Mɔgɔ wɛrɛw dɛmɛ u ka nafa sɔrɔ Kunmabɔsara la
Krista ka Saya Hakilijigin ka kan ka kɛ Awirilikalo tile 12
1 “Barika Ala ye a ka nili fɛnba kosɔn min ɲɔgɔn tɛ!” (2 Kɔr. 9:15) Nin kumaw b’a jira ka ɲɛ fɛn min b’an dusukun na ka ɲɛsin Ala ka ɲumanya ni a ka dusukun ɲumanya ma, a ye o minnu kɛ a ka jamakulu ye a Denkɛ Yesu Krista sababu fɛ. O waleɲumandɔn sugu bɛna ye kɛrɛnkɛrɛnnenya la ni an bɛna an lajɛ tuma min na, Awirilikalo tile 12, walisa ka Krista ka saya Hakilijigin kɛ.
2 Mɔgɔ miliyɔn tan ni kɔ b’u fara Jehowa ka baarakɛlaw kan san o san, walisa ka Hakilijigin kɛ. U fana b’a jira o cogo la ko waleɲumandɔn b’u la ka ɲɛsin Krista ka saraka ma. O n’a ta o ta, walisa ka nafa sɔrɔ kunmabɔsara la, fo u ka da a la. (Yuh. 3:16, 36) An bɛ se k’u dɛmɛ cogo jumɛn na walisa u ka o dannaya sugu bonya? Hakilijigin waati kɔnɔna na, an bɛ se ka dusu don u kɔnɔ walisa u ka sɔn Bibulu-kalan ka kɛ u kun, ani u ka na jɛkulu ka dɔgɔkun lajɛw la. An ka nin hakililaw lajɛ.
3 Bibulu-kalanw: Mɔgɔ minnu y’a jira ko kibaru duman ka di u ye, ni i bɛ olu wele tuma min na ka na Hakilijigin na, mun na i t’a ɲini ka Bibulu-kalan dɔ daminɛ ni u ye Qu’enseigne la Bible ? gafe kɔnɔ? I k’a jira o tigi la ko i bɛ se ka Hakilijigin ɲɛfɔ a ye. Gafe dayɛlɛ a ɲɛw 206-208nan na, ka baro kɛ yɔrɔ kan min tɔgɔ ye ko “ Le Repas du Seigneur : une célébration qui honore Dieu, ” (o kɔrɔ ye ko Matigi ka Surɔfana ye ko ye min bɛ bonya da Ala kan). I bɛ se ka na baro kɛ o kunnafɔni kan siyɛn kelen walima siyɛn fila, laala k’o kɛ i n’a fɔ Bibulu-kalan min bɛ kɛ so dakun na. Ni i tilara o yɔrɔ la, i barokɛɲɔgɔn bɛ se ka sɔn aw ka baro kɛ kalansen 5nan kan, n’o tɔgɔ ye ko “ La rançon, le plus beau don de Dieu, ” (o kɔrɔ ye ko kunmabɔsara ye Ala ka nilifɛn bɛɛ la belebele ye). Ni Bibulu-kalan basigira, i ka segin ka na daminɛ na, ka kalansen fɔlɔ fo naaninan lajɛ gafe kɔnɔ.
4 An bɛ se ka Bibulu-kalan kɛ jɔni kun o kɛcogo fɛ? A bɛ se ka kɛ ko an baarakɛɲɔgɔnw, an lakɔlidenɲɔgɔnw, walima an sigiɲɔgɔnw dɔw bɛna sɔn o baro suguw la. Balimamuso minnu bɛ jɛkulu kɔnɔ ni u furucɛw tɛ Jehowa seere ye, balimakɛw bɛ se ka gɛrɛ o furucɛw la, ka kuma olu fɛ fana. An kana ɲinɛ ka Bibulu-kalan kuma fɔ an yɛrɛ somɔgɔw ye minnu tɛ Jehowa seerew ye. Ka fara o kan, an bɛna cɛsiri kɛrɛnkɛrɛnnen kɛ walisa ka Hakilijigin welesɛbɛn di mɔgɔw ma minnu delila ka na jɛkulu ka ko dɔ la. (Luka 15:3-7) An k’a ɲini ka o mɔgɔ suguw bɛɛ dɛmɛ walisa u ka nafa sɔrɔ kunmabɔsara la.
5 Jɛkulu ka lajɛw: Bibulu-kalandenw ani mɔgɔ wɛrɛ minnu y’a jira ko kibaru duman ka di u ye, olu caman nana lajɛ fɔlɔ min na, o ye Hakilijigin ye. O la sa, an bɛ se ka dusu don u kɔnɔ cogo di walisa u ka na jɛkulu ka lajɛ tɔw la, ka nafa sɔrɔ olu la? San 2005 Awirilikalo An ka Masaya Cidenyabaara bɛ nin hakililaw di an ma: “Forobajɛmu min bɛna kɛ siɲɛ wɛrɛ, an ka o tɔgɔ fɔ u ye. La Tour de Garde yɔrɔ min bɛna kalan siɲɛ wɛrɛ, an ka o jira u la. Kitabu yɔrɔ minnu bɛna kalan gafe-kalan waati la, an ka olu fana fɔ. An ka “Ala-ka-Marako lakɔli” ani “Baara ka lajɛ” cogoyaw fɔ u ye. Ni baara dɔ dilen bɛ an ma ka kɛ “Ala-ka-Marako lakɔli” la, an bɛ se ka segin o kan u ye. Yɔrɔ koloma minnu fɔra lajɛw la, an ka olu fɔ u ye. Foto minnu bɛ an ka sɛbɛnw kɔnɔ, an ka olu ta ka kalandenw dɛmɛ u k’a faamuyali sɔrɔ. Kabini an ka kalan fɔlɔ la, an k’a ɲini u fɛ u ka na lajɛw la.”
6 Ni Bibulu-kalan basigilen bɛ kɛ mɔgɔ kɔnɔnajɛlenw kun, ani ni u bɛ na jɛkulu ka lajɛw la tuma bɛɛ, tuma caman na u ka ɲɛtaa bɛ teliya alako ta fan fɛ. O la sa, an ka dusu don mɔgɔ wɛrɛw kɔnɔ u ka nafa sɔrɔ nin fɛɛrɛ tigɛlenw na alako ta fan fɛ, ka se o cogo la ka nafa sɔrɔ Ala ka nilifɛn bɛɛ la belebele la, n’o ye kunmabɔsara ye.
[Study Questions]
1. Sira jumɛn fɛ Ala ka mɔgɔw b’u ka waleɲumandɔn jira kunmabɔsara ko la?
2. Jɔni bɛ u fara Jehowa ka baarakɛlaw kan walisa ka Hakilijigin kɛ, ani u ka kan ka mun kɛ walisa ka nafa sɔrɔ kunmabɔsara la?
3. An bɛ mɔgɔ minnu wele ka na Hakilijigin na, an bɛ se ka Bibulu-kalan daminɛ ni olu ye cogo di?
4. An bɛ se ka Bibulu-kalan kɛ jɔni kun nin Hakilijigin waati kɔnɔna na?
5. Bibulu-kalandenw ni mɔgɔ wɛrɛ minnu y’a jira ko kibaru duman ka di u ye, an bɛ se ka dusu don olu kɔnɔ cogo di?
6. Sira fila jumɛnw fɛ, an bɛ se ka mɔgɔ kɔnɔnajɛlenw dɛmɛ u ka nafa sɔrɔ kunmabɔsara la?