Kit ma Jehovah Konyowa Kwede me Ciro Can

1. Pingo pe obedo gin mayot me medde ki kanyo pekki, ento anga ma bikonyowa? (1 Petero 5:10)

I KARE man me agikki-ni, wan ducu wakemme ki pekki mapatpat. Pi meno, i kare mukene wawinyo ni tek me medde ki kanyo pekki magi wa i agikki. Jo mogo gitye ki two ma pe cang. Jo mukene gitye ki arem me cola pi to pa jo me amaragi. Dok jo mukene gitye ka kato ki i aunauna ma a ki bot jo me ganggi nyo luloc me gamente. (Mat. 10:​18, 36, 37) Bed ki gen ni Jehovah twero konyi me kanyo peko mo keken ma itye ka kato ki iye.—Kwan 1 Petero 5:10.

2. Kerowa me ciro can a ki kwene?

² Me ciro can, myero wamedde ki bedo lugen bot Jehovah dok wati pire ki yomcwiny kadi bed watye ka kato ki i pekki calo aunauna nyo atematema me timo bal. Wek wacir can, mitte bene ni wabed ki gen ni jami biyubbe i lobo manyen. Kerowa me ciro can pe a ki botwa; ento twerre pi “tek madwong” ma Jehovah miniwa. (2 Kor. 4:7) I pwony man, wabinyamo jami angwen ma Jehovah omiyo botwa me konyowa me ciro can. Wabineno bene gin ma watwero timone me nongo adwogi maber ki i jami magi.

LEGA

3. Pingo obedo gin me ur adada ni watwero lega bot Jehovah?

³ Jehovah ominiwa mot mo me aura adada ma konyowa me ciro can. Kadi bed wan lubalo, en oweko twerre piwa me lok kwede, dok en winyowa. (Ibru 4:16) Tam kong i kom lok man: Watwero lega bot Jehovah pi lok mo keken dok i cawa mo keken. En twero winyo legawa i leb mo keken dok i kabedo mo keken ma walego iye, kadi bed watye kakenwa nyo kitweyowa i gang buc. (Yon 2:​1, 2; Tic 16:​25, 26) Ka ce par onurowa woko dok pe wangeyo gin me awaca i legawa bot Jehovah, en pud twero niang gin ma wamito wacone bote. (Rom. 8:​26, 27) Obedo gin me ur adada ni watwero lega bot Jehovah!

4. Pingo watwero waco ni legawa bot Jehovah me konyowa ciro can rwatte ki mitine?

⁴ I Lokke, Jehovah cuko cwinywa ni “ka walegge gin mo kun walubo gin ma en mito, ci en winyo legawa.” (1 Jon 5:14) Tika watwero lego Jehovah wek okonywa me ciro can? Watwero! Timo meno rwatte ki mitine. Wangeyo man nining? Jehovah tittiwa ni ka wamedde ki bedo lugen, ci En binongo lagam ma myero Edok iye bot Catan. (Car. 27:11) Medo i kom meno, Baibul waco ni Jehovah tye atera “me nyuto tekke bot jo ma gibedo ki lengic i kome.” (2 Tekwaro 16:9) Dong watwero bedo ki gen ni Jehovah tye ki teko kacel ki miti me konyowa me ciro can.—Ic. 30:18; 41:10; Luka 11:13.

5. I yo ma nining ma lega twero konyowa me bedo ma wiwa opye mot? (Icaya 26:3)

⁵ Baibul waco ni ka walego bot Jehovah ki cwinywa ducu, ci ‘kuc pa Lubanga ma kato ngec pa jo ducu bigwoko cwinywa ki tamwa maber.’ (Pil. 4:7) Watye ki pwoc madit pi lok man. Dano ma pe gitiyo pi Jehovah bene gitye ki pekki, dok gitemo yo mapatpat me konyogi me bedo ma wigi opye mot. Me labolle, jo mukene gitiyo ki kit yo mo me lwodo lok ma weko wigi dong nono labongo tam mo keken, kadi wa tam ma kelo par. Ka giweko tamgi dong nono kit meno, gitwero miyo kare bot jogi me doro tamgi. (Por ki Matayo 12:​43-45.) Medo i kom meno, kuc ma ngat moni nongo ki i kodi lwodo lok macalo meno pe kitwero porone ki kuc ma wanongo ki bot Jehovah. Jehovah miyo kucce bot jo ma gijenge i kome keken. En miyogi “kuc me ada” nyo kuc ma bedo nakanaka, kadi wa i kare ma nongo kwo tek adada. (Kwan Icaya 26:3.) Yo acel ma Jehovah miniwa kwede ki kuc aye ki konyowa me po i kom wang ginacoya ma twero kweyo cwinywa. Ginacoya magi gipoyo wiwa i kom kit ma Jehovah marowa dok mito konyowa kwede, pi meno weko wabedo ma wiwa opye mot.—Jab. 62:​1, 2.

