Dawimangpa Na Nial Un

1, 2. Satan le dawite tawh kisai bang i theih ding kisam a hiam?

JEHOVAH ii leitung thakah nuntakna pen nopci mahmah ding hi. Pasian’ ngimna banga a kinungta ding hita hi. Tu’n ahihleh, Satan le dawite ii ukcipna leitungah i nungta hi. (2 Korin 4:4) Dawite pen i muh theih loh hang amau om takpi uh a, vanglian mahmah uh hi.

² Hih khenpi sungah, Jehovah tawh kinai taka i om theih dan le Satan’ khut sung pan ei le ei i kidal theih dante kikum ding hi hang. Jehovah in hong huh ding cih hong kamciam hi. Ahih hang, Satan le dawite in ei hong khem nading le hong do nadinga a zat lampite i theih ding kisam hi.

‘HUMPINELKAI HAWK BANGIN’

3. Satan in ei bang hong ci nuam a hiam?

³ Mihingte in amau’ angsung phattuam nading bek tawh Jehovah a bia uh hi lel hi, haksatna thuak uhleh Pasian bia nawn lo ding uh hi, ci-in Satan in gen hi. (Job 2:4, 5 sim in.) Mi khat peuhpeuh in Jehovah thu a sinnop ciang Satan le dawi te’n thei uh a, khaktan dingin a hanciam uh hi. Mi khat in Jehovah kiang ki-apin tui a kiphum ciang amau na heh mahmah uh hi. Lai Siangtho in Dawimangpa pen “humpinelkai bangin a nek theih ding zongin vak kawikawi hi,” ci-in gen hi. (1 Peter 5:8) Satan in Pasian tawh i kizopna siasak nuam hi.—Late 7:1, 2; 2 Timoti 3:12.

4, 5. (a) Satan in bang hihzo lo a hiam? (b) ‘Dawimangpa nial’ cih in bang a hiam?

⁴ Ahih hang, Satan le dawite lau kul lo hi. Ei’ tunga amau’ septheihna Jehovah in ciangtan hi. Khristian man “mihonpite” pen “bawlsiatna lianpi” panin suakta ding uh hi, ci-in Jehovah in kamciam hi. (Maangmuhna 7:9, 14) Jehovah in a mite kem ahih manin ama’ kamciam tangtung lo dingin Dawimangpa’n bangmah hih thei lo hi.

⁵ Jehovah tawh kinai takin om lehang, Amah tawh i kizopna pen Satan in siasak zo lo hi. Lai Siangtho in: “Note amah tawh na om laiteng uh note tawh TOPA hong om hi,” ci-in kamciam hi. (2 Khang Tangthu 15:2; 1 Korin 10:13 sim in.) Abel, Enok, Noah, Sarah, le Moses-te banga tanglai-a a citak numei pasal tampite in Jehovah tawh kinai taka omin Dawimangpa na nial uh hi. (Hebru 11:4-40) Amaute mah bangin en’ zong i nial thei hi. Lai Siangtho in: “Dawimangpa na nial un. Nial le uhcin no kiang panin taikhia ding hi,” ci-in kamciam hi.—James 4:7.

‘DAWIGILO HONPITE TAWH A KIDO IHI HI’

6. Satan in koi bangin hong khem a hiam?

⁶ Satan in ei tunga ama’ septheihna Jehovah in ciangtan ahihlam thei napi, Pasian tawh i kizopna a thanemsak thei na khempeuh sem dingin hanciam lai veve hi. Tu hun ciang zong, Dawimangpa’n nam tuamtuamin hong do hi. Ahih hang, kum tampi tak sung a zat ngeisa a mi khem dante mah zang hi. Tua a mi khemna pawlkhat bangteng hiam?

