I cɛsiri ko ɲuman kɛli la!

¹ Ikomi an bɛ ka don san 2003 Hakilijigin waati la, kun caman b’an bolo minnu kosɔn an bɛ an ‘cɛsiri ko ɲuman kɛli la.’ (1 Pi. 3:13) Kunw bɛɛ la belebeleba ye Yesu Kirisita ka kunmabɔ saraka de ye. (Mat. 20:28; Yuh. 3:16) Ka ɲɛsin o kun fɔlen ma ciden Piɛrɛ y’a sɛbɛn, ko: ‘Aw ma kunmabɔ ni fɛn tiɲɛtaw ye iko wari ni sanu, ka bɔ aw taamacogo fufafu la. . . nka, aw kunmabɔra ni joli ye min sɔngɔ ka bon kosɛbɛ, i n’a fɔ sagaden dɔ joli, nɔ si tɛ sagaden min na, nɔgɔ yɔrɔ tɛ min na, ni Kirisita yɛrɛ joli ye.’ (1 Pi. 1:​18, 19) Waleɲumandɔn min b’an na ka ɲɛsin o kanuya wale ma, min ɲɔgɔn tɛ, o b’an wajibiya an ka an cɛsiri ka ko ɲuman kɛ, ka a dɔn ko Yesu tun ye ‘a yɛrɛ di an kosɔn, walisa a ka an kunmabɔ kojuguw bɛɛ la, ka mɔgɔ dɔw saniya, ka u kɛ a yɛrɛ kelenpe taw ye, u jijalen ko ɲumanw kɛli la.’​—⁠Ti. 2:14; 2 Kɔr. 5:​14, 15.

² Ni an bɛ ko kɛ min ka di Ala ye, anw ni ale cɛ bɛ ɲɛ, wa a b’a janto an na ni kanuya ye, k’an kɔlɔsi. Piɛrɛ tilara k’a fɔ kɔfɛ, ko: ‘Ɲɛnamaya ka di min ye, n’a b’a fɛ ka don ɲumanw ye. . . O ka a kɔ sin juguya ma, ka ko ɲuman kɛ, ka hɛrɛ ɲini ka tugu o nɔfɛ. Katuguni Jehowa ɲɛ bɛ mɔgɔ tilennenw kan, a tulo bɛ u ka deliliw la.’ (1 Pi. 3:​10-12) An bɛ farati waati minnu na nin ye, dugawuba don an bolo k’a dɔn ko Jehowa bɛ taga a fɛ ka an kɔlɔsi, wa, ko a labɛnnen don ka wale kɛ an ka nafa kama, walisa ‘k’an mara i n’a fɔ a yɛrɛ ɲɛkisɛ.’​—⁠Dut. 32:10; 2 Til. 16:⁠9.

³ Piɛrɛ y’a ka bataki ci Kerecɛn fɔlɔ minnu ma, olu tun bɛ kɔrɔbɔliw la cogo o cogo, u tun jijalen bɛ cɛsiri la, wa, fɛn fosi ma se ka dɔ bɔ o la. Kibaru duman weleweledali tun bɛ se ka jɛnsɛn ka se yɔrɔ o yɔrɔ ma, u y’a weleweleda fo ka se yen. (1 Pi. 1:6; 4:12) A bɛ ten fana bi, Ala ka jamakulu bolo. K’a sɔrɔ an bɛ ‘waati gɛlɛnw na,’ waleɲumandɔn min b’an na Jehowa ka ɲumanya ko la, o b’an bila ka Ala sago kɛ ni cɛsiriba ye. (2 Tim. 3:1; Zab. 145:⁠7) An bɛna an cɛsiri ka kɛwale ɲuman minnu kɛ nin Hakilijigin waati la, an ka olu dɔw mafilɛ.

