Bed ki Neno Mupore i kom Pekkini

1-2. Gin ango ma mitte ni watim wek wabed ki kero me kanyo pekkiwa? (Nen bene cal.)

JEHOVAH maro jone adada. Kadi bed kit meno, pol pa lutic pa Jehovah kwogi opong ki “can ki ayelayela.” (Jab. 90:10) Jo mogo i kingi gitye ka nongo aunauna ki bot lupacogi ma gimito ni gujuk tic pi Jehovah woko. Jo mukene kibologi i buc pi tito kwena. Jo mapol komgi lit nyo gitye ka lweny ki pekki ma bino pi tiyo. Ki dong mukene, gurwenyo jogi me amara i to nyo gin mo marac otimme i kwogi. Tika tye gin mo ma tye ka keli par nyo weko ideno can i kare-ni?

² Ka watye ka kato ki i peko, myero watam kit ma Jehovah tamo kwede wek wabed ki kero me cirone. Pingo man pire tek? Pien ka pe watye ki neno mupore i kom pekkiwa, ci pe wabingeyo gin me atima wek wacir pekkiwa. Man bedo calo dwoyo mutoka. Ka wang diricane ocido woko, pe itwero neno jami ma tye i nyimi. Ento ka wang diricane leng, ci ibineno maber yo ma myero ilubi. I pwony man, wabinyamo (1) kit ma myero wanen kwede pekkiwa, (2) adwogi maraco ma twero bino ka pe wabedo ki neno mupore i kom pekkiwa, ki dong (3) jami ma watwero timone ka gin mo marac otimme i komwa.

KIT MA MYERO WANEN KWEDE PEKKIWA

3. Pingo pe watwero gengo pekki i kare-ni?

³ Pe watwero kwo labongo pekki i lobo man marac-ci. Teke pud watye ki roc dok Catan aye tye ka loyo lobo-ni, pud wabimedde ki kato ki i pekki. Dok bene, ka wamedde ki nyiko cok ki agikki me lobo man, kwo bimedde ameda ki doko tek. Can ma poto atura calo oyengyeng, pong pa pii ki mac ma wango kabedo malac tye ka medde ameda dok dano maraco bene gimedde ki keto can i kom jo mukene. (Mat. 24:8; 2 Tem. 3:13) Ka ni Jehovah okwany pekki magi ducu i kare-ni, ci bibedo calo en tye ka konyo Catan ki loyo lobo-ni. I lobo man, pe watwero gengo “kare marac” ki bedo tye.—Latit. 9:12.

4. Tyen lok mukene ango mumiyo Lukricitayo gideno can?

⁴ Lukricitayo gideno can pien gilubo kor Yecu. Yecu owaco bot lulub kore tyen mapol ni kibiketo aunauna i komgi pi niyegi. (Mat. 24:9; Jon 16:2) Pi meno, pe wabedo ki ur ka kiketo aunauna i komwa. Wangeyo ni watye ka lubo Yecu dok wamoko tamwa me medde ki bedo lugen bote. (1 Tec. 3:​3, 4) Ka wamedde ki bedo lugen i kare me aunauna, wangeyo ni nongo watye ka timo gin ma atir i wang Jehovah gin ki Yecu, dok gibiminiwa mot me kwo ma pe tum. Medo i kom meno, wanyuto ni wayero me woro Jehovah pien en aye laloc maber loyo, dok wanyuto ka maleng ni Catan obedo lagoba. Goba acel ma Catan owaco aye ni dano pe gimaro Lubanga ento gitiyo pire pi rwot ineka. I tute pa Catan me moko lok meno, en kelo aunauna magwar i kom jo pa Jehovah. (Yubu 1:​9-11) Ka waciro pekki magi, wanyuto ni wamaro Jehovah ki cwinywa ducu dok meno weko cwinye bedo yom.—Car. 27:11.

5. Pwony ango ma wanongo ki i Latitlok 7:​13, 14? (Nen bene cal.)

⁵ Jehovah pe juko jami maraco ducu ki timme. Jehovah pe obedo ngat mager dok en pe timo gin mo keken ma wanowa. (Yak. 1:13) Kadi bed kit meno, Kabaka Solomon owaco ni “kare ma piny rac” obedo “tic pa Lubanga.” (Kwan Latitlok 7:​13, 14.) En onongo pe tye ka waco ni Jehovah aye kelo jami maraco, ento jami maraco timme pien Jehovah ye ni gutimme. Dong gin ango ma watwero pwonyo ki i lok pa Solomon ma kicoyo i Latitlok 7:​13, 14? Me acel, mitte ni wabed ki neno mupore i kom kwowa i lobo pa Catan pien wabibedo ki kare mabeco kacel ki kare maraco. I kare ma watye maber, watwero pwoyo Jehovah pien jami mabeco ducu obedo mic ma oa ki bote. Me aryo, Solomon opoyo wiwa ni ‘dano pe ngeyo gin ma bitimme lacen.’ Pi meno, pe watwero ngeyo ka nino moni bikelo peko nyo yomcwiny pien can ma poto atura poto i kom jo ma kitgi atir ki jo maraco bene.

