Pingo Itwero Bedo ki Yomcwiny Kadi Bed Kidagi?

1. Gin ango ma Yecu owaco dok pingo weko wabedo ki ur?

I PWONYE me Wi Got, Yecu owaco ni: ‘Wutye ki yomcwiny ka dano dagwu.’ (Luka 6:22) Lok meno nen calo oweko dano gubedo ki ur madit. Tye kit meno pien pe tye ngat mo ma mito ni kidage. Ci dong pingo Yecu owaco lok meno? Meno lapeny maber me anyama pien i kare-ni, dano mapol gidag lulub kor Yecu. Dong wabinyamo pingo dano gidagwa ki dong pingo watwero bedo ki yomcwiny kadi bed kidagwa.

PINGO JO MUKENE GIDAGWA?

2-3. Tit kong tyen lok acel mumiyo dano giuno Lukricitayo me ada, dok meno weko wawinyo nining i kom jo ma gidagwa? (Jon 16:​2, 3)

² Kidagwa pien waworo Jehovah. Yecu oloko kit man i kom jo ma onongo gibiuno nyo bene neko lulub kore ni: “Pe gingeyo Won, kadi an.” (Kwan Jon 16:​2, 3.) Anga ma weko dano gidag jo pa Lubanga? Catan, pien en aye “lubanga me lobo man.” (2 Kor. 4:​3, 4) En tute me gengo dano wek pe gupwony lok i kom Jehovah dok weko kiuno jo ma gimaro Lubanga. (Jon 8:​42-44) Ngeyo lok man weko wawinyo nining i kom jo ma giunowa? Ka wangeyo ni Catan aye bwologi, ci bikonyowa pe me kwerogi.

³ Nen kong gin ma otimme i kom omego Pavel,a ma bedo i lobo mo ma kiketo iye kigeng i kom ticwa. Kit macalo en omedde ki bedo lagen bot Jehovah, kimake, kigoye matek ci kitweye i ot bucce kene pi dwe mapol. Pavel owaco ni: “Dong onen ka maleng bota ni Catan ki jogine aye gitye ka tute me gengowa ki woro Jehovah. Nen calo pol pa acikari ma gitiyo i gang buc pe gidagwa. Ento gitye mere ka tiyo ticgi.” Omego mo ma bedo i lobo Croatia ma lunywalle guketo aunauna magwar i kome owaco ni: “Aniang atir ni Catan aye obedo lamonena ento pe lunyodona.”—Ep. 6:12.

4. Pwony ango ma watwero nongo ki i gin ma otimme i kom Yecu gin ki Citefano? (Nen bene cal.)

⁴ Pe wadag jo ma giunowa. Me ka meno, mitte ni waleg pigi. (Mat. 5:44) Wapwonyo man ki i lanen pa Yecu kacel ki bot Citefano. I kare ma lumony me Roma guguro Yecu i kom yat, en olego ni: “Aba, wayi tim kica botgi.” (Luka 23:34) Yecu onongo tye ka lego Jehovah wek otim kica bot lumony ma kiminigi twero me neke. Twero bedo ni en bene otamo i kom lwak ma gubedo ka dange ni omyero kineke woko pien onongo gitye ka lubo tam pa lumonene. Yecu onongo ngeyo ni jo magi pe gingeyo gin ma gitye ka timone. I yo acel-lu bene, Citefano olego Lubanga me timo kica bot jo ma onongo gibineke. (Tic 7:​58-60) Tika Jehovah ogamo lega pa Yecu gin ki Citefano? Ada, ogamo. Jo mapol ma gucwako neko Yecu, lacen guketo niye i kome ci gunongo batija. (Tic 2:​36-41) Dok Caulo, ma bene ocwako neko Citefano, lacen odoko Lakricitayo dok okoko ange pi gin ma otimo.—1 Tem. 1:13.