⁴ A ɲini mɔgɔ wɛrɛw fɛ u ka na Hakilijigin na: An bɛ se ka an ka waleɲumandɔn jira nilifɛn ɲumanba ko la, min ɲɔgɔn tɛ, n’o ye kunmabɔli ye. An bɛ se k’o jira cogo min dɔ la kelen fɛ, o ye an ka na Yesu ka saya hakilijigin lajɛ la, o min bɛ kɛ san o san. O bɛna kɛ ɲinan Arabadon, Awirilikalo tile 16, tile binnen kɔfɛ. (Luk. 22:​19, 20) Salon, jɛkulu 94 600 minnu jɛnsɛnnen bɛ diɲɛ yɔrɔ bɛɛ la, olu bɛɛ ka dantigɛliw ye a jira ko mɔgɔ minnu nana Hakilijigin na, olu tun ye 15 597 746 ye. Mɔgɔ nalenw cayara ni san tɛmɛnnen mɔgɔw hakɛ ye ni mɔgɔ 220 000 ye.

⁵ Mɔgɔ joli bɛna na ɲinan? O bɛna bɔ kosɛbɛ cɛsiriw la, an bɛna cɛsiri minnu kɛ ka dusu don mɔgɔw kɔnɔ walisa u ka na an ka ɲɔgɔnlajɛba la. I b’a fɛ ka mɔgɔ minnu wele Hakilijigin na, i ka olu tɔgɔ sɛbɛnni daminɛ. I ka kan ka kɔn ka mɔgɔ minnu tɔgɔ sɛbɛn, tɔgɔw bɛɛ ɲɛ, o ye i ka sokɔnɔmɔgɔw ye. Ni i furuɲɔgɔn tɛ Jehowa batobaga ye, a jira a la k’i b’a fɛ tiɲɛ na, ale ni e ka kɛ ɲɔgɔn fɛ o la. Cɛ dɔ min tun tɛ dannabaga ye, a y’a fɔ ko ale tagara Hakilijigin na salon, bawo a y’a ye ko a nali Hakilijigin na, o tun ye koba ye a muso bolo. O kɔfɛ, i ka i balimaw tɔgɔ sɛbɛn, ani i sigiɲɔgɔnw, i baarakɛɲɔgɔnw, walima i lakɔlidenɲɔgɔnw. I bɛ Bibulu kalan kɛ mɔgɔ minnu kun, a sɛgɛsɛgɛ fana k’i ye olu tɔgɔ sɛbɛn.

⁶ N’i ye mɔgɔw tɔgɔ sɛbɛn kaban tuma min na, i ka waati boloda walisa e yɛrɛ ka taa bɔ u kelen-kelen bɛɛ ye, k’u wele u ka na Hakilijigin na. Baara kɛ ni Hakilijigin welesɛbɛnfura dilannenw ye. Walisa ka mɔgɔw hakili jigin a la u k’a dɔn Hakilijigin lajɛ bɛna kɛ tuma min na, ani yɔrɔ min na, i ka a lɛrɛ ni a kɛyɔrɔ sɛbɛn cogo jɛlen na, mansinna sɛbɛnni cogo la, Hakilijigin welesɛbɛnfura kɔkanna kan. Ni Awirilikalo tile 16 bɛ ka surunya, i ye mɔgɔ minnu tɔgɔ sɛbɛn, i ka olu hakili jigin a don na. I bɛ se k’o kɛ telefɔni fɛ, walima e yɛrɛ bɛ se ka taa bɔ u ye o kama. An bɛ se ka mɔgɔ hakɛba minnu dɛmɛ u ka na nin koba, senuman na, min nafa ka bon ka tɛmɛn koba tɔw bɛɛ kan, an ka o mɔgɔw dɛmɛ.

⁷ Minnu nana Hakilijigin na, olu dɛmɛ: Hakilijigin lajɛ bɛ kɛ su min na, o ye nisɔndiyakoba ye tuma bɛɛ. Mɔgɔ minnu tɛ deli ka na an ka lajɛw la, an bɛ cogo sɔrɔ k’olu ladon. I ka kow labɛn walisa i ka na joona, ka to yen ka mɛn, ni o bɛ se ka kɛ i sigida la. Mɔgɔ kura minnu bɛna na, a bɔ i yɛrɛ la ka dɔnbagaya don e ni olu cɛ. I ka kɛ mɔgɔ ye min b’a ɲɛkɔrɔdiya mɔgɔw kɔrɔ, ani min bɛ mɔgɔw ladon ka ɲɛ.​—⁠Rom. 12:⁠13.

