“Lubanga me Ada” Kare Ducu Cobo Cikkene

1. Ma lubbe ki Jabuli 31:​2-5, pingo watwero keto genwa i kom Jehovah?

WATYE ka kwo i lobo ma Catan aye lalocce dok dano mapol giloko lok goba. Tek adada me ngeyo ngat ma myero wagen. Pol pa lubiacara gikwalo luwotgi. Lucatwil bene giwaco lok goba i kom gin ma gitye ka catone wek dano guwil. I kare mukene, kadi wa luremwa macok bene pe gigwoko cikkegi. Kadi bed kit meno, watye ki yomcwiny madit ni kare ducu watwero geno Jehovah! En aye “Lubanga me ada.” (Kwan Jabuli 31:​2-5.) Jehovah pe loko lok goba dok jami ducu ma en waco obedo lok ada. Watwero bedo ki gen ni i kare ducu en bicobo cikkene.

2. Gin ango ma wabinyamo i pwony man?

² I pwony man, wabicako ki nyamo tyen lok mogo mumiyo watwero geno Jehovah ki cwinywa ducu. I nge meno, wabinyamo kit ma Lubanga bigiko kwede lobo pa Catan man marac-ci ki dong gin ma Lubanga tye ka timone i kare-ni me cobo yubbe pi lobo ki pi dano. Pwony man bitugo cwinywa me tito bot jo mukene lok ada madok i kom Jehovah.

GIN MUMIYO WATWERO GENO JEHOVAH

3. Pingo watwero geno Jehovah ki cwinywa ducu?

³ Watwero geno Jehovah pien en aye Lacwec. En ocweyo polo ki lobo ki jami ducu makwo. (Acak. 1:1; Jab. 36:9; Yabo 4:11) En ocweyo lobo i yo ma weko jami ducu ma mitte piwa me kwo medde ki bedo tye, calo yamo ma wayweyo ki pii ma wamato. En kare ducu doro kit ma lobo ki jami ducu ma i dan polo tiyo kwede. Kit macalo Jehovah aye ocweyowa, ngeyo jami ducu, dok tye ki teko ma lapore pe, watwero gene me doro kwowa maber ki dong me miniwa anyim mamwonya.

4. Wangeyo nining ni Jehovah marowa?

⁴ Watwero geno Jehovah pien en marowa. Jehovah ocweyo dano pien en mito ni gunong mit pa kwo. Jehovah otito yubbe meno bot Wode acel keken i kare ma owaco ni: “Weku wacweyu dano ma gical ki wan.” (Acak. 1:26) En ominiwa mot me bedo agonya. En bene ocweyo lobo-ni mamwonya adada dok omiyo botwa me bedo pacowa. (Jab. 115:16) En omiyo bot lunyodowa mukwongo mot me loko lobo man wek odok paradic. (Acak. 1:28; 2:15) En ominigi cam mamit, kwai nyig yen ki lee mapol mapatpat, ki jami mukene mapol ma weko gitwero nongo mit pa kwo. Jami magi ducu nyuto ka maleng ni “mar pa Rwot [Jehovah] ma pe lokke bedo nakanaka.”—Jab. 103:17.

5. (a) Gin ango ma Jehovah otimo i kare ma Adam ki Kawa gujemo? (b) Tit kong cikke mogo ma Jehovah dong ocobo. (Nen bok ma wiye tye ni “Lubanga Kare Ducu Loko Lok Ada.”)

⁵ Watwero geno Jehovah pien kare ducu en cobo cikkene. Jehovah pe ocweyo lobo ci “oweko woko kun onyobbe atata, en oketo ni dano twero bedo iye.” (Ic. 45:​18, 19) I kare ma Adam ki Kawa gujemo i kom Jehovah, gin gurwenyo mot me bedo kwo pi naka. Dong onongo twero nen calo Catan obalo woko yub pa Lubanga pi lobo ki pi dano. Ento pe tye gin mo keken ma twero juko Jehovah ki cobo yubbe. (Ic. 46:​10, 11) En pud tye ki miti ni dano ma kitgi atir myero gubed kwo i wi lobo pi naka. Meno aye tyen lok mumiyo Jehovah oye ni Adam ki Kawa gunywal lutino. Dok en ocwalo Wode me miyo kwone piwa wek wabed ki gen me kwo pi naka.—Jon 3:16.

