Gen Jehovah Won Twer Ducu

1. Jami maraco ango ma otimme i kom Yubu?

JAMI maraco mapol otimme i kom Yubu atura. Lutinone ducu guto woko. Kikwalo bene leeyine mogo ki mukene kinekogi. Dok pol pa luticce bene guto woko. I nge timme pa jami magi ducu, two mo malit omako Yubu. Medo i kom meno, jo mapol ma onongo yam giworo Yubu gurwenyo woro i kome. Co adek ma onongo giwaco ni gin lurem Yubu gubino ka limme, ento guloko lok maraco mapol i kome ma omedo turcwinye ameda. Kadi wa dakone kikome bene cwinye otur adada mumiyo en owaco bot Yubu ni “yet Lubanga, ci ito.” (Yubu 2:9; 15:​4, 5; 19:​1-3) Ka ngat mo tye ka kato ki i pekki mapol, en romo tamo ni Lubanga pe paro pire dok pe bikonye. Pi meno, Yubu onongo twero cako bedo ki akalakala ka ce ada Jehovah gwoko jo ma gimarre.

2-3. (a) Gin ango ma watwero cako bedo ki akalakala iye? (b) Gin ango ma wabipwonyo ki i buk pa Yubu?

² Watye ka kwo i kare me agikki ma ‘piny tye marac.’ (2 Tem. 3:1) Dong calo Yubu, wan bene watwero kato ki i pekki madongo. Ka watye ka kato ki i pekki teretere, man miyo wabedo ki par ni kwo pe dong biyubbe. Jo mukene bene giromo cako tamo ni Jehovah dong pe marogi dok pe mito konyogi.

³ Ka dong iwinyo kit meno i kare mo, pe iwek cwinyi otur. Yubu opwonyo ni Jehovah pe weko jo ma gigene matwal. Wan bene watwero pwonnye me geno Jehovah ki me bedo ki tekcwiny ni Wonwa bikonyowa. Me konyowa timo meno, kong dong wanenu pwony aryo ma pigi tego ma wanongo ki i buk pa Yubu: Mukwongo, Jehovah aye obedo Laloc Mamalo ma loyo polo ki lobo. Me aryo, Jehovah tye ki twero me cobo jami ducu ma en ociko pire. En bene gwokowa ki miniwa jami ducu ma wamito me bedo ki wat maber kwede.

CATAN BENE OBINO I KINGI

4. Gin ango ma otimme i kare ma lumalaika gugure i nyim Jehovah?

⁴ I nino mo acel, “awobe pa Lubanga” gugure i polo i nyim Jehovah. Baibul omedo ni: “Catan bene obino i kingi.” (Yubu 1:6) Man aye tyen mukwongo ma wanongo iye nying ni “Catan” i Baibul. Kilwonge kit meno pien en lajemo i kom Jehovah. Jehovah oye ki Catan me bedo i gure meno kadi bed en onongo dong pe tye lagen Bote. En onongo dong tye lamone pa Jehovah, lumalaika ma lugen, kacel ki dano ma gin lugen. Lok ma Jehovah owaco i Acakki 3:15 nyuto ni Catan onongo dong pe tye i kin jo me ot pa Jehovah. Pi meno, Catan pe tye i kin likwayo pa “dako,” ma gin aye lumalaika ma lugen—ma onongo ‘lakwaro’ ma kiciko pire-ni bia ki i kingi.

5. Pwony ango ma wanongo ki i gin ma Catan owaco ki kit ma Jehovah odok kwede iye?

⁵ Jehovah oweko kicoyo gin ma otimme i gure meno i Baibul pien en mito ni wange lok meno. Gin ma Catan owaco nyuto ka maleng ni en obedo ngat ma cwinye col dok loko lok goba i kom jo ma gitiyo pi Jehovah. (Yubu 1:9; por ki Niyabo 12:10.) Gin mutimme i cokke meno miniwa kwecwiny: Jehovah kare ducu tiyo ki tekone me timo gin ma tye atir. Dok bene wapwonyo ni macalo Won Twer Ducu, Jehovah keto wang cor i kom gin maraco ma jo mukene gitwero timone.