⁸ Mɔgɔ minnu bɛna na Hakilijigin na, yali Bibulu kalan sababu fɛ, olu dɔw bɛ se ka dɛmɛ walisa u ka ɲɛtaa ka bonya alako ta fan fɛ wa? Mɔgɔ o mɔgɔ bɛna na Hakilijgin na, ni weleweledala si tɛ taa bɔ a ye, i jija k’o mɔgɔ sugu bɛɛ tɔgɔw ni u ka ladɛrɛsiw sɔrɔ walisa ka se ka taga a fɛ k’u dɛmɛ. Ni dɛmɛ bɛ kɛ ni kanuya ye, olu dɔw bɛ se ka ɲɛtaa kɛ fo u bɛ cogow dafa walisa ka kɛ weleweledala ye min ma batise, sani san wɛrɛ Hakilijigin ka se. Mɔgɔ minnu nana Hakilijigin na, n’i bɛ to ka taa bɔ u ye, i k’u wele ka na jɛmu kɛrɛnkɛrɛnnen na, min bɛna kɛ Awirilikalo tile 27.

⁹ I bɛ se ka kɛ tutigɛbaga farankan ye Marisikalo ni Awirikalo la wa?: Cɛsiri min bɛ an na Jehowa ka ko la, o b’an bila san o san, an ka an yɛrɛ bɛɛ di cidenyabaara ma, baara kɛrɛnkɛrɛnnen kalow kɔnɔna na. Jɛkulu kuuru bɛɛ bɛ cɛsiri minnu kɛ walisa ka kibaru duman weleweleda ni timinandiya ye, hakilijigin waati kɔnɔna na, o kɔ bɛ se ka ɲɛ kosɛbɛ.

¹⁰ Jɛkulu dɔ weleweledala 107 ye, ani tutigɛbaga basigilenw 9 y’a jira ko salon Awirilikalo kɛra olu bolo kalo ye min ɲɔgɔn ma kɛ, bawo mɔgɔ 53 kɛra tutigɛbaga farankanw ye. Maakɔrɔw ni cidenyabaara magannaw sen bɛ o tutigɛbagaw la. Maakɔrɔw ye mun kɛ walisa ka dɔ fara mɔgɔw ŋaniya kan ka kɛ tutigɛbaga farankan ye o kalo la? Waati jan sani Marisikalo ni Awirilikalo ka se, u ye dusu don mɔgɔ caman kɔnɔ walisa u ka kɛ tutigɛbaga farankan ye. Foro baara lajɛw kɛra lɛrɛ danfaralen caman na, tile kuuru bɛɛ la, ka bɛn jɛkulu kuuru bɛɛ ma. Ka ɲɛsin dɛsɛbagatɔw ma, farikolo ta fan fɛ, sinsin kɛrɛnkɛrɛnnen kɛra telefɔni seereya kan.

¹¹ An balimamuso dɔ si tun ye san 86 ye. A tun tɛ se ka taama a ka banaw bolo. A ye sɛbɛn lafa walisa ka kɛ tutigɛbaga farankan ye. A b’a daminɛ sɔgɔma, ka lɛrɛ fila kɛ telefɔni seereya la, a sigilen a ka gabugu la. O kɔfɛ, a b’a sɛgɛnnafiyɛn lɛrɛ damadɔw kɔnɔ. O kɔ, a bɛ telefɔni seereya daminɛ kokura, ka dɔɔnin kɛ o la. A ye muso dɔ sɔrɔ telefɔni na min furucɛ ni a denkɛ funankɛnin fila banna, o tun y’a san fila ye. O muso ma se ka a faamu mun na Ala y’a to o kojugu suguw ka kɛ. Seereya dafalen dira a ma, ani Bibulu kalan daminɛna ni a ye. Duguba waajulikɛyɔrɔw la, ka seereya kɛ telefɔni fɛ, sufɛ ani waati dɔ wɛrɛw la, o nafa ka bon walisa ka mɔgɔw lasɔrɔ minnu bɛ sankasobaw la, walima minnu bɛ yɔrɔw la, mɔgɔ tɛ se ka don yɔrɔ minnu na. O b’a to fana weleweledala ka kuma mɔgɔw fɛ minnu tɛ u ka so tile kɔnɔna na.

