Jehovah Obedo ka Pwonya Cakke ka Tinona

Ma pud peya amedde, wek kong acak tito lokka ki i acakkine. Kinywala i kare me Lweny me Aryo me Wi Lobo, i kabedo ma kilwongo ni Calgary, i lobo Canada. Mwaki ma romo 75 angec, lapainia mo ma nyinge Donald Fraser ma onongo pud tye bulu, odwongo doggolawa ci Mamana oye kwano Baibul. En omaro lok ada ma onongo tye ka pwonyone ki i Baibul matek, ento kit macalo kome onongo lit, onongo pe romo cito i cokke kare ki kare. Kadi bed kit meno, en otute matek ci onongo batija i mwaka 1950. Ki cwercwiny madit, kwone orweny woko mwaki aryo i nge nongo batija. I kare meno, Babana onongo pud pe tye Lacaden, ento en oye ni omego mo omi pwony i wi lyel pa Mamana.

Nino mogo manok i nge yiko Mamana, lamego mo muteggi ma nyinge Alice, ma onongo obedo ngat ma kiwiro, olwonga me cito i cokke. En onongo ngeya pien onena ma abedo ka wot i cokke kacel ki Mamana i kare ma Mamana onongo pud tye ki kero me cito i cokke. Apenyo Babana ka atwero cito. En oye ci owaco ni ebicito kweda “kicel keken” wek epwo omego ma onongo omiyo pwony i wi lyel pa Mamana. Cokke ma obedo tye i otyeno meno obedo Cukul me Tiokraci ki Cokke me Ticwa. Cokke mukwongo meno ma Babana obedo iye-ni oyomo cwinye adada. Ki i gang kwan, en onongo okwano kit me lok i nyim lwak, pi meno obedo ki ur pi kit ma dano onongo gitye ka miyo pwony mamit. Babana omoko tamme me bedo ka wirre i cokke me Cukul me Tiokraci cabit ki cabit. Ka kare woto ki kato, en ocako wirre i cokke mukene bene.

I kare ca, lador Cukul me Tiokraci onongo cako cokke ki kwano nying omege ma gitye i cukul man, ci ngat acel acel ma owinyo nyinge onongo gamo ni, “Atye.” I otyeno mo, apenyo ka kiromo kwano nyinga i cokke ma lubo. Omego-ni opwoya matek ento pe openya ka aniang maber gin ma timme i cukul meno.

Onongo pe angeyo ni ka ipenyo ni kikwan nyingi i cokke, nongo itye ka penyo ni imito miyo pwony i cokke meno. Onongo amito ni awiny mere ka kikwano nyinga keken! I cabit ma lubo, awinyo ka kilwongo nyinga ci agamo ki awaka ni, “Atye.” I nge cokke, omege ki lumege gupwoya matek. Lacen i nge cabit mogo, omego mo omina karatac ma aloko pire i acakki me lokka.

Abedo ki lworo matek! I kare ca, pwony ma lutino kwan gimiyo onongo tero dakika abicel me o aboro. Onongo pe tye pwony mo ma kwako kwano Baibul keken. Babana okonya me yubo pwony man ci oweko anwoyo miyone tyen 20 kulu ma peya amiyo i nyim lwak. I nge miyo pwony, lador cukul omina tira ma okonya adada. Pi mwaki mapol, Jehovah obedo ka pwonya kun tiyo ki Babana, omege ki lumege ma guteggi, ki dong dul ma mege.

JEHOVAH OMEDDE KI PWONYA

Lamego Alice, ma aloko i kome con-ni, obedo ka pwonya i kare ma acako tito kwena. I kare ca, onongo wakwano wang ginacoya adek bot ngat ma watye ka tito kwena bote-ni ci i ngeye wamine buk. Ka onongo an aye abiloko i dog ot moni, Lamego Alice onongo kong titte bot rwod ot ci i ngeye, wacca ni akwan wang ginacoya mukwongo. I nge meno, an onongo dong amedde ki nywako lok ki rwod ot, ci akwano wang ginacoya me aryo ki me adek, ci dong amiyo buk. Lacen, apwonyo kit me cako lok. Ma babana onongo batija i mwaka 1954, en aye dong omedde ki pwonya kit me tito kwena. Macalo lanyodo ma tye kene, en otute matek me pwonya me maro Jehovah. En onongo tero cokke ki tic me pwony calo gin ma pire tek adada. Kare ducu onongo angeyo ni wabibedo tye i cokke dok wabicito ka tito kwena i tum cabit.