JEHOVAH KETO WANG COR

6. Jehovah onyuto nining ni en aye edoro cokke ma obedo i polo-ni? (Yubu 1:​7, 8)

⁶ Kwan Yubu 1:​7, 8. Jehovah aye odoro cokke ma otimme i polo-ni. En onongo ongeyo woko ni Catan mito lweny i kom Yubu. Pi meno, en aye ocako lok kun penyo Catan ni: “Itamo pi laticca Yubu?” Kong dong wanenu kit ma Jehovah otiyo kwede ki tekone me konyo Yubu.

7. Ma lubbe ki Yubu 1:​10, 11, gin ango ma Catan owaco i kom dano ma gitiyo pi Jehovah?

⁷ Kwan Yubu 1:​10, 11. Jehovah aye obedo Laloc Mamalo Twal ma loyo polo ki lobo. En tye ki teko me timo gin mo keken ma iye mito dok kare ducu en ngeyo gin maber loyo me atima. (Jer. 32:17; Dan. 4:35) Kadi bed kit meno, Catan omoro adot ni Jehovah tiyo ki twerone i yo marac. En bene owaco ni Lubanga bito dano ki jami mabeco wek Guwore. Catan bene owaco lapiny lapiny ni dano gitiyo pi Jehovah pi jami mabeco ma En minigi keken. Jehovah odok i lok man nining?

8-9. Wang cor ango ma Jehovah omoko pi Catan, dok pingo? (Yubu 1:12) (Nen bene cal.)

⁸ Kwan Yubu 1:12. Jehovah oye ni Catan otem Yubu, ento en oketo wang cor ma Catan omyero pe ongol. Lubanga owaco ka maleng bot Catan ni: “Kono nyo i kom en [Yubu] keken aye pe iket cingi!” Lumalaika ma gitye i cokke meno guwinyo ka Jehovah miyo cik meno bot Catan. Catan onongo pe ki teko me ngolo wang cor meno ma Jehovah oketo-ni. Dok pud tye kit meno kadi wa i kare-ni. Dong Jehovah otiyo ki tekone me gwoko Yubu dok onyuto ni ebedo Lubanga ma lamar ma ngolo kop atir.

⁹ Yub pa Catan me lweny i kom Yubu pe ocobbe kulu. Yubu omedde ki bedo lagen bot Wonne me polo. (Yubu 1:22) Kadi bed kit meno, Catan onongo pud peya otyeko temo Yubu.

10. Pingo Jehovah oye ki Catan me medde ki temo Yubu? (Yubu 2:​2-6)

¹⁰ Kwan Yubu 2:​2-6. I nge meno, Catan omedo tutene me turo genne pa Yubu. Catan owaco ni Yubu bijuko tic pi Jehovah woko ka ce kwone tye ka mading. Me nyuto ka maleng ni Catan lagoba, Jehovah oye ki Larac-ci me kelo two marac i kom Yubu. Ento Jehovah oketo wang cor kun waco ni: “Myero igwok kwone keken!” Catan onongo pe twero neko Yubu pien Jehovah pe oye ni otim meno. Ki kany, dok waneno ka maleng ni Jehovah obedo Won Twer Ducu pien Catan onongo pe twero ngolo wang cor ma Jehovah oketo.

JEHOVAH OGIKO PEKO PA YUBU WOKO

11. I nge juko atematema pa Yubu, Jehovah ogoyo laane i kom Yubu nining? (Yubu 42:​10-13)

¹¹ Kwan Yubu 42:​10-13. I kare ma Yubu dong onyuto ka maleng ni ebimedde ki bedo lagen, Jehovah dong pe oye ki Catan me medde ki temo Yubu matwal. En ogiko peko pa Yubu woko. Dong Catan onongo pe tye ki teko me gengo Jehovah ki gwoko Yubu kacel ki goyo laane i kome.