¹² Maakɔrɔw ye u ka dantigɛli kuncɛ ni nin kuma ye, ko: “O kɛra waati dumanba ye an bolo dɛ! An bɛ Jehowa waleɲumandɔn, bawo ale de y’a kɛ an kelen- kelen bɛɛ ye bonya kɛrɛnkɛrɛnnen ni dugawuw sɔrɔ waajuli baara la.” I ka jɛkulu fana bɛ se k’o dugawu suguw sɔrɔ kow labɛncogo ɲuman sababu fɛ.

¹³ An ka an jija walisa weleweledala kelen-kelen bɛɛ ka se k’a niyɔrɔ kɛ cidenyabaara la: An ka kanuya ka ɲɛsin Ala ma, ani an mɔgɔɲɔgɔn ma, o b’an bila ka waati kunmabɔ kalo o kalo walisa ka kibaru duman fɔ tɔw ye. (Mat. 22:​37-39) Jɛkulu gafe kalan lakɔlɔsibagaw ni u kankɔrɔsigiw ka kan k’u gɛlɛya k’u ka kulu kɔnɔmɔgɔw dɛmɛ walisa u k’u niyɔrɔ kɛ cidenyabaara la, kalo o kalo. O bɛ se ka kɛ cogo ɲuman min fɛ, o ye ka kɔn ka kow labɛn walisa ka baara kɛ cidenyabaara la, ni kulu kɔnɔmɔgɔ kelen-kelen bɛɛ ye. O daminɛ joona sani kalosa ka se. O bɛna cogo caman di aw ma ka dɛmɛ don ni kanuya ye.

¹⁴ I ka gafe kalan kulu la, yali weleweledalaw bɛ yen, a ka gɛlɛn kosɛbɛ minnu bolo k’u niyɔrɔ kɛ cidenyabaara la wa? Ni u dɔw dalen bɛ dɔgɔtɔroso la, walima u tɛ se ka bɔ u ka so da fɛ, a bɛ faamu ko cogo bɛrɛ tɛ olu bolo ka seereya kɛ. Nka, o n’a ta o ta, cogo fitinin minnu bɛ u bolo, ni u bɛ nafa bɔ olu la, ka a to u ka yeelen ka manamana, mɔgɔ minnu ɲɛ bɛ u ka baara ɲumanw na, o bɛ se ka o mɔgɔw bila u k’u mago don tiɲɛ na, ni u sɛbɛ ye. (Mat. 5:16) Gafe kalan lakɔlɔsibagaw ka kan ka a sɛgɛsɛgɛ walisa k’a dɔn ni o weleweledala suguw b’a dɔn ko ni u ye sanga tan ni duuru kɛ foro baara la, u bɛ se k’o sɛbɛn forobaara dantigɛli sɛbɛn kan. U bɛ waati min kɛ seereya la, ka se k’o sɛbɛn, o bɛ dusu don o weleweledala kantigiw kɔnɔ, ka nisɔndiya ni wasa lase u ma. O b’a to fana Ala ka jamakulu bɛ waajuli baara min kɛ diɲɛ bɛɛ kɔnɔ, o baara dantigɛli bɛ kɛ dantigɛli jɔnjɔn ye.

¹⁵ Funankɛnin minnu bɛ baara ɲuman kɛli la: A bɛ mɔgɔ dusu suma ka krecɛn funankɛninw ye minnu bɛ u fanga ni u barika don, Jehowa ka baara la. (Nt. 20:29) N’i ye funankɛnin ye, yali i bɛ se ka jira baara kɛrɛnkɛrɛnnen kalow kɔnɔna na ko i cɛsirilen bɛ Jehowa ka ko la wa?

