Nyut Niang Matut Wek ‘Ibed ki Kwo Maber’

1-2. Niang matut obedo gin ango dok twero konyowa nining?

TIKA dong i nino mo iwinyo calo ngat mo oteri i yo ma pe onyuto woro? Nyo iwinyo calo ngat mo obedo ki tam marac i komi nyo otimo gin mo ma ocwero cwinyi? Nyo kece ikemme ki gin mo ma okelli lworo matek adada? Ka gin ma kit meno otimme i komi, ci nongo ingeyo kit ma timo gin ma atir tek kwede. Gin ango ma watwero timone ka gin ma kit meno otimme i komwa? Baibul miniwa tam maber i kom gin me atima.

² Niang matut obedo kero me neno jami i yo matut ento pe wiye wiye. Man konyowa me niang tyen lok mumiyo gin moni otimme nyo pingo ngat moni otimme kit moni. Macalo adwogine, niang matut twero konyowa me nyuto ryeko. Me labolle, weko wagwokke ki lok ma waloko dok miyo wangeyo awene ma mitte ni ‘waling alinga.’ (Car. 10:19; Jab. 4:4) Twero bene konyowa me juko akemowa ki me weko bal pa jo mukene. Dok bikonyowa me jolo tira ma kiminiwa. (Car. 19:20) Ka wanyuto niang matut, miyo wayomo cwiny Jehovah dok weko kwowa ki kwo pa jo ma wacwero cwinygi bedo mayot. Dok ka wakemme ki gin mo ma ocwero cwinywa adada, wabibedo ki kero me juko akemowa wek pe wadok iye i yo marac. Kong dong wanenu labol adek ma nonge i Baibul ma nyuto kit ma niang matut twero konyowa kwede me bedo jo mamwol ma wiwa opye mot kun bene wajenge i kom Jehovah.

BED NGAT MAMWOL ENTO PE LAWAKA

3. Naaman obedo anga?

³ Me timo gin ma atir, mitte ni wabed jo mamwol. (1 Pet. 5:5) Ka kong watamo matut ma peya watimo gin moni, ci bikonyowa me nyuto mwolo. I yo ma nining? Tam kong i kom labol pa Naaman. En onongo kwo i lobo Ciria ma tye cok ki lobo Icrael. Naaman onongo obedo ladit mony pa jo Ciria ma oywek adada. Kadi bed kit meno, en onongo tye ki two dobo.—2 Luker 5:1.

4. Kit ma Naaman odok kwede i lok pa latin anyaka mo onyuto nining ni en obedo ngat ma ryek?

⁴ Dako pa Naaman onongo tye ki latin anyaka mo ma Laicrael ma obedo angecane. Latin anyaka meno owaco bot dako pa Naaman ni tye lanebi mo i lobo Icrael ma twero cango two pa cware woko. (2 Luker 5:​2, 3) Naaman onongo twero bedo ki tam ni, ‘Tika angeca mo ma oa ki i lobo Icrael ma gubedo lumonewa-ni twero miya tam ma konya?’ Ento Naaman otamo matut i kom lok pa latin anyaka meno. En pe ocayo lokke kit macalo ngat ma lawaka onongo twero timone kwede. Me ka meno, en onyuto mwolo dok owinyo lok pa latin anyaka-ni. En onongo twero ki bot kabaka me Ciria me cito i lobo Icrael wek kicange.—2 Luker 5:​4, 5.

5. Gin ango ma otimme i kom Naaman i kare ma oo i Icrael?

⁵ Naaman ocito i gang kal pa Kabaka Jekoram me Icrael wek kicange. Ento Jekoram otamo ni kabaka me Ciria onongo tye ka yenyo kolo i kome. I kare ma lanebi Elica owinyo lok man, en owaco ki Jekoram ni ocwal Naaman bote. (2 Luker 5:​6-9) Ento Elica pe otimo gin ma Naaman onongo tamo ni en bitimone. Elica pe bene okato woko ki i ode me rwatte ki Naaman nyo me lok kwede. Me ka meno, Elica ocwalo laticce me waco bot Naaman gin ma myero en otim wek ocang.—2 Luker 5:10.