12. Mi kong labol mo ma nyuto gin ma Jehovah otimo pi luticce ma gigene.

¹² I kare man me agikki-ni, Jehovah otiyo ki tekone me konyo luticce. Me labolle, i mwaka 1945 lumony me Nazi gudiyo Lucaden pa Jehovah ma romo 230 me woto wot mabor dok ma keto kwogi ka mading kun gia ki i gang buc ma tye i Germany me cito i dog nam wek kinekgi kunnu. Kadi bed kit meno, pe tye ngat mo keken ma oto ki i kingi. Gucoyo gin mutimme i komgi ci guwaco ni Jehovah olarogi kit ma yam olaro kwede Luibru adek-ki ki i ruk mac ma okur malyet, dok kadi wa ngwec yito mo keken obedo pe i komgi. I yo acel-lu, Lucaden magi gukato ki i atematema magwar ento niyegi ojing matek. Jehovah omiyo botgi tekone. Gin bene guwinyo ni kilarogi kit ma kilaro kwede ki Daniel ki i dog labwor. Cakke i kare meno, gumoko tamgi me medde ki tic pi Jehovah pi naka. Dok guwaco ni medde ki tic pi Jehovah pi naka aye obedo mot maber loyo ma gitwero nongone.—Por ki Daniel 3:27; 6:22.

13. Gin ango ma itwero bedo ki gen iye ka itye ka kato ki i peko? (Nen bene cal.)

¹³ I kare mogo, wan bene wakato ki i pekki madongo i kwowa. (1 Pet. 5:​8-10) I kare mukene, cwinywa tur adada pien nongo watamo ni pekowa pe bigik. I kare ma kit meno, lwodo gin mutimme i kom Yubu twero konyowa. Watwero bedo labongo akalakala mo keken ni Jehovah tye ki teko me giko pekowa dok en bitimo meno i kare-ni nyo i kare me anyim. Jehovah dong otyeko moko woko con awene ma en bigiko iye lobo man marac-ci dok pe biye ni nino meno okat kadi matidi!

JEHOVAH MARO LUTICCE MA LUGEN

14-15. Gin ango ma Jehovah mito timone pi luticce ma lugen dok pingo? (Yubu 14:15) (Nen bene cal ma tye i .)

¹⁴ Kwan Yubu 14:15. Wonwa me polo bedo lagen bot jo ma lugen bote. En marogi matek adada mumiyo kadi bed gin guto, en pud bicerogi woko. I lobo manyen, dano ducu gibibedo ki yomcwiny madit adada ka dong en ocero luticce ma guto.—Ic. 65:17.

¹⁵ Kadi wa i kare ma peko pa Yubu dong ogik, en pud omedde ki kwo i lobo pa Catan man marac-ci. Ento Baibul tittiwa ni Jehovah ogoyo laane i kom Yubu i yo mo me aura adada. En ocango Yubu dok omine jami ma dodo ma yam onongo tye kwede tyen aryo kulu. Mot magi obedo mere abil keken pa jami ma Jehovah bitimo pi Yubu i anyim. Ki lok ada, Jehovah bimiyo mot bot jo ducu ma lugen bote dok gin ducu gibinongo mit pa kwo pi naka i lobo manyen. (Yabo 21:​3, 4) Macalo Lalo polo ki lobo, en tye ki miti me timo meno. Tamo kit ma Jehovah bigoyo kwede laane i komwa cuko cwinywa adada ka watye ka kato ki i peko i kare-ni!

16. Tyen lok mukene ango ma watye kwede me geno Jehovah ma en aye Laloc Mamalo Twal?

¹⁶ Kadi bed Jehovah omiyo mot bot Yubu, lacen Yubu pud oto woko. Ento Jehovah tye ki teko me cero Yubu pien En aye Won Twer Ducu dok Laloc Mamalo Twal. (Nwo. 32:39) Dong pe tye ngat mo keken ma twero genge ki cero jo ma en maro. Dok meno bitimme i kare ma en omoko.—Rom. 8:​38, 39.