¹⁶ N’i tɛ weleweledala ye min ma batise fɔlɔ, jɛkulu kɔnɔ, yali i bɛ se k’o kɛ i kuntilenna kɛrɛnkɛrɛnnen ye wa? I k’i yɛrɛ ɲininka tan: ‘Tiɲɛ min bɛ Bibulu kɔnɔ, yali o kalansiraw jujɔ dɔnniya jɔnjɔn bɛ ne na wa? Yali ne b’a fɛ ka ne niyɔrɔ kɛ Masaya baara la wa? Yali ne ye misali ɲuman ye ne taamacogo la wa? Yali ne bɛ se ka n ka dannaya ɲɛfɔ mɔgɔ wɛrɛw ye kibaru duman ko la wa? Yali ne dusukun bɛ ne bila k’o kɛ wa?’ N’i bɛ se k’a fɔ ɔwɔ nin ɲininkaliw kelen-kelen bɛɛ la, o tuma na, i ŋaniya min ye ka kɛ weleweledala ye, i k’o fɔ i bangebagaw ye. Olu bɛ se k’o kuma fɔ baara kulunin maakɔrɔ dɔ ye.

¹⁷ N’i ye kibaru duman weleweledala ye kaban, yali i bɛ se ka nafa bɔ lakɔlibila waatiw la walisa ka dɔ fara i niyɔrɔ kan cidenyabaara la wa? Waati bolodacogo ɲuman fɛ, ka fara bangebagaw ni mɔgɔ wɛrɛw ka dɛmɛ kan, funankɛnin batiselen caman sera ka kɛ tutigɛbaga farankanw ye. Ni i tɛ se k’o kɛ, o tuma na, a ɲini ka dɔ fara i niyɔrɔ kan foro cidenyabaara la. I ka kuntilenna sigi i yɛrɛ ye, ka lɛrɛ hakɛ dɔ kɛ foro baara la, ani k’i ka cidenyabaara kɛcogo ɲɛ ka taga a fɛ. Laala, i bɛ se k’a ɲini ka Bibulu tɛmɛsira dɔ ta da kelen-kelen bɛɛ la, ka i ka segin-ka-bɔnyew kɛcogo ɲɛ ka taga a fɛ, ka Bibulu kalan daminɛ, walima ka telefɔni seereya kɛ, walima ka seereya kɛcogo wɛrɛ fara i ka cidenyabaara kan. Ka a kɛ i kuntilenna ye ka i sigiɲɔgɔn, i lakɔlidenɲɔgɔn, walima i balima k’i bilasira ka na Hakilijigin na ɲinan, e ko cogo di o la? K’i niyɔrɔ dafalen kɛ o baara sugu la, o bɛna baraji caman lase i ma, wa, siga t’a la, o bɛna dusu don jɛkulu kɔnɔmɔgɔ tɔw kɔnɔ.​—⁠1 Tes. 5:⁠11.

¹⁸ Mɔgɔ kuraw dɛmɛ u ka taga ɲɛ: Ala-ka-marako san tɛmɛnnen na, sokɔnɔ Bibulu kalan 1 924 de ɲɛminɛna kalo o kalo Senegali ni Mali waajulikɛyɔrɔw la. Waati senfɛ, olu caman bɛna taga ɲɛ fo ka se yɛrɛbakundili ni batɛmu ma. Nka, sani u ka se o yɔrɔ ma, an ka kan k’u dɛmɛ walisa u ka se ka kɛ kibaru duman weleweledalaw ye. O ye ko ye min nafa ka bon mɔgɔ kuraw kalanni na walisa u ka kɛ Yesu Krista ka kalandenw ye. (Mat. 9:9; Luk. 6:40) Yali Bibulu kalanden dɔ b’i bolo min sera o yɔrɔ ma wa?

¹⁹ N’i dalen tɛ i ka Bibulu kalanden ka ɲɛtaa la, dɛmɛ ɲini i ka gafe kalan lakɔlɔsibaga, walima baara lakɔlɔsibaga fɛ. Laala i bɛ se k’a ɲini a fɛ a ka fara i kan o tigi ka kalan kɛtuma na. O balimakɛw bɛ ko caman dɔn minnu bɛ se k’u dɛmɛ, ka kalanden ka ɲɛtaa jateminɛ, alako ta fan fɛ. Hakililaw bɛ se ka kɛ u fɛ minnu bɛna kalanden dɛmɛ a ka taa ɲɛ alako ta fan fɛ.

