Cako Kwano Baibul ki Dano Ka Twere, ki Coyo Waraga nyo ki Cim, nyo ki i Nyim Doggola
1, 2. Wan waromo keto yub me kwano Baibul wek orwatte ki cawa pa jo ma ticgi pol nining?
1 Dano i kare-ni gitye ki tic mapol. Ento kadi bed kit meno, jo mapol pud gitye ki miti i kom jami me cwiny. Wan kono dong watwero konyogi me cobo mitigi me cwiny-nyi nining? (Mat. 5:3) Lutit kwena mapol gikwano Baibul ki dano ki i nyim doggolagi, nyo gitiyo ki cim, nyo ki coyo waraga. In kono pe itwero medo kit me ticci i yo magi?
2 Me cako kwano Baibul ki dano, omyero wabed ma wayubbe me nyuto kit me kwano Baibul bot ngati mo keken teke ka kare mo onen. Man watwero timone ki kwene dok nining?
3. Pingo omyero inyut kit me kwano Baibul i nino mukwongo me rwatte ki dano moni, dok itwero timo man nining?
3 Ki i Nyim Doggola: Ka inongo ngat mo ma oye leyo lok i kom Baibul, ci yab paragraf moni ma nongo dong iyubo woko con-ni, calo paragraf mukwongo me pwony me 1 i brocuwa me Mito, ci wucak kwanone. Kwanu paragraf, wunen lapeny ma tye, ka wunyam ginacoya acel nyo aryo ma kiketogi. Pol kare, kitwero timo man ki i nyim doggola dok tero kine ka dakika abic me o i apar. Ka cwiny ngatte omaro nyamo lok wun-ni, ket yub dok me kwano paragraf acel nyo aryo kun nongo wulubo kore ki kore i nino mukene.—Itwero nongo tam mukene ma kimiyo i kit me cako ki kwano Baibul cut cut i Our Kingdom Ministry me Dwe me Acel mwaka 2002, pot 6.
4. Wan waromo cako kwano Baibul ki dano ki i nyim doggolagi nining ka wadok cen?
4 Yo acel-li bene kitwero tic kwede me cako kwano Baibul ki dano ka wadok adoka cen. Me labolle, iromo cako tic ki brocuwa me Mito ci iloko i kom nying Lubanga kun itiyo ki pwony me 2, paragraf 1-2. I nino ma dok idok bote, itwero nyamo gin ma Baibul loko i kom kit Jehovah kun itiyo ki paragraf 3-4. I nge meno, wutwero neno paragraf 5-6 ki cal ma tye i pot karatac 5 ma nyuto kit ma kwano Baibul konyowa kwede me ngeyo Jehovah. Man ducu twero timme ma nongo wacung acunga ki i nyim doggola.
5, 6. (a) Pingo jo mogo dok giye kwano Baibul ki cim nyo ki waraga? (b) Watwero cako kwan kun nongo watiyo ki cim nining?
5 Tic ki Cim nyo ki Waraga: Jo mogo dok giromo ye kwano Baibul ki i cim ma loyo kwan wang ki wang. Nen kong gin ma otimme macalo lapor i kom lok man: I kare mo ma onongo lamego mo tye ka tito kwena i dog ot ki dog ot, lamego-ni orwatte ki dako mo ma onongo pud tidi ento obedo min latin dok onongo tiyo. I kare ma lamego-ni otemo me nonge i gange kwe, ci otamo ni omyero kong ego bote cim. Dako-ni otito ni en ada pe etye ki kare mo me nyamo lok me Baibul. Lamego-ni owacce ni: “Itwero pwonyo jami manyen ka watiyo ki cim pi dakika 10 nyo 15 keken.” Dako-ni ogamo ni: “Ka wabitiyo ki cim ci Ayela Pe!” Pe otero kare mapol, gin gucako kwan tere tere kun gitiyo ki cim. Jo mogo gukwano Baibul ki dano kun gitiyo ki waraga. Yo me kwan ki waraga-ni tiyo maber tutwalle pi jo ma gibedo ka mabor ki ka ma kacokke tye iye.
6 Pe itamo ni jo mogo ma in ilimo nyo ingeyogi giromo ye kwano Baibul ka itiyo ki cim nyo ki waraga? Itwero tic ki yo ma pud kitito atita-ni, nyo iromo wacci: “Ka inongo ni rwatte boti, ci watwero nyamo lok me Baibul kun nongo watiyo ki cim nyo ki waraga. Itamo ni pe dok ber ka watimo kit meno?” Ka waketo yub me kwano Baibul ma dano ginongo ni rwatte pigi, ci wabikonyogi me ‘bedo ki ngec i kom Lubanga.’—Car. 2:5; 1 Kor. 9:23.