GEN JEHOVAH KI CWINYI DUCU

17. Wangeyo nining ni Catan pe twero tyeko jo pa Jehovah?

¹⁷ Lok ma kicoyo i Baibul madok i kom Yubu, miniwa tyen lok mapol me geno Jehovah ki cwinywa ducu. Watye ki pwoc madit adada bot Jehovah pien en pe oye ni Catan otyek jo pa Jehovah woko! Wangeyo ni Jehovah aye Laloc Mamalo Twal pien i kare-ni, dano ma giromo milion abongwen kulu gitye ka tic pi Jehovah ki gen. Gamente kacel ki lutela dini matego gutute tyen mapol me juko lutic pa Jehovah ki wore kacel ki tito kwena maber-ri. Ento guyelle kwe pien Jehovah konyowa. (Ic. 54:17). Dok pe tye gin mo keken ma twero gengowa ki tito bot jo mukene ni Jehovah aye Lubanga me ada ki dok ni Catan lagoba ki lanek. Kadi wato, Jehovah pud bicero jo ducu ma gumedde ki bedo lugen bote.—Koc 13:14.

18. Pingo pe mitte ni wabed ki lworo i kom gin ma bitimme i anyim?

¹⁸ Ka watamo matut i kom gin ma wakwano ki i buk pa Yubu, niyewa jing matek ni Jehovah bigwokowa labongo paro pi gin ma bitimme i anyim. Dong pe mitte ni wabed ki lworo. I kare me twon can madit atika-ni, Catan ki lumonye gibitamo ni jo pa Lubanga gigoro dok gibilweny i komgi. Ento kit ma otimme kwede i kare pa Yubu, Jehovah pe biye ki Catan me tyeko jone matwal. Macok cok-ki, Jehovah bigiko pekki ducu ma Catan okelo i kom dano. Yecu bibolo Catan kacel ki jogine i bur ma tere pe gik pi mwaki alip acel. (Luka 8:31; Yabo 20:​1-3) I nge mwaki alip acel, kibityeko Catan kacel ki jo ducu ma lube matwal, kit ma Jehovah otito kwede con.—Acak. 3:15; Rom. 16:20; Yabo 20:10.

19. Mot ango ma Jehovah bimiyone bot jo ma lugen? (Nen bene cal.)

¹⁹ Watye ki yomcwiny madwong adada me kuro kwo i lobo manyen ma wabibedo labongo roc dok ma cwinywa yom. Kwo bibedo mamwonya adada ma loyo kit ma wabyeko kwede. Jehovah ocikke ni: “Nen, aketo jami ducu doko nyen.” (Yabo 21:5) Meno tyen lokke ngo? Pi tyen mukwongo nicakke i kare ma kitim bal i poto me Eden, Catan kacel ki jogine pe gibibedo ki kero me wano dano nyo bito dano me timo bal. Man bimiyo wawinyo agonya dok wabedo ki kuc! Dok pe ibibedo ki par mo keken pien jami ma miyo ibedo ki par dong nongo pe matwal. Jo ma gibibwot ki i lweny me Armagedon gibibedo ki kare me neno tango mapol. Jo ma komgi lit twogi bicang. Dok jowa me amara ma guto kibicerogi me kwo odoco. I kare meno, wabinongo mit pa kwo ki yomcwiny kit ma Wonwa me polo onongo mito ni wabed kwede!

20. In imoko tammi me timo gin ango?

²⁰ I kare man me agikki-ni, wabikemme ki atematema mapatpat, dok bimitte ni wabed ki tekcwiny wek wamedde ki bedo lugen. Dong mitte ni wamedde ki keto genwa ducu i kom Jehovah kun walubo cikke macalo lalocwa. Wamedde wunu ki nyuto ni wamaro Wonwa me polo Jehovah ki cwinywa ducu, kun wanyuto ka maleng ni lok ma Catan owaco i kom Jehovah kacel ki luticce obedo lok goba. Ada, watwero bedo ki gen ni ka wamedde ki bedo lugen bot Jehovah, Lubanga Won Twer Ducu, ci wabibedo ki anyim mamwonya pien Jehovah tye ki miti me miyo mot bot luticce ma lugen dok bicobone!