An bɛɛ ka bonya da Jehowa n’a Denkɛ kan
Mɔgɔ minnu bɛna ye Hakilijigin lajɛ kɛnɛkan Awirilikalo tile 8 don, olu bɛɛ bɛ se ka nafa sɔrɔ o la kosɛbɛ cogo min na
1 Bonya kɛrɛnkɛrɛnnen bɛ da mɔgɔ sugu jumɛn kan bi bi in na? O ye mɔgɔw ye minnu ka ko kɛlenw ka bon kosɛbɛ diɲɛ mɔgɔw bolo. O n’a ta o ta, tuma caman na ɲinɛ bɛ kɛ joona u ka walew kɔ. Nka, wale minnu bɛ hadamadenw bɛɛ nafa tigitigi, a dun bɛ cogo di olu ko la? O walew la, min ka bon n’a bɛɛ ye, o bɛna kɛ fɛn ye an bɛna an ɲɛmajɔ kosɛbɛ min fɛ tuma min na an bɛna Matigi ka Surɔfana ko labato san 2001 Awirilikalo tile 8 don, tile binnen kɔfɛ.
2 Jɔn de ka kan ni bonya bɛɛ la belebeleba ye? Bibulu b’an jaabi ko: ‘Jehowa, i ka kan ni nɔɔrɔ ni bonya ani sebaaya ye, katuguni e de ye fɛn bɛɛ da.’ (Jir. 4:11) Ikomi Jehowa de ye dabaga ye, ale de ye dunuya bɛɛ kunna Masaba ye. O de y’a to a ka kan ni danbe ye fo abada! —1 Tim. 1:17.
3 Yesu Krista, Ala Denkɛ ye wale nafamaw kɛ minnu bɛna duba banbaliw lase hadamadenw ma. A y’a Fa ladege tigitigi. (Yuh. 5:19) A ka Ala kanminɛni dafalen n’a ka kantigiya baara y’a kɛ “a ka kan ni sebaaya ni fɛntigiya ni hakilitigiya ni fanga ni bonya ni nɔɔrɔ ani tanuni ye.” (Jir. 5:12) A Fa ye bonya da a kan k’a kɛ Masakɛ ye. (Zab. 2:6-8) Min ye an ta fan fɛ la ye, an bɛna cogo sɔrɔ ka bonya da Fa ni Denkɛ kan n’an bɛ Matigi ka Surɔfana labato san 2001 Awirilikalo tile 8 don na.
4 Nimisako don k’a fɔ ko hadamaden ka tariku kɔnɔna na, mɔgɔ minnu ye bonya da Jehowa n’a Denkɛ kan iko a ka kan ka kɛ cogo min na, o mɔgɔw man ca. Tuma dɔw la, hali Ala ka jamakulu kɔrɔ, Israyɛldenw kɔni, olu ma baara bɛrɛ kɛ Jehowa ye. O kɛra dɔgɔyamaba ye ka ɲɛsin Ala ma. (Mal. 1:6) Bonya bɛnnen bɛ min wajibiya, o ye kanminɛni ye min bɛ kɛ ni kantigiya ye, n’a sinsinnen bɛ kanuya ni waleɲumandɔn kan ka ɲɛsin Jehowa n’a Denkɛ ma, u ka ko kɛlen kosɔn an ye. N’an bɛ o bonya n’o karama sugu da u kan, o kɔrɔ ye k’an bɛ alaɲɛsiranya ni bonya dunba jira, ani k’an sɔnnen bɛ Jehowa ni Yesu ye an ka kow bɛɛ la. Krecɛn jɛkulu b’i jija ka mɔgɔ wɛrɛw kalan, k’u dɛmɛ walasa olu fana k’o ɲɔgɔn kɛ.
5 Bonya bɛ jira ko kɛrɛnkɛrɛnnen min sababu fɛ: Hakilijigin labatoli de ye Jehowa Seerew ka lajɛ bɛɛ la nafama ye san o san. Mɔgɔ o mɔgɔ b’a fɛ ka baara kɛ Jehowa ye, ka bonya da a kan, o tigi ka kan ka kɛ yen o don na. (Luka 22:19) An sigilen bɛ n’a ye ko ka fara Seere kisɛman miliyɔn 6 kan, magojirabagaw bɛna mɔgɔ nataw hakɛ bonya ka caya ni miliyɔn 14 ye. O bɛna kɛ cogo ɲuman ye ka bonya da an sankolola Fa kan dɛ! K’a sɔrɔ Hakilijigin labatoli bɛna sinsin Yesu kan, bonya ni karama minnu jirala a ka ko kɛlen fɛ, o bɛ danbe da Fa de kan, Fa min y’a ci.—Yuh. 5:23.