²⁰ N’i ka kalanden y’a jira ko a b’a fɛ ka kɛ weleweledala ye min ma batise, wa, ni e yɛrɛ miiri la a bɛ cogow dafa walisa ka o kɛ, i k’o fɔ lakɔlɔsibaga ɲɛmɔgɔ ye. A bɛna ko labɛn walisa maakɔrɔ fila ka e, ani i ka kalanden ye ɲɔgɔn fɛ, ka se ka a lajɛ ni a bɛ cogow dafa ka kɛ weleweledala ye. U bɛna baara kɛ ni kunnafoniw ye minnu bɛ Notre Ministère gafe kɔnɔ, a ɲɛ 98-100 la. (Nowanburukalo tile 15 san 1988 La Tour de Garde ɲɛ 17 lajɛ.) Ni sɔn kɛra kalanden la a ka kɛ weleweledala ye, i ka kan ka a degeli daminɛ o yɔrɔnin bɛɛ la. Ni a ye forobaara dantigɛli sɛbɛn di, a bɛna fɔ jɛkulu ye ko a kɛra weleweledala ye min ma batise. An jigi b’a la ko weleweledala kura ba caman, denmisɛnninw ka fara mɔgɔkɔrɔbaw kan, u bɛna taa ɲɛ ka se o yɔrɔba ma alako ta fan fɛ, nin baara kɛrɛnkɛrɛnnen kalow la.

²¹ Ko bolodali bɛ mɔgɔ dɛmɛ ka kɛwale ɲumanw kɛ: Ni an bɛ kɔn ka bolodali kɛ, o bɛna a to an ka ala-ka-marako baaraw bɛ ɲɛtaa sɔrɔ Hakilijigin waati la. (Nt. 21:⁠5) Fɛn caman bɛ yen maakɔrɔw ka kan k’u hakili to minnu na.

²² Walisa ka jɛkulu kɔnɔmɔgɔw dɛmɛ u k’u seko damajira kɛ foro baara la, maakɔrɔw ka kan ka kow labɛn cogo nafama na walisa forobaara lajɛw ka kɛ dɔgɔkun kɔnɔna na, ani dɔgɔkun don labanw na. Baara lakɔlɔsibaga ka kan ka o kow labɛnni ɲɛminɛ. Yali foro baara lajɛ dɔ wɛrɛw ka kan ka kɛ sɔgɔma joona fɛ, wuladanin fɛ, walima su daminɛ na wa? O ko labɛnnenw ka kan ka fɔ jɛkulu ye. A nafa ka bon kosɛbɛ ni foro baara lajɛw sɛbɛnfura bɛ gɛngɛn kunnafoniw walan kan.

²³ Maakɔrɔw ka kan k’a lajɛ ko minnu ka kan ka sigi sen kan, Hakilijigin kama, waati jan sani Awirilikalo tile 16 ka se. A bɛ se ka kɛ ko jɛkulu caman mago bɛna kɛ Masaya so la. O kama, nin kow ka kan ka labɛn jɛkuluw ni ɲɔgɔn cɛ: Jɛkuluw bɛna a bɔ ɲɔgɔn kɔrɔ cogo min na k’u ka lajɛ kɛ Masaya so kɔnɔ, Masaya so saniyaliko, mɔgɔw kunbɛnbagaw ni taamasiyɛnw tɛmɛnbagaw sugandili ko, ani taamasiyɛnw sɔrɔli koɲɛ. Hakilijigin bɛ kɛ lɛrɛ min na, ani yɔrɔ min na, ani yɛlɛma o yɛlɛma bɛ don dɔgɔkun lajɛw la, jɛkulu ka kan ka ladɔnniya o kow la. K’an hakili to o ko bɛɛ lajɛlen na ni ɲɛmajɔ ye, o bɛna to Hakilijigin lajɛ bɛ ‘kɛ cogo bɛnnen na, a ko ɲɛnabɔlen koɲuman.’​—⁠1 Kɔr. 14:⁠40.