7. Satan in Jehovah’ mite bang hang do a hiam?

⁷ ‘Leitung midang khempeuh Dawimangpa khut sungah om hi,’ ci-in sawltak Johan in at hi. (1 Johan 5:19) Siatna tawh a kidim hih leitung pen Satan in ukcip a, Jehovah’ mite tungah zong ukcip nuam hi. (Mikah 4:1; Johan 15:19; Maangmuhna 12:12, 17) Satan in hun tawmcik bek a neihlam thei ahih manin Pasian tunga i cihtak loh nadingin mimal khat ciatte nakpi takin hong tawsawn hi. Khat veivei ciang bawlsiatna zang a, midang le na dangte zong zangin hong do thei hi.

8. Khristian khempeuh in bang pen i theih ding kisam a hiam?

⁸ “Si le sa tawh kido i hi kei a, . . . van lam a dawigilo honpite tawh a kido i hi hi,” ci-in Efesa 6:12-ah kisim hi. [ZSV] Khristian khat ciat in Dawimangpa le dawite a do ihi hi. Jehovah kiang ki-ap a, tui a kiphum khempeuh tua galsimna-ah a kihel hi hang, cih i theih ding kisam hi. Sawltak Paul in Efesa pawlpite kianga a laikhak sungah Khristian te’n a “nanzawh” nading le a “dinkip” nadingin na hanthawn hi.—Efesa 6:11, 13-15, ZSV.

9. Satan le dawite in ei tungah bang hong cih ding hanciam uh a hiam?

⁹ Satan le dawite in nam tuamtuam tawh hong khem nading hanciam uh hi. Satan’ khemna nam khat i nanzawh hang bekin adang khemna khat tawh hong kikhem nawn lo ding cihna hi lo hi. Dawimangpa’n thang siah a, hong mat theih nadingin i thanemnate zong hi. Ahih hang, Lai Siangtho sungah Dawimangpa’ nasep ziate hong gen ahih manin ama’ thangah awk loin ki-om thei hi. (2 Korin 2:11; Ciaptehna 31 en in.) Tua thang nam khat pen dawisiamna ahi hi.

DAWITE GAMLAPI PAN PEL IN

10. (a) Dawisiamna cih in bang hiam? (b) Jehovah in dawisiamna bangci muh a hiam?

¹⁰ Dawisiamna-ah khutlam etna, bum le kau siamna le misi thu dotna cih bang mihingte hih zawh loh siamnate zanga dawite tawh kizopna kihel hi. Lai Siangtho in dawisiamna pen a “kihhuai,” le tua siamna zang kawmin Jehovah kibia thei lo ahihlam gen hi. (Thu Hilhkikna 18:10-12; Maangmuhna 21:8) Dawisiamna lam tawh kisai khempeuh Khristian te’n i pelh ding ahi hi.—Rom 12:9.

11. Mihingte’ hih zawh loh siamnate theih sawmna in bang hong piangsak thei a hiam?

¹¹ Mihingte’ hih zawh loh siamnate i lunglut khak leh dawisiamna zang dinga hong khem nading baih mahmah hi cih Satan in thei hi. Dawisiamna tawh kisai khempeuh in Jehovah tawh i kizopna hong siasak ding hi.

SATAN IN HONG KHEM DING HANCIAM

12. Satan in i ngaihsutna koi bangin hong thuzawh sawm a hiam?

¹² Satan in mihingte’ ngaihsutna a buaisak dingin hanciam hi. Mi te’n “a phate sia ci-in, a siate pha ci a” a ngaihsut dongin, muanlahna damdamin neisak hi. (Isaiah 5:20) Lai Siangtho’ hong hilhnate zattak nawn kei, Pasian’ tehnate thudon kei leng i lungnuamzaw lai ding hi, ci-a ngaihsun dingin Dawimangpa’n hong hanthawn hi.

13. Muanlahna lungsim neisak dingin Satan in koi bangin hanciam a hiam?

¹³ Muanlahna lungsim pen Satan’ zat a muibun pen khemna nam khat ahi hi. Tua pen Satan in a zat zawh sawtta hi. Eden huanah, Satan in Eve kiangah: “Pasian in, ‘Huan sunga sing khatpeuh pan na ne kei un,’ hong ci takpi hiam?” ci-in dong a, muanlahna lungsim neisak hi. (Piancilna 3:1, ZIV) Tua khit teh, Job’ hun hong tun ciang zong, vantung mite’ mai-ah Satan in Jehovah kiangah: “Job in a mawkna-in Pasian kihta ahi hiam? ci-in a dong hi. (Job 1:9, ZIV) Jesuh tui a kiphum khit ciang, Satan in: “Pasian’ Tapa na hih takpi le hih suangte anlum a suah nadingin thu pia in,” ci-in na to hi.—Matthai 4:3.

