“A’ ye nin kɛ walisa ka aw hakili to ne la”
Yesu ka Saya Hakilijigin ka kan ka Kɛ Awirilikalo tile 2
1. Mun na san 2007 Awirilikalo tile 2 ye donba ye?
1 Ka ɲɛsin Yesu ka saya ma min kɛra saraka ye, san 2007 Awirilikalo tile 2, mɔgɔ miliyɔn caman bɛna u lajɛ, diɲɛ yɔrɔ bɛɛ la, walisa k’o saya hakilijigin kɛ. Yesu sara a sankolola Fa ka masabaya lafasali de kosɔn, k’a jira ko Sitanɛ-Sendonbaga ye nkalon de tigɛ, a y’a fɔ tuma min na ko hadamadenw bɛ baara kɛ Ala ye ɲɛngoya dɔrɔn de la. (Job 2:1-5) Matigi ka Surɔfana bɛna an hakili jigin fana ko Yesu ka saya fɛ, k’a to hadamaden jurumuntan cogo la, a ye ‘a yɛrɛ ni di ka kɛ mɔgɔ caman kunmabɔsara ye.’ (Mat. 20:28) O la sa, Yesu ye nin ci fɔ a ka kalandenw ye: “A’ ye nin kɛ walisa ka aw hakili to ne la.” Luka 22:19) Waleɲumandɔn min b’i la Jehowa ka o nilifɛnba ko la, yala o b’i bila k’i ka kow labɛnni daminɛ kabini sisan, walisa ka o kanuya wale bɛɛ la belebele hakilijigin kɛ wa?—Yuh. 3:16.
2. An bɛ se k’an dusukun labɛn Hakilijigin kama cogo di?
2 I dusukun labɛn: Fɛn minnu kɛra Yesu hadamadenlama ka ɲɛnamaya don labanw kelen-kelen bɛɛ la, n’an bɛ olu sɛgɛsɛgɛ, an bɛ se k’an dusukun labɛn nin Hakilijigin kama. Walisa k’an dɛmɛ o la, Bibulu kalan bolodalen kɛrɛnkɛrɛnnen bɛ Examinons les Écritures chaque jour — 2007 gafenin kɔnɔ ani san 2007 Calendrier kɔnɔ. O kalan bolodalen bɛ bɛn donw ma, kow kɛra minnu na sanni Yesu ka sa, ka kɛɲɛ ni an ka bi kalandiriye ye. Kow kɛra donw ani waati minnu na Bibulu kɔnɔ, olu sinsinnen bɛ Yahutuw ka kalandiriye kan, o min bɛ donw jate k’a ta tilebin dɔ la ka na bila tilebin dɔ wɛrɛ la. Jateminɛ kɛra o ko kan, wa, Hakilijigin Bibulu kalan bolodala ka kɛɲɛ ni o ko ye. N’an bɛ kunnafoniw lajɛ minnu bɛ Bibulu kalan kɔnɔna na, n’an bɛ taasi Ala ka kanuya bonya la delili kɔnɔ, o bɛna an dɛmɛ ka nafaba sɔrɔ Hakilijigin na.
3. Mɔgɔ minnu y’a jira ko kibaru duman ka di u ye ani minnu ye waajuli baara jɔ, an bɛ se ka olu dɛmɛ u ka nafa sɔrɔ Hakilijigin na cogo jumɛn na?
3 Mɔgɔ wɛrɛw wele ka na o la: Farankan sɛbɛn min bɛ Feburuyekalo An ka Masaya Cidenyabaara kɔnɔ, o tun ye baara kɛrɛnkɛrɛnnen dɔ kofɔ, n’o ye ka mɔgɔw wele ka na o koba la. Yala i y’i ka kow labɛn walisa k’i sen don kosɛbɛ o baara la wa? I ye i dɔnbagaw tɔgɔw sɛbɛn walisa k’u wele ka na o la wa? Yala i y’a daminɛ k’olu wele wa? I ka fɛɛrɛw tigɛ walisa ka na joona Hakilijigin la ka se k’i ka mɔgɔ welelenw kunbɛn ani mɔgɔ wɛrɛw fana minnu y’a jira ko kibaru duman ka di u ye. Laala i b’a fɛ ka sigi u kɛrɛfɛ, k’a dɔn ni Bibulu ni dɔnkilida gafe bɛ u bolo. I ka u jira jɛkulu kɔnɔmɔgɔ tɔw la. Hakilijigin bannen kɔfɛ, i ka to u ka bila la walisa k’u ka ɲininkaliw jaabi. U wele fana ka na jɛmukan kɛrɛnkɛrɛnnen na min bɛna kɛ Awirilikalo tile 15. Maakɔrɔw bɛna wale kɛ walisa an balima minnu ye waajuli baara jɔ, olu ka Hakilijigin ani jɛmukan kɛrɛnkɛrɛnnen welesɛbɛnw sɔrɔ.
4. Hakilijigin kɔfɛ, an bɛ se ka mɔgɔw dɛmɛ u ka taa ɲɛ alako ta fan fɛ cogo jumɛn na?
4 Mɔgɔ kura minnu y’a jira ko kibaru duman ka di u ye ani minnu ye waajuli baara jɔ, an ka olu dɛmɛ u ka taa ɲɛ: Hakilijigin jɛmukɛbaga bɛna ɲɛfɔli surun kɛ an ka Bibulu-kalan fɛɛrɛ kan, ka dusu don mɔgɔ kuraw kɔnɔ u ka dɔnniya sɔrɔ Jehowa ko la ka taa a fɛ. I bɛ se ka baara kɛ ni a ka kuma fɔlenw ye walisa k’a fɔ mɔgɔ welelenw ye k’i bɛ se k’u dɛmɛ u ka dɔ fara u ka dɔnniya kan alako ta fan fɛ. Ni u tɛ ka Bibulu-kalan kɛ, i jija ka taa bɔ u ye joona Hakilijigin kɔfɛ, ka jira u la Bibulu-kalan bɛ kɛ cogo min na, k’a sɔrɔ waribɔ t’a la. Walisa u ka taa ɲɛ alako ta fan, u mago b’a la fana ka na jɛkulu ka lajɛw la. (Heb. 10:24, 25) Walisa o ka se ka kɛ, dusu don u kɔnɔ u ka to ka na lajɛw la tuma bɛɛ. Maakɔrɔw ka kan ka fɛɛrɛ tigɛ ka taa bɔ Kretiɛnw ye minnu ye waajuli baara jɔ, nka minnu nana Hakilijigin na walisa ka dusu don u kɔnɔ u ka jateminɛ kɛ ka taa a fɛ hakililaw kan minnu fɔra jɛmu kɔnɔ. O ko bɛ se ka dusu don u kɔnɔ u ka u ka baara daminɛ kokura jɛkulu kɔnɔ.
5. Ka Hakilijigin kɛ, o bɛ se ka nɔ jumɛn bila an na?
5 Jehowa ni Yesu ye min kɛ an ye, Hakilijigin b’an dɛmɛ ka miiri kosɛbɛ o la. Ni an bɛ miiri o cogo la, o b’an ka kanuya bonya kosɛbɛ ka ɲɛsin u ma, ka nɔ bila an taamacogo la. (2 Kɔr. 5:14, 15; 1 Yuh. 4:11) Sisan de ye a waati ye k’an yɛrɛ labɛnni daminɛ ani mɔgɔ minnu y’a jira ko kibaru duman ka di u ye, ka olu fana labɛnni daminɛ o koba kama, o min kɔnɔna na, an bɛna “Matigi saya ko de fɔ.”—1 Kɔr. 11:26.