²⁴ Laala, dutigiw b’a fɛ k’u ka denbaya ka kalan waati dɔ ta walisa ka kuma fɛnw kan minnu bɛ dɔ fara denbaya niyɔrɔ kan Hakilijigin waati la. Yali i ka denbaya mumɛ bɛ se ka kɛ tutigɛbaga farankan ye wa? Walima denbaya bɛ se ka mɔgɔ kelen, walima mɔgɔ caman dɛmɛ u ka se k’o kɛ wa? Ni o tɛ se ka kɛ, e ani i ka denbaya ka kuntilenna jɔnjɔnw sigi sen kan ka waati caman kɛ cidenyabaara la. I ka so kɔnɔ, yali denmisɛnnin dɔ bɛ yen min bɛ se ka cogow dafa walisa ka kɛ weleweledala ye min ma batise, ni i ye dusu don a kɔnɔ dɔɔnin, k’a dɛmɛ wa? I ka denbaya bɛ se ka mɔgɔ joli wele ka na Hakilijigin na ɲinan? Ka kow labɛn ka ɲɛ, o bɛna nisɔndiya ni dugawu caman lase i ka denbaya ma.

²⁵ Waati min tora, i ka nafaba bɔ o la: Ciden Piɛrɛ tun bɛ ka lɛtɛrɛ sɛbɛn san kɛmɛ fɔlɔ Kerecɛnw ma tuma min na, a ye u hakili jigin ko u tun bɛ waati jugu la, bawo Yahutuw ka kow sigicogo bantuma tun sera. (1 Pi. 4:⁠7) Bi bi in na fana, taamasiyɛn bɛɛ b’a jira ko diɲɛ laban ka surun kosɛbɛ. An ka ɲɛnamaya kɛcogo ka kan k’a jira don o don, ko an dalen bɛ o la. Ikomi an ye Jehowa ka baarakɛla cɛsirilenw ye, an sinsinnen ka kan ka to kibaru duman fɔli baara kan, o min tɛ se ka bila ka sumaya.​​—⁠Ti. 2:​13, 14.

²⁶ Cɛsiri ni wale kɛtuma de ye sisan ye. Jehowa ye min kɛ e ani i ka denbaya ye, ani jɛkulu ye, i ka miiri kosɛbɛ o la. Jehowa ye ko ɲumanw kɛ an ye sira caman fɛ, an tɛ se k’a sara abada minnu na. O n’a ta o ta, an bɛ se ka min di a ma, o ye k’a bato ni an ni bɛɛ ye. (Zab. 116:​12-14) An b’an banban cɛsiri minnu na, o sara bɛna kɛ dugawu caman ye ka bɔ Jehowa yɔrɔ. (Nt. 10:22) An bɛɛ ka “An jija ko ɲuman kɛli la,” baaraba waati kɛrɛnkɛrɛnnen nin na ‘walisa fɛnw bɛɛ la, nɔɔrɔ ka da Jehowa kan, Yesu Krsita sababu fɛ.’​—⁠1 Pi. 3:13; 4:11.

[Box on page 3]

Mɔgɔ minnu tun nana Hakilijigin na diɲɛ bɛɛ kɔnɔ

1999 14 088 751

2000 14 872 086

2001 15 374 986

2002 15 597 746

[Box on page 4]

I bɛna jɔni wele ka na Hakilijigin na?

□ I ka denbaya kɔnɔmɔgɔw ani i balimaw.

□ I sigiɲɔgɔnw ni i dɔnbagaw

□ I baarakɛɲɔgɔnw ni i lakɔlidenɲɔgɔnw

□ Segin-ka-bɔnyew ni Bibulu kalandenw

[Box on page 5]

Mɔgɔ minnu nana Hakilijigin na, olu dɛmɛ

□ I k’i ɲɛkɔrɔdiya mɔgɔw kɔrɔ, k’u ladon ka ɲɛ

□ I ka taa bɔ u ye

□ Bibulu kalan kofɔ u ye

□ U wele ka na jɛmu kɛrɛnkɛrɛnnen na

[Box on page 6]

I kuntilenna ye mun ni mun ye Hakilijigin waati la?

□ I ka mɔgɔ welelen dɔ ka na Hakilijigin na.

□ Ka cogow dafa walisa ka kɛ kibaru duman weleweledala ye.

□ Ka lɛrɛ hakɛ dɔ kɛ cidenyabaara la.

□ Ka cidenyabaara kɛcogo dɔ ɲɛ ka taga a fɛ.

□ K’a kɛ tutigɛbaga farankan ye.