Kwan Baibul ki Dano i Yo ma Weko Gidongo ki i Nyim Doggola nyo ki Cim
1. Tyen lok ango ma weko wakwano Baibul ki dano?
1 Cako kwano Baibul ki dano kelo yomcwiny adada! Ento nongo ngat mo ma mito kwano Baibul pud obedo gin mukwongo. Tyen lok me kwan man tye pi konyo dano meno me doko lalub kor Kricito. (Mat. 28:19, 20) Gin ango dong ma twero konyowa me cobo yub man?
2. Kwano Baibul ki i nyim doggola nyo ki cim obedo ngo dok pingo tiyo?
2 Jo ma Tic Odiyogi: Tic tye kadiyo dano medde ameda i kare-ni. I kabedo mukene jo manok adada aye gitwero jalo cawa acel kulu me kwano Baibul tyen mukwongo. Ka wamito konyo jo ma kit magi kicuko cwinywa ni omyero kong wacak kwano Baibul kwedgi ki i nyim doggola nyo ki cim. Ka pud wucako kwan man acaka omyero kong iwek obed macek wuromo nyamo tyeng mogo manok ki i Baibul kun nongo wutiyo ki paragraf acel nyo aryo ki i buk mo calo Baibul Pwonyo. Ber mada ni lutit kwena mapol dong gitye ka kwan kit man ki dano i nyim doggola nyo ki cim!
3. Pingo omyero wayelle me medo kare ma wakwano kwede ki latin kwan ki i nyim doggola?
3 Ento omyero mono wamedde ki kwan ki i nyim doggola keken dong matwal? Pe. Kadi bed ni pe omyero water cawa malac ka pud wacako kwan acaka Our Kingdom Ministry me Mai 1990 pot karatac 8 oloko ni: “Ka teke dong wacako kwan ma nongo rwed ot tye ki miti ci waromo tero kare malac olo.” Man pire tek. Me labolle: Latin ma neto ogoyo kong mukwongo kicako miye cam manok nok nio ka doge dok ocako ye cam ento pe watwero bedo ki gen ni kom latin meno bibedo yot ka kibedo ka miye cam manok nok kumeno naka. I yo acel-lu latin kwan omyero kikwan kwede kare ki kare ka weko doko latic pa Lubanga ma otegi.—Ibru 5:13, 14.
4. Adwogi maber ango ma bino ki i kwano Baibul ki dano ki i ot?
4 Kwano Baibul ki i Ot: Kwanwu bedo ber ka wutye wun kenwu—i ot nyo i kabedo mo mukene ma opore. Man weko gin ma wukwano niange miyo latin kwan meno niang Lok pa Lubanga maber. (Mat. 13:23) Man bene bikonyo lapwony me miyo lok ma gitye ka kwanone-ni bedo ma gudo kwo pa latin kwan-ni. Medo i kom meno kwan pi kare malac biweko kwano Lok pa Lubanga woto kore ki kore dok bijingo niye bene.—Rom. 10:17.
5. I yo ango ma waromo loko kwede kwan ma wakwano ki i doggola me bedo ki i ot?
5 I yo ango ma iromo loko kwede kwanwu ki i nyim doggola doko kwan ki i ot? I yo nge kwan macek cek tyen mapol pingo pe wucak kwan pi wang cawa mo malac? Nyo iromo penye ryeko ryeko ni “Itwero nongo cawa mo wek tin kong wanyam lok man kacel?” nyo ni “Imito ni ibed pi kare ma rom mene tin me nyamo lok man?” Ka inongo ni pud pe twere ci wumedde ki kwanwu ki i nyim doggola. I kare mukene ma inongo ni rwatte temme me lokone me bedo ki i ot.
6. Mitiwa omyero obed ningo ka watye ka timo ticwa me tito kwena dok tam ma wanongo ki i pwony man romo konyowa me cobo man nining?
6 Kit ma pud watye ka medde ki yenyo jo ma cwinygi tye atir-ri omyero wiwa pe owil ki cako kwano Baibul ki dano. Mitiwa tye me konyo jo ma cwinygi tye atir me doko lutic pa Jehováh ma gudyere dok gunongo batija. Walego laane i kom tic ma watye ka timo me tito lok me kwena maber-ri.—2 Tem. 4:5.