GIN MA JEHOVAH OTIMO ME COBO YUBBE

6. I nge jemo mutimme i Eden, gin ango ma Jehovah otito ni bitimme i anyim?

⁶ Ngat ma obito Adam gin ki Kawa me jemo i kom Lubanga obedo “min kulu macon-ni, ma gilwongo ni Ladot, ki Catan.”a (Yabo 12:9; Acak. 3:​4, 5; Jon 8:44) Jehovah ongolo kop i kom Catan ni i kare me anyim, kibijwere woko. (Acak. 3:15) Ento ma peya kare meno oromo, jo mapol gibilubo kor Catan dok gibitimo jami maraco calo en. Kadi bed kit meno, jo mukene pud gibimedde ki bedo lugen bot Jehovah.

7. Jo mene ma gitye ka lubo lanen pa Catan, dok gin ango ma bitimme i komgi?

⁷ Jo mapol gitye ka lubo lanen marac pa Catan. I kingi tye iye lumalaika ma yam gujemo i kom Jehovah kacel ki dano ma gikwero bedo luwiny bot Lubanga. Kit macalo gijemo i kom Jehovah, meno nyuto ka maleng ni gubedo likwayo pa Catan. Ento i kare ma Lubanga dong omoko woko, en bijwero Catan kacel ki jo ducu ma cwakke.—Dan. 2:44; Rom. 16:20.

8. Gin ango ma Yecu otimo i mwaka 1914? (Nen bene cal.)

⁸ Pingo watye ki gen ni cikke pa Lubanga me jwero Catan kacel ki jo ducu ma lubbe bicobbe? I mwaka 1914, Jehovah oketo Yecu macalo kabaka, dok Yecu ocako lweny i kom Catan Larac-ci ki jogine dok obologi piny i lobo. (Yabo 12:​7-9) Kadi bed lweny meno otimme i polo, ento jo ma i lobo bene gunongo adwogine. Baibul waco ni: “Wun lobo ki nam, wubineno can malit atika, pien Ladot dong olor obino woko piny botwu ma tye ki akemo madwong, pien ngeyo ni karene tye manok.” (Yabo 12:12) Nicakke i mwaka 1914, Catan omedo tutene me bwolo jo mapol kit ma en twero kwede dok macalo adwogine, kwo i lobo-ni tye ka doko rac medde ameda. Ada, “wun lobo ki nam, wubineno can!” Ento macok cok-ki, Yecu bityeko “loyo lweny.” I kare meno, kibijwero jo ducu ma gilubo Catan dok kibikwanyo Catan woko ki i bedo laloc lobo. (Yabo 6:2) Yecu binyuto ka maleng bot jo ducu ni Catan kite rac dok obalo nying Jehovah pi kare malac. (Jab. 45:​4-6) I kare meno, dano ducu bingeyo ni Jehovah aye Lubanga me ada!—Ejek. 38:23.

World War I: U.S. National Archives photo; bomb: USAF photo; pandemic: blvdone/stock.adobe.com; riot: inhauscreative/E+ via Getty Images

JEHOVAH TYE KA COKO JO DUCU MA GIMARO ADA

9. Angagi ma Jehovah tye ka cokogi i kare-ni?

⁹ Jehovah tye ka “coko jami ducu ma tye i polo ki i wi lobo, ki ribogi woko kacel i Kricito.” (Ep. 1:10) “Jami ducu ma tye i polo” gubedo jo ma kiwirogi, ma Jehovah oyerogi me loc kacel ki Kricito i polo. ‘Jami ducu ma tye i wi lobo’ gubedo jo ma gibikwo i Paradic i lobo. Luwor Jehovah magi ducu gitye ka tic matek me konyo jo mukene me pwonyo lok ada madok i kom Jehovah kun giyaro goba pa Catan ka maleng.

10. Jehovah tye ka konyo dano nining me bedo agonya ki i te dini goba? (Niyabo 14:​6, 7)

¹⁰ Jehovah ocwalo jone me tito kwena i wi lobo-ni ducu wek gubed ki kare me nongo jo ma gitye ki miti me ngeyo lok ada. Man aye pud dong obedo tic me tito kwena madit loyo i tekwaro pa dano. (Kwan Niyabo 14:​6, 7.) Kadi bed Jehovah tiyo ki dano me tito kwena maber-ri, ento lumalaika bene gitye ka konyo me cwalo jo ma kitgi atir bot jo pa Jehovah. Tic me tito kwena man yaro ka maleng goba ma Catan oweko dini goba gipwonyo i kom Jehovah. (Yabo 18:​2, 4) Macok cok-ki i anyim, kibijwero dini goba ducu, dok Lubanga me ada binongo woro ki deyo ma opore pire.—Yabo 17:16.

