Jehowa ka kan kosɛbɛ ni tanuliba ye
Matigi ka surɔfana ɲɛnajɛ bɛna kɛ Awirilikalo tile 16
1 Ni Awirilikalo tile 16 san 2003 bɛ ka surunya, an bɛ kɔrɔtɔ o don nali kɔrɔ. O don sufɛ, Jehowa tɔgɔ bonya kama, an bɛna Yesu ka saya hakilijigin kɛ, ka fara an balima dannamɔgɔ miliyɔn caman kan diɲɛ mumɛ kɔnɔ. Jehowa ka kan ni an ka tanuli bɛɛ ye bawo a ye fɛɛrɛ ɲumanba tigɛ ka an kunmabɔ. O kunmabɔli sababu fɛ, a bɛna ko ɲumanbaw kɛ a kanminɛbagaw bɛɛ ye. Ni an dusu bɛɛ ye, an bɛ fara Zaburu sɛbɛnbaga kan, ka pɛrɛn k’a fɔ ko: “Jehowa ka bon, a ka kan ni tanuliba ye.”—Zab. 145:3.
2 O waati kɔnɔ, an bɛ an hakili jakabɔ Ala ka ɲumanya kan. An ka kan ka a waleɲumandɔn ko min na, an b’an hakili jakabɔ o fana kan k’a masɔrɔ a “ye a denkɛ kelenpe ci diɲɛ la, walisa an ka ɲɛnamaya ale de barika la.” (1 Yuhana 4:9, 10) Ni an ye Matigi ka surɔfana dumuni laada sirataama a ɲɛ ma, Jehowa ka yafa ani a ka makari ani a ka dusukun ɲumanya bɛ nɔ bila an dusukun na. (Zab. 145:8) Siga t’a la, kunmabɔli ye Jehowa ka kanuya jiracogo bɛɛ la belebeleba ye ka ɲɛsin hadamadenw ma. (Yuhana 3:16) Ni an bɛ miiri Ala ka kanuya la, ka nisɔndiya ni Yesu ka kantigiya ye, a ye o min mara limaniya kɔnɔ, o b’an bila ka Jehowa tanu. An bɛna a tanu a ka kanuya kosɔn fɔ badaa badaa. Dan tɛ a ka kanuya la, sabu a ye o kɛ walisa an ka se ka ɲɛnamaya banbali sɔrɔ.—Zab. 145:1, 2.
3 Tɔw dɛmɛ ka Jehowa bato: Jehowa ye kunmabɔ sara min bɔ an ye fu, fɛn wɛrɛ tɛ se ka bonya ka tɛmɛ o kan. O nafa dɔnni b’an bila ka tɔw wele u ka fara an kan Jehowa batoli la. Zaburu sɛbɛnbaga y’a sɛbɛn hakili senu barika la, ko:‘ i ka ɲumanya caman bɛna u fa, fo u na to k’a fɔ u lamini bɛɛ ye, wa i ka tilenneya kosɔn u na ɲagalikan ba bɔ.’ (Zab. 145:7) Salon dɔrɔn, diɲɛ mumɛ kɔnɔ, Jehowa seerew ye lɛrɛ min kɛ waajuli baara la, o ka ca ni lɛrɛ miliyɔn ba kelen ye. U ka sɛgɛn kɔ kɛra mun ye? Dɔgɔkun o dɔgɔkun, mɔgɔ 5 100 ni kɔ ye batɛmu ta k’a jira k’u ye u yɛrɛbakun di Jehowa ma. Ikomi mɔgɔ 15 597 766 nana hakilijigin na, an bɛ se ka sigi n’a ye ko mɔgɔ caman bɛna fara an kan bawo mɔgɔ minnu ma Jehowa tanuli daminɛ fɔlɔ iko kibaru duman weleweledalaw, olu tun ye miliyɔn 9 ye. K’a masɔrɔ an ye weleweledalaw ye, Kibaruya duman weleweledali bonya dira an ma. An bɛ maa wɛrɛw dusukun ɲɛsin Jehowa ni a denkɛ ni masaya ma. An ka o bonya in minɛ ni sɛbɛ ye.