14. Dawisiamna pen lauhuai ding maw, ci-a mi te’n muanlahna lungsim a neih nadingin Satan in koici bawl thei hiam?

¹⁴ Tu hunin zong, Dawimangpa’n muanlahna lungsim piangsak lai hi. Dawimangpa’n dawisiamna pawlkhat pen a sanhuai bangin bawl a, tua zahpi-in lauhuai ding maw, ci-a mi te’n muanlahna lungsim a neih nadingin a hanciam hi. Khristian pawlkhatte nangawn in zong, dawisiamna a lauhuai lam thei nawn lo uh hi. (2 Korin 11:3) Tua hileh, ei le ei i kidal nading bang bawl thei i hiam? Satan’ mikhem dante tawh hong kikhem khak loh nading pilvang takin i om hi cih koici theithei ding i hiam? Hong kikhem theih dan nam nih kikum ni. Tuate pen gualnopna le zatui kikhoina ahi hi.

SATAN IN I LUNGGULHNATE ZANG

15. Gualnopna i zatna pan dawite tawh koi bangin kizom khathei i hiam?

¹⁵ Tu hun ciang, cinema, video, TV, computer game, le Internet site a tamzaw-ah dawisiamna, mitphial, le mihingte’ hih zawh loh siamnate vive kilak hi. Mi tampite in dawite tawh kipawl a lauhuai lam thei loin, cimphawng le a lauhuai lo bangin ngaihsun uh hi. Mi khat in aksi tungtawna mailam thu etna, khutlam etna, phuisamna, le khongkhai cih bang dawisiamnate zang khathei hi. Dawimangpa’n tuate a lauhuaina seel cipin, a lamdang mahmah, a lungluthuai mahmah le cimphawng banga i ngaihsut dingin bawl hi. Ei mahmah in dawisiamnate zang kei peuh leng, dawi tawh kisai le mihingte’ hih zawh loh siamna tawh kisai thute sima, i et pen lauhuai lo hi, ci-in zong kingaihsun khathei hi. Tua banga ngaihsutna pen bang hangin lauhuai a hiam?—1 Korin 10:12.

16. Mihingte’ hih zawh loh siamna thute a kilak gualnopna pen bang hang nial ding kisam hiam?

¹⁶ Satan le dawite in i ngaihsutnate theithei lo uh hi. Ahih hang, i teel gualnopna, i innkuanpihte le ei mahmah ii teelna tungtawnin i lungsim deihnate le i ngaihsutnate a theithei uh hi. Dawi lawmneite, phuisamnate, dawiveite, bum le aisannate le sisan hup dawite cih bang lim a kilak video, tumging, le laibute teel ihih leh, Satan le dawite in dawi thu lunglut ihihlam thei ding uh hi. Tua khit ciang, dawisiamna zang dingin nakpi takin hong khem tading uh hi.—Galati 6:7 sim in.

17. Satan in i cidam nopna lungsim pen koi bangin hun lemtangin zang thei a hiam?

¹⁷ Satan in i cidam nopna lungsim zong hun lemtangin zang thei hi. Tu lai-in, mi tampi dam lo uh hi. Zatui tuamtuam tawh a kikep uh hang, noptuam tuan lo thei hi. (Marka 5:25, 26) Cih nading thei nawn lo ahih manin, bumleh theite kiangah pai, ahih kei leh dawi thu tawh kizom kikepna le kikhoina tuamtuam zang thei uh hi. Ahih hang, Khristiante in dawisiamna a kihel kikhoinate i teel khak loh nading i kidop mahmah ding kisam hi.—Siampi Laibu 19:31.

