“Aw ka yeelen bɔ iko lanpa”
1 Nin diɲɛ bɛ dibi la alako ta fan fɛ ani jogo caman ba kɔnɔ minnu ma ɲi. O diɲɛ in kɔnɔ, Ala lakika batobaga miliyɔn wɔɔrɔ ɲɔgɔn ka ‘yeelen bɛ ka bɔ iko lanpa’ jamana 234 la, dugukolo yɔrɔ bɛɛ la. (Filip. 2:15) O de b’a to mɔgɔw ka teli ka an dɔn ka bɔ tɔw la. Tiɲɛ yeelen min bɛ bɔ Jehowa yɔrɔ, o ye fɛn nafamaba ye. An bɛ se ka o yeelen jira cogoya jumɛn na?—2 Kɔr. 3:18.
2 An ka kɛtaw: Mɔgɔw ka teli ka an taamacogo kɔlɔsi. (1 Pi. 2:12) Muso dɔ y’a kɔlɔsi ko a baarakɛɲɔgɔn Jehowa seere dɔ tun ka ɲi. O cɛ in tun bɛ mɔgɔ dɛmɛ. Malobaliya kumaw tɛ bɔ a da. Ni tulonkɛkuma nɔgɔlenw fɔra a tɛ yɛlɛ. Ni mɔgɔ tɔw b’a dalaɲini, ka kuma kolonw fɔ a kɛrɛfɛ, o tun tɛ a bɔ a ka basigilenya kan, wa a tun bɛ to tilennenya kɔnɔ. O ye nɔ jumɛn bila muso la? Muso ko: “A kɛcogo tun ye ne kabakoya fo ne tora ka ɲininkaliw kɛ Bibulu kan. Ne ye Ala ka Kuma kalan daminɛ. O kɔfɛ ne ye batɛmu ta.” Muso ko fana: “A ka taamacogo de tun ye ne bila ka Jehowa seerew ka dannayakow lajɛ.”
3 An ka sariya minɛ cogo, ani an bɛ diɲɛ kow filɛ ni ɲɛ min ye, ani an ka kuma saniyalen b’a jira kɛnɛkan ko, anw Jehowa Seerew ye jamakulu ye, min bɛ a ka ɲɛnamaya kɛ ka kɛɲɛ ni Bibulu ka sariya sigilen kɔrɔtalenw ye. O baara ɲuman suguw bɛ se ka nɔɔrɔ da Jehowa kan, ka mɔgɔ tɔw lana a ka bato la.
4 An ka kumaw: Laala mɔgɔ minnu b’an kɛcogo ɲuman ye, olu tɛ se k’a dɔn mun na danfara bɛ an ni tɔw cɛ ni an ma kuma u fɛ, ka an ka dannayakow ɲɛfɔ u ye. I baarakɛɲɔgɔnw walima i lakɔlidenɲɔgɔnw b’a dɔn k’i ye Jehowa Seere ye wa? Yala i bɛ to k’a ɲini ka seereya di Ala ko la baro gansan senfɛ wa? Yala i y’a latigɛ ka ‘i ka yeelen bɔ mɔgɔw ɲɛ na,’ ni a se bɛ i ye tuma o tuma wa?—Mat. 5:14-16.
5 Cikan min donna an bolo ka yeelen bɔ mɔgɔ tɔw ye, ni an b’a fɛ ka o baara kɛ ka dafa, an ka kan k’a to an hakili la, k’o tɛ taa yɛrɛbakun di kɔ. N’i an b’an yɛrɛbakun bɛɛ di o kama, o bɛna an bila, ka ban ko nafantanw na, ka an seko bɛɛ kɛ kisili baara la ni o ye waajuli ye ani ka mɔgɔw kɛ Yesu ka kalandenw ye.—2 Kɔr. 12:15.
6 An ka kɛwalew ani an ka kumaw fɛ, an ka taga a fɛ ka yeelen bɔ iko lanpa. Ni an b’o kɛ, o bɛ se ka tɔw bila u k’u fara an kan, ka nɔɔrɔ da Jehowa kan.