6. Pingo Jehovah ye ni wakat ki i pekki? (Jo Ibru 12:​7, 11)

⁶ Ka watye ka kato ki i peko, Jehovah twero tic ki kare meno me pwonyowa me jenge i kome pi kony, me ka tute me cobo peko meno wan kikomwa. Jehovah kare ducu neno gin ma timme i komwa, cwinye cwer ka watye ka deno can, dok tye atera me konyowa. Kadi bed en oye ni wawot i “nota me tipo to,” en pud medde ki tirowa, nyutiwa ni emarowa, dok miniwa teko me cirone. (Jab. 23:4) Ka watye ka kato ki i kwo matek, watwero niang kit mene ma mitte ni wadong, ci Jehovah bikonyowa me dongo kit magi. (Kwan Jo Ibru 12:​7, 11.) Me labolle, onongo mitte ni Yubu odong cwiny me mwolo. Jehovah aye pe okelo peko i kom Yubu; ento en oye ni Yubu okat ki i pekki magi, dok otiyo ki kare meno wek Yubu onong pwonnye ki iye. (Yubu 42:​1-6) Watwero bedo ki gen ni, ka Jehovah oye ni wakat ki i peko moni, en bikonyowa me medde ki bedo lugen bote dok biminiwa mot.—Rom. 8:​35-39.

7. Pingo itwero bedo ki yomcwiny kadi bed itye ka kato ki i aunauna?

⁷ Watwero bedo ki yomcwiny kadi bed watye ka kato ki i aunauna. Ka itye ka kato ki i aunauna pi niyeni, pe ibed ki tam ni Jehovah cwinye pe yom i komi nyo ni en pe tye ka konyi. Me ka meno, myero wii opo ni aunauna nyuto ni itye lawiny bot Jehovah dok cwinye yom i komi. (Mat. 5:​10-12) Ka watye ki tam ma kit meno i kom aunauna, ci wabibedo ki yomcwiny, kit ma lukwena gubedo kwede-ni. (Tic 5:​40-42) Medo i kom meno, watwero konyo jo ma pe gubedo Lucaden me pwonyo lok ada me Baibul wek “gumi deyo bot Lubanga.” (1 Pet. 2:12) Tam kong i kom Yucepu. Jehovah okonyo Yucepu dok omine mot pe i kare ma kigonye keken, ento kadi wa i kare ma en onongo tye i buc. Jehovah twero timo meno piwa bene ka watye ka kato ki i aunauna.—Acak. 39:​3, 23.

8. Gin ango mukene ma twero konyowa me medde ki ciro pekkiwa?

⁸ Pekkiwa bigik. Gin mutimme i kom Yubu pwonyowa ni pekkiwa bigik. Ki lok ada, “[Jehovah] omiyo gum ki Yubu i agikki me kwone makato i acakkine.” (Yubu 42:12) I yo acel-lu, Jehovah bene biminiwa mot i lobo manyen i yo me aura. Kwowa i kare-ni cek dok opong ki peko ka iporo ki kwo ma pe tum ma wabinongo i anyim. Meno pud dong tugo cwinywa ya me ciro pekkiwa nio wa i agikki!—Mat. 24:13.

BEDO KI NENO MARAC TWERO MEDO PEKOWA AMEDA

9. I yo ma nining ma bedo ki neno ma pe opore twero medo kwede pekkiwa ameda?

⁹ Ka watye ki neno marac i kare ma watye ka kato ki i peko, ci meno twero medo pekowa ameda. Watwero cako tamo ni Jehovah aye tye ka kelo peko man i komwa. Me labolle, i kare mo, Yubu obedo ki tam ni Jehovah aye okelo pekkine, dok neno marac meno oweko en “otamo ni en aye lokke tye atir, pe Lubanga.” (Yubu 32:2) I yo acel-lu, Naomi bene okok i kom Jehovah ni en aye tye ka kelo can i kome. (Ruth 1:​13, 20, 21) Ka onongo Yubu gin ki Naomi gumedde ki tamo ni Jehovah aye tye ka kelo pekkigi, kono onongo akemo omakogi i kom Jehovah dok gujuko tic pire woko. (Car. 19:3) Kadi bed kit meno, Jehovah pud okonyogi me bedo ki neno ma atir i kom pekkigi dok ominigi mot pi bedo jo ma lugen.