4 Sira ɲuman min dɔ fɛ an bɛ se ka dusu don tɔw kɔnɔ u ka Jehowa bonya, o ye k’u wele u ka fara an kan ka Matigi ka surɔfana laada bɔ a sira fɛ. Yali i b’a fɛ ka mɔgɔ minnu wele, i ye olu bɛɛ tɔgɔ sɛbɛn ka bila wa? I ka kan ka minnu hakili jigin a don ani a lɛrɛ la, i ye olu tɔgɔ sɛbɛn wa? Yala i ye welesɛbɛn di mɔgɔw bɛɛ ma minnu tɔgɔ sɛbɛnnen bɛ i bolo wa? N’i ma o kɛ fɔlɔ, i timinandiya k’a o kɛ waati tɔ kɔnɔ. Ɲɛnajɛ kun ye min ye, u dɛmɛ u k’o faamu. Mɔgɔ minnu bɛna na Hakilijigin na, i labɛn k’olu bɛɛ fɔ. I k’u kunbɛn koɲuman. U ni tɔw ɲɛ jira ɲɔgɔn na, k’u fo u ka nali la.
5 Mɔgɔ kuraw ka nali hakilijigin na, o bɛ se ka dusu don u kɔnɔ u ka ɲɛtaa sɔrɔ Alako la. Bana tun bɛ Bibulu kalanden dɔ la min b’a bali ka don jama la. A nana hakilijigin na. A ɲininkalen ɲɛnajɛ ko la, a y’a fɔ ko: “A kɛra sufɛla ye min ɲɔgɔn tun tɛ, bonya ni alaɲɛsiran ta fan fɛ, wa, ne tun bɛ yen.” K’a ta o la, a tora ka na lajɛw la.
6 Hakilijigin kɔfɛ: Kibaru duman ka di minnu ye, mun bɛ se ka kɛ olu ye walisa u ka Jehowa tanu? Maakɔrɔw na u hakili to mɔgɔ kuraw la minnu nana hakilijigin na, ka fɛɛrɛw tigɛ walisa weleweledala minnu bɛ se kosɛbɛ, olu ka taa bɔ u ye teliya la hakilijigin kɔfɛ, ka kuma fɛn kuraw kan u ye minnu kalan ani u ye minnu ye. Laala dɔw b’a fɛ Bibulu kalan ka kɛ u kun. U ka kan ka wele ka na jɛkulu ka dɔgɔkun lajɛw bɛɛ fana na, k’a masɔrɔ lajɛw matarafali bɛ dɔ fara u ka Bibulu dɔnniya kan.
7 Weleweledala minnu ma basigi wajuli baara la, ani weleweledala minnu ye walekɛbaliw ye, fɛɛrɛw tigɛra ka dusu don olu bɛɛ kɔnɔ walisa u ka na lajɛw la tuma bɛɛ. Ni Maakɔrɔw y’a ɲini i fɛ i ka mɔgɔ dɔ dɛmɛ min ye waajuli jɔ walisa a ka waajuli daminɛ kokura, i ka sɔn o ma. K’an janto ni kanuya ye an balimaw la, o bɛnnen don ni ciden Pol ka kuma ye min bɛ dusu don an kɔnɔ ko: “O de kosɔn, ni cogo bɛ an fɛ, an ka ko ɲuman kɛ mɔgɔw bɛɛ ye, janko an balima dannabaaw.”—Gal. 6:10.
8 An bɛɛ k’an jija kɛrɛnkɛrɛnnenya la ka na hakilijigin na Awirilikalo tile 16 don. An kana sɔn ka nin tuma jɛ, tuma in min ka bon sanuya ta fan fɛ Alabato la. An bɛɛ ka Jehowa bato a ka baarabaw kosɔn sisan ani badaa badaa!—Zab. 145:21.