6. (a) Pingo onongo Naaman pe mito timo gin ma kiwacce? (b) I yo ma nining ma lutic pa Naaman gunyuto kwede ryeko dok adwogine obedo nining? (2 Luker 5:​13, 14)

⁶ Mukwongo, Naaman pe odok i lok meno ki yomcwiny. En oweko ‘kiniga omake ci ocito woko ki cwercwiny.’ (2 Luker 5:​11, 12) Pingo? Pien en nen calo otamo ni Elica onongo myero omine woro kit macalo ebedo ladit wi mony pa jo Ciria-ni. Medo i kom meno, nen calo en bene otamo ni Elica pe tye ka nyuto woro i kom lobo Ciria. Pi meno, Naaman omoko tamme me dok cen gang labongo nongo cango. Ento luticce guniang ni Elica onongo tye ki cwiny me konyo Naaman, mumiyo gulego Naaman me tam matut i kom tam ma en omoko me dok cen gang. I agikkine, Naaman ogiko bedo lawaka ci omwolle dok otimo gin ma Elica onongo owacce ni otim. Macalo adwogine, en ocang woko!—Kwan 2 Luker 5:​13, 14.

7. Pwony ango ma wanongo ki i gin mutimme i kom Naaman? (Carolok 22:4) (Nen bene cal.)

⁷ Pwony ma wanongo ki i labol pa Naaman. Wanyuto ryeko ka ce kong watamo matut i kom lok moni kadi bed wangeyo lok meno maber. Kit ma wawinyo nyo waneno kwede ki jami pe twero bedo i yo ma atir kare ducu. Meno aye tyen lok mumiyo myero watam matut ma peya watimo gin mo keken. Dok omyero wabed jo mamwol. Ngat mamwol niang ni pe engeyo jami ducu. I kare mogo, wamito kony pa jo mukene me niang gin ma tye ka timme-ni maber. Dok Jehovah bene twero konyowa me timo meno. Kadi bed Naaman onongo pe obedo lawor Jehovah, ento en obedo mwol mumiyo en owinyo lok pa latin anyaka me Icrael, luticce, ki dong ma pire tek loyo Elica ma obedo latic pa Jehovah. Naaman ogiko bedo ngat ma lawaka. Dok i agikkine, en omoko tam me ryeko ma omiyo en ocang. Dong ma peya wadok i lok moni nyo watimo gin moni, omyero kong watam matut iye. Me labolle, ngat mo twero miniwa tam ma jenge i Baibul ento wanongo ni ye iye tek. Ka meno otimme, ci mitte ni kong watam matut ka ce kit ma wabidok i tam meno binyuto ka wamwol nyo wabedo luwaka.—Kwan Carolok 22:4.

DOK I LOK KI MWOLO ENTO PE KI GERO

8. I kare macalo mene ma twero bedo tek botwa me bedo ma komwa opye mot?

⁸ I kare mukene, jami mogo timme ma miyo cwinywa cwer adada. Ento ka kong watamo iye ma peya waloko nyo watimo gin mo, ci bikonyowa me bedo ma komwa opye mot. Ki lok ada, timo meno pe obedo gin mayot, tutwalle ka ngat mo pe onyutiwa cwiny me kica nyo oterowa marac. (Ep. 4:26 ki jami akwana me nwsty-E pi “Ka kiniga omakowu”) Nen kong kit ma Daudi gin ki Abigail gunyuto kwede niango matut.

9. Nabal otero Daudi nining?

⁹ Tam kong i kom gin mutimme i kare ma Daudi kacel ki lumonye onongo gungweco ki bot Caulo dok gitye ka kanne i dye tim me Paran. (1 Cam. 25:1) I kare ma gitye kunnu, gukonyo me gwoko romi pa laco mo ma lalonyo ma nyinge Nabal. (1 Cam. 25:​15, 16) Ma dong kare oromo me ngolo yer romi, Daudi ocwalo monnye bot Nabal ka penyo pi ginacama. Gin gucito ci gupenyo Nabal ki mwolo dok i yo me woro. (1 Cam. 25:​6-8) Ento Nabal pe onyuto pwoc mo keken pi jami ducu ma Daudi kacel ki monnye gutimo pire. En odoko ger adada dok oyeto Daudi kacel ki monnye.—1 Cam. 25:​10, 11.