Onongo pe aryek tutwal ki i gang kwan; ento, pi mwaki 12 ma abedo kwede i gang kwan, apwonyo jami mapol ma okonya lacen. Me labolle, kipwonya ki cura kacel ki leb Muno maber adada. Anongo pwonnye matut i leb Muno kacel ki diro me coyo lok i kom jami mapatpat dok meno pud tye ka konya wa i kare-ni i ticca kacel ki Dipatmen ma Loyo Yubo Cam me Cwiny.

Dano pol kare gipenya pingo amaro wer. Lunyodona aryo ducu onongo bene gimaro wer. I kare ma atye ki mwaka abiro, kicako pwonya kit me goyo piano pi kare mo, ento lapwonya onongo tamo ni pe atwero pwonyo goyone. En omiyo tam ki babana ni omyero agik pwonyo goyo piano woko. Aniang pingo en owaco kit meno. Onongo pe atye ki miti me pwonyone i kare meno.

I nge dwe mogo manok, babana ononga lapwony mukene. I wang-ngi dong, kibedo ka pwonya kit me goyo piano kacel ki wero wer, dok abedo ka timo jami aryo magi ducu maber adada. I kare ma pud atidi, dwana onongo mit adada dok aloyo pyem wer mapol. Yubba onongo tye me doko lapwony wer wek anong cente muromo ma twero konya ka acako tic macalo painia marii. Ento ma dong acok nongo digiri i wer, aniang ni bimitte ni ater cawa madwong ka yubbe pi peny ma kubbe ki lok kom wer. Pi meno, agiko kwanna woko ci acako tic macalo painia marii. Meno obedo i mwaka 1963.

TIC MACALO PAINIA OKELA YOMCWINY MADWONG

I nge tic macalo painia marii pi mwaka acel, kicwala me tic macalo painia keken i kabedo ma kilwongo ni Kapuskasing, ma tye i Ontario. Omego Daniel Skinner, ma abedo ka tic kacel kwede macalo painia onongo dit loya ki mwaki mapol. En opwonya jami mapol i kom kit ma kacokke myero oti kwede. Kicima me tic macalo lamemba me Komitti ma Doro Tic me Tito Kwena i kacokke ma atye ki mwaka 20, pi meno onongo atye ki jami mapol adada me apwonya. Cwinya yom ni dulwa dok tye ka keto yub me pwonyo omege matino. Ka omege magi gutiyo matek, ci gitwero bedo me kony adada i dul pa Jehovah kadi bed ni pud gitino!

Kwo i Kapuskasing i kare mukene onongo tek adada. I kare ma nongo piny omakke pee, piny onongo bedo mangic adada. Wan ki Omego Dan onongo pol kare wawoto awota. Ento, gin acel ma oyomo cwinya adada obedo rwatte ki lamego mo ma nyinge Linda Cole, ma lacen odoko Linda Splane.

Linda onongo latit kwena ma kome mit dok onongo tye ki jo mapol ma gunyuto miti me pwonyo lok ada ma en dok cen ka limogi. En onongo cinge yot, lakica, dok maro bedo kacel ki dano. Minne Goldie, onongo obedo lamego ma lagen. Wonne Allen i acakkine onongo pe maro Lucaden. Kadi bed wongi onongo pe maro ada, mamagi onongo kare ducu kelo Linda kacel ki omegine matino John ki Gordon i Ot me Ker dok bene opwonyogi kit me tito kwena. I kare mapatpat, Goldie, Linda, John, ki Gordon ducu gutiyo macalo lupainia marii. I nge mwaki mapol, Allen odoko Lacaden pa Jehovah dok otiyo matek i kacokke.

I mwaka 1965, kilwonga me cito i Cukul me Ticwa me Ker ma onongo bibedo i jang gang kal me Canada pi dwe acel wek anong pwonnye. Ma atye i cukul meno, kipenya me pongo fom me cito i cukul me Gilead. Onongo pe atamo ni apore me bedo lamiconari, ento apongo fom meno. Kilwonga me cito i kilaci me 42 me Gilead. Pol kare, lupwonyewa i Gilead onongo giwacciwa kit ma watye ka timone kwede. Ripot mukwongo ma anongo ocuko cwinya me pwonyo jami ducu ma atwero pwonyone madok i kom dulwa ma pud atye i cukul man. Meno obedo tam maber adada pien onongo pud atye ki mwaka 21 keken.