6 An bɛ se ka mun kɛ walasa k’o ko kɛrɛnkɛrɛnnen kɔkɔrɔdon? An bɛ se ka magojirabaga kuraw dɛmɛ u ka se ka nafaba sɔrɔ o la. Dusu don u kɔnɔ u ka ye Hakilijigin lajɛ kɛnɛkan. N’i yɔrɔ dɔ bɛ yen u mago bɛ dɛmɛ na yɔrɔ min na walasa u ka se ka taa o la, i k’o kɛ u ye ni ɲumanya ye. Jɛmukan min bɛna kɛ, o kun ɲɛfɔ u ye. I k’u ni tɔw ɲɛ jira ɲɔgɔn na. U bɛ min ye, ani u bɛ min mɛn, o bɛ se k’u bila u ka ɲini ka fara an kan walasa ka bonya da Jehowa kan.
7 Nafa min bɛ kalan na, o nafa kana dɔgɔya i bolo. Kalansoba kalanden dɔ hakilila kɛra nin ye: “Ne bɛ taa egilisi min na, Komuniyɔn tara siɲɛ caman na ne ɲɛ na yen, nka ne ye min ye yan, o n’o tɛ kelen ye fewu. N y’a ye k’a b’a kɛ tigitigi iko Bibulu b’a fɔ cogo min na. Ne ɲɛ na aw ta de ye tiɲɛ ye.” A y’a daminɛ ka taa lajɛw la tuma bɛɛ. A ma mɛn fana a ye batɛmu ta.
8 Mɔgɔ kuraw dɛmɛ u ka taa ɲɛ: Mɔgɔ kura minnu bɛna ye Hakilijigin lajɛ kɛnɛkan, olu kɔlɔsi ka tila ka taa bɔ u ye joona walasa u ye fɛn ɲuman minnu kalan, k’o fɛnw lajɛ u fɛ ko kura. I k’u ladɔnniya lajɛ tɔw la, k’a jira u la k’u bɛ se ka dɔ fara u ka Bibulu dɔnniya kan o lajɛw la. Dɔnniya gafe Masalakun 17 lajɛ, n’o ye ko: “I ka lasagonnenya sɔrɔ Ala ka Jama cɛma.” Jɛkulu ye alako ta fan fɛ fɛn sɔrɔta caman minnu labɛn u ye, o masalakun bɛna o jira u la. I ka fɛɛrɛ tigɛ walasa u ka se ka Our Whole Association of Brothers [Toute la communauté de nos frères] videyo kasɛti lajɛ (walima dɔ wɛrɛ i n’a fɔ Unis grâce à l’enseignement divin, n’o tɛ sɔrɔ). O cogo la, u bɛna se ka Jehowa ka jamakulu ka kelenya, a ka nisɔndiya, n’a ka timinandiya ye u ɲɛ na.
9 Nafaba b’a la magojirabaga yɛrɛw ka dege ka se ka bonya ni karama da Jehowa kan. A ɲɛfɔ u ye ko delili min bɛ bɔ dusukun na, o ka di Jehowa ye, wa, o ye alako ta fan fɛ nisɔndiya sababu ye fana tuma bɛɛ. (1 Yuh. 5:14) I ka baara kɛ ni Wajibiya gafenin ye, a kalansen 8 nan fo ka na 12 nan na, walasa ka jira u la kɛwale sugu min bɛ bonya da Jehowa kan. Fɛn min sɛbɛnnen bɛ Les Témoins de Jehovah gafenin kɔnɔ a ɲɛ 30-1 na, (n’o tɛ yen, i bɛ se ka baara kɛ ni Unis pour faire la volonté de Dieu gafenin ye, a ɲɛw 14-5) n’i bɛ k’o ɲɛfɔ tuma min na, i ka dusu don mɔgɔ kuraw kɔnɔ u ka miiri cogo ma min b’u bolo ka bonya da Jehowa kan, n’o ye olu yɛrɛ k’u sen don wajulibaara la.
10 Waleɲumandɔn min b’an na Yesu ka saraka ko la ani bonya ko la, bonya min b’an bolo ka baara kɛ iko a ka kalandenw, o bɛ bonya da Fa kan, ka hɛrɛ lase mɔgɔ wɛrɛw ma. Yesu ye layidu ta ko: “Min bɛ baara kɛ ne ye, ne Fa na o tigi bonya.”—Yuh. 12:26.