10. I yo ma nining ma Daudi gin ki Abigail gunyuto kwede ryeko? (1 Camuel 25:​32, 33) (Nen bene cal.)

¹⁰ Ka onongo ni ibed Daudi, onongo ibiwinyo nining? Yot adada me niang pingo cwiny Daudi ocwer. Ki lok ada, Daudi onongo obedo laco ma cwinye tek adada, ento ma gin man otimme, kiniga omake matek ma omiyo en onongo mito neko Nabal woko! (1 Cam. 25:​13, 21, 22) Ento Abigail dako Nabal, ojuko Daudi kacel ki lumonye i kare ma gitye ka cito ka neko Nabal. Abigail onyuto ryeko nining? En oniang gin ma oweko akemo omako Daudi, dok onongo ngeyo ni Daudi obedo laco ma kite ber. Dong onongo mito timo gin mo keken ma etwero wek ekony Daudi me juko kinigane ki me timo jami i yo ma nyuto ryeko. Abigail okelo ki Daudi mic mapol dok omine tam me ryeko. (1 Cam. 25:​18, 23-31) Daudi onyuto ryeko pien owinyo tam pa Abigail dok oniang ni gin ma en owaco onongo nyuto kit ma Jehovah winyo kwede. Macalo adwogine, Daudi ojuko akemone dok ogwokke ki timo bal madit.—Kwan 1 Camuel 25:​32, 33.

11. Nyuto niango twero konyowa nining ka ngat mo ocwero cwinywa? (Carolok 19:11)

¹¹ Pwony ma wanongo ki bot Daudi gin ki Abigail. Kadi bed watye ki tyen lok ma atir me keco, mitte ni kong watam matut i kom gin ma twero konyowa me dok i lok meno ma nongo komwa opye mot. Gin mukene ma twero konyowa me juko akemowa ki me moko tam me ryeko, aye me lwodo jami maraco ma twero timme ka wadok i lok meno ki kiniga. (Kwan Carolok 19:11.) I kare ma Abigail opoyo wi Daudi i kom adwogi maraco ma twero bino pi ticce, meno okonyo Daudi me juko akemone. Ka gin mo nyo ngat mo ocwero cwinyi, pe inyut mingo ki dok iye ki gero. (Yak. 1:19) Kwany kare me lega bot Jehovah ki me tam i kom kit ma en neno kwede gin meno. Man bikonyi me dwoko akemoni piny.

12. I yo mene ma jo mukene gitwero konyowa kwede me juko akemowa ki me moko tam me ryeko?

¹² Jehovah otiyo ki Abigail me konyo Daudi wek ojuk akemone dok oniang kit ma Jehovah tamo kwede. I kare-ni bene, Jehovah twero tic ki omegiwa ki lumegiwa me konyowa niang kit ma en tamo kwede. Dong ka gin mo otimme ma ocwero cwinyi, kong ilok ki Lakricitayo mo muteggi ma twero konyi me neno jami kit ma Jehovah neno kwede. (Car. 12:15; 20:18) Ki tungcel, ka kiniga omako laremi mo, tika itwero lubo lanen pa Abigail? Tika itwero konye me neno jami kit ma Jehovah neno kwede? Jehovah bigoyo laane i kom tuteni me konyo jo mukene me nyuto niango ki me bedo ma komgi opye mot.

GEN JEHOVAH KA LWORO OMAKI

13. Niang matut twero konyowa nining ka lworo omakowa?

¹³ I kare mukene, wakato ki i jami ma miyo wabedo ki lworo. Ento ka watamo i kom kit ma Jehovah tek kwede loyo gin mo nyo ngat mo keken, meno twero konyowa me keto genwa i kome kadi bed lworo omakowa. (Jab. 27:1) Jehovah bene twero konyowa kadi bed wawinyo calo yo mo keken dong pe. Meno aye gin mutimme i kom lanebi Yona. En onongo maro Jehovah adada ento lworo omake i kare ma Jehovah omine tic mo matek.

