Tic ki Cim me Miyo Caden Romo Kelo Adwogi Maber
1. Pingo waromo neno tic ki cim me miyo caden calo yo ma pire tek i ticwa me pwony?
1 Pingo waromo tamo pi tic ki cim me miyo caden i ticwa me pwony? Pien meno obedo yo mukene me konyo dano wek gunong ngec matir pi nongo larre. (2 Pet. 3:9) Kadi bed ni yo ma pire tek me tito kwena maber me Ker pa Lubanga aye obedo wot i ot ki ot, ento waye bene tic ki yo mukene mapat me yenyo jo ma pe ginonge paco pol kare.—Mat. 24:14; Luka 10:1-7; Yabo 14:6.
2. Kiyubo yub me tic ki cim pi miyo caden nining?
2 Kit ma Kiyubo Kwede: Wang tic me miyo caden ki cim bene kimiyo bot lutit kwena calo me yub me wot i tic me pwony i ot ki ot. Dano acel romo tic i wang tic man kene nyo macalo gurup matidi ma gwok tye iye dano aryo nyo adek. Myero kinong ot mo ma oling mot ma ayelayela pe iye pi tic man. Pol pa dano ginongo ni ber ka gibedo i nget meja kun giryeyo bukke ma gimaro tic kwede me tito kwena i ot ki ot i nyimgi.
3. Ngo ma myero wiwa opo iye ka watye ka tic ki cim me miyo caden?
3 Kit me Miyo Caden ki Cim: Ka watye ka tic ki cim me miyo caden, omyero lokwa obed kit ma jwi. Jo mukene ma pud gicako lok acaka giromo kwano lok ma kicoyo piny bot rwod ot ento i dwan ma gin loko kwede jwi. Yo mapat pat ma romo konyi me cako lok nonge i buk me Reasoning, i Ticwa me Ker, ki dok i trak me In Imito Ngeyo Lok Ada? Ka itye ka yubo lokki keni, nen ni itye ki wi lok madit, lapeny ma kwako wi lok meno, dok bene bed atera me kwano ginacoya mogo ma gamo lapeny meno. Pol kare iromo lok i kom bukke ma watye ka terogi i ot ki ot. Nen kong lok me poyo wic magi: Bed ma komi opye mot dok bene lok mot. Lok ki mwolo, di cwinyi, dok ki dwan me lirem, pien dwan ma kit man winye maber i cim. Ka rwod ot tye ka miyo tamme, cik iti iwiny, dok inyut pwoc i lokke. Nen ni pe iloko lok mo i kom mic me cente me cwako ticwa-ni pien rwod ot romo tamone ni meno obedo yo mo me penyo cente i cim.
4. Ngo ma tic ki cim me miyo caden romo konyowa me cobone ma lubbe ki wang ticwa ma kiminiwa?
4 Dano ma itye ka lok kwede i cim-mi romo bedo latwo nyo lagoro nyo dano ma ticce miyo nonge paco i ticwa me ot ki ot tek. Tye dok jo mukene ma gibedo i kabedo ma pe giye ni wele gudony iye ata dok acekere kurogi, calo odi ma kirumo ki cel nyo odi maboco. Dong, i tutewa me cobo ticwa me pwony maber, tam kong kit ma iromo tic kwede ki cim me miyo caden.