Bed Lagen dok ma Cwinyi Tek Calo Benaya

Benaya onongo obedo laco ma cwinye tek adada ma obedo lamony pa Kabaka Daudi ka dok lacen pa Solomon. Benaya onongo obedo wod pa lalamdog. Lulamdog kacel ki Lulevi onongo pe gicito i dog lweny dok pe gitiyo ki jami lweny. Ento Benaya olwenyo pi Jehovah dok onyuto tekcwiny. Me labolle, en odonyo i bur matut ci oneko labwor dok lacen, oneko Laejipt mo ma obedo twon oluma dok tye ki jami lweny. Daudi onongo geno Benaya matek adada mumiyo okete me bedo ladit wi jo ma gwoko kabaka.—2 Cam. 23:​20-23.

Benaya omedde ki bedo lagen bot Daudi kadi wa i kare ma Abcalom ki Adoniya gujemo i kom Daudi. (2 Cam. 8:18; 15:18; 1 Luker 1:8) Dok i kare ma Daudi dong otii woko, Benaya pud omedde ki bedo lagen bote kun konyo Solomon wek kiwire me doko kabaka. (1 Luker 1:​32-40) Benaya obedo lagen bot Jehovah kacel ki luloc ma Jehovah oyerogi kadi bed jo mukene pe gubedo lugen.

Wan bene myero wabed ki tekcwiny me lweny ki lamonewa Catan kacel ki jo ma gicwake. Dok omyero wamok tamwa me kwo i yo ma yomo cwiny Jehovah. (Ep. 6:11; 1 Pet. 5:​8, 9) Kadi bed jo mukene gumoko tamgi me a woko ki bot Jehovah, wabimedde ki bedo lugen bote, pien wangeyo ni en bimiyowa mot.—2 Cam. 22:26.