14. Gin ango ma oweko Yona obedo ki lworo me timo tic ma Jehovah omine?

¹⁴ Jehovah omiyo tic matek adada bot Yona. Onongo mitte ni ocit owac bot jo Nineve ni Jehovah bijwerogi woko. (Yona 1:​1, 2) Go kong ni Jehovah onongo openyi me timo tic meno. Onongo ibiwinyo nining? Onongo mitte ni Yona owot ki tyene me a ki i Icrael me cito i Nineve dok wotte onongo bitero dwe acel kulu. Jo Aciria onongo gingene pi bedo jo mager dok lubwami. Nineve onongo kilwongo ni “gang ma oyo remo pa dano.” (Nak. 3:​1, 7) Dong me ka timo tic ma Jehovah omine, Yona omoko tamme me ringo woko.—Yona 1:3.

15. Gin ango ma okonyo Yona me medde ki keto genne i kom Jehovah? (Yona 2:​6-9)

¹⁵ Yona oito mel me cito ka mabor ki Nineve. Lacen, kibole i nam ci Jehovah olaro kwone i yo me tango. Gin mutimme man opoyo wiye i kom teko pa Jehovah. (Yona 1:​15, 17) Yona onongo pwony ma pire tek. En oniang ni pe mitte ni ebed ki lworo me cito ka tito kwena bot jo Nineve pien Jehovah twero gwokke ki i kom peko mo keken. (Kwan Yona 2:​6-9.) I kare ma Jehovah omiyo ki Yona tic man odoco, en obedo lawiny. Yona ocito i Nineve dok jo ma kunnu guwinyo lokke mumiyo gularo kwogi.—Yona 3:5.

16. Gin ango ma twero konyowa ka lworo omakowa? (Carolok 29:25) (Nen bene cal.)

¹⁶ Pwony ma wanongo ki i labol pa Yona. Omyero pe wabed ki lworo mukato kare woko i kom dano ma weko wakwero bedo luwiny bot Jehovah. (Kwan Carolok 29:25.) Yona otamo matut i kom jami ducu mutimme dok oniang ni me ka bedo ki par pi gin ma twero timme i kome, onongo mitte ni wiye opo ni Jehovah bikonye. Wan bene watwero juko bedo ki lworo ka waketo tamwa i kom kit ma Jehovah kare ducu okonyowa dok ogwokowa kwede. Watwero bene tam i kom kit ma Jehovah okonyo kwede omegiwa ki lumegiwa ma guketo gengi i kome me kato ki i jami ma kelo lworo.a (Ibru 13:6) Dong wamoku tamwa me nyuto niang matut kun wageno Jehovah ki cwinywa ducu dok wakony jo mukene me timo meno bene.

MEDDE KI PWONYO KIT ME TAM CALO JEHOVAH

17. Gin ango ma bikonyowa me pwonnye me tam calo Jehovah?

¹⁷ Kit ma dong wanyamo kwede, ka watute me niang lok moni maber, ci bikonyowa me lweny ki peko. Gin ango ma bikonyowa me bedo ki niang matut? Jehovah aye twero konyowa. Meno aye tyen lok mumiyo en ominiwa Baibul ki dong cwiny mere maleng. (Nek. 9:20; Jab. 32:8) En miniwa tira ma twero konyowa me moko tam me ryeko dok konyowa me jukke kekenwa. (Jab. 119:​97-101) Dong mitte ni watam matut i kom gin ma Baibul waco dok waleg Jehovah pi cwiny maleng. Timo man bikonyowa me neno jami kit ma Jehovah neno kwede ki me timo gin ma en mito ni watim.—Car. 21:11.

18. Gin ango ma imoko tammi me timone?

¹⁸ Dong wamoku tamwa me medde ki penyo Jehovah pi ryekone. (Jab. 14:2) Ka watimo meno, ci pe wabingak woko ki i “yo me niang maber.” (Car. 21:16) Dok wabimoko tamwa me nyuto niang matut kare ducu. Macalo adwogine, wabibedo “ki kwo maber.”