Ki i Gilead, kipwonyowa kit me kubbe ki jo ma gitiyo i odi me poko lok angeya calo i redio, telebijon, ki gajeti akwana. Pwonyo lok i kom jami magi oyomo cwinya adada. Pe onongo angeyo ni pwonnye meno onongo bikonya adada i anyim, kit ma abimedde ki titone lacen.

KICWALA KA TIC I SENEGAL

I nge nino mogo manok ma watyeko kwanwa, an kacel ki Michael Höhle, ma onongo wabitic kwede macalo lumiconari, waa me cito i ticwa i lobo Senegal, ma tye i Afrika. I kare meno, onongo tye lutit kwena ma romo 100 i lobo Senegal.

I nge tic i Senegal pi dwe mogo manok, kilwonga me bedo ka tic i jang gang kal kicel i cabit ducu. Kabedo ma onongo watiyo iye obedo rum mo matidi ma tye i gang pa lumiconari. Kadi bed opic man onongo tidi, Omego Emmanuel Paterakis, ma onongo tye ka neno wi tic i jang gang kal, opoyo wiya ni jang gang kal man cung pi dul pa Jehovah i lobo Senegal. I nino mo, Omego Paterakis okatti ki tam ni omyero waco waraga me cuko cwiny bot lumiconari ducu. I kare meno, onongo wape ki macin me rudo karatac, pi meno onongo kicoyo waraga ki acel acel kun kitiyo ki typewriter. Meno onongo tic matek adada pien onongo myero pe watim roc mo keken iye!

I otyeno meno ma peya adok cen i ganga, Omego Paterakis omina baaca mo. En owacca ni, “David, dul pa Jehovah ocoyo waraga boti.” Lacen ma ayabo baaca meno, anongo waraga acel ma onongo an aye acoyo! Gin mutimme meno opwonya me bedo ki woro pi tic mo keken i dul pa Jehovah kadi bed jang gang kal meno dit nyo tidi.

Amako lirem ki jo mapol i kacokke dok pol kare onongo acwalo cawa kwedgi i Ceng Abicel otyeno. Meno obedo kare me yomcwiny adada! Pud akubbe ki jo mogo i kingi i kare-ni. Dok pien onongo aloko leb French ki i Senegal, man konya ka alimo jang gang kal mapatpat ma kiloko iye leb French.

I mwaka 1968, Linda oye me bedo dakona. Pi kare malac, abedo ka yenyo tic mo ma watwero timone kicel kicel wek oten kor ticwa macalo lupainia i lobo Senegal, ento pol pa wegi tic onongo gimito ni giti ki jo ma gia ki i Senegal keken ento pe jo ma gia ki woko. I agikkine, i kare ma adok cen i Canada, wanyomme ci kicimowa me tic macalo painia keken i Edmundston, New Brunswick, ma obedo boma mo matidi ma otenne ki rijon me Quebec.

WATIYO MACALO LUPAINIA I NEW BRUNSWICK KI QUEBEC

Ma pud peya kicwalowa ka tic i Edmundston, onongo pe tye latit kwena mo keken ma a ki i kabedo meno dok onongo tye lutino kwan me Baibul manok adada. Dini me Katoli onongo doro but kwo me nino ducu pa dano ma i kabedo man. Cokcok odi ducu onongo gitye ki lanyut ni: Pe Wamito Lucaden pa Jehovah Kany. I kare meno, onongo pe waworo lanyut ma kit meno kit ma waworo kwede i kare-ni, pi meno onongo wacito i odi ducu kadi bed gitye ki lanyut meno nyo pe. Cabit ducu, dul mo pa Katoli onongo gicoyo i gajeti akwana ni: “Wacitu ka dwaro Lucaden pa Jehovah me aryema woko.” Onongo tye Lucaden pa Jehovah angwen keken i Edmundston—meno Victor Norberg ki dakone Velda ki dong an ki dakona Linda!

Wiya pe biwil i kom lim mukwongo pa laneno me adwol. I nge bedo kwedwa pi cabit acel, en ocuko cwinywa ni, “Gwok nyo gin maber ma wutwero timone ma wutye kany aye me loko tam pa dano i kom Lucaden pa Jehovah.” Cakke i kare meno, waketo yub me timo man dok tam meno otiyo! Motmot, dano gucako neno apokapoka ma tye i kin mwolo pa Lucaden pa Jehovah ka kiporo ki awaka pa lutela dini pa Katoli. I kare-ni dong, tye kacokke mo matidi i boma meno.

I nge bedo pi mwaka acel i kabedo meno ma Lucaden pe iye-ni, kilwongowa me miyo kony i kacokke mo madit i boma me Quebec. Wabedo pi dwe abicel ki omege ki lumege ma kunnu ma onongo gimaro dano adada ci lacen kicwalowa i tic me limo adwol.