10. Ka watye ka kato ki i pekki, tam ango ma watwero cako bedo kwede?

¹⁰ Kadi bed wangeyo ni Jehovah aye pe kelo peko i komwa, ento watwero cako bedo ki tam ni piwa pe tek bote. Tam marac ma kit meno twero turo cwinywa dok weko wanongo tek me timo gin ma tye atir. (Car. 24:10) Kabaka Daudi ki lanebi Kabakuk gukato ki i pekki mapol. Dok i kare mukene, gubedo ki akalakala ka ada Jehovah tye ka winyo legagi. (Jab. 10:1; Kab. 1:2) Kadi bed kit meno, gin gumedde ki lega. Jehovah ogamo legagi dok omedde ki konyogi. Dok en bimedde ki konyi bene.—Jab. 10:17.

11. Ngo ma twero timme i komwa ka pe wabedo ki neno mupore i kom pekki?

¹¹ Ka pe watye ki neno mupore i kom pekkiwa, watwero tamo ni Jehovah myero pe oye wakat ki i peko. Dong watwero bedo ki ur ka jami maraco otimme. (1 Pet. 4:12) Watwero nongo pwony ki i lanen pa lupwonnye pa Yecu. I kare ma Yecu owaccigi ni kibiketo aunauna i kome dok kibineke, pe guye ni gin ma kit meno twero timme i kome. (Luka 18:​33, 34) Me labolle, Petero otamo ni Lubanga pe biye ni Yecu oden can kit meno, kadi bed Yecu onongo otittigi ka maleng ni ebideno can. Yecu oniang ni kodi tam ma kit meno twero genge ki timo miti pa Jehovah, pi meno en ojuko Petero. (Mar. 8:​31-33) Kadi wa i nge to pa Yecu, lupwonnyene pe guniang cutcut pingo kineke. Ento Yecu pud omarogi dok omedde ki konyogi. I kare ma en oloko kwedgi i nge cerre, en okonyogi me niang pingo onongo mitte ni eden can nio wa i to kun ‘gonyo botgi lok ducu ma i ginacoya.’ (Luka 24:​25-27, 32, 44-48) Ka onongo gukwanyo kare me lwodo lok ma Yecu opwonyogi, ci meno onongo bikonyogi me yubbe pi aunauna ma onongo gibikato ki iye. Wan bene ka watamo i kom gin ma Baibul waco i kom aunauna, ci bikonyowa me bedo ma wayubbe pi pekki ma bino i anyim.

12. Bedo ki neno ma pe opore i kom pekowa twero weko wawinyo nining?

¹² Ka pe watye ki neno ma atir i kom pekkiwa, watwero cako tamo ni kitye ka terowa marac nyo ni pekowa dit makato kit ma tye kwede. Me labolle, Lucaden mogo giromo tamo ni kiterogi marac pien ni pe kiminigi mot me tic mo nyo gurwenyo mot me tic ma onongo gitye kwede. Tam kong i kom lapor pa Yecu i kom lutic ma i poto olok. Lutic mogo cwinygi ocwer pien guwinyo calo mucara ma kiculogi nok, ento won poto owaco bot ngat acel i kingi ni: “Larema, an pe ateri marac.” (Mat. 20:​10-13) Lutic magi gukok i kom won poto pe ni pien kiterogi marac ento pien gubedo ki gen ma pe opore. Pe wamito ni gin ma kit meno otimme i komwa. Dong gin ango ma watwero timone wek wabed ki neno ma atir i kom peko ma watye ka kato ki iye?

JAMI MA WATWERO TIMONE KA GIN MO MARAC OTIMME I KOMWA

13. Ngo ma twero timme ka peko opoto i komwa?

¹³ Lutic pa Jehovah gingeyo gin ma Baibul waco i kom pekki. Dok pol kare wakwano Baibul bot jo mukene me cuko cwinygi wek gukany pekki ma gitye ka wok ki iye. Ento, ka peko opoto i komwa, watwero nongo ni tek adada me bedo ki neno ma atir. Me labolle, watwero cako tamo ni Jehovah tye ka miniwa pwod pi gin mo marac ma watimo nyo ni en pe tye ka winyo legawa. Ka icako tam kit meno, gin ango ma itwero timone?

