Wideyo min bɛ yɛlɛmaba dɔ ɲɛfɔ furakɛli cogo kan

Mɔgɔ minnu sigilen bɛ sariya koɲɛ ɲɛnabɔli kama ani mɔgɔ minnu ka baara ye kɛnɛya sabatili ye, olu bɛ ka u ɲɛmajɔ ka t’a fɛ banabagatɔw jow ko la ani u bɛ fɛn min filɛ iko fɛn ɲuman jogoɲumanya sira la. O kɛra sababu ye ka furakɛlicogo kuraw ni fɛɛrɛ kuraw yiriwa minnu bɛ se ka Jehowa Seerew dɛmɛ kosɛbɛ. (Kɛw. 15:28, 29) Soigner sans transfuser – Besoins et droits du patient wideyo sinsinnen bɛ o de kan. Aw ka o wideyo filɛ, aw ye min faamu a ko la, aw ka miiri o kan.—Kɔlɔsili: Opereli kunkunrunninw jaw jiralen bɛ wideyo la, o kosɔn, bangebagaw ka kan k’a jateminɛ ni olu ni denmisɛnninw bɛ jaw lajɛ ɲɔgɔn fɛ.

(1) Mun na dɔgɔtɔrɔw kulu bɛ ka jolidon nafa sɛgɛsɛgɛ kokura? (2) Misali saba di opereli gɛlɛnw kan minnu kɛra k’a sɔrɔ jolidon ma kɛ? (3) Diɲɛ bɛɛ kɔnɔ, furakɛlaw ni operelikɛlaw hakɛ jumɛn y’a jira ko u bɛ sɔn ka mɔgɔ furakɛ k’a sɔrɔ jolidon ma kɛ? Mun na u labɛnnen don ka o kɛ? (4) Kalan minnu kɛra kɔsa in na jolidon ko la dɔgɔtɔrɔsow la, olu ye mun jira? (5) Furakɛli ta fan fɛ, farati jumɛnw bɛ jolidon na? (6) Ka ɲɛsin fɛnw ma minnu bɛ se ka bila joli nɔ na, dɔgɔtɔrɔba caman nana faamuyali jumɛn sɔrɔ olu nafa kan? (7) Mun de bɛ na ni jolidɔgɔya ye? Hadamaden bɛ se ka jolidɔgɔya kun fo ka se hakɛ jumɛn na? Mun bɛ se ka bila a nɔ na? (8) Mun bɛ se ka kɛ walisa banabagatɔ fari ka se ka globules rouges (fɛn ɲɛnama minnu bɛ joli la minnu bilen don) caman dilan? (9) Fɛɛrɛ jumɛnw tigɛra walisa ka jolibɔn dɔgɔya opereli kɛtuma na? (10) Yala mɔgɔ bɛ se ka da fɛnw na minnu bɛ se ka bila joli nɔ na ni denmisɛnw bɛ furakɛ walima ni banabagatɔ ka ɲɛnamaya bɛ farati la wa? (11) Jogoɲumanya bɛ sɔn sariyakolo nafamaba min ka sirataama furakɛlicogo ɲuman kɔnɔ, o ye jumɛn ye? (12) Mun na a nafa ka bon kosɛbɛ Kerecɛnw ka kɔn ka furakɛlicogow sugandi jolidon tɛ min na? An bɛ se ka o kɛ cogo di?

Furakɛlicogo minnu jirala wideyo la, ka sɔn o dɔ la, o ye an kelen-kelen bɛɛ ka ko de ye. An bɛ o kɛ ka kɛnyɛ ni an kɔnɔnamiiri ye min kalanna ka ɲɛ Bibulu fɛ. Aw bɛ sɔn furakɛlicogo minnu na ni jolidon tɛ u la, yala aw ye o sugandi aw yɛrɛw ani aw ka denbaya ye wa? Aw ye o ko min sugandi ani kun minnu na aw ye o sugandi, aw somɔgɔ minnu tɛ Jehowa Seerew ye, olu fana ka kan ka ladɔnniya koɲuman o la.—Aw ka san 2004 Zuwɛnkalo tile 15 ani san 2000 Ɔkutɔburukalo tile 15 La Tour de Garde “Questions des lecteurs” yɔrɔ lajɛ.