Denmisɛn minnu bɛ yeelen bɔ iko lanpa
1 Yesu y’a fɔ a ka kalandenw ye ko: “Aw ye kɛnɛyeelen ye diɲɛ la.” (Mat. 5:14, 16) Yesu ka kalandenw bɛ iko dugu min bɛ kulu san fɛ, n’a bɛ ka mɛnɛmɛnɛ tile kɔrɔ, u bɛna dɔn ka bɔ tɔw la ka ɲɛ. Bi fana, Kerecɛn denmisɛn caman bɛ ka “yeelen bɔ . . . i ko lanpa bɛ yeelen bɔ diɲɛ la cogo min na” u taamacogo ɲuman fɛ ani u ka timinandiya fɛ waajuli la.—Fil. 2:15; Mal. 3:18.
2 Lakɔli la: Aw bɛ se ka seereya kɛ lakɔli la cogo jumɛnw fɛ? Denmisɛn dɔw ye sira sɔrɔ ka seereya kɛ baro bolodalenw sababu fɛ minnu bɛ kɛ klasi kɔnɔ. O barow bɛ kɛ fɛn sugu minnu kan u dɔw filɛ: dɔrɔgu, yɛlɛmayɛlɛmali ani dugukolo nafolomafɛnw dɔgɔyali. Baara dira an balimamuso dɔ ka klasi kɔnɔ, k’u ka sɛbɛnni kɛ, min kɔnɔ u b’u hakilina di terorisimu kan, n’o ye mugujugupɛrɛn ye diɲɛ nɛfɛ. A sɛbɛn kɔnɔ an balimamuso ye seereya kɛ Ala ka Masaya kan, k’a jira ko o de ye hadamadenw jigiya lakika ye. A ka lakɔlimɛtiri kabakoyara kosɛbɛ a ka hakililaw sigicogo ɲuman na a ka sɛbɛn kɔnɔ. O y’a to fana an balimamuso ye sira sɔrɔ ka seereya kɛ tuguni.
3 Aw bɛ se ka yeelen bɔ iko lanpa sira wɛrɛ min fana fɛ, o ye aw taamacogo ye, aw ka finiw bɛrɛ bɛnnen ni aw yecogo ye. (1 Kɔr. 4:9; 1 Tim. 2:9) Ni lakɔlidenw ni lakɔli karamɔgɔw b’a ye ko aw kɛcogo ni tɔw kɛcogo tɛ kelen ye, u dɔw bɛ se ka sama tiɲɛ nɔfɛ aw taamacogo ɲuman kosɔn. O bɛ sira dayɛlɛ aw ye fana ka kuma tiɲɛw kan minnu bɛ Bibulu kɔnɔ. (1 Pi. 2:12; 3:1, 2) Ka taama alaɲɛsiran kɔnɔ, o bɛ se ka kɛ ko ye min ma nɔgɔn. Nka ni aw bɛ taama o cogo la, Jehowa bɛna dugawu caman lase aw ma. (1 Pi. 3:16, 17; 4:14) Walisa mɔgɔw ka nata kibaru duman na, aw bɛ se fana ka sɛbɛnw kalan minnu sinsinnen bɛ Bibulu kan lafiyɛnwaatiw la, walima aw bɛ se ka taa ka o sɛbɛnw to yɔrɔ la, bɛɛ bɛ se k’u ye yɔrɔ min na.
4 Ni aw bɛ aw ka yeelen bɔ iko lanpa lakɔli la, o bɛ dɔ fara aw ka dannaya kan. O b’aw kun kɔrɔta aw ka baara la Jehowa ye. (Jer. 9:24) O bɛ aw tanga fɛn caman ma fana. An balimamuso dɔ y’a fɔ ko: “ Ka kuma ne ka dannayakow kan, nafa min bɛ sɔrɔ o la, o dɔ ye ko lakɔlidenw t’a ɲini ka ne diyagoya ka kow kɛ minnu ni Bibulu ka kuma tɛ ɲɔgɔn ta.”
5 Ka dɔ fara baara kan Jehowa ye: Denmisɛn dɔw ye yeelen bɔ iko lanpa sira wɛrɛ min fana fɛ, o ye ko u ye dɔ fara u ka cidenyabaara kan. Balimakɛ dɔ tilalen kɔ lakɔliba kalan na, a yɛlɛmana yɔrɔ wɛrɛ la, yɔrɔ min magoba bɛ Masaya weleweledalaw la. A tun bɛ jɛkulu fitinin dɔ kɔnɔ, min maakɔrɔ tun ye kelenpe dɔrɔn de ye. An balimakɛ ye lɛtɛrɛ ci a teri dɔ ma ko: “Ne bɛ ka waati dumanba de kɛ yan yɔrɔ la. Cidenyabaara bɛ mɔgɔ barika bonya kosɛbɛ! An bɛ miniti 20 ɲɔgɔn de kɛ da kelen-kelen bɛɛ la, bawo mɔgɔw b’a fɛ k’an ka fɔtaw bɛɛ mɛn.” A ye nin fana fɔ ko: “Ne b’a fɛ denmisɛn bɛɛ ka se ka nin ɲɔgɔn kɛ, ani ka ne ka nisɔndiya ɲɔgɔn sɔrɔ. Ni an bɛ baara kɛ Jehowa ye ni an ka fɛnw bɛɛ ye, ko tɛ yen min ka fisa ni o ye.”
6 Denmisɛnw, a’ minnu bɛ yeelen bɔ iko lanpa diɲɛ kɔnɔ, aw b’an kunkɔrɔta kosɛbɛ. (1 Tes. 2:20) Ni aw bɛ baara kɛ Jehowa ye ni aw dusukun bɛɛ ye, aw ni bɛɛ ye, aw hakili bɛɛ ye, ani ni aw fanga bɛɛ ye, aw bɛna fɛn bɛɛ ‘kɛmɛ-kɛmɛ sɔrɔ nin diɲɛ la, . . . Aw na ɲɛnamaya banbali sɔrɔ’ diɲɛ nata la.—Mar. 10:29, 30; 12:30.
[Study Questions]
1. Bibulu b’a jira cogo di ko Kerecɛnw bɛna dɔn ka bɔ tɔw la ka ɲɛ? O kumaw bɛ waleya cogo di Kerecɛn denmisɛnw kan bi?
2. Aw bɛ se ka seereya kɛ lakɔli karamɔgɔw ani klasiɲɔgɔnw ye sira jumɛnw fɛ?
3. Aw bɛ se ka mun kɛ walisa aw taamacogo fɛ aw k’a ka yeelen bɔ lakɔli la?
4. Ka seereya kɛ lakɔli la, o nafa dɔw ye jumɛnw ye?
5. (a) Denmisɛn dɔw ye dɔ fara u ka cidenyabaara kan cogo di? b) Kuntilenna jumɛnw bɛ aw la alako ta fan fɛ?
6. Denminsɛn minnu bɛ aw ka jɛkulu kɔnɔ, olu bɛ kunkɔrɔta jumɛnw lase aw ma?