5. Pwony ango ma inongo ki i gin ma otimme i kom César?

⁵ Jehovah bene winyo legawa ka walego pi jo ma gidagwa. Nen kong gin ma otimme i kom omego César, ma bedo i lobo Venezuela. Wonne oketo aunauna magwar i kome pi bedo Lacaden pa Jehovah. César owaco ni: “Mamana onongo obedo mego maber adada. Kadi bed ni kare ducu en onongo keto pi jami me cwiny bedo mukwongo, ento en bene omedde ki gwoko babana maber. En opwonyowa me woro babawa, nikwanyo ka owacciwa ni watim gin ma Jehovah dagi.” Ka mwaka woto ki kato, won César ocako loko kite. César owaco ni: “I nino mo acel i nge lega matek, apenyo babana ka aromo kwano Baibul kwede. I kare ma en oye lokka, abedo ki yomcwiny matek adada.” I nge kare mo, won César onongo batija. Pe tyen lokke ni jo ducu ma gidagwa gibitimo alokaloka ma kit meno, ento jo mogo i kingi giromo loko kwogi i nge neno kit ma waloko kwede ki woro ki kit ma wakwo kwede. Cwinywa bedo yom adada ka guloko kwogi! Watye ka kuro neno kit ma Jehovah, “Langolkop me lobo ducu” ma obedo lakica, bikonyo kwede jo ma kit meno me pwonyo lok i kome.—Acak. 18:25.

6. Ma lubbe ki Matayo 10:​22, tyen lok mukene ango ma omiyo dano gidagwa?

⁶ Kidagwa pien watye ki woro i kom Yecu. Yecu owaco ni dano ducu gibikwero Lukricitayo me ada ‘pi nyinge.’ (Kwan Matayo 10:22.) “Nying” Yecu cung pi gin ango? Cung pi kite kacel ki twerone macalo Kabaka me Ker pa Lubanga. Dano gidagwa pien guketo gengi i kom lutela me lobo man, me ka keto gengi i kom latela ma Jehovah oyero, Yecu Kricito. Kadi bed kit meno, peko ma watye ka kato ki iye-ni, dong cok gik. Yecu dong obedo ka loc macalo Kabaka me Ker pa Lubanga cakke i mwaka 1914. Macok cok-ki, en bijwero gamente me lobo man ducu.

7-8. Tyen lok ango mumiyo dano gingalowa? (Jon 15:​18-20) (Nen bene cal.)

⁷ Kidagwa pien pe wakwo calo jo me lobo pa Catan. Yecu otito ni dano bikwero lulub kore pien pe gubedo “jo me lobo.” (Kwan Jon 15:​18-20.) Calo Lukricitayo me kare macon, wan bene wakwero tim kacel ki lok maraco me lobo man. Pi tyen lok man, oweko omege ki lumege mapol kiterogi marac adada i gang tic nyo i gang kwan. (1 Pet. 4:​3, 4) Ento cwinywa yom ni jo mogo ma yam gubedo ka unowa guloko tamgi dok gucako worowa pi kit ma wakwo kwede.

⁸ Nen kong gin ma otimme i kom omego Ignacio, ma bedo i Central America. I cukul ma en onongo kwano iye, onongo tye lapwony mo ma obedo ka caye pi mwaki mapol pi kit ma en kwo kwede. Ento ma peya Ignacio otyeko kwanne, lapwony meno openye kit ma en nongo kwede kero me kwo ma lubbe ki cik me Baibul kadi bed jo mapol ki i cukulgi gicaye. Ignacio otito ni cik pa Lubanga aye ma gwokke. Ci en olwongo lapwony meno me bino i cokke pa Lucaden pa Jehovah. Ignacio obedo ki ur madit adada i kare ma lapwony meno obino i cokke! Mar ma kinyuto ki lapwony meno i cokke ogudo cwinye adada ma omiyo en omedde ki bino i cokke. Lacen, lapwony man bene okemme ki aunauna pi kwano Baibul ki Lucaden. Ento en omedde ki dongo i yo me cwiny ci lacen onongo batija.

9-10. (a) Gin ango mukene ma miyo Lukricitayo gibedo pat ki jo me lobo pa Catan? (b) Pwony ango ma wanongo ki i lanen pa lakwena Paulo?

⁹ Gin mukene ma weko wabedo pat ki jo me lobo-ni aye pien pe wacwako tung ka mo keken ka odok i lok me wibye nyo lweny. (Jon 18:36) Walubo cik ma nonge i Jo Roma 13:1 ki bedo luwiny bot gamente me lobowa. Kadi bed kit meno, macalo Lukricitayo, pe wacwako tung ka mo ka odok i lok me wibye dok bene pe wacung me bedo lutela nyo wabolo kwir. Pingo? Pien watye lugen bot Jehovah ki Kerre ma Yecu Kricito aye lalocce. Lucaden pa Jehovah mapol dong kitweyogi i buc pi niyegi. Ento kadi bed gitye i buc, pud gimedde ki tito kwena. I yo meno, nongo gitye ka lubo lanen pa lakwena Paulo ma kitweye macalo mabuc pi mwaki mapol. (Tic 24:27; 28:​16, 30) Paulo omedde ki nywako lok me kwena maber-ri ki jo ducu ma onongo gitye ki miti me winyone kadi wa lugwok mabuc, jo ma gitiyo i kot, luloc, ki dong ludito gamente pa laloc me Roma ma nyinge Nero.—Tic 9:15.