11. Watwero ngeyo jo ma giworo Jehovah i yo ma atir nining?

¹¹ Jehovah kelo dano ma gia ki i tekwaro kacel ki kabedo mapatpat i kacokkene. (Yabo 7:​9, 10) I kare ma guwinyo “lok me kwena maber,” guniang ni ginongo ada ci guribbe kacel ki jo pa Jehovah. (Mar. 13:10) I kare-ni, watwero neno ka maleng jo mene ma gitye ka tic pi Jehovah i yo matir. Lanebi Mika onongo otito con ni: ‘Wubipoko kin jo ma kitgi atir ki jo maraco, kin ngat ma tiyo bot Lubanga ki ngat ma pe tiyo bote.’ (Mal. 3:18) Kit ma gikwo kwede kacel ki ticgi me tito kwena nyuto ka maleng ni Lucaden pa Jehovah aye gitye ka woro Lubanga i yo ma atir.

12. I yo ma nining ma tic me tito kwena konyo me cobo yub pa Jehovah?

¹² Tito “lok man me kwena maber me ker pa Lubanga” weko walubo cik pa Yecu dok bene wacobo lok pa lunebi. (Mat. 24:14; 28:​18-20) Dok macalo adwogi me tic man, jo mapol ma gia ki i but lobo-ni ducu gitye ka doko lulub kor Yecu dok gitye ki gen me woro Jehovah pi naka. Pud dong obedo mot madit ya ni Jehovah tiyo kwedwa me cobo yubbe!

BED KI GEN NI JEHOVAH BICOBO CIKKENE

13. Jo mene ma Catan keto aunauna i komgi, dok pingo?

¹³ Catan Larac-ci tye ki akemo madwong “pien ngeyo ni karene tye manok” ma peya kijwero lobone. (Yabo 12:​12, 13) En tutwalle keto aunauna i kom jo ma kiwirogi. Gin aye “jo ma gilubo cik pa Lubanga, ma gimako bene lok me caden ma Yecu omiyo.” (Yabo 12:17; 14:12) Catan bene keto aunauna i kom jo ducu ma gimiyo cwakgi bot jo ma kiwirogi.

14. Gin ango ma bitimme ka Catan ocako lweny i kom jo pa Jehovah? (Nen bene cal.)

¹⁴ Ka dong kityeko jwero Babilon Madit woko, jo ma gilubo Catan gibioto lweny i kom jo pa Jehovah. Ci cutcut lweny me Armagedon bicakke. (Yabo 16:​13, 14, 16) Yecu kacel ki dul mony me polo gibilaro luwor Jehovah dok gibijwero but lobo pa Catan mudong-ngi. (Yabo 19:​19-21) Kibijwero jo maraco kacel ki lugoba ducu woko. (Yabo 21:8) Dano ducu gibingeyo ni Jehovah kare ducu timo gin ma atir dok loko lok ada.

15. Pingo watye ki gen ni cikke pa Jehovah pi anyim bicobbe? (Icaya 65:​16, 17) (Nen bene cal.)

¹⁵ I kare-ni makato kare mo keken, dano ma i wi lobo ducu gitye ka lweny dok gupokke adada. Ento ki kony pa Jehovah, luticce gimedde ki bedo ma gunote. Jehovah tye ka coko dano ducu ma gimaro ada me kelogi i kacokkene. Pe tye gin mo ma twero gengo Jehovah ki goyo laane i kom jone kacel ki tic ma gitimo pire. (Kwan Icaya 65:​16, 17.) Watye ki gen ni cikkene ducu bicobbe. Pingo? Pien i Jo Roma 8:​38, 39 lakwena Paulo otitiwa ka maleng ni: “Kadi to, kadi kwo, kadi lumalaika, kadi luloc, kadi gin ma tye i kare man, kadi gin ma mito bino, kadi teko, kadi gin ma tye malo, kadi gin ma tye piny, kadi ki gin mo keken i kom ginaketa ducu, pe bibedo ki twero mo me pokowa woko ki i kom mar pa Lubanga ma tye i Kricito Yecu Rwotwa.”

16. Pingo igeno Jehovah ki cwinyi ducu?

¹⁶ Watye ki tyen lok mapol me geno Jehovah Lubanga me ada. En aye Lacwecwa. En marowa matek adada. Dok en tye ka coko dano mapol ma i but lobo-ni ducu me bino ka wore i yo ma atir. (Ic. 60:22; Jek. 8:23) Wangeyo ni en kare ducu cobo cikkene dok macok cok-ki, en bikwanyo Catan woko wek lobo ducu obed agonya ki i kom goba pa Catan. Wan bene walego kit ma Daudi olego kwede ni: “Gipwo Rwot [Jehovah], Lubanga . . . ma en keken aye ma tiyo gin me aura. Gipak nyinge me deyo-ni nakanaka, wek deyone bene opong lobo woko ducu.”—Jab. 72:​18, 19.