6. Jami macalo mene ma itwero lega pigi? (Nen bene cal.)

⁶ Gin ma itwero timone. Ka itye ka kato ki i peko mo, tit ki Jehovah kit ma iwinyo kwede. ‘Ter pekoni ducu bot Jehovah’ dok ilege ni omi boti kuc. (Jab. 55:22) Lege bene ni omini ryeko ma mitte me ngeyo gin me atima. (Car. 2:​10, 11) Dok bene, wi pe owil me pwoyo Jehovah i legani. (Pil. 4:6) Tam i kom yo mapatpat ma en tye ka konyi kwede nino ducu me ciro pekkini dok ipwoye pi kony meno kacel ki jami mabeco ma en miyo boti. Pe iwek peko ma itye ka wok ki iye ogengi neno mot ma Jehovah dong omini.—Jab. 16:​5, 6.

LOK PA LUBANGA

7. Kwano Baibul twero konyowa nining me ciro can?

⁷ Jehovah ominiwa Lokke me konyowa ciro can. Baibul tye ki tyeng mapol ma pwonyowa ni Jehovah bikonyowa. Nen kong labol acel. Matayo 6:8 waco ni: “Wonwu ngeyo gin ma wumito ma nongo peya wupenye.” Yecu aye owaco lok meno, dok en ngeyo Jehovah maber makato ngat mo keken. Pi meno, watwero bedo ki gen matek ni Jehovah ngeyo gin ma wamito dok bikonyowa. Baibul tye ki lok mabeco mapol ma twero miniwa teko me ciro pekkiwa.—Jab. 94:19.

8. (a) Mi labol i kom cik ma iye lac me Baibul ma twero konyowa me ciro can. (b) Gin ango ma twero konyowa me po i kom tam ma Baibul miyo i kare ma wamito?

⁸ Baibul miniwa tam ma twero konyowa me ciro pekki. Tam magi miniwa ryeko ma wamito me moko tam ma atir. (Car. 2:​6, 7) Me labolle, Baibul cuko cwinywa pe me bedo ka paro pi gin ma twero timme i anyim, ento me jenge i kom Jehovah nino ducu. (Mat. 6:34) Ka wakwano Baibul nino ducu dok walwodo matut jami ma wakwano, bibedo yot piwa me po i kom tam ma Baibul miyo ka ce mitte ni wamok tam nyo walweny ki peko moni.

9. I yo ma nining ma jami ma kicoyogi i Baibul jingo kwede niyewa ni Jehovah bikonyowa?

⁹ I Baibul, wakwano lok i kom jo ma onongo guketo gengi i kom Jehovah calo wan, ci en okonyogi. (Ibru 11:​32-34; Yak. 5:17) Ka watamo i kom kit ma Jehovah okonyogi kwede, wajingo niyewa ni Jehovah bikonyowa bene. En aye ‘ka-larrewa dok tekwa bene, en oyubbe me konyowa i kare me can.’ (Jab. 46:1) Dok ka watamo i kom kit ma lutic pa Jehovah magi gunyuto kwede niyegi i kome dok gumedde ki tic pire i kare me peko, man cuko cwinywa me lubo lanengi.—Yak. 5:​10, 11.