18. Khristian khat in koi bang kikhoinate nial ding a hiam?

¹⁸ Jehovah in a thukham a palsat mite kiangah: “Mi khat in thukham a zuihnop kei leh ama thungetna nangawn Pasian in zakthadahhuai sa hi,” ci-in gen hi. (Paunak 28:9) Hih thu ngaihsun in! Jehovah in a thungetnate nangawn zong ngai nawn lo hi! Jehovah tawh i kizopna a siasak thei, le Pasian’ huhna hong khaktan thei khempeuh i hih nuam kei hi. A diakin, i cinat hun ciang ahi hi. (Late 41:3) Tua ahih manin, i kikep i kikhoi nadinga i ngaihsut khat peuhpeuhah dawisiamna le mihingte’ hih zawh loh siamnate a kihel ding hiam cih pilvang taka i kan tel ding kisam hi. (Matthai 6:13) Tuate tawh kizom ahih khak leh i nial ding kisam hi.—Ciaptehna 32 en in.

DAWI TANGTHUTE

19. Mite lausak dingin Dawimangpa in koici bawl a hiam?

¹⁹ Mi pawlkhat in Dawimangpa le dawite om taktak lo uh a, a kiphuak tawm hi lel hi, ci-in ngaihsun uh a, pawlkhat leuleu in amau’ tuahkhak thute hangin dawite om takpi hi cih thei uh hi. Mi tampite in dawite ii bawlsiat ding a lau manun zehtang uh hi. Pawlkhatte in dawite ii mi khemna tangthu genin mite lausak uh hi. Mite in dawi tangthute lunglut mahmah uh a, mi dangte kiangah gensawn uh hi. Dawi tangthute hangin mi te’n Dawimangpa lau uh hi.

20. Satan’ khemnate koi bangin kithehzaak sak khathei i hiam?

²⁰ Hih thu ngaihsun in—Mi te’n amah a lau ding uh Satan in deih hi. (2 Thesalonika 2:9, 10) Satan pen mi khem hatpa hi a, dawisiamna a lunglut mite’ lungsim thuzawh a, a man lo pipi zong a man bangin umsak hi. Mite in a upmawh thute a mu takpi le a za takpi danin zuau phuakin gen uh hi. Dawi tangthute a kigen sawnkik ciang, mite in thu tampi behlapin genkik uh hi. Tua bang tangthute gensawnkikin mite a lausak nuam Satan i huh nuam kei hi.—Johan 8:44; 2 Timoti 2:16.

21. Dawi tangthu i gen sangin bang thu i gen ding hoihzaw a hiam?

²¹ Jehovah’ mite in dawite’ bawlsiatna tuakkha ngei ahih lezong midangte kiang gensawn ding hi lo hi. Pasian’ mite in dawimangpa le dawite’ bawlsiat ding lau kul lo hi. Tua sangin, Jesuh’ thu le Jehovah in a piak Jesuh vangliatna thu bek i mitsuan ding kisam hi. (Hebru 12:2) Jesuh in a nungzuite kiangah dawite’ thu pen a zaknop tangthu bangin na genpih ngei lo hi. Pasian’ Gam lungdamna thu le “Pasian’ sep na lamdang liante” thu bek na mitsuan zaw hi.—Sawltak 2:11; Luka 8:1; Rom 1:11, 12.

22. Bang hih dingin khensat na hiam?

²² Satan in Jehovah tawh i kizopna hong siasak nuam ahihlam mangngilh kei in. Tua banga a siatsak theih nadingin a zat theih khempeuh a zang hi. Ahih hang, Satan hong khemnate i thei a, dawisiamna a kihel na khempeuh nial dingin thu i khensat hi. I khensatna a thanemsak dingin ‘Dawimangpa hun i pia’ het kei ding hi. (Efesa 4:27 sim in.) Hi mah hi. Dawimangpa i nial leh ama’ thang pan suakta-in Jehovah’ kepcinna nuai-ah lungmuang takin i om thei ding hi.—Efesa 6:11.