⁴ Gentehna-in, inn thakah a kituah ding na lawm khat a huhin kingaihsun in. Na lawm in a vante khempeuh singkuang sungah guang khin hi. Singkuang pawlkhat pen zaang ahih manin likbaih hi. Ahih hang, singkuang pawlkhat pen giklua ahih manin mi nih in a zawng kul hi. Na lawm in a gik mahmah singkuang pen nang guakin hong liksak ding ahi hiam? Hong liksak lo ding hi. Bang hang ahi tam? Hong gimsak nuam lo ahih man hi. Tua na lawm mah bangin, Jehovah in a haksa lua a sem dingin cikmah hunin hong kalh ngei lo ding hi. (Thu Hilhkikna 30:11-14) Jehovah in hong tel mahmah hi. “Amah in eite’ pianna hong thei a, eite pen leivui ihihna a phawk hi.”—Late 103:13.

15. Jehovah’ thupiakte in i phattuam nading hi cih bang hang gen thei i hiam?

¹⁵ Moses in Israel mite kiangah Jehovah’ thupiakte amau ading “hoih tawntung” ahihna le amau’ thu manna in a “nuntak” suak theih nading uh ahihna thu na gen hi. (Thu Hilhkikna 5:28-33; 6:24) Tu hunin zong tua bangmah ahi hi. Jehovah’ hong kalh khempeuh in i nuntakna hong hoihsak semsem hi. (Isaiah 48:17 sim in.) Eite adingin bang hoihpen hiam cih i Pa Jehovah in a tawntungin thei hi. (Rom 11:33) ‘Pasian pen itna ahi hi,’ ci-in Lai Siangtho in gen hi. (1 Johan 4:8) Tua in Jehovah’ gen khempeuh le a sep khempeuh in itna bulphuh hi cihna hi.

16. A cingtaak lo mi ihih hang, gitlohna leitungah nungta ihih hang Pasian thu i mang thei hi cih koici theih i hiam?

¹⁶ Pasian thu man den ding pen baih lo hi. Dawimangpa ukna, gitlohna leitungah i nungta hi. Mi te’n siatna a bawl nadingun Dawimangpa in thuzawh sawm hi. (1 Johan 5:19) A cingtaak lo i lungsim ngaihsutnate zong i do kul hi. Tuate in Pasian thu mang lo dingin hong tawsawn thei ahih man hi. (Rom 7:21-25) Ahih hangin, Jehovah i itna in a hoih nate sem dingin tha hong pia hi. Pasian in ama thu mang dinga i hanciamnate hong mu-in, a thahat mahmah kha siangtho tawh hong huh hi. (1 Samuel 15:22, 23; Sawltak 5:32) Kha siangtho in pianzia hoihte hong neisak a, Pasian thu ol takin i man theih nading hong huh hi.—Galati 5:22, 23.

17, 18. (a) Hih laibu sungah bang thu sin ding i hiam? (b) A zom khenpi-ah bang thu kikum ding i hiam?

¹⁷ Hih laibu sungah Jehovah deihna banga i nuntak theih dan sin ding hi hang. Pasian thubulte le gamtatna tawh kisai lamlahnate i nuntakpih theih dan ding zong sin ding hi hang. Jehovah in ama thu mang dingin cikmah hunin hong sawl tentan lo hi cih phawk den in. Thu mang dinga i tel ciang, i nuntakna hong hoih semsemin, a hoih mahmah lametna i nei ding hi. A thupi penah, Pasian thu i manna in amah nakpi taka i it lam kilangsak hi.—Ciaptehna 4 en in.

¹⁸ Bang pen man a, bang pen khial hi cih i theih nading Jehovah in mi khat ciat tungah lungsim kitheihna hong pia hi. Tua pen seek lehang, “ama thupiakte zui” dingin hong huh ding hi. I lungsim kitheihna cih in bang a hiam? Koici seek ding i hiam? Kikum ni.