10. Itwero tic ki Baibul i yo maber loyo nining?

¹⁰ Gin ma itwero timone. Kwan Baibul nino ducu, dok ico piny tyeng mogo ma inongo ni gitye me kony adada boti. Jo mapol gikwano lok ma tye i buk me Kwano Ginacoya me Nino Ducu i odiko. Man weko gibedo ki gin mo maber me alwoda pi nino meno. Meno aye gin ma okonyo laminwa mo ma nyinge Mariaa i kare ma en obedo ka twoyo wonne kacel ki minne. Lunyodone aryo ducu komgi odoko lit ki two kanca dok onongo pe gibicang. En otito ni: “Odiko ducu onongo akwano wang ginacoya ma kiketo i buk me Kwano Ginacoya me Nino Ducu ci atamo matut i kom gin ma apwonyo. Man okonya me tam i kom Jehovah nino ducu kacel ki jami mabeco ma en pwonyowa kwede i Lokke, me ka tamo pi pekki ma atye kwede keken.”—Jab. 61:2.

OMEGIWA KI LUMEGIWA

11. Pingo tye me cuko cwiny tutwal me ngeyo ni pe watye kenwa i can ma waciro?

¹¹ Jehovah ominiwa omegiwa ki lumegiwa ma i twok lobo ducu ma gikonyowa me ciro can. Cuko cwinywa matek me ngeyo ni ‘utmegiwa ma gitye i lobo ducu gitye ka ciro kit can macalo meno.’ (1 Pet. 5:9) Man nyuto ni tye omege ki lumege mapol ma gukato ki i kit peko ma wan watye ka kato ki iye-ni ento pud gumedde ki gwoko gennegi bot Jehovah. Pi meno, waromo bedo ki gen ni wan bene watwero ciro peko meno!—Tic 14:22.

12. Utmegiwa gitwero konyowa nining, dok wan bene watwero timo gin ango pigi? (2 Jo Korint 1:​3, 4)

¹² Omegiwa ki lumegiwa gitwero cuko cwinywa me ciro can ki i lokgi kacel ki gin ma gitimo piwa. Meno otimme i kom lakwena Paulo bene. I waragane, en ocoyo nying jo ma gukonye i kare ma onongo en pe twero a ki gang, dok opwoyogi adada. Omege ki lumege magi guloko lok me kica bot Paulo dok gumine jami me kom ma mitte. (Pil. 2:​25, 29, 30; Kol. 4:​10, 11) I kare-ni bene, omegiwa ki lumegiwa gikweyo cwinywa dok gikonyowa me ciro can. Dok wan bene watwero konyogi i yo acel-lu ka gitye ka kato ki i peko.—Kwan 2 Jo Korint 1:​3, 4.

13. Gin ango ma okonyo laminwa mo ma nyinge Maya me ciro can?

¹³ I mwaka 2020, abili ma i lobo Russia gudonyo atura i gang pa laminwa mo ma nyinge Maya ci gubedo ka yenyo jami i ode. Lacen, onongo mitte ni en ocung i nyim kot pi tito pi niyene bot jo mukene. Maya owaco ni omege ki lumege gucuko cwinye matek i kare meno. En owaco ni: “I kare meno, onongo aol, atye ki par, dok cwinya otur. Ento omege ki lumege gugona cim dok mukene gucwala mecej dok gucona waraga. Gucuko cwinya ni gimara matek adada. Onongo kare ducu angeyo ni utmegina gimara dok gitye calo jo ganga kikome. Ento cakke i mwaka 2020, aye lok man ki cwinya ducu.”

14. Gin ango ma itwero timo me nongo kony ki bot omege ki lumege? (Nen bene cal.)

¹⁴ Gin ma itwero timone. Ka iwoto ki ciro can, medde ki bedo cok ki omege ki lumege. Pe ilwor penyo luelda pi kony. Gitwero bedo “ka-gwok ka yamo tye, dok macalo ka-gwok ka kot ocorre piny.” (Ic. 32:2) Wii bene myero opo ni, Lukricitayo luwoti bene gitye ka kanyo pekki mapatpat. Dong ka imiyo kony bot ngat mo ma tye ki peko, ibibedo ki yomcwiny dok man bikonyi me kanyo pekoni.—Tic 20:35.