Pi mwaki 14 ma lubo, wabedo ka limo adwol mapatpat i rijon me Quebec. Meno obedo kare me yomcwiny adada! Tic me tito kwena onongo tye ka wot maber adada i Quebec, dok i kacokke ma onongo walimogi, onongo pol kare wanongo dano mapol ma gia ki i gang acel ma gitye ka kwano Baibul me doko Lucaden!

WIWA PO I KOM OMEGE KI LUMEGE MA GUTIYO MATEK

Yot adada me maro omege ki lumege ma gia ki i kabedo ma kiloko iye leb French i Canada. Gubedo jo ma gitito tamgi atir ka maleng, giluyom cwiny, dok komgi mit adada. Ento pe obedo yot botgi me pwonyo ada pi lyeto magwar ma obedo ka a ki bot lupacogi. Lunyodo pa omege ki lumege matino mogo guwaccigi ni, “Juk kwan ki Lucaden pa Jehovah, ka pe, ci a woko ki gang!” Kadi bed kit meno, polgi gumedde ki bedo lugen bot Jehovah. Labongo akalakala mo, Jehovah cwinye yom adada i komgi pi bedo lugen!

Amito bene lok i kom lupainia marii ki lupainia keken ma gutiyo ki gen i Quebec i kare ca. Polgi onongo gua ki i kabedo mapatpat i Canada. Medo i kom pwonyo leb French, onongo mitte bene ni gupwony tekwaro kacel ki kit ma jo me kabedo meno gitamo kwede, pien onongo dini pa Katoli orwako lwite matut i kwogi.

Onongo pol kare kicwalo painia keken me tic i kabedo ma can lutit kwena tye iye. Kit macalo jo me kabedo magi onongo pe gimaro Lucaden, onongo tek ki lupainia me nongo ot kacel ki tic me atima ma twero cwako kor ticgi macalo lupainia. Kadi wa jo ma pud gunyomme nyen onongo giribo ot ma gibedo kadi wa dano aboro wek obed yot botgi me culo ot ma gitye ka pangone. Onongo pe gitye ki cente muromo me kwo kengi. Lupainia magi onongo gitiyo matek ki cwinygi ducu. Ka onongo gucako kwano Baibul ki ngat mo, onongo gitimo gin mo keken me konyo latin kwangi meno me dongo. Kit ma dong wel lutit kwena ma gia ki i Quebec omedde-ni, pol pa lupainia magi dong gukobo woko i kabedo mukene ma can lutit kwena tye iye.

I kare ma wabedo i tic me limo adwol, onongo i Ceng Abicel odiko ducu watute me tic ki lutino ma mwakagi tye apar ki wiye. Man oweko wabedo ki kare me niang pekki ma gitye ka kato ki iye. Lutino mogo ma watiyo kwedgi dong gitye ka tic i lobe mukene macalo lumiconari nyo gitye ki mot me tic mukene.

I kare ca, onongo kacokke mogo pe gitye ki kero me piko moo i mutokawa nyo pitowa, dong i kare mukene onongo centewa tum woko ma dwe cito ka tum. I kare ma kit meno, onongo wajenge i kom Jehovah keken, pien en aye onongo ngeyo peko ma watye ka wok ki iye. En pe owekowa matwal. Pi meno, kare ducu wabedo ki kero me cito ka limo kacokke mukene.

GIN MA APWONYO KI BOT OMEGE MA LUGEN

I kare ma onongo atye i Quebec, wabedo ki kare me miyo caden kun watiyo ki redio, telebijon, nyo gajeti akwana, dong cwinya obedo yom ni onongo apwonyo jami magi i kare ma atye i Cukul me Gilead. Pol kare onongo atiyo kacel ki Omego Léonce Crépeault, ma onongo bene obedo laneno me adwol dok onongo tye ki diro me lok ki jo ma gitiyo i odi me poko lok angeya. Ka onongo en tye ka lok ki jo ma rwomgi dongo ma gitiyo i odi poko lok angeya, onongo pe nyutte ni en engeyo jami mapol. Me ka meno, en onongo waco ni: “Ladit, an ki lawota-ni wabedo mere lutit kwena. Pe watye ki ngec mapol i kom kit me lok i redio nyo telebijon. Ento dulwa ocwalowa ni waniang lwak pi gure madit pa Lucaden pa Jehovah ma tye ka bino-ni. Wabibedo ki pwoc madit pi kony mo keken ma wubiminiwa.” Pi mwolo ma en onyuto, omiyo jo mapol ma gitiyo i odi poko lok angeya gubedo atera me konyowa.

