“Aw ka yeelen ka yelenku”
1 An bɛ diɲɛ min na, o bɛ dibi la jogo ani alako ta fan fɛ. Tiɲɛ yeelen bɛ dibi “kɛwale nafantanw” bɔ kɛnɛ kan walasa an ka se k’an jɛngɛ u ma bawo u bɛ se k’an lase saya ma. O kosɔn, ciden Pol ye dusu don Krecɛnw kɔnɔ ko: ‘Iko yeelen denw, a’ ye taama yeelen na ka t’a fɛ.’—Efe. 5:8, 11.
2 ‘Yeelen bɛ wolo den min na’ ani diɲɛ bɛ dibi min na, danfaraba bɛ u cɛ. (Efe. 5:9, Layidu Kura) Walasa an ka wolo o den sugu la, fo an ka kɛ ɲɛjirabaga ɲumanw ye an ka ɲɛnamaya kɛcogo la Krecɛnya sira la, ani ka kɛ mɔgɔ suguw ye Yesu bɛ sɔn minnu na. An ka kan ka jogo sugu minnu fana dankɛnɛmaya tiɲɛ ta fan fɛ, o ye dusukun dafalen, kɔnɔnajɛya, ni nisɔndiya ye. O den suguw ka kan ka ye an ka don o don ɲɛnamaya kɛcogo la, an’an ka cidenyabaara la.
3 An ka yeelen ka yelenku ko kelen-kelen bɛɛ la: Yesu y’a fɔ a ka kalandenw ye ko: “Aw ka yeelen ka yelenku mɔgɔw ɲɛkɔrɔ.” (Mat. 5:16, LK) An bɛ Yesu ladege ka Jehowa ka yeelen bɔ, tuma min na an bɛ Ala ka Masaya kibaru duman n’a kuntilennaw wajuli kɛ. An bɛ yelenku i n’a fɔ yeelen bɔyɔrɔ, n’an bɛ taa bɔ mɔgɔw ye u ka sow, n’an bɛ tiɲɛ kuma fɔ baarakɛyɔrɔ la, lakɔliso la, an sigiɲɔgɔnw fɛ, ani n’an bɛ cogo sɔrɔ ka kuma yɔrɔ o yɔrɔ la.—Fil. 2:15.
4 Yesu y’a fɔ ko dɔw tun bɛ na yeelen koniya. (Yuh. 3:20) O la sa, dusutiɲɛ t’an sɔrɔ ni mɔgɔ fanba b’u ban “Krista nɔɔrɔ Kibaro duman yeelen” ka se u ma. (2 Kɔr. 4:4) Jehowa bɛ hadamadenw dusukunw dɔn, a tɛ tilenbaliw fɛ a ka jama cɛla.
5 N’an bɛ tugu Jehowa ka siraw la, n’an bɛ yeelen diyabɔ alako ta fan fɛ fana, an bɛ se k’o yelenku mɔgɔ wɛrɛw ɲɛkɔrɔ. N’u b’a dɔn an taamacogo fɛ ko “ɲɛnamaya yeelen” b’an bolo, o bɛna se k’u bila ka yɛlɛma bɛnnenw kɛ walasa olu fana ka kɛ yeelen tabagaw ye.—Yuh. 8:12.
6 N’an b’a to an ka yeelen ka yelenku, an bɛ tanu lase an Dabaga ma, ka kɔnɔnajɛw dɛmɛ u ka Ala dɔn, ani ka ɲɛnamaya banbali jigiya sɔrɔ. (1 Piɛ. 2:12) Ikomi yeelen b’an bolo, an ka baara kɛ n’o ye ka mɔgɔ wɛrɛw bilasira walasa u ka bɔ alako ta fan fɛ dibi la, k’u dɛmɛ fana walasa u ka yeelen baaraw kɛ.