GEN MA WATYE KWEDE

15. Gen pi anyim okonyo Yecu nining, dok genwa pi anyim konyowa nining? (Jo Ibru 12:2)

¹⁵ Jehovah ominiwa gen matek ma konyowa me medde ki ciro can nio wa i agikki. (Rom. 15:13) Wii opo ni Yecu okanyo pekki mapol i nino me agikki me kwone i lobo pi gen ma onongo en tye kwede. (Kwan Jo Ibru 12:2.) Yecu ongeyo ni ka egwoko gennene, ci ebinyuto ni lok ducu ma Catan oloko i kom Jehovah obedo goba dok ni Jehovah aye oporre me nongo worowa. Yecu bene onongo tye ki miti matek me dok cen bot Wonne i polo kun kuro kare ma en bidoko Kabaka ma nongo loyo loc kacel ki omegine ma kiwirogi. I yo acel-lu, genwa me kwo pi naka i lobo manyen konyowa me medde ki kanyo peko mo keken ma wakemme kwede i lobo pa Catan-ni.

16. Gen okonyo laminwa mo nining me ciro pekone, dok gin ango ma ipwonyo ki i lokke?

¹⁶ Nen kong kit ma gen me kwo i lobo manyen okonyo kwede laminwa mo ma nyinge Anna ma bedo i lobo Russia. Kimako cware ci kikete i buc kun woto ki kuro pido i kome. I kare ma meno otimme, Anna owaco ni: “Pol kare alego bot Jehovah i kom gen ma en omina dok alwodo lok i kom kwo me anyim. Man konya pe me bedo ma cwinya otur. Angeyo ni i nge kato ki i pekki magi ducu, jami mabeco bibino. Jehovah biloyo lumonene, dok biminiwa bakacic.”

17. Watwero nyuto ni watye ki pwoc pi gen ma Jehovah omiyo botwa nining? (Nen bene cal.)

¹⁷ Gin ma itwero timone. Kwany kare me tam i kom anyim mamwonya ma Jehovah oyubo piwa. Go kong kit ma kwo bibedo mit kwede i lobo manyen ma nongo itye ka kwo kacel ki luremi ki jo gangwu. Dok peko mo keken ma wakato ki iye i kare-ni “pe pek, bedo pi kare manok mo keken” ka kiporo ki kwo pi naka i paradic. (2 Kor. 4:17) Medo i kom meno, tim gin mo keken ma itwero me nywako pi niyeni ki jo mukene. Tam kong kit ma kwo tek kwede pi jo ma pe gitiyo pi Jehovah. Gin bene gitye ki pekki mapol, ento pe gingeyo lok i kom anyim mamwonya ma Jehovah ocikke pire. Itwero tugo mitigi i kom gen ma watye kwede i kom Ker-ri ki nywako lok mo manok kwedgi.

18. Pingo watwero geno cikke pa Jehovah?

¹⁸ I ngeye ma Yubu okanyo pekki mapol dok ogwoko gennene bot Jehovah, en owaco bot Jehovah ni: “Angeyo ni itwero tiyo gin ducu; pe tye lok mo ma iyubo ma pe bicobbe kakare.” (Yubu 42:2) Yubu oniang ni pe tye gin mo keken ma twero gengo Jehovah ki cobo cikkene. Lok ada meno twero konyo wan bene me jingo niyewa kun wamedde ki ciro can. Me labolle, tam kong i kom dako mo ma dong otwoyo two pi kare malac. Cwinye otur woko pien dong ocito bot ludaktari mapol ento pe tye mo keken ma ocango twone. Ento lacen en orwatte ki daktar mo maber ma otitte twone kikome ki kit ma ebikonye kwede me cang. Cutcut, cwinye obedo yom adada, kadi bed mitte ni okur pi kare mo wek onong alokaloka. Kombeddi dong yot pire me medde ki kanyo twone pien ngeyo ni ebicang. I yo acel-lu, gen ma watye kwede pi Paradic konyowa me medde ki kanyo pekkiwa.

19. Gin ango ma myero watim wek wamedde ki ciro can?

¹⁹ Kit ma dong waneno kwede, Jehovah konyowa me kanyo pekkiwa kun tiyo ki lega, Lokke, luye luwotwa, ki dong genwa pi anyim. Ka watiyo ki mot magi ducu, ci Jehovah bikonyowa kadi bed wakat ki i peko ma nining i kare-ni. Wabibedo ki kero me medde ki ciro can nio wa i kare ma lobo pa Catan kacel ki pekki dong bibedo pe.—Pil. 4:13.