14. Gin ango ma itwero lega pire ka itye ka kato ki i peko? (2 Jo Korint 4:7)

¹⁴ Leg Jehovah pi kony. Lok bot Jehovah i kom pekoni ki kit ma tye ka gudi kwede. Ka tye gin mo ma imito ni Jehovah otim piri me konyi ki peko man, ci lege pire. Iromo bene lege pi cwiny mere maleng wek omini teko me cirone kacel ki ryeko me moko tam mabeco. Ento wii opo ni, Jehovah twero gamo legani i yo ma pe ibyeko. (Ep. 3:20) En bene twero tic ki lumalaika nyo utmege me konyi. (Jab. 34:7) Pi meno, jol kony pa Jehovah i yo mo keken ma en omini. En miyo cwiny mere maleng botwa labongo gingi mo, dok cwiny maleng twero konyi me kanyo peko mo keken.—Kwan 2 Jo Korint 4:7.

15. Gin ango ma bikonyi me kanyo pekki? (Nen bene cal.)

¹⁵ Medde ki timo jami ma jingo watti ki Jehovah. Ka itye ka kato ki i peko, pe iromo bedo ki kero me timo jami ducu ma onongo itimogi con me jingo watti ki Jehovah. Ento meno aye kare ma omyero itute matek me bedo ki neno ma atir. Dong tute matek me kwano nyo winyo jami ma weko ibedo ki neno ma atir. (Jab. 119:143) Medde ki kwano kacel ki lwodo lok me Baibul nino ducu, kun bene itimo kwed iye. Tute matek me nywako i tic me pwony kit ma itwero kwede, dok imedde ki bino i cokke kun imiyo lagam. Kwany kare me bedo kacel ki omege ki lumege. Gwokke pe me bedo keni keni, kadi bed iwinyo calo pe imito ribbe ki jo mukene.—Car. 18:1.

16. Akalakala ango ma itwero bedo kwede ka peko opoto i komi, dok iromo lweny kwede nining? (2 Jo Korint 10:​4, 5)

¹⁶ Tute matek me loyo akalakala ma itye kwede. Ka gin mo marac otimme i komi, itwero cako bedo ki akalakala i komi nyo i kom Jehovah. Ka tye kit meno, gin ango ma romo konyi me kwanyo tam maraco woko ki i wii? (Kwan 2 Jo Korint 10:​4, 5.) Itwero loyo akalakala magi ka itiyo ki ‘ngec pa Lubanga’ ma nonge i Baibul kacel ki bukke ma dulwa ocoyo. Me labolle, tika itamo ni Jehovah cwinye pe yom i komi? Kwan kong gin mutimme i kom lakwena Paulo. Paulo onongo tye ki pekki mapol. Kadi bed kit meno, en omedde ki tito kwena maber ki mit kom dok meno oweko en obedo ki tekcwiny ni Jehovah kacel ki Yecu cwinygi yom i kome. (2 Kor. 11:​23-27) Tika itye ki akalakala ka ada Jehovah otimmi kica pi bal ma onongo itimo con? Ka tye kit meno, co piny wang ginacoya mogo ma nyuto ka maleng ni Jehovah timo kica pi balwa. (Ic. 43:25) I nge meno, kwan wang ginacoya magi dok ilwod iye i yo matut. (Jab. 119:97) Tika peko mo opoto i komi nyo i kom ngat mo ma imaro ma oweko dong itye ki akalakala ka ce Lubanga gwoko luticce ma lugen? Tim kwed i kom tyen lok mumiyo Lubanga ye ni waden can ki kit ma en gwokowa kwede i yo me cwiny kadi bed peko opoto i komwa. (Jab. 91:​9-12) Medo i kom meno, kwan bene lok i kom omege ki lumege ma gukanyo pekki malit ento pud gumedde ki tic pi Jehovah ki yomcwiny.a

17. Gin ango ma omyero watim ka peko opoto i komwa?

¹⁷ Twero bedo ni i kare-ni, pe itye ka kato ki i peko mo madit. Pwo Jehovah dok ipakke pi jami mabeco ma en omini. (Latit. 7:14) Ento ka gin mo marac otimme, bed ki neno ma atir i kom peko meno dok imedde ki geno Jehovah. Ka itimo kit meno, Jehovah ‘bimini yo ma myero ibwot kwede, wek ibed ki twero me ciro.’ (1 Kor. 10:13) Ento gin ango ma omyero watim ka gin mo marac otimme i kom omegiwa ki lumegiwa? Pwony ma lubo man binyamo lapeny meno.