Miyo Caden Labongo Loko Lok Mo
1 Jami ma Jehovah ocweyogi gitito lok mapol ata i kom kite ma pe nen-ni labongo loko lok mo. (Jab. 19:1-3; Rom. 1:20) I kit yo acel-li, ber kitwa, kitwa macalo Lukricitayo, ki rukwa maber miyo caden labongo loko lok mo. (1 Pet. 2:12; 3:1-4) Mitiwa ki acel acel omyero obed me weko “pwony pa Lubanga Lalarwa onen ma mwonya” pi kit ma wan wabedo kwede.—Tito 2:10.
2 Dano ma gitye ki roc gitwero miyo pwony me Baibul nen ma mwonya nining? Man twere pi tela ma Lok pa Lubanga kacel ki teko pa cwiny maleng miyo. (Jab. 119:105; 143:10) Lok pa Lubanga “obedo gin makwo, dok tiyo matek, bit bene kato pala lucwan ma lebe bit ryoryo woko.” (Ibru. 4:12) Lok man donyo wa i cwinywa ci weko waruko kit manyen. (Kol. 3:9, 10) Cwiny maleng nyako kit mabeco i cwinywa calo kica, ber, mwolo, ki gwokke ken. (Gal. 5:22, 23) Tika wan ki acel acel wamiyo lok kacel ki cwiny pa Lubanga loyo kwowa?—Ep. 4:30; 1 Tec. 2:13.
3 Jo Mukene Gineno: Ka wakwo ma lubbe ki cik pa Jehovah dok watemme me nyuto kite i kwowa, ci jo mukene gineno. Ter kong macalo labol, laco mo ma onongo lutic luwote ginywaro pien ni onongo cek. Lamego mo ma onongo gitiyo kwedgi en i opic acel-li obedo ka tere maber dok ki woro kare ducu. Man omiyo laco-ni openyo lamego-ni ni omyero otite gin ma omiyo en dok kite pat. Lamego-ni otito ni kite me bedo ki woro-ni obino macalo adwogi me keto pwony me Baibul i tic i kwone. En bene otite lok i kom gen ma mwonya me Ker-ri. Laco-ni ocako kwano Baibul ci omedde kwede nio ka onongo batija. I kare ma en laco-ni odok tugi, ber pa kite ma en odok kwede ogudo cwiny wadine tutwal ma oweko jo mapol ki i kin-gi bene gujolo lok me ada.
4 Ka watye i dog tic, i cukul, nyo ka watye kacel ki wadiwa ki jiraniwa, omyero wawek kitwa maber kacel ki caden ma wamiyo owek jo mukene gumi deyo bot Lubanga.—Mat. 5:16.