Lok pa Solomon i kom awobi-ni nyuto gin ma twero timme i kom lawor Jehovah mo keken. En twero timo bal madit kun lacen waco ni jami ducu otimme atura. Nyo en twero waco ni, “Apo anongo ni dong otimme woko.” Ento, ka en otamo matut i kom gin mutimme, en biniang ni onongo emoko tam maraco mogo ma otere i timo bal madit man. Twero bedo ni en oyero lurem ma pe gimaro Jehovah. Nyo gwok galowang, kabedo me Intanet, nyo kabedo ma en maro cito iye nongo pe opore pi Lakricitayo. Oromo bedo ni en onongo dong ojuko lega, kwano Baibul, cito i cokke, nyo nywako i tic me pwony. Calo awobi ma kiloko i kome i Carolok, nongo balle pe otimme atura. Pwony ango ma wanongo? Pe omyero wagwokke ki timo bal keken, ento bene jami mogo ma twero terowa i timo bal meno. Man aye gin ma Solomon otito kikome i nge tito gin mutimme.—Mat. 5:​29, 30. w24.07 16 ¶10-11

Lonyo man obedo gin ango? Obedo tic me tito kwena maber me Ker-ri ma bilaro kwo pa dano. (2 Kor. 4:1) Atabo ma kicweyo ki lobo cung pi gin ango? Cung pi lutic pa Lubanga, ma gitero kwena maber me Ker-ri bot jo mukene. I kare pa lakwena Paulogi, lucatwil onongo gitiyo ki atabo nyo abino ma kicweyo ki lobo me tingo jami ma welgi tek calo cam, kongo vino, ki cente. I yo acel-lu, Jehovah omiyo botwa kwena me Ker pa Lubanga ma pire tek adada. Ki kony pa Jehovah, watwero nongo teko ma wamito me medde ki tito kwena man. I kare mogo, watwero bedo ki lworo i kom dano ma myero watit kwena botgi. Watwero loyo ariya meno nining? Nen kong lega pa lukwena i kare ma kiminigi rukca ni omyero pe gutit kwena. Me ka bedo ki lworo, gin gulego Jehovah ni okonygi wek ‘gimedde ki tito lokke ki tekcwiny labongo lworo mo.’ Jehovah ogamo legagi cutcut. (Tic 4:​18, 29, 31) Ka ce lworo dano weko pe wanongo mit pa tito kwena, kwa Jehovah wek okonyi me dongo marri pi dano wek pe ibed ki lworo me tito botgi kwena maber-ri. w24.04 16 ¶8-9

Marwa pi Jehovah tugo cwinywa me lonyo nyinge. Watye ki miti me tito bot jo mukene ni lok ma Catan owaco i kom Jehovah pe tye ada. (Acak. 3:​1-5; Yubu 2:4; Jon 8:44) Ka watye ka tito kwena, wabedo ki miti madwong me tito ki jo ducu ma ye winyo lokwa, ngat ma Jehovah obedo. Wamito ni jo ducu gunge ni kite ma pire tek loyo aye mar, yo me locce tye atir, dok ni Kerre bijwayo pekki kun kelo kuc ki yomcwiny bot dano ducu ma i wi lobo. (Jab. 37:​10, 11, 29; 1 Jon 4:8) Ka watito bot dano jami magi, ci nongo watye ka lonyo nyinge. Cwinywa bene bedo yom pien nongo watye ka timo gin ma omyero watim macalo Lucaden pa Jehovah. w24.05 18 ¶12