Lacen, kicima kacel ki Omego Glen How, ma obedo lapilida pa dulwa, me tic i kom pido mogo matego ma twero ywayo tam pa odi poko lok angeya. Pwonnye ma anongo ki i Cukul me Gilead kacel ki ngec ma anongo pi tic kacel ki Léonce okonya adada. Obedo mot madit me tic kacel ki Omego How. En onongo cwinye tek adada ka tye ka cung pi dulwa i kot, ento ma dong pire tek loyo, en onongo tye ki mar matut pi Jehovah.

I mwaka 1985, kicwalowa me limo adwol ma onongo cok ki gangwa tung kupoto ceng me Canada, wek wabed ki kare me miyo kony bot babana. I nge dwe adek keken ma wabedo kunnu, kwone orweny woko. Wamedde ki limo adwol ma tye tung kupoto ceng me Canada nio wa i mwaka 1989 ma kilwongowa atura me cito ka tic i Betel me lobo Amerika. Pi meno, onongo dong mitte ni wawek tic me limo adwol ma watimo cokcok pi mwaki 19. Pi mwaki magi ducu, wabedo i paci pa omege ki lumege mapol mapatpat dok onongo ginywako camgi kacel kwedwa. Watye ki pwoc madit adada bot utmege ducu ma gujolowa i pacigi dok gunywako camgi kwedwa!

KIKOBOWA KA TIC I BETEL ME AMERIKA

I kare ma wao i Brooklyn, kicima me tic i Dipatmen ma Neno Wi Tic. Atye ki pwoc pi pwonnye ma anongo ki kunnu. Gin acel ma apwonyo ki kunnu aye pe me tamo ni angeyo gin moni maber ma peya aniang lok ducu mutimme. Lacen i mwaka 1998, kicima me tic i Dipatmen ma Loyo Yubo Cam me Cwiny, ka ma pud atye ka medde ki nongo pwonnye iye. Pi mwaki mapol, abedo ki mot me konyo Omego John Barr, ma onongo obedo lakub kin Komitti pa Lukiko Madit ma Loyo Yubo Cam me Cwiny. Kare ducu abibedo ki pwoc pi pwonnye ma anongo ki bote kacel ki kare ma atero kwede. En onongo obedo omego ma tute adada me lubo lanen pa Yecu macok.

Atye ki yomcwiny madit me tic kacel ki omege ki lumege ma gimwol ma gitiyo i Dipatmen ma Loyo Yubo Cam me Cwiny. Kare ducu gilego bot Jehovah wek okonygi ki ticgi dok gingeyo ni jami ducu ma gicobo obedo pi teko pa cwiny maleng pa Jehovah, ento pe pi diro ma gitye kwede.

Obedo mot madit pi an kacel ki Linda me limo omege ki lumege ma lugen ma gibedo i lobe ma romo 110. Waneno kit ma lumiconari, lumemba me Komitti me Jang Gang Kal kacel ki jo mukene ma gitiyo pi kare malac gimaro kwede Jehovah ki cwinygi ducu. Waneno bene mit kom kacel ki genne pa lutit kwena ma gibedo i lobe magi, ma gimedde ki tic pi Jehovah kadi bed lweny, can lim ki dong aunauna tye. Labongo akalakala mo, Jehovah maro omege ki lumege magi matek adada!

Pi mwaki mapol, Linda obedo lakony matek adada bota ma oweko abedo ki kero me cobo ticca maber. En maro dano adada dok pol kare yenyo yo me konyo jo mukene. En ladiro adada i miyo caden i kare ma owec. En okonyo dano mapol me pwonyo lok i kom Jehovah, dok okonyo kadi wa jo mogo ma onongo ticgi okwe woko me dwogo cen ka tic pi Jehovah odoco. Linda obedo mot ma oa ki bot Jehovah! Ka wawoto ki teggi, watye ki pwoc madit adada pi omege ki lumege matino ma gikonyowa i wotwa kacel ki jami mukene.—Mar. 10:​29, 30.

Ka atamo i kom mwaki 80 mukato-ni, atye ki pwoc madit adada. Aye lok pa laco jabuli ma ocoyo ni: “Ai Lubanga, ibedo ka pwonya cakke ka tinona, pi meno pud atuco pi ticci me aura ducu ma itiyo.” (Jab. 71:17) Amito medde ki timo meno ka teke pud akwo.