¹⁰ Kit meno bene, omegiwa ki lumegiwa ma kitweyogi i buc i kare-ni, gitito kwena bot jo ducu ma giye winyo lokgi, kadiwa lungolkop, ludito gamente ki dong acikari ma gwoko mabuc. Omego mo ma otero mwaki makato abicel i buc pi bedo ma pe cwako tung ka mo, owaco ni pe eneno kare ma etero i buc macalo pwod ento calo tic ma Jehovah omine me yenyo jo ma gimito pwonyo lok ada. Cwinywa bedo yom adada ka Jehovah tiyo kwedwa me tito kwena bot jo ma kit meno! (Kol. 4:3) Kong dong wanyamu tyen lok mukene ma watye kwede me bedo ki yomcwiny kadi bed kidagwa pi tic pi Jehovah.

PINGO WABEDO KI YOMCWINY KADI BED KIDAGWA?

11. Pingo niyewa jing doko matek ka watye ka kato ki i aunauna? Mi labol mo.

¹¹ Wangeyo ni adegadega magi tye ka cobo lok pa lunebi me Baibul. I lok pa lunebi ma kikwongo coyone i Baibul, Jehovah owaco ni Catan kacel ki jo ma lubbe gibikwero jo pa Lubanga. (Acak. 3:15) Yecu owaco tyen mapol ni jo ma gitiyo pi Jehovah kibikwerogi. (Mat. 10:22; Mar. 13:​9-12; Luka 6:​22, 23; Jon 15:20) Dok kadi wa jo mogo ma gucoyo Baibul bene guloko iye. (2 Tem. 3:12; Yak. 1:2; 1 Pet. 4:​12-14; Juda 3, 17-19) Dong ka aunauna ocakke, pe wabedo ki ur. Me ka meno, cwinywa bedo yom ni lok pa lunebi me Baibul tye ka cobbe. Meno moko ka maleng ni waworo Lubanga me ada. Laminwa mo ma bedo i lobo ma kiketo iye kigeng i kom ticwa owaco ni: “I kare ma adyero kwona bot Jehovah, onongo angeyo maber ni wang ma akato ki i aunauna i nge kare mo. Pi meno, lworo pe maka dok pe abedo ki ur ka atye ka kato ki atematema.” Cwar laminwa-ni bene obedo i kin jo ma guketo aunauna i kome. Cware otere marac dok owango Baibulle kacel ki bukkewa mukene ma tye bote. Ento me ka bedo ki lworo, niye pa laminwa-ni odongo matek. (Ibru 10:39) Laminwa-ni owaco ni: “Onongo angeyo ni abikato ki i aunauna pien Baibul otito woko con ni kibiuno lutic pa Lubanga. Dong kato ki i aunauna man omiyo amoko ni man aye dini me ada.”

12. Gin ango ma okonyo omego mo acel me kanyo aunauna?

¹² Kadi bed wangeyo ni kibiunowa, pud twero bedo tek adada botwa me kanyo aunauna. Omego mo ocoyo kit man i kom kare ma ebedo kwede i buc, ni: “I kare mogo, cwinya onongo tur adada dok abedo ki par ma weko akok ki pig wanga.” Gin ango ma okonyo omego-ni me kanyo peko man? En owaco ni, “Kare ducu onongo alego. Odiko ducu ka aco, onongo acako ki lega. Dok i dyeceng bene, onongo alego ka jami odoko tek. Ka jo mukene gutera marac dok gucwero cwinya, onongo aloro wiya i cagati ci alego.” Ominwa-ni bene olwodo lok i kom lanen pa jo mapol ma gukanyo aunauna i kare mukato ki dong i kare-ni. Meno okonye me kanyo aunauna ki me nongo kuc ma Yecu ocikke me miyone bot lulub kore.—Jon 14:27; 16:33.

13. Gin ango ma twero konyowa me kanyo adegadega?

¹³ Marwa pi Jehovah ki pi utmegiwa konyowa me kanyo aunauna. Yecu omedde ki maro Wonne ki cwinye ducu nio wa i tone. Yecu bene onongo maro lureme. (Jon 13:1; 15:13) Ka wadongo mar ma kit meno pi Jehovah kacel ki utmegiwa, wan bene wabibedo ki kero me loyo adegadega. I yo ma nining? Me gamo lapeny meno, kong wanenu labol pa lakwena Paulo.

14. Gin ango ma okonyo Paulo me bedo lagen bot Jehovah kadi wa i kare ma onongo kibineke woko?

¹⁴ I kare ma dong kicok neko lakwena Paulo, en ocoyo waraga bot lareme macok Temceo, ni: “Lubanga yam pe omiyowa cwiny me lworo, ento omiyowa cwiny me teko ki mar.” (2 Tem. 1:7) Gin ango ma onongo Paulo tye ka lok iye? En onongo tye ka waco ni mar matut pi Jehovah twero konyo Lakricitayo me kanyo aunauna magwar. (2 Tem. 1:8) Dok kadi bed Paulo onongo ngeyo ni kibineke pi tic pi Jehovah, mare matek pi Jehovah okonye me bedo ki tekcwiny kacel ki bedo lagen Bote.—Tic 20:​22-24.

15. I yo ma nining ma omege ki lumege ginyuto kwede mar bot luye luwotgi i kare-ni? (Nen bene cal.)

¹⁵ Wamaro luye luwotwa ma gitye ka cung matek me kanyo aunauna. Paulo kikome bene kinyutte mar ma kit meno i kare ma Akwila gin ki Pricikila guketo kwogi ka mading pire. (Rom. 16:​3, 4) I kare-ni, utmege mapol giketo kwogi ka mading me konyo omege ki lumege. Me labolle, i lobo Russia, utmege mapol gicito i kot ka cuko cwiny omege ki lumege ma kimakogi. I kare ma laminwa mo ma kimako oneno omege ki lumege mapol i ot kot, meno okweyo cwinye adada ma oweko lok orweny woko ki i doge. Mar ma omege ki lumege gunyutte ojingo cwinye i kare ma mitte kikome. Cwinywa yom adada ni watye ki mar matek loyo adegadega!

16. Pingo lakwena Petero owaco ni jo ma kiunogi pi tic pi Lubanga gitye ki tyen lok me bedo ki yomcwiny? (1 Petero 4:14)

¹⁶ Wangeyo ni Lubanga cwinye bedo yom i komwa ka watye ka kanyo aunauna. (Kwan 1 Petero 4:14.) Lakwena Petero owaco ni jo ma giciro aunauna pien gitiyo pi Lubanga gitye ki tyen lok me bedo ki yomcwiny. Pingo? Pien aunauna ma kit meno nyuto ka maleng ni cwiny pa Lubanga ‘tye i komwa.’ Petero onongo niang maber tyen lok me bedo ki cwak pa Lubanga ki me ciro aunauna. Ma pe orii i nge Pentekote 33 K.M., kicwalo acikari me ot pa Lubanga me mako Petero ki lukwena mukene pi tito kwena. Ento Petero ocung matek pi niyene. (Tic 5:​24-29) Kadi wa i kare ma kigoyogi, en kacel ki lukwena luwote pe gugiko tito kwena. Me ka meno, gubedo ki yomcwiny “pien Lubanga otamo ni gimyero pi dit man me nongo lewic pi nying Yecu.” Wan bene watwero bedo ki yomcwiny ka watye ka kanyo aunauna.—Tic 5:​40-42.

17. Gin ango ma Yecu owaco ki lupwonnyene i dyewor ma peya kineke?

¹⁷ I dyewor ma peya kineke, Yecu owaco bot lupwonnyene ni: “Ngat ma mara Wora bimare, an bene abimare.” (Jon 14:21) Watye ka kuro ki miti madit kare ma dano ducu bimaro Jehovah gin ki Yecu, dok pe gibidagowa pi tic pi Jehovah! (2 Tec. 1:​6-8) Ka wawoto ki kuro kare meno, walego ni wiwa pe owil i kom tyen lok mapol ma watye kwede me bedo ki yomcwiny kadi bed kidagwa.