Jehowa bɛ barika di
1 E bɛ mun miiri ciden Pol ko la? A tun ka kisɛ kosɛbɛ cogo min na Jehowa ka baara la fo an bɛ nisɔndiya n’an bɛ Kɛwalew kalan Bibulu kɔnɔ. Pol sera ka nin kow bɛɛ kɛ cogo di? A ko: ‘Min bɛ barika di ne ma, o sababu fɛ, ne bɛ se ka fɛn bɛɛ kɛ.’ (Flp. 4:13, Traduction du monde nouveau, NW) An fana bɛ se ka barika sɔrɔ ka bɔ Jehowa yɔrɔ. Cogo di? N’an bɛ nafa bɔ ko wɔɔrɔ la a ye minnu sigi walasa k’an galabu n’an barika bonya alako ta fan fɛ.
2 Ala ka kuma: An ka kan ka dumuni kɛ walasa an barika ka to an na. O cogo kelen na fana an ka kan ka balo Ala ka kuma sababu fɛ walasa an ɲɛnama ka to alako ta fan fɛ. (Mat. 4:4) Bibulu bɛ barika di an ma walasa k’an kɔkɔrɔdon. O la sa, an ka kan ka balo yɛrɛkalan sɛbɛ la, ka taasi o la don o don walasa an ka timinandiya n’an ka nisɔndiya ka to an na tiɲɛ ta fan fɛ. —Zab. 1:2, 3.
3 Delili: Nafa b’a la k’an madon Jehowa la, kɛrɛnkɛrɛnnenya la n’an bɛ mago kɛrɛnkɛrɛnnen dɔ waati la. Ala ka barika senu sababu fɛ, a bɛ fanga di ka dɔ fara mɔgɔ galabu kan, mɔgɔ minnu b’o ɲini a fɛ delili la. (Luka 11:13; Efe. 3:16) Bibulu bɛ dusu don an kɔnɔ walasa an k’an “timinandiya delili la.” (Rom. 12:12) Yali i b’o kɛ wa?
4 Jɛkulu: An bɛ barika ni dusulamin sɔrɔ fana ka bɔ jɛkulu lajɛw la, ani jɛɲɔgɔnya duman na an bɛ min diyabɔ yen an balimakɛw n’an balimamusow fɛ. (Heb. 10:24, 25) N’an kɔnɔnafililen don, u b’an dusu lamin, k’an dɛmɛ ni kanuya ye.—Nta. 17:17; Waj. 4:10.
5 Foro cidenyabaara la: K’an sen don cidenyabaara la tuma bɛɛ, o b’an dɛmɛ k’an sinsinnen to Masaya n’a ka dubaw kan. N’an bɛ mɔgɔ wɛrɛw dɛmɛ, k’u kalan Jehowa ko la, o bɛ dusu don an kɔnɔ k’a t’a fɛ. (Kɛw. 20:35) An bɛɛ tɛ se ka taa baara kɛ magoba bɛ yɔrɔ min na, walima ka waati-dafalen baara kɛ cidenyabaara la, nka an bɛ se k’an niyɔrɔ sɛbɛ kɛ cidenyabaara la sira wɛrɛw fɛ.—Heb. 6:10-12.
6 Krecɛn maakɔrɔw: Maakɔrɔw bɛ dusulamin ni dɛmɛ min di, an bɛ nafa sɔrɔ o la. Jehowa ye baara di u ma u k’u jan to Ala ka sagakulu la min kalifalen bɛ u ma. (1 Piɛ. 5:2) Lakɔlɔsibaga taamakɛlaw bɛ taa jɛkulu minnu na, u b’olu sabati i n’a fɔ Pol y’a kɛ cogo min a ka waati la.—Rom. 1:11, 12.
7 Kantigiw ye misali ɲumanw ye: An baarakɛɲɔgɔn kantigi minnu tun bɛ fɔlɔ la, ani minnu bɛ sisan, olu ka misali ɲumanw bɛ dusu don an kɔnɔ. (Heb. 12:1) N’i mago bɛ dusulamin na, mun na i tɛna nin fɛnw dɔ la kelen kalan: maana min bɛ sɔn-ni-sɔn gafeninw kɔnɔ mɔgɔ dɔ ka ɲɛnamaya kan, walima wajuli ko kɛlen minnu b’an lasabati ka bɔ Annuaire kɔnɔ, olu dɔ la kelen, walima Jehowa Seerew ka tariku min ɲɛfɔlen bɛ Prédicateurs gafe kɔnɔ?
8 An balimakɛ dɔ min si ye san 90 ye sisan, a sɔnna tiɲɛ ma k’a to a ka funankɛya daminɛ na. K’a fitininma to, a ka limaniya kɔrɔbɔra. A bɛɛ la fɔlɔ kɛra ko mɔgɔ minnu tun bɛ jɛkulu kɔnɔ, olu dɔw ye Jehowa ka jɛkuluba bila. Du-ni-du baara fana tun ka gɛlɛn ale ɲɛ na. O bɛɛ n’a ta, a tun y’a ka dannaya da tuma bɛɛ Jehowa kan. Dɔɔnin dɔrɔn o kɔfɛ, a ye nisɔndiya sɔrɔ cidenyabaara la. Bi dun? Hali n’a y’a sɔrɔ dɔ bɛ ka bɔ a ka kɛnɛya la, hali bi a ye Brooklyn Bɛtɛlden dɔ ye min bɛ baara kɛ Ɲɛmɔgɔw kulu la. Ikomi a nɔrɔlen tora Jehowa ka jɛkuluba la, a ma nimisa si sɔrɔ o la.
9 An balimamuso dɔ min ye Bɛtɛlden dɔ ye Angiletɛri, a batisera tuma min na a si tun ye san 13 ye. San min dara o kan, a ye tutigɛbagaya daminɛ a kɔrɔkɛ fɛ. San min fana dara o kan tuguni, a fa bilara kaso la k’a sababu kɛ a da tun tɛ Diɲɛ Kɛlɛba Filanan ko la. A taara ɲɛ k’a ka dannaya da Jehowa kan walasa ka barika sɔrɔ. A ye baara kɛ Ala lakika ye ka t’a fɛ. O kɔnɔna na, a furula balimakɛ kantigi dɔ ma. U fila tora Jehowa sago kɛli la. U kɛlen ka san 35 kɛ ɲɔgɔn fɛ furu la, a cɛ balala ka sa. A ye barika sɔrɔ ko kura Jehowa fɛ. Fo ka se bi ma, a bɛ t’a fɛ ka baara kɛ Jehowa ye. A bɛ waati kɔnɔna, waati min na a bɛna se ka baara kɛ Jehowa ye abada i n’a fɔ Jehowa ka dugukolo kan denbaya mɔgɔ dɔ.
10 Jehowa b’a ka baarakɛla kantigiw dɛmɛ, ka dɔ fara u galabu kan. ‘A bɛ sebagaya di mɔgɔ barika bannen ma, ka barikantan fanga bonya.’ An bɛ se k’o barika sugu sɔrɔ min tɛ ban n’an bɛ nafa bɔ ko sigilen wɔɔrɔ la minnu kofɔra sanfɛ. I hakili to nin na: ‘Mɔgɔ minnu b’u jigi da Jehowa kan, olu barika na kuraya . . . U bɛ boli, u tɛ sɛgɛn. U bɛ taama, u barika tɛ ban.’ (Esa. 40:29-31) Pol y’a ka dannaya da kosɛbɛ Jehowa kan walasa ka barika sɔrɔ. An fana ka kan k’o kɛ.