An ka barika da Jehowa ye a ka dusukun-ɲumanya ko la
Krista ka saya hakilijgin bɛna kɛ Marisikalo tile 24
1 Zaburu sɛbɛnbaga kabara ko: ‘Mɔgɔw ka Jehowa tanu a ka dusukun-ɲumanya kosɔn ani a ka kabako kɛlenw kosɔn hadamadenw ye.’ (Zab. 107:8) Ala ka dusukun-ɲumanya ka bon ni a ka tin ye ka ɲɛsin hadamadenw ma. O jirala ka jɛya tanuli kuma na min sɛbɛnna Zaburusɛbɛnbaga fɛ, Ala ka hakili senu barika la ko: ‘O Jehowa, i ka dusukun-ɲumanya kɛra ne sinsinnan ye.’ (Zab. 94:18) A kɛtɔ ka a denkɛ kelenpe bangelen di an kosɔn, Jehowa ye dakabana dusukun-ɲumanya jira dɛ!—1 Yuh. 4:9, 10.
2 Ikomi Krista ka saya Hakilijigin setɔla don, an bɛ se ka barika da ‘dusukun-ɲumanya Ala’ ye cogo di? (Zab. 59:17) An kelen-kelen bɛɛ bɛna a ŋaniya ka waati ta walisa ka miiri Yesu ka don labanw na dugukolo kan. (Zab. 143:5) A nafa ka bon kosɛbɛ an ka tugu Bibulu kalanjɛ kɛrɛnkɛrɛnnen na min bolodara Hakilijigin kama, ni o jiralen bɛ Examinons les Écritures chaque jour—2005 kɔnɔ. Ni an bɛ se, an ka Le plus grand homme de tous les temps gafe tila 112-16 kalan, ka ɲininiw kɛ a kɔnɔ. Sɛbɛn wɛrɛ minnu sinsinnen bɛ Bibulu kan, an bɛ se ka olu fana kalan. An bɛ Bibulu tɛmɛsira minnu kalan, an ka taasi olu la, ka an sɛbɛ don u la. (1 Tim. 4:15) Ka delili kɛ, ka kalan fara o kan, o tɛ an dusukun dɔrɔn balo dɛ, o bɛ an ka kanuya jira fana ka ɲɛsin Jehowa ma.—Mat. 22:37.
3 Mɔgɔ wɛrɛw bila u ka barika da Ala ye: Salon, mɔgɔ minnu tun bɛ Hakilijigin kɛnɛ kan diɲɛ kɔnɔ, olu bɛɛ lajɛlen tun ye mɔgɔ 16,760,607 ye. Liberia dugunin dɔ la, an balimakɛw ye lɛtɛrɛ ci dugutigi ma, ka a ladɔnniya k’u ŋaniya ye ka Matigi ka surɔfana koɲɛ matarafa a ka dugu la. Dugutigi ye yamaruya di an balimakɛw ma walisa u ka Hakilijigin kɛ ntolantankɛnɛ kan. A tilara ka a ka mɔgɔw bila u ka o fɔ a ka dugu yɔrɔ bɛɛ la, ka mɔgɔw wele ka na o la. K’a sɔrɔ an balimakɛw tun ye weleweledala duuru dɔrɔn ye o dugu kɔnɔ, mɔgɔ minnu nana Hakilijigin na, olu tun ye mɔgɔ 636!
4 Ka kɛnyɛ ni an seko ye, an fana b’a fɛ ka mɔgɔ camanba dɛmɛ walisa u ka na ka fara an kan ka Hakilijigin kɛ. I b’a fɛ ka mɔgɔ minnu wele ka na, mun na i tɛna olu bɛɛ tɔgɔw sɛbɛn? Ja minnu bɛ Marisikalo tile 8 Réveillez-vous ! ni La Tour de Garde ɲɛw laban na, olu bɛ mɔgɔw wele u ka na Hakilijigin na. I bɛ se ka baara kɛ ni olu ye. Mɔgɔwele sɛbɛnfuranin minnu dilanna Hakilijigin kama, i bɛ se ka olu fana kɛ ka mɔgɔw wele ka na. Hakilijigin bɛ kɛ waati min na ani yɔrɔ min na, i ka o sɛbɛn mansin na, walima i ka o sɛbɛn koɲuman i bolo la o sɛbɛnfuraninw kan, ka tila ka o kelen di i ka mɔgɔ weleta kelen-kelen bɛɛ ma. Ni Marisikalo tile 24 sera, i ka u kelen-kelen bɛɛ lasɔrɔ kokura, k’u hakili jigin wele ko la, ka fɛɛrɛ labanw tigɛ.
5 An bɛ Bibulu kalan kɛ mɔgɔ minnu kun, ni olu ma na lajɛw la fɔlɔ, an bɛ se ka olu dɛmɛ cogo jumɛn na walisa u ka na Hakilijigin na, ka nafaba sɔrɔ o la? Bibulu-kalan kelen-kelen bɛɛ kɛwaati la, miniti damadɔw ta ka u dɛmɛ u k’a faamu nafa min bɛ Hakilijigin matarafali la. I bɛ se ka kunnafoni ɲɛnamaw sɔrɔ Marisikalo tile 15 san 2004 La Tour de Garde ɲɛw 3-7 la ani Raisonner gafe ɲɛw 241-45 la.
6 Nabagaw kunbɛn ka ɲɛ: Mɔgɔ minnu bɛna na Hakilijigin na, i ka kuma u fɛ, k’u kunbɛn ka ɲɛ. (Rom. 12:13). I ye mɔgɔ minnu wele ka na Hakilijigin na, i ka fɛɛrɛ tigɛ walisa ka sigi u kɛrɛ fɛ, ka a sɛgɛsɛgɛ ko Bibulu ni dɔnkilida gafe bɛ u bolo. An balimakɛw ni an balimamuso minnu ye waajulibaara dabila, olu fɛn o fɛn ye u jija ka na Hakilijigin na, an bɛna ko bɛɛ kɛ ka olu kunbɛn ka ɲɛ. Ni an ye an mago don u la ni kanuya ye, o bɛ se ka u dɛmɛ u ka nali daminɛ jɛkulu la kokura. (Luka 15:3-7) Nin kow bɛɛ la senuma in kosɔn, an bɛɛ ka an seko kɛ walisa ka dusu don mɔgɔ wɛrɛw kɔnɔ u ka na ka fara an kan walisa ka barika da Jehowa ye a ka ‘dakabana dusukun-ɲumanya ko la.’—Zab. 31:21.
[Study Questions]
1. Jehowa ye dusukun-ɲumanya jira an fan fɛ cogo jumɛn na?
2. Waleɲumandɔn min bɛ an na ka ɲɛsin Jehowa ma, an bɛ se ka o jira cogo di?
3, 4. (a) An balimakɛ minnu bɛ Liberia, an bɛ se ka olu ka hakilina ladege cogo di? (b) I y’a latigɛ ka jɔni wele Hakilijigin na?
5. An bɛ se ka dusu don Bibulu kalandenw kɔnɔ cogo di walisa u ka na Hakilijigin na?
6. Mɔgɔ minnu bɛ na Hakilijigin na, mun na a nafa ka bon ka olu